Tumubod Para sa Buhay na Daing Katapusan
“[Magkaigwa nin] pagtubod sa ikapagdadanay na buhay kan kalag.”—HEBREO 10:39.
1. Ano an inaadmitir nin sarong Katolikong ensiklopedya manongod sa paggamit kan Biblia sa terminong “kalag”?
MINSAN saen mayo nin sinasabi an Biblia na an mga tawo may inmortal na kalag na natatadang buhay pagkagadan kan hawak asin nabubuhay sagkod lamang sa lugar nin mga espiritu. Minsan an New Catholic Encyclopedia nag-aadmitir: “An ideya na an kalag nagdadanay na buhay pagkagadan dai madaling marisa sa Biblia. . . . An kalag sa D[aan] na T[ipan] nangangahulogan bakong kabtang nin tawo, kundi an bilog na tawo—tawo bilang nabubuhay na persona. Siring man, sa B[agong] T[ipan] iyan nangangahulogan buhay nin tawo: an buhay nin sarong indibiduwal.” Kaya an mga tawo bakong igwa nin kalag, sinda an kalag.
2. (a) Saen guminikan an paniniwala sa inmortal na kalag? (b) Ano an katotoohan manongod sa kamugtakan nin tawo pagkagadan?
2 Siring sa idinoon kan sinusundan na artikulo, an paniniwala sa inmortal na kalag paganong ideya na masususog pabalik sa enot na mga panahon sa kasaysayan. An autor kaiyan iyo an kuminontra sa malinaw na kapahayagan nin Dios na an tawo “siertong magagadan” huli sa pakisuway. (Genesis 2:17) An paratumang, si Satanas na Diablo, an nagsabi: “Dai nanggad kamo magagadan.” (Genesis 3:4) Asin idto kaputikan. (Juan 8:44) Kan huri, pinalakop ni Satanas an doktrina nin inmortalidad kan kalag nin tawo. Alagad ta an katotoohan manongod sa kamugtakan nin tawo pagkagadan siring sa sinasabi sa ipinasabong na Tataramon nin Dios sa Eclesiastes 9:5: “[An] gadan, mayo man lamang . . . nin pakaaram.”—Helingon man an Roma 5:12.
An Paglaom sa Buhay na Daing Katapusan
3. Manongod sa anong paglaom na dakol an sinasabi kan Biblia?
3 Mantang malinaw na ipinaheheling kan Biblia na mayo nin inmortal na kalag, iyan dakol an sinasabi manongod sa buhay na daing katapusan. An paglaom sa buhay na daing sagkod pundamental na katokdoan ni Jesus. Sia nagsabi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” (Juan 17:3) Manongod sa mga nagtutubod sa Dios asin ki Cristo, si Jesus nagsabi: “Ako nagtatao sa saindo nin buhay na daing katapusan.” (Juan 10:28) May lubos na pagsarig, sia nagsabi: “An minatubod igwa nin buhay na daing katapusan. . . . Sia mabubuhay sagkod lamang.” (Juan 6:47, 51) Asin sinabi man nia: “An Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.”—Juan 3:16.
4. Ano an isinabi ni Jesus manongod sa paglaom sa ngapit?
4 Mantang mayo nin inmortal na kalag na natatadang buhay pagkagadan, paano maootob an panuga kan Biblia na buhay na daing katapusan? Si Jesus nagtao nin dagdag na impormasyon manongod digdi kan songkoon nia si Marta asin Maria pagkagadan kan tugang nindang si Lazaro. Sinabihan nia si Marta: “Ako iyo an pagkabuhay liwat asin an buhay. An naggigibo nin pagtubod sa sako, minsan pa sia magadan, mabubuhay.” Hinapot nia si Marta: “Minatubod ka kaini?” Sia nagsimbag: “Iyo, Kagurangnan; nagtubod ako na ika an Cristo na Aki nin Dios.”—Juan 11:25-27.
5, 6. Ano an ipinaheling kan pagbuhay liwat ni Jesus ki Lazaro?
5 Tanganing ipaheling na sia, bilang an Aki nin Dios, tinawan nin kapangyarihan na buhayon liwat an gadan, si Jesus nagduman sa lolobngan ni Lazaro. Apat nang aldaw na gadan si Lazaro, asin nagpopoon nang malapa an saiyang bangkay. Minsan siring, “[si Jesus] nagkurahaw sa makosog na tingog: ‘Lazaro, lumuwas ka!’ Idtong nagadan luminuwas na an saiyang mga bitis asin kamot nagagapos nin mga henerong sa gadan, asin napapatos nin sarong podong an saiyang lalauogon. Si Jesus nagsabi sa sainda: ‘Hubadi sia nindo asin palakawa.’” (Juan 11:43, 44) An gadan na si Lazaro binuhay liwat!
6 Si Lazaro dai ibinalik hale sa langit o saen pa man sa lugar nin mga espiritu. Dai sia nagduman sa lugar nin mga espiritu kan sia magadan kundi sia daing pakaaram sa lolobngan, na namumugtakan kan gabos na gadan. (Salmo 146:4; Juan 3:13; Gibo 2:34) Bakong makatanosan na isipon na an inmortal na kalag ni Lazaro yaon na sa glorya sa langit dangan an kalag na iyan kinua sa langit tanganing isaro sa saiyang bakong sangkap na hawak digdi sa daga tanganing mabuhay liwat sa kinaban na pano nin sakit, helang, asin kagadanan. Alagad mantang sia mayo sa langit, an pagbabalik nia sa buhay ikinaogma nanggad, huli ta iyan nangahulogan nin dagdag na mga taon nin buhay para sa saiya asin pakaiba liwat sa saiyang mga namomotan. Sa huri, magagadan sia liwat.
7, 8. (a) Sa ano pang ibang okasyon na binuhay liwat ni Jesus an gadan? (b) Taano ta ginibo ni Jesus an mga milagrong ini nin pagbuhay liwat sa mga tawo?
7 Kan buhayon ni Jesus an sarong daragitang nagadan, an saiyang mga magurang “nakamate nin labi-labing kaogmahan.” (Marcos 5:42) Pero, an daragitang iyan sa huri nagadan man liwat. Kan buhayon ni Jesus an gadan na aki kan balong taga-Nain, “nagkatarakot sinda gabos, asin nagpoon sindang magpamuraway sa Dios.” (Lucas 7:16) Alagad an tawong iyan sa huri nagadan man. Mapadapit sa mga milagrong ini, an The New International Dictionary of New Testament Theology nagpapatunay: “An mga binuhay liwat ni Cristo kan saiyang daganon na ministeryo kinaipuhan na magadan, ta an mga pagbuhay na ini dai nagtao nin inmortalidad.”
8 Taano ta binuhay liwat ni Jesus an mga ini hale sa gadan? Bakong tanganing magtao nin buhay na daing katapusan sa panahon na idto, kundi tanganing patunayan na sia an Mesiyas asin ipaheling kun ano an itinaong kapangyarihan sa saiya nin Dios na gibohon. Iyan nagparigon sa pagtubod sa paglaom kan pagkabuhay liwat asin buhay na daing sagkod sakop kan maabot na paghade kan langitnon na Kahadean nin Dios sa kamot ni Cristo.—Mateo 6:9, 10; Juan 11:41, 42.
9. Paano nasabotan nin tama ni Marta asin Pablo an katokdoan ni Jesus manongod sa paglaom sa pagkabuhay liwat?
9 Aram ni Marta an manongod sa paglaom na iyan huli sa pakikiasosyar nia ki Jesus, ta sia kaidto nagsabi na sa saiya manongod ki Lazaro: “Aram ko na sia mabubuhay sa pagbuhay liwat sa huring aldaw.” (Juan 11:24) Aram nia na an pagbuhay liwat mangyayari, bakong sa saiyang (ki Lazaro) huring aldaw, kundi sa ngapit, “sa huring aldaw”—sa Aldaw nin Paghokom, na an mga gadan bubuhayon liwat sa pagsakop kan Kahadean nin Dios. Aram man iyan ni apostol Pablo, ta sia nagsabi: “[An Dios] nagtalaan nin aldaw na katuyohan niang hokoman an ineerokan na daga sa katanosan.” (Gibo 17:31) Nagsabi man si Pablo: “Magkakaigwa nin pagkabuhay liwat an mga matanos asin an mga bakong matanos.” (Gibo 24:15) Dai nia sinabi na nangyayari na an pagkabuhay liwat kundi na “magkakaigwa” kaiyan sa ngapit—sa pagsakop kan Kahadean.
10. Ano an ikinomento nin sarong propesor na Pranses manongod sa mga paniniwala kan Kakristianohan mapadapit sa pagkabuhay liwat kun ikokomparar sa malinaw na katokdoan kan Biblia?
10 Sa librong Immortality of the Soul or Resurrection of the Dead? an Pranses na propesor na Protestante na si Oscar Cullmann nagsurat: “May dakulaon na pagkakalaen an Kristianong paglaom sa pagkabuhay liwat kan mga gadan asin an Griegong paniniwala sa inmortalidad kan kalag. . . . Minsan ngani kan huri an Kristianismo pinagkonektar an duwang paniniwalang ini, asin ngonyan biyong napagriribay an duwa kan ordinaryong Kristiano, mayo ako nin naheheling na dahelan na itago an ibinibilang ko asin kan mayoriya nin mga iskolar na katotoohan. . . . An buhay asin kaisipan kan Bagong Tipan biyong dominado nin pagtubod sa pagkabuhay liwat. . . . An bilog na tawo, na talagang gadan, binubuhay liwat paagi sa bagong akto nin paglalang nin Dios.”
Pagkabuhay Liwat—Pasiring Saen?
11, 12. (a) Ano an katuyohan nin Dios para sa mga tawo asin sa dagang ini? (b) Paano ipinaheling ni Jesus na an katuyohan nin Dios para sa dagang ini dai naliwat?
11 Kan an tawo lalangon nin Dios, itinao nia sa sainda an daga bilang saindang daing sagkod na harong asin katuyohan nia na panoon an planetang ini nin matanos na rasa nin tawo. (Genesis 1:26-28; Salmo 115:16) Inaapod kan Biblia si Jehova na “an Naghaman kan daga asin an Naggibo kaiyan, Sia an Saro na masarig na nagbugtak kaiyan, na dai iyan linalang na dai nin kapakanan, na naghaman kaiyan tanganing pag-istaran.”—Isaias 45:18.
12 Sa ibong nin rinibong taon na pagkabakong sangkap asin kagadanan magpoon kan pagrebelde nin tawo, katuyohan pa man giraray nin Dios na an daga magin daing sagkod na harong nin tawo: “An mga matanos mismo magmamana kan daga, asin sinda mag-eerok dian sagkod lamang.” (Salmo 37:29) “Maogma an mga mahoyo, mantang mamanahon ninda an daga.” (Mateo 5:5) Kaya, kan buhayon liwat ni Jesus an mga gadan, binuhay nia sinda digdi sa daga, asin namidbid tolos sinda nin iba bilang an mga nagadan. Pinatunayan kaini na sa pagsakop kan Kahadean an mga gadan bubuhayon liwat digdi sa daga tanganing magkaigwa kan oportunidad na mabuhay dian sagkod lamang. (Kapahayagan 20:12, 13) Maootob kaiyan an katuyohan nin Dios para sa mga tawo asin para sa daga.—Isaias 46:9-11; 55:11; Tito 1:1, 2.
13. Anong magabat na problema an napapaatubang sa mga iglesya nin Kakristianohan, asin paano ninda pinoprobaran na resolberan iyan?
13 Pero, mantang an mga iglesya nin Kakristianohan naniniwala sa inmortalidad kan kalag, nagtatao ini sainda nin magabat na problema: Paano ninda ikaooyon an pagkabuhay liwat kan “bilog na tawo,” na ipinaheling ni Jesus, sa paniniwala ninda sa inmortal na kalag na dati nang nabubuhay sa langit o sa impierno? An The Catholic Encyclopedia positibong nagsasabi: “An Fourth Lateran Council nagtotokdo na an gabos na tawo, baga man pinili o kondenado, ‘mabubuhay liwat sa sadiri nindang hawak na dara-dara ninda ngonyan.’” Idinugang pa kaiyan: “Mantang an hawak an kapadis kan mga krimen kan kalag, asin an kaibaiba kan saiyang marahay na mga kuwalidad, garo baga hinahagad kan hustisya nin Dios na an hawak makikabtang sa padusa o balos kan kalag.” Sono sa paniniwalang ini, an hawak makikisumaro liwat sa kalag duman sa langit o sa impierno. Gurano kahaloy? “An binuhay liwat na hawak kapwa kan mga santo asin parakasala tatawan nin inmortalidad,” sabi kan librong iyan.
14. Paano hinihingoang ipaliwanag nin sarong parasurat na Jesuita an punto-de-vista nin Kakristianohan manongod sa pagkabuhay liwat kan hawak?
14 Sa librong The Future Life, ni Jesuita J. C. Sasia, mababasa niato: “An buhay sa langit kun siring magigin man magayagaya paagi sa pinamuraway na mga sentido [kan hawak na nagin kasaro liwat kan kalag].” Manongod sa mga hawak na nakasaro liwat kan saindang kalag sa impierno, sinasabi kan librong iyan: “Sa impierno, pagkabuhay liwat [kan hawak], an kada sentido kan hawak nin tawo magkakaigwa nin sadiring padusa . . . An sentido nin pakamate o pagduot nangorognang padudusahan, huli ta partikularmente paagi sa mga kasalan kan laman na an Dios napaanggot kan mga kondenado. . . . An pakikiiba ninda sa saindang hawak para sa sainda magigin gikanan nin dagdag na mga padusa asin kasakitan.”
15. Taano ta paglanghad an pagtokdo na an mga tawo pinasasakitan nin Dios sa impierno sagkod lamang?
15 Kaya, an pag-ako sa paganong ideya nin inmortalidad kan kalag nagbukas kan dalan na akoon man kan Kakristianohan an paganong ideya nin makologon na pagpasakit sa mga kalag—asin pati hawak—sa impierno sagkod lamang. Pero, mapadapit sa suanoy na kostumbre nin pagsolo sa mga aki bilang atang sa falsong mga dios, si Jehova nagsabi: ‘Tinotong [ninda] sa kalayo an saindang mga aking lalaki bilang bilog na mga dolot na tinotong ki Baal, bagay na dai ko ipinagboot o itinaram, asin dai suminabong sa sakong puso.” (Jeremias 19:5) Kaya sarong paglanghad an pagtokdo na pinasasakitan nin Dios nin daing sagkod an mga tawo, mantang malinaw na ipinaheheling kan saiyang Tataramon na an habong magsolsol na mga parakasala lalaglagon, gagadanon. “An siisay man na kalag na dai maghinanyog sa Propetang iyan [si Jesus] biyong lalaglagon.”—Gibo 3:23; helingon man an Mateo 10:28; Lucas 17:27; Juan 3:16; 2 Pedro 2:12; Judas 5.
Inmortalidad
16. Ano an itinotokdo kan Biblia manongod sa inmortalidad?
16 Minsan siring, bako daw na nagtotokdo an Biblia na an mga tawo dadarahon sa langit tanganing magkaigwa nin inmortal na buhay duman? Iyo. Pero ini mayo nin koneksion sa inmortal na kalag nin tawo. An inmortalidad bunga nin pagbuhay liwat sa saro bilang espiritung linalang (kapareho ni Jesus) asin bakong huli sa pagkaigwa nia nin inmortal na kalag na natadang buhay kan sia magadan. An maabot na balos na inmortalidad iinopresir sa nagkapirang maimbod, arog-Cristong mga tawo asin maootob sana kun si Cristo magkapot na kan kapangyarihan sa Kahadean duman sa langit, bakong pagkasakat tolos ni Cristo sa langit kan enot na siglo.—Salmo 110:1; 1 Corinto 15:53, 54.
17. Pira an magkakamit nin inmortalidad, asin ano an kabtang ninda sa katuyohan nin Dios para sa daga?
17 Saro pa, an paglaom na iyan iinopresir sa pipira sana sa pamilya nin tawo. Inapod ni Jesus an mga ini na “sadangoton na aripompon.” (Lucas 12:32) An grupong ini, na 144,000 an kabilangan, bubuhayon liwat pasiring sa langitnon na buhay bilang inmortal na espiritung mga linalang na maghahade sa daga kaiba ni Cristo sa saiyang langitnon na Kahadean. (2 Pedro 3:13; Kapahayagan 7:4; 14:1, 4; 20:4) An daga na paghahadean ninda, pag-abot nin panahon, mapapano nin sangkap na mga tawo, daing duwa-duwa nin rinibong milyon sa sainda. An dakol sa mga tawong iyan iyo an mabalik sa daga sa “pagkabuhay liwat [kan] mga matanos asin [kan] mga bakong matanos.” (Gibo 24:15) Pero, may iba pa na magkakamit nin buhay sa bagong kinaban apuwera sa mga binuhay liwat hale sa mga gadan. Sairisay an ibang ini?
“Dai Noarin Man Magagadan”
18. Apuwera sa paglaom sa pagkabuhay liwat para sa mga gadan, ano pang makangangalas na bagay an ihinula ni Jesus?
18 Minsan ngani an seguradong paglaom para sa mga gadan iyo an pagkabuhay liwat, igwa nin saro pang makangangalas na paglaom sa satong panahon. Iyan may koneksion sa isinabi pa ni Jesus ki Marta. Pakapagsabing: “An naggigibo nin pagtubod sa sako, minsan pa sia magadan, mabubuhay [sa pagkabuhay liwat],” idinugang ni Jesus, “asin an gabos na nabubuhay asin naggigibo nin pagtubod sa sako dai noarin man magagadan.” (Juan 11:25, 26) Sa nahuhuring mga tataramon na ini, ihinula ni Jesus an sarong makangangalas na bagay: Maabot an panahon na an mga nabubuhay dai na kaipuhan na magadan! Alagad ta noarin iyan?
19. (a) Sa anong panahon maootob an paglaom na noarin man dai na magadan? (b) Paano ilinaladawan kan Biblia an mga may paglaom na noarin man dai na magadan?
19 Ngonyan—an satong kaaldawan—an panahon na maootob an panugang iyan! Ipinaheheling kan gabos na ebidensia na haranihon na kita sa katapusan kan maraot na kinaban na ini. (Mateo 24:3-14; 2 Timoteo 3:1-5, 13) Kaya, an mga tawo na ngonyan nagtutubod sa Dios asin sa saiyang Aki igwa kan makaoogmang paglaom na maligtas na buhay sa katapusan kan palakaw na ini asin padagos na mabuhay sa bagong kinaban nin Dios—na noarin man dai na magadan! An mga ini inaapod sa Kapahayagan 7:9, 14 na “sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon . . . [na] nagluwas sa dakulang kahorasaan,” iningatan nin Dios huli sa saindang pagtubod. Inapod ni Jesus an nagdadangadang na pagkatunaw kan presenteng maraot na palakaw na “dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.”—Mateo 24:21; helingon man an Talinhaga 2:21, 22; Salmo 37:10, 11, 34.
20, 21. Paano an minilyon ngonyan nagtutubod sa Dios asin ki Cristo, asin ano an dai kaipuhan kan dakol sa sainda?
20 Sa bilog na kinaban, an minilyon sa dakulang kadaklan na boot na mabuhay sagkod lamang digdi sa daga nagtutubod na sa mga panuga nin Dios asin sa saro na saiyang inautorisaran na magin “an pagkabuhay liwat asin an buhay,” si Jesu-Cristo. Asin idinusay ninda an saindang sadiri sa Dios, sinimbolisaran ini paagi sa bautismo sa tubig. (Mateo 28:19, 20) Minimidbid ninda na biyo nindang utang an kaligtasan sa “Dios, na nagtutukaw sa trono, asin sa Kordero,” si Jesu-Cristo.—Kapahayagan 7:10.
21 An mga kabilang sa dakulang kadaklan na makaliligtas sa katapusan kan kinaban na ini dai magkakaipo nin pagkabuhay liwat hale sa mga gadan ta sinda “dai noarin man magagadan”! Ginigibo daw nindo an mga paagi na makabilang sa grupong ini? Kun iyo, makangangalas nanggad, pambihirang pribilehiyo an bukas sa saindo—an makaligtas sa katapusan kan maraot na palakaw ni Satanas asin makalaog sa matanos na bagong panahon na magtatao saindo nin sangkap na salud asin buhay na daing katapusan sa sarong paraisong daga! (Lucas 23:43; Kapahayagan 21:4, 5) Paagi sa pag-adal kun ano an kabotan nin Dios asin paghihingoa na gibohon iyan, puwede nindong ipaheling na kamo ‘bakong an klase na minasibog sa kalaglagan.’ Puwede man kamong magkaigwa nin “pagtubod sa ikapagdadanay na buhay kan kalag.”—Hebreo 10:39; 1 Juan 2:15-17; Kapahayagan 7:15.
Mga Hapot Para sa Repaso
◻ Ano an tunay na paglaom para sa mga gadan?
◻ Taano an paniniwala kan Kakristianohan sa pagkabuhay liwat kan hawak ta insulto sa Dios?
◻ Ano an itinotokdo kan Biblia manongod sa inmortalidad?
◻ Ano an puwedeng magin makangangalas na paglaom nin mga tawo ngonyan?