An Mamuraway na Milenyo Nagdadangadang Na

“Asin nakaheling ako nin mga trono, asin may mga nakatukaw dian, asin sinda tinawan nin kapangyarihan nin paghokom. Iyo, naheling ko an mga kalag kan mga ginadan nin patok huli sa pagpatotoo ninda ki Jesus asin huli sa pagtaram manonongod sa Dios, asin an mga dai nagsamba sa mabangis na hayop ni sa ladawan kaiyan patin dai nag-ako kan tanda sa saindang angog asin sa saindang kamot. Asin nagkaburuhay sinda asin naghade sa kaibanan ni Cristo sa laog nin sangribong taon.” “Asin papahidon [nin Dios] an gabos na luha sa mga mata [kan katawohan], asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”—Kapahayagan 20:4; 21:4.

SA SIRING ihinuhula kan Biblia an nagdadangadang na mamuraway na milenyo—an Sangribong Taon na Pamamahala ni Jesu-Cristo asin nin kairibang grupo nin langitnon na mga hade. Tibaad may tendensia kamong honaon an hulang ini bilang imahinasyon sana, sarong ilusyon. Minsan siring, igwa kamo nin igong rason na mansayon an Milenyong ini bilang nagdadangadang na katunayan!

Sarong bagay, an pag-adal nin Biblia maghahayag saindo na trinatar kaini an nakaaging anom na milenyo kan kasaysayan nin tawo sa pambihira kamapananarigan na paagi. Dugang pa, an Biblia sarong libro nin hula, asin an dakulang bilang kan mga prediksion kaini, o mga hula, naotob na sa gabos na detalye.a Huli sa kamugtakan na iyan, taano an Biblia ta dai mapananarigan sa paghula kan nagdadangadang na Milenyo nin pamamahala ni Cristo? Alagad, tibaad magngalas kamo, kun ano an sinasabi sato kan Biblia manongod sa panahon na iyan. Ano an katuyohan kaini? Asin para sa partikular na interes nindo, paano ini makaaapektar sa saindong buhay?

Sarong Manang Nawara

Ipinaheheling kan Biblia na an Sangribong Taon na Pamamahala ni Cristo iyo an paagi nia sa pagtao kan pinakamahalagang mana sa saiyang “mga aki.” Alagad anong mana? Asin anong “mga aki”? An mana puwedeng ipakahulogan bilang bagay na itinatao sa aki nin saro sa kagadanan nin saro. Kan an satong apoon si Adan nagpatunay na bakong makinuyog sa Dios, iwinara nia para sa saiya asin sa gabos niang aki—an bilog na rasa nin tawo—an katanosan sa buhay na daing katapusan sa daganon na paraiso. Sa siring itinao ni Adan an mana nin kasalan, kagadanan, asin kamondoan sa mga gikan nia.—Genesis 3:1-19; Roma 5:12.

Si Jesus napadigdi sa daga sa laman tanganing mabawi para sa katawohan an mana na iwinara ni Adan. Nagibo nia ini paagi sa pagpatunay na maimbod ki Jehova Dios, na odok sa boot na inatang an saiyang buhay sa kapakanan kan katawohan. (Juan 3:16) Sa pagkakaigwa nin sangkap, mayong kasalan na buhay, naako ni Jesus an katanosan sa daing katapusan na sangkap na buhay sa Paraiso sa daga—an mismong bagay na iwinara ni Adan. Alagad, nungka na isinagibo ni Jesus an katanosan na iyan; ni ikinawara nia ini kan magadan sia asin binuhay liwat pasiring sa buhay sa langit. Kun siring magagamit nia ini bilang an mahalagang mana na ipamamana sa saiyang “mga aki.”—Roma 5:18, 19.

An mga Paramana—“Mga Aki” ni Cristo

Sa Isaias 9:6 si Jesus makahulang inaapod na “Amang Daing Katapusan.” Sia nagigin Amang Daing Katapusan kan binalukat na kinaban nin katawohan, na nasa kamugtakan na itao an mana sa mga binalukat na ini, o mga pinaniaki. (Mateo 20:28; helingon man an Salmo 37:18, 29.) Malinaw na ipinaheling ini sa saiyang panuga: “Madia, kamong mga benendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban.” Padagos pa niang sinabi: “Maogma an mga mahoyo, mantang mamanahon ninda an daga.”—Mateo 5:5; 25:34.

Alagad, tanganing an daga magin angay na mana, an mga kamugtakan maninigong liwaton nin lubos—gibohon na sangkap! Dapat ining magin kinaban kun saen an sangkap na katoninongan asin pagkasararo nagdadanay sa tahaw kan gabos na linalang nin Dios. (Isaias 11:6-9) An gabos na gira kan pagkabakong sangkap nin tawo maninigong mapara, kabilang an kagadanan. (1 Corinto 15:25, 26) Nangangahulogan ini na an mga nagadan, na kabilang sa binalukat na katawohan, maninigong buhayon liwat. Solamenteng sa paaging ini magkakaigwa sinda nin oportunidad na magin mga paramana ni Cristo!—Juan 5:28, 29.

Kaya, an Sangribong Taon na Pamamahala ni Cristo magigin maogmang panahon na dian an katawohan luway-luway na “bubutasan hale sa kaoripnan nin kalapaan” asin makaabot sa pagkasangkap. (Roma 8:21) Nakaiinteres, maski an sekular na mga reperensia nag-aako na ini an katuyohan kan milenyo. An Webster’s Ninth New Collegiate Dictionary (1985 edition) nagtatao nin kahulogan sa “milenyo” bilang “an panahon nin dakulang kaogmahan o pagkasangkap nin tawo.”

Nakalilihis sa Pamamahala ni Salomon

An mamuraway na Milenyong ini puwedeng iagid sa matoninong asin maginhawang 40-taon na pamamahala ni Hadeng Salomon sa suanoy na Israel. (1 Hade 4:24, 25, 29) Kan sinongko kan reyna kan Seba si Hadeng Salomon, sinabi nia: “Totoo an tataramon na nadangog ko sa sakong sadiring daga dapit sa saimong mga bagay asin kan saimong kadonongan. Asin dai ako nagtubod sa mga tataramon sagkod na nakaabot ako tanganing maheling kan sakuya mismong mga mata; asin, uya! Mayo pa sa kabanga an isinaysay sa sako. Nalihisan mo sa kadonongan asin prosperidad an mga nabareta na nadangog ko. Maogma an saimong mga lalaki; maoogma ining saimong mga oripon na dayaday sa atubangan mo, na nagdadangog kan saimong kadonongan!”—1 Hade 10:6-8.

Kun nalihisan an katoninongan, prosperidad, asin kadonongan kan 40-taon na daganon na pamamahala ni Hadeng Salomon, iyo, labi kisa doble, kan dakulang mga linalaoman kan reyna kan Seba, kun siring an Sangribong Taon na Pamamahala kan orog na dakula, langitnon na Hadeng Salomon, si Jesu-Cristo, sierto nanggad na makalilihis sa imahinasyon nin tawo! Sa mga tataramon ni Jesus mismo, sia “an sarong labi pa ki Salomon.” (Mateo 12:42) Probaran na imahinaron an pinakamakosog, maginhawa, matoninong, matanos, asin maogmang mga kamugtakan sa daga na puwede nindong imahinaron, asin dai nindo mahihimong maisip maski an sarong kabtang kan nakaandam sa Milenyo ni Cristo.

Kasabay daw kan Ikatolong Milenyo?

An mga pangyayari sa kinaban magpoon kan 1914 nagpapaheling na nabubuhay na kita sa “pagtatapos kan palakaw nin mga bagay.” Dugang pang sinabi ni Jesus na an kapag-arakian na asosyado sa ihinulang mga pangyayaring ini “dai noarin man makalilihis sagkod na an gabos na bagay na ini mangyari.” Kun siring, nangangahulogan daw ini, na an Milenyong Pamamahala ni Cristo makakasabay kan ikatolong milenyo?—Mateo 24:3-21, 34.

Pinatanidan ni Jesus an saiyang mga disipulo na dai magbanabana. Sinabi nia: “Mayo sa saindo an pakaaram kan mga aldaw o panahon na ibinugtak nin Ama sa saiyang sadiring kapangyarihan.” (Gibo 1:7) Asin dapit sa eksaktong “aldaw asin oras” na mangyari an mga bagay na ini, sinabi ni Jesus na solamenteng an saiyang Ama, si Jehova Dios, an nakaaaram. (Mateo 24:36) Kaya an Biblia dai nagsusuportar sa arin man kan nag-oorog na bilang ngonyan nin mga propeta asin mobimiento dapit sa pagkalaglag kan kinaban na nagtotokdo sa pagbagting kan matangang banggi nin Banggi kan Bagong Taon, sa 1999, bilang an katapusan kan kinaban.

Alagad, an presenteng mga pangyayari sa kinaban malinaw na nagpapaheling na an panahon kan katapusan kaining madiklom, maraot na sistema nin mga bagay “makakaagi na” asin na an Milenyo ni Cristo “naghaharani na.” (Roma 13:12) Imbes na magbanabana sa eksaktong aldaw asin oras kan pag-abot kaini, panahon na nanggad ngonyan na magkua nin kaaraman dapit sa mga kahagadan nin Dios para sa kaligtasan. (Juan 17:3) Sa paaging ini manonodan nindo kun paano magigin kabilang sa mga sasabihan ni Jesus: “Madia, kamong mga benendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban.” (Mateo 25:34) An mga Saksi ni Jehova andam an boot asin matatabangan kamo na magin kabilang sa mga magkakaigwa kan mga bendisyon kan nagdadangadang na mamuraway na Milenyo.b

[Mga Nota sa Ibaba]

[Blurb sa pahina 6]

“Madia, kamong mga benendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban”