An Ikatolong Milenyo—Ootobon daw Kaiyan an Saindong mga Linalaoman?

AN PAGBILANG kan natatadang panahon nagpoon na. An relong digital sa atubang kan sentrong kultural kan Beaubourg sa Paris, Pransia, nagpapaheling kan mga segundong natatada. Magpapadagos ini sa daing ontok na pagbilang kaini kan natatadang panahon sagkod sa matangang banggi nin Disyembre 31, 1999. Sa panahon na iyan, mangyayari an bagay na naobserbaran nin sarong beses sana bago an satong Komon na Kapanahonan: an paglaog nin sarong bagong milenyo, an ikatolong milenyo.

“An 2000, sa sarong paagi, ‘iyo an pinakadakulang linalaoman na pangyayari’ sa kasaysayan nin tawo kasuarin man,” an isinuherir kan sosyal na parasiyasat na si Bernward Joerges kan Berlin, Alemania. Taano an siring na antisipasyon? Total, an taon na 2000 saro man sanang petsa sa pag-agi nin panahon. Apuwera pa, an petsa minimidbid sana kan mga nagsusunod sa kalendaryong pan-Solnopan. Sono sa Islāmikong kalendaryo, an 2000 C.E. mangyayari durante kan Islāmikong taon na 1420; sono sa Judiong kalendaryo, 5760 A.M.

Alagad sa sarong interbio sa diaryong Sueco na Dagens Nyheter, nagpaliwanag si Propesor Joerges: “Huli sa kolonyalismo asin imperyalismo, an satong Gregorianong kronolohiya, na nagpopoon sa hinohonang pagkamundag ni Cristo, nagin marigon sa dakulang kabtang kan kinaban.” Sa siring an taon na 2000 magigin panglobong pantanda sa panahon para sa dakulang kabtang kan katawohan. Sinabi ni Propesor Joerges: “Iooyon kan gabos na tawo an saindang pribadong biograpiya siring man an iba pa sa pangyayaring ini.”

Alagad, an dakol orog pa an nasa isip kisa sa pagtanda kan panahon. “An darakulang mga proyekto asin programa sa ‘pagtanda,’ pagtao nin kahalagahan asin pagselebrar kan pangyayaring ini inaandam na sa gabos na kamugtakan nin buhay asin gabos na sosyal na grado,” an pahayag ni Joerges. Idinugang pa nia na “sa bilog na globo, an midbid na mga negosyante sa paggibo nin mga proyekto asin ‘mga namamahala sa mga pasale’ nag-iisip asin nagdedesinyo nin darakulang okasyon.” An ibang parabareta nagsasabing “masosobrahan kita kan pagluwas nin mga libro manongod sa nakaaging siglo. An gabos na ahensia sa pagbareta maoogma nin labi-labi sa pagbago kan milenyo. Sarong istasyon nin telebisyon sa Solnopan Alemania an nagpaplano nin 24-oras na pagbareta kan mga pagsirang kan aldaw sa bilog na kinaban.”

Sisiertohon man kan paagi nin pagbabareta na magin sibot sa pag-aram kan huring omboy na ipinangaki kan 1999 asin an kaenot-enoti na mamundag sa 2000. Galagang hahanapon kan mga peryodista an dikit na natatada sa mga namundag kan ika-19 siglo tanganing hapoton kun ano an pagmate na mabuhay sa tolong siglo asin duwang milenyo! Hinohona pa ngani kan iba na ini gabos na pagsaginsagin dapit sa milenyo magpoprodusir nin klase nin daing kontrol na pagngisi asin paghibi kan dakol. Sono sa sarong makatatakot na prediksion, sa pagbagting kan matangang banggi kan Banggi nin Bagong Taon na iyan, dakol an maghuhugot.

Sa ibong kan siring na malinaw na kasobrahan, masasabotan na an okasyon nakapupukaw nin interes. Para sa kadakol sa satong mamondo huli sa karibokan na kinaban, an bagong milenyo minamansay bilang tanda nin paglaom, sarong dalan pasiring sa mas marahay na ngapit. An iba naglalaom sa siyensia asin teknolohiya sa pagprodusir nin ngapit na dian kita makakan nin mas marhay asin mabubuhay nin mas halawig, magtatrabaho nin dikit asin magdadanay sa harong nin mas haloy; kun saen an mga robot magibo para sa sato kan nakalalangkag na mga gibohon; kun saen an kontroladong pagsasaro nin mga elemento an magibo sa tubig na magin pangatong. Ilinaladawan ninda an ngapit na may telebisyon na garo nasa atubang nindo an mga tawo, mga teleponong naheheling an saindong mga kaolay, mga fax machine na de-lor an mga mensahe, asin mga teleponong nagtatradusir sa oras mismong iyan. Linalaom nindang madiskobre an Bulan, Mars, o iba pang planeta, na nagmimina kan mga kayamanan kaiyan.

Alagad bakong gabos naglalaom sa marahay. Ilinaladawan kan ibang parasiyasat an bagong milenyo na magdadara kan panahon nin dai makontrol na pag-oswag nin populasyon kan kinaban asin pagbagsak kan kapalibotan. Paiiniton kan polusyon sa aire an atmospera kan daga. Matutunaw an mga yelo asin malangkaw an mga kadagatan, na binabaha an mabunga, matawong mga lugar pero ginigibong disyerto an minilyon na ektarya nin inoomang daga. Ihinuhula ninda an pagbagsak kan ekonomia kan kinaban, an politikal na kaluyahan na matanyog sa mga gobyerno asin sosyedad, an dai makontrol na krimen, asin an pinakamaraot sa gabos, an nuklear na pagkatumtom na mapoho sa gabos na buhay nin tawo.

An mga parahula haloy sa mga pagbanabana alagad kulang sa kasiertohan dapit sa nagdadangadang na milenyo. Sa simple kadakol an dai linalaoman na mga elemento na kalabot sa tamang paghula kan ngapit. Sarong propesyonal na nag-aaram kan ngapit an nag-aagid kan paggibo nin siring sa pagkawat nin chess: “Bago ko itira an masunod, inaaram ko an pinakadakol na mapupuwedeng tira sa enotan. Alagad pakatapos na makatira an sakong kalaban, ginigibo ko liwat an gabos na iyan.”

Kun ano an mangyayari sa taon na 2000, solamenteng an panahon an magsasabi. Alagad, dai ini nangangahulogan na an saindong ngapit bakong sierto. An Biblia nagtatao nin igong patotoo na harani na kita sa pagdangadang nin orog na gayong mahalagang milenyo kisa sa saro na magpopoon nin kulang na sa sarong dekada. An nagdadangadang na Milenyong ini malampas na gayo sa arin man na linalaoman nin tawo! Ano an eksaktong kahulogan kaini? Ano an kalabot digdi? Iniimbitaran niamo kamo na konsideraron an satong masunod na artikulo asin manodan kun ano an sinasabi kan Biblia.