Hoben na mga Lingkod kan mga Panahon kan Biblia
AN Biblia nagsasaysay manongod sa dakol na maboboot na hoben na isinaboot an saindang paglilingkod sa Dios asin mayaman na binendisyonan para kaiyan. Baga man kita hoben o gurang asin ubanon na, an marahay na mga halimbawang ini sa Biblia makatatao nin dakulang pagpakosog.
Si Jose 17 anyos pa sana kan sia ipabakal sa kaoripnan sa Egipto. Duman, harayo sa saiyang pamilya asin dai naheheling kan mga nakakamidbid sa saiya, pinatunayan ni Jose an saiyang integridad. Kan pagmaigotan kan agom ni Potifar na akiton si Jose, sia nagsabi: “Paano ko magigibo an dakulang karatan na ini asin aktuwal na magkasala tumang sa Dios?” Dawa sa atubangan kan makapangyarihan na Faraon, an pinakamakapangyarihan na hade kan saiyang aldaw, inaprobetsaran ni Jose na itao sa Dios an kaomawan para sa pag-interpretar sa mga pangatorogan ni Faraon. Sia binendisyonan nin nagsosopay. Ginamit sia nin Dios na iligtas kapwa an mga Egipcio asin an saiyang pamilya sa kagadanan paagi sa gutom asin darahon sa Egipto an saiyang ama, si Jacob, asin an pamilya kaini.—Genesis 37:2; 39:7-9; 41:15, 16, 32.
Si Moises Asin an Iba Pa Maimbod Kaidtong Hoben Pa
An aking babae ni Faraon inampon si Moises bilang aki nia, pero natokdoan si Moises kan saiyang ina asin ama manongod sa tunay na Dios. Sinasabi kan Biblia na kan dakula na, si Moises “nagsayuma na apodon na aki kan aking babae ni Faraon, na pinagmarahay pa na maapi kaibanan kan banwaan nin Dios kisa magkamit kan dai nagdadanay na pag-ogma sa kasalan.” Ginamit nin Dios si Moises na iluwas sa Egipto an saiyang banwaan, akoon an Pagboot sa Sinai, asin isurat an dakulang kabtang kan Biblia. Ano man an edad nindo, nagpapatalubo daw kamo nin determinasyon na maglingkod sa Dios kapareho ni Moises?—Hebreo 11:23-29; Exodo 2:1-10.
An Kasuratan nagsasaysay sato manongod sa “saradit” na naghinanyog kaiba kan nasyon kan an Pagboot nin Dios basahon sa Israel. (Deuteronomio 31:10-13) “An gabos na may isip na tanganing maghinanyog” nagtindog “magpoon aga sagkod odto” tanganing dangogon an Pagboot kan kaaldawan ni Nehemias. (Nehemias 8:1-8) Dawa kun an saradit dai nasabotan an gabos, puwede nindang maapresyar na sinda kaipuhan na mamoot, sumamba, asin kumuyog ki Jehova Dios. Ano man an edad nindo, kamo daw naghihinanyog sa mga kombension asin asamblea na duman pinag-oolayan an Tataramon nin Dios? Nanodan daw nindo an halaga nin pagkuyog sa saiya, arog kan hoben na mga Israelitas na idto?
Si David, Josias, Asin Jeremias
Pinili nin Dios si David, an nguhod sa walong magturugang, para sa espesyal na paglilingkod asin nagsabi sa saiya: “Nakua ko si David na aki ni Jese, lalaking nakaoyon sa sakong puso, na magibo kan gabos na kabotan ko.” Pinili sia nin Dios na magin “pastor” kan saiyang banwaan, asin ginibo ni David an paglilingkod na iyan, mantang pinatutunayan an saiyang pagkamoot ki Jehova sa laog nin dakol na taon. Isinurat nia an labing 70 kan Mga Salmo asin nagin apoon ni Jesu-Cristo. Baga man kamo hoben o gurang, inaapresyar daw nindo an mga dalan nin Dios, asin ginigibo daw nindo an mga bagay na minamawot nia, kapareho ni David?—Gibo 13:22; Salmo 78:70, 71; 1 Samuel 16:10, 11; Lucas 3:23, 31.
Si Josias nagin hade kan sia otso anyos pa sana. Kan mga 15 anyos na, “mantang aki pa sia, pinonan niang hanapon an Dios ni David na saiyang apoon.” Bago sia nag-20, pinonan ni Josias an sarong kampanya tumang sa falsong pagsamba. Dangan, ipinahirahay nia an templo, asin ibinalik nia sa daga an malinig na pagsamba. Mababasa niato: “Sa bilog niang kaaldawan dai sinda suminiblag sa pagsunod ki Jehova na Dios kan saindang mga apoon.” Kita gabos dai puwedeng magin hade arog ni Josias, pero puwede kitang maglingkod sa Dios asin manindogan nin marigon tumang sa falsong pagsamba, ano man an satong edad.—2 Cronica 34:3, 8, 33.
An makakamhan sa gabos na Dios nagsabi ki Jeremias: “Bago taka hinaman sa tulak namidbid taka na, asin bago ka luminuwas sa matris pinakangbanal taka. Ginibo takang propeta sa mga nasyon.” Si Jeremias nagreklamo na sia hobenon pa tanganing magin propeta: “Ah, Soberanong Kagurangnan na Jehova! Dai ako tataong magtaram, huli ta aki pa ako.” Si Jehova nagsimbag: “Dai ka magsabing, ‘Aki pa ako.’ Kundi sa gabos na sobolan ko sa saimo, ika maninigong magduman; asin an gabos na ipagboot ko sa saimo, maninigong itaram mo.” Sa laog nin labing 40 taon iyan an ginibo ni Jeremias, asin dawa kan gusto niang pumondo, dai sia makapondo. An tataramon nin Dios “nagin siring sa naglalaad na kalayo na tuminaros sa [saiyang] mga tolang.” Sia kaipuhan nanggad na magtaram! Ano man an saindong edad, pinatatalubo daw nindo an pagtubod na arog kan ki Jeremias, na nag-aabante sa paglilingkod sa Dios arog nia?—Jeremias 1:4-8; 20:9.
Si Daniel, Jesus, Asin Timoteo
Dai pa daw nindo nadangog an manongod ki Daniel? Posibleng gayo na mayo pa siang 20 anyos kan sia darahon kaiba nin ibang “mga aki” bilang bihag sa palasyo kan makapangyarihan na si Nabucodonosor, hade sa Babilonya. Sa ibong kan pagigin hoben ni Daniel, determinado siang kumuyog sa Dios. Si Daniel asin an saiyang kairiba nagsayumang magpadigta sa mga kakanon na tibaad naglalapas sa Pagboot nin Dios o nadigtaan nin paganong mga rituwal. Sa laog nin labing 80 taon, si Daniel noarin man dai nag-urong-sulong, na nagdadanay sa saiyang integridad sagkod sa pagsayuma na pumondo sa pamimibi sa Dios, dawa kun ini magbubunga kan pag-apon sa saiya sa mga leon. Ibinibilang daw nindong arog kaiyan kaseryoso an saindong paglilingkod sa Dios asin an saindong mga pamibi? Maninigo nanggad.—Daniel 1:3, 4, 8; 6:10, 16, 22.
Sa edad na 12, si Jesus nanompongan na nagtutukaw sa tahaw kan mga paratokdo nin relihiyon sa templo sa Jerusalem, na “naghihinanyog sa sainda asin naghahapot sa sainda. Alagad an gabos na naghihinanyog sa [aking si Jesus] danay na nagngangalas sa saiyang pakasabot asin sa saiyang mga simbag.” Magkakainteres daw kamo sa Makakasuratan na orolay nin mga kamagurangan sa templo arog ni Jesus? Mapapangalas man daw an iba sa saindong pakasabot asin sa saindong mga simbag? Ngonyan, an dakol na hoben na Saksi na nag-aadal, naghihinanyog nin maingat, asin nagpapartisipar sa Kristianong mga pagtiripon may kaaraman sa Kasuratan na pinagngangalasan nin mga gurang.—Lucas 2:42, 46, 47.
Kamo daw arog ni Timoteo, na bilang aki tinokdoan kan “banal na mga kasuratan”? Kan sia hoben pa, “marahay an patotoo [ki Timoteo] kan mga tugang” sa kisuerra duwang kongregasyon. Pinili ni apostol Pablo si Timoteo na umiba sa saiya sa pagbiyahe, bako sanang tanganing magin kargador, kundi tanganing tabangan si Pablo sa pagtotokdo sa iba. Pipilion daw kamo para sa siring na mga pribilehiyo? An saindo daw na gibohon “marahay an patotoo,” bako sanang sa saindong kongregasyon kundi pati sa iba?—2 Timoteo 3:15; Gibo 16:1-4.
Anong Klaseng Ngapit an Gusto Nindo?
Puwede daw na an mga hoben ngonyan magin arog kaimbod ki Jose, Moises, David, asin iba pa? Iyo. Totoo, dakol na hobenes na interesado sana sa pag-oroogma. Pero an iba ginagamit nin madonong an saindang pagkabarobata, na minimidbid an Dios asin an saiyang kabotan para sa sainda. Inootob ninda an hula sa Biblia: “An saimong banwaan gikan sa boot na magpepresentar kan saindang sadiri sa aldaw kan saimong kapangyarihan. . . . Ika igwa kan saimong grupo nin mga barobata siring kan ambon.”—Salmo 110:3.
An mararahay na hobenes na iyan nagpapaheling nin kadonongan na lihis sa saindang edad, mantang matatabangan sinda nin Dios na magin mapanggana an saindang presenteng buhay patin tawan sinda nin mamuraway na ngapit sa nagdadangadang na bagong kinaban. (1 Timoteo 4:8) Alagad, paano an sarong modernong barobata makakapatalubo nin pagtubod na kapareho kan mga hobenes na sinasabi sa Biblia? Kun boot nindong maaraman, inaagda mi kamong basahon an artikulong “Maogmang mga Hobenes sa Paglilingkod ki Jehova,” poon sa pahina 19 kan magasin na ini.
[Mga ritrato sa pahina 5]
An hoben na si Moises dai naakit kan kayamanan nin Egipto
An hoben na si David naoyonan kan puso ni Jehova
[Mga ritrato sa pahina 6]
Minsan ngani sa paghona ni Jeremias sia “aki pa,” sia mapusong naghulit nin mensahe na bakong popular
Sa edad na 12, pinapagngalas ni Jesus an mga gurang sa saiyang pakasabot sa Tataramon nin Dios
[Ritrato sa pahina 7]
Sa Israel dawa an mga saradit naghinanyog kun binabasa an Pagboot nin Dios. Iyo man daw kamo?