2000—Tinandaan na Taon?
IGWA daw nin ano man na espesyal na bagay manongod sa taon 2000? An mga tawo na nag-eerok sa kadagaan sa Solnopan sa pankagabsan minamansay iyan bilang an enot na taon kan ikatolong milenyo. Nagpopoon na an plinanong marhay na mga pag-andam tanganing selebraron iyan. Iniinstalar an dakulaon na elektronikong mga relo sa pagbilang kan segundo sagkod na pumoon an bagong milenyo. Inoorganisar an mga baraylehan sa Kaorogmahan sa Bisperas nin Bagong Taon. Ipinapabakal an mga T-shirt na igwa nin mga sarabihon manongod sa katapusan kan milenyo sa mga tindahan sa mga banwaan saka sa mga galeriya sa darakulang siudad.
An mga iglesia, saradit asin darakula, makikiayon sa bilog na taon na kaorogmahan. Amay sa masunod na taon, si Papa Juan Paulo II linalaoman na mabiahe pasiring sa Israel tanganing pangenotan an mga Katoliko Romano sa inapod na “an selebrasyon jubileo sa milenyo kan Iglesia Katolika Romana.” Kinakalkulo na poon duwa may kabangang milyon sagkod anom na milyon na turista, poon sa deboto sagkod sa nali, an nagpaplanong dumalaw sa Israel sa masunod na taon.
Taano ta kadakol na tawo an nagpaplanong dumalaw sa Israel? Nagtataram para sa papa, si Roger Cardinal Etchegaray, sarong opisyal sa Batikano, nagsabi: “An taon 2000 pagselebrar ki Cristo asin sa saiyang buhay sa dagang ini. Kun siring natural sana na an Papa madigdi.” Paano nagkaigwa nin koneksion ki Cristo an taon 2000? An taon 2000 parateng ibinibilang na iyo an eksaktong ika-2,000 na taon poon kan mamundag si Cristo. Alagad iyo daw? Helingon niato.
An taon 2000 mas makahulogan pa ngani sa mga miembro nin nagkapirang grupong relihioso. Kombensido sinda na sa laog kan masunod na mga taon, si Jesus mabalik sa Bukid nin mga Olibo asin an ralaban nin Armagedon, na nasambitan sa libro nin Kapahayagan, paglalabanan sa kababan nin Megido. (Kapahayagan 16:14-16) Sa pag-antisipar kan mga pangyayaring ini, ginatos na residente sa E.U. an ipinapabakal an saindang harong asin kadaklan kan saindang mga rogaring asin nagbabalyo sa Israel. Para sa kapakinabangan kan mga dai mabayaan an saindang harong, an sarong prominenteng ebanghelista sa E.U. nanuga daa na ibobrodkast sa telebisyon—na de-kolor—an pagbalik ni Jesus!
Sa kadagaan sa Solnopan, dinudugangan an mga plano sa pagpoon kan ikatolong milenyo. Minsan siring, an mga tawo sa ibang kadagaan nagpapadagos sa saindang normal na aktibidad. An mga tawong ini—an mayoriya kan populasyon kan kinaban—dai naniniwala na si Jesus kan Nazaret iyo an Mesiyas. Ni inaako man ninda an B.C.-A.D. na estilo nin pagpetsa.a Halimbawa, dakol na Muslim an naggagamit kan sadiri nindang kalendaryo, na segun dian an masunod na taon 1420—bakong 2000. An mga Muslim binibilang an mga taon poon kan petsa na an propetang si Muḥammad nagdulag hale sa Meca pasiring sa Medina. Kun susumahon, an mga tawo sa bilog na kinaban naggagamit nin mga 40 laen-laen na kalendaryo.
Maninigo daw na magkaigwa nin kahulogan an taon 2000 para sa mga Kristiano? Talaga daw na an Enero 1, 2000, may espesyal na kahulogan na aldaw? An mga hapot na ini sisimbagon sa masunod na artikulo.
[Nota sa Ibaba]
a Sa B.C.-A.D. na sistema nin pagpetsa, an mga pangyayari na nangyari bago an tradisyonal na panahon kan pagkamundag ni Jesus inaapod na mga taon “B.C.” (before Christ [bago si Cristo]); idtong mga nangyari pakatapos inaapod na mga taon “A.D.” (Anno Domini—“in the year of our Lord” [“sa taon kan satong Kagurangnan”].) Minsan siring, an nagkapirang may kabatidan na intelektuwal mas gustong gamiton an sekular na apod na “B.C.E.” (before our Common Era [bago an satong Komun na Kapanahonan]) asin “C.E.” (of our Common Era [kan satong Komun na Kapanahonan].)