Si Jehova Asin si Cristo—Pangenot na mga Parakomunikar

“An Soberanong Kagurangnan na Jehova dai magibo nin ano man sagkod na dai pa nia ikinakapahayag an saiyang hilom sa saiyang mga lingkod na propeta.”—AMOS 3:7.

1. Anong mga paagi nin komunikasyon an ginagamit ngonyan?

NGONYAN an komunikasyon multimilyon dolyares na negosyo. An gabos na librong napublikar, an gabos na diaryo asin magasin na regular na iniimprenta, an gabos na programa sa radyo asin telebisyon, saka an gabos na pelikula asin drama sa entablado, mga paghihingoa sa komunikasyon. Totoo man iyan sa gabos na surat na ginibo asin ipinadara saka sa gabos na pag-apod sa telepono. Gabos iyan mga paghihingoa sa komunikasyon.

2. Ano an pirang halimbawa sa mga pag-oswag na nagibo nin tawo sa teknikal na mga kabtang nin komunikasyon?

² Nakatataranta an mga pag-oswag na nagibo nin tawo sa teknikal na mga kabtang nin komunikasyon. Halimbawa, an mga kableng fiber-optic, na mas marahay na gayo kisa mga kableng tanso, kayang darahon nin durungan an manampulong ribong orolay sa telepono. Yaon man an mga satelayt sa komunikasyon, na naglilibot sa daga duman sa kahiwasan asin may kasangkapan sa paghatod nin mga signal nin telepono, telegrapo, radyo, asin telebisyon. An saro sa mga satelayt na iyan kayang durungan na ihatod an 30,000 na mensahe sa telepono!

3. Ano an nangyayari kun may mga siwang sa komunikasyon?

³ Alagad sa ibong kan gabos na paaging ini nin komunikasyon, kanigoan an kasakitan sa kinaban huli sa kakulangan nin komunikasyon sa pag-oltanan nin mga indibiduwal. Halimbawa, sinasabi sato na “nagdadakula an pagkaseparar—naghihiwas an ‘siwang sa komunikasyon’—sa pag-oltanan kan mga namamahala asin kan mga pinamamahalaan.” Asin ano an inaapod na siwang sa henerasyon kundi an dai pakahimo nin mga magurang asin kan saindang mga aki na mapangganang makakomunikar sa lambang saro? Ibinabareta nin mga parakonseho sa mag-agom na an pinakadakulang problema nin mga mag-agom iyo an kadaihan nin komunikasyon sa pag-oltanan nin mag-agom. Puwede pa nganing gikanan nin kagadanan an kadaihan nin tamang komunikasyon. Sa kapinonan nin 1990, 73 katawo an nagadan sa pagbagsak nin sarong eroplano, na an sarong dahelan iyo an dai pakakomunikar kan piloto asin kan nagtatao nin instruksion sa ibaba. An bareta sa peryodiko nagsabi: “An Kaolangan sa Komunikasyon Nagbunga nin Trahedya.”

4. (a) Ano an boot sabihon nin “komunikasyon”? (b) Ano an pasohan kan komunikasyon nin mga Kristiano?

⁴ Ano an komunikasyon kun para sa mga Kristiano? Sono sa sarong diksionaryo, an “komunikasyon” nangangahulogan “pagpaabot nin impormasyon, kaisipan, o pagmate tangani na iyan akoon nin kompleto o masabotan.” An saro pang diksionaryo tinawan iyan nin kahulogan na “sarong paagi nin epektibong pagpahayag nin mga ideya.” Mangnoha, “epektibong pagpahayag nin mga ideya.” An komunikasyon nin mga Kristiano nangorognang kaipuhan na magin epektibo ta an pasohan kaiyan aboton an puso nin mga tawo kan katotoohan hale sa Tataramon nin Dios tanganing, tibaad pa, humiro sinda sono sa nanodan ninda. Pambihira nanggad, iyan pinahihiro nin kadaihan nin kapasloan, nin pagkamoot.

Si Jehova Bilang Parakomunikar

5. Ano an saro sa enot na mga paagi na si Jehova Dios nagkomunikar sa tawo?

⁵ Si Jehova Dios daing duwa-duwa na iyo an kadarudakulaing Parakomunikar. Huli ta linalang nia kita sa saiyang ladawan asin kaagid, sia nakakakomunikar sa sato, asin puwede kitang magkomunikar sa iba manongod sa saiya. Poon kan lalangon an tawo, si Jehova nakikomunikar sa saiyang daganon na mga linalang manongod sa saiya man sana. An sarong paagi na ginibo nia ini iyo an saiyang naheheling na mga linalang. Kaya, an salmista nagsasabi sato: “An kalangitan nagpapahayag kan kamurawayan nin Dios; asin an gibo kan saiyang mga kamot ipinagsasaysay kan kahiwasan. An sunod-sunod na aldaw nagpapaluwas nin tataramon, asin an sunod-sunod na banggi nagpapaheling nin kaaraman.” (Salmo 19:1, 2) Asin sinasabi sato kan Roma 1:20 na “an dai naheheling na mga kuwalidad [nin Dios] malinaw nang naheheling poon pa sa paglalang kan kinaban padagos.” An “malinaw nang naheheling” nagpaparisa nanggad nin epektibong komunikasyon!

6. Ano an ikinomunikar ni Jehova sa saiyang daganon na mga linalang kan sinda yaon sa tatamnan nin Eden?

⁶ An mga dai nin pagtubod sa Dios asin sa saiyang banal na kapahayagan pinatutubod kita na an tawo bahala nang humanap nin impormasyon tanganing maaraman kun taano sia ta nabubuhay. Alagad ta liniliwanag kan Tataramon nin Dios na an Dios nakikomunikar sa tawo poon pa kan kapinonan. Halimbawa, itinao nin Dios sa enot na lalaki asin babae an pagboot na mangaki: “Pangagbunga asin pangagdakol kamo asin panoa nindo an daga asin sakopa nindo . . . an lambang nabubuhay na hayop.” Itinogot man sainda nin Dios na magpakabasog sa mga prutas sa tatamnan—apuwera sana an saro. Dangan, kan magmasumbikal si Adan asin Eva, ikinomunikar ni Jehova an enot na Mesiyanikong panuga, na tinatawan nin paglaom an katawohan: “Pag-iiwalon ko ika [an halas] asin an babae asin an saimong banhi asin an saiyang banhi. Lulugadon ka nia sa payo asin lulugadon mo sia sa bool.”—Genesis 1:28; 2:16, 17; 3:15.

7. Ano an ipinaheheling kan libro nin Genesis manongod sa pakikomunikar ni Jehova sa saiyang mga lingkod?

⁷ Kan an aki ni Adan na si Cain pano nin nakagagadan na pagkauri, si Jehova Dios nagkomunikar sa saiya, na garo baga sinasabi: ‘Mag-ingat ka! Pasiring ka sa sala!’ Alagad ta habo ni Cain na dangogon an patanid na idto asin ginadan an saiyang tugang. (Genesis 4:6-8) Dangan, kan an daga mapano nin kadahasan asin karatan, ikinomunikar ni Jehova sa matanos na si Noe an saiyang katuyohan na linigan an daga kan gabos na nanraramog dian. (Genesis 6:13–7:5) Pakalihis kan Baha, kan si Noe asin an saiyang pamilya lumuwas sa dahong, ikinomunikar ni Jehova sa sainda an saiyang katuyohan manongod sa kabanalan nin buhay asin dugo, asin paagi sa hablondawani itinao nia an garantiya na nungka pa niang lalaglagon an gabos na nabubuhay paagi sa baha. Pakalihis nin pirang siglo, ikinomunikar ni Jehova ki Abraham an Saiyang katuyohan na an gabos na pamilya nin katawohan bendisyonan an sadiri paagi sa Banhi ni Abraham. (Genesis 9:1-17; 12:1-3; 22:11, 12, 16-18) Asin kan ipahayag nin Dios na lalaglagon nia an gabos na mga naggagamit nin sala sa sekso sa Sodoma asin Gomorra, saiyang mamomoton na ikinomunikar an bagay na iyan ki Abraham, na sinasabi: “Tatagoon ko daw ki Abraham an sakong ginigibo?”—Genesis 18:17.

8. Sa anong apat na paagi nagkomunikar si Jehova sa saiyang mga lingkod digdi sa daga?

⁸ Poon ki Moises, ginamit ni Jehova an dakol na propeta sa pagkomunikar sa Israel. (Hebreo 1:1) Kun beses ginagamit nia an berbal na pagdikta, arog kan sabihan nia si Moises: “Isurat mo an mga tataramon na ini.” (Exodo 34:27) Mas parate na si Jehova nagkomunikar sa saiyang mga representante paagi sa mga bisyon, arog kan ginibo na nia ki Abraham.a Ginamit man ni Jehova an mga pangatorogan sa pagkomunikar sa mga tawo, asin bako sanang sa saiyang mga lingkod kundi pati sa mga may relasyon sa saiyang mga lingkod. Halimbawa, pinapangyari ni Jehova na an duwa sa kairibang preso ni Jose mangatorogan, na tinawan ni Jose nin kahulogan para sa sainda. Pinapangyari man ni Jehova na mangatorogan si Faraon asin si Nabucodonosor, na tinawan nin kahulogan kan saiyang mga lingkod na si Jose asin Daniel. (Genesis 40:8–41:32; Daniel, kapitulo 2 asin 4) Dugang pa, sa dakol na okasyon ginamit ni Jehova an mensaherong mga anghel na magkomunikar sa saiyang mga lingkod.—Exodo 3:2; Hokom 6:11; Mateo 1:20; Lucas 1:26.

9. Ano an nagmotibar ki Jehova na magkomunikar sa saiyang banwaan na Israel, arog kan maririsa sa anong mga kapahayagan nia?

⁹ An gabos na komunikasyon na iyan ni Jehova paagi sa saiyang propeta nagpaaninag kan saiyang pagkamoot sa saiyang banwaan na Israel. Halimbawa, sinabi nia paagi sa saiyang propetang si Ezequiel: “Naoogma ako, bakong sa pagkagadan kan maraot, kundi sa bagay na an sarong maraot minatalikod sa saiyang dalan asin magdanay na mabuhay. Talikod kamo, talikod kamo sa saindong maraot na mga dalan, huli ta taano ta kaipuhan pa kamong magadan, O harong ni Israel?” (Ezequiel 33:11) Si Jehova matinios asin pasensiosong Parakomunikar sa saiyang rebeldeng suanoy na banwaan, arog kan maheheling sa 2 Cronica 36:15, 16: “Si Jehova na Dios kan saindang mga magurang nagsugo sa sainda paagi sa saiyang mga sugo, nin paorootro, huli ta sia naherak sa saiyang banwaan asin sa saiyang erokan. Alagad ta . . . dinuduhagi [ninda] an saiyang mga tataramon patin tinutuya an saiyang mga propeta . . . sagkod na mayo na nin kaomayan.”

10. Paano nagkokomunikar si Jehova sa saiyang banwaan ngonyan, asin sagkod saen na sia Dios nin komunikasyon?

¹⁰ Ngonyan, nasa sato an ipinasabong na Tataramon nin Dios, an Banal na Biblia, na paagi kaiyan si Jehova nagkokomunikar sato nin impormasyon manongod sa saiyang sadiri, sa saiyang mga katuyohan, asin sa saiyang boot para sa sato. (2 Timoteo 3:16, 17) An totoo, bilang an Kaharohalangkaweng Parakomunikar, si Jehova, nagsasabi: “An Soberanong Kagurangnan na Jehova dai magibo nin ano man sagkod na dai pa nia ikinakapahayag an saiyang hilom sa saiyang mga lingkod na propeta.” (Amos 3:7) Ipinaaaram nia sa saiyang mga lingkod an katuyohan niang gibohon.

An Aki nin Dios Bilang Parakomunikar

11. Siisay an pangenot na instrumento ni Jehova sa pagkomunikar sa tawo, asin taano ta angay an saiyang titulong “an Tataramon”?

¹¹ Sa gabos na ahente na ginamit ni Jehova sa pagkomunikar kan Saiyang kabotan, an pangenot iyo an Tataramon, an Logos, na nagin si Jesu-Cristo. Ano an kahulogan kan pag-apod sa saiyang Tataramon, o Logos? Na sia an Pangenot na Representante ni Jehova. Asin ano an representante? Saro na nagkokomunikar kan sasabihon nin iba. Kaya an Logos nagin parakomunikar kan tataramon ni Jehova Dios sa Saiyang intelihenteng mga linalang sa daga. An katongdan na iyan napakahalaga kaya sia inapod na Tataramon.—Juan 1:1, 2, 14.

12. (a) Sa anong katuyohan na si Jesus nagdigdi sa daga? (b) Ano an nagpapatunay sa saiyang maimbod na pag-otob sa katuyohan na iyan?

¹² Si Jesus mismo nagsabi ki Poncio Pilato na an pangenot niang katuyohan sa pagdigdi sa daga ikomunikar an katotoohan sa katawohan: “Ako namundag dahel kaini, asin dahel kaini ako napadigdi sa kinaban, tanganing ako magpatotoo sa katotoohan.” (Juan 18:37) Asin an rekord sa mga Ebanghelyo nagsasabi kun gurano nia karahay na naotob an asignasyon na iyan. An saiyang Sermon sa Bukid minimidbid na iyo an pinakadakulang sermon na ihinulit nin sarong tawo. Kanigoan karahay kan saiyang pagkomunikar paagi sa sermon na iyan! “An nangyari iyo na an mga kadaklan [na nakadangog kan sermon] napangalas nin makuri sa saiyang paagi nin pagtotokdo.” (Mateo 7:28) Manongod sa saro pang okasyon, mababasa niato: “An dakulang kadaklan nagdadangog sa saiya na may kaogmahan.” (Marcos 12:37) Kan an pirang opisyal isugo na dakopon si Jesus, nagbuwelta sindang dai sia dara. Taano? An simbag ninda sa mga Fariseo: “Dai pa nin tawong nagtaram nin arog kaini.”—Juan 7:46.

An mga Disipulo ni Cristo Isinugong Magin mga Parakomunikar

13. Ano an nagpapaheling na si Cristo dai nakontento sa pagigin solo-solong parakomunikar?

¹³ Dai kontento sa pagigin solo-solong parakomunikar, enot isinugo ni Jesus an 12 apostol dangan an 70 paraebanghelyo na paduman bilang mga parakomunikar kan maogmang bareta kan Kahadean. (Lucas 9:1; 10:1) Dangan dai nahaloy bago sia sumakat sa langit, isinugo nia an saiyang mga disipulo na gumibo nin espesyal na trabaho. Anong trabaho? Arog kan mababasa niato sa Mateo 28:19, 20, pinagbotan nia sinda na magin mga parakomunikar; asin kaipuhan na tokdoan man ninda an iba na magin mga parakomunikar.

14. Gurano kaepektibo kan enot na mga parakomunikar na Kristiano?

¹⁴ An mga disipulo daw epektibong mga parakomunikar? Iyo nanggad! Bilang resulta kan saiyang paghuhulit kan aldaw nin Pentecostes 33 C.E., 3,000 kalag an nakadugang sa bagong mabilog na Kristianong kongregasyon. Dai nahaloy an bilang nagin 5,000 na lalaki. (Gibo 2:41; 4:4) Bakong makangangalas na pinagsahotan sinda kan saindang mga kaiwal na Judio na pinano ninda an bilog na Jerusalem kan saiyang katokdoan dangan nagreklamo na linaglag na ninda an ineerokan na daga huli sa saindang paghuhulit!—Gibo 5:28; 17:6.

15. Anong instrumento an ginamit ni Jehova sa modernong mga panahon sa pagkomunikar sa mga tawo?

¹⁵ Kumusta man an modernong mga panahon? Arog kan ihinula sa Mateo 24:3, 45-47, an Kagurangnan, si Jesu-Cristo, ninombrahan an “maimbod asin madonong na oripon,” na kompuwesto nin linahidan na mga Kristiano, na mag-asikaso kan gabos niang rogaring digdi sa daga sa panahon na ini kan saiyang presensia. An maimbod asin madonong na oripon na iyan irinirepresentar ngonyan kan Namamahalang Grupo kan mga Saksi ni Jehova, na an ahente sa publisidad iyo an Watch Tower Bible and Tract Society. Angay nanggad, an maimbod asin madonong na oripon na iyan inapod man na pinakapaagihan sa pagkomunikar nin Dios. Iyan man nagdadagka sato na magin matibay na mga parakomunikar. An totoo, an pinakaenot na luwas kan Zion’s Watch Tower and Herald of Christ’s Presence nagsadol sa mga parabasa: “Kun kamo may kataed o katood na sa paghona nindo magkakainteres o makikinabang sa itinotokdo [kan magasin na ini], iyan puwede nindong ipaheling sa sainda; sa siring ihinuhulit nindo an Tataramon asin ginigibo an ikararahay nin gabos na tawo mantang may oportunidad kamo.”

16. Ano an nagpapaheling na labi pa sa Biblia sana an kaipuhan tanganing an Dios epektibong makakomunikar sa saiyang daganon na mga lingkod?

¹⁶ Minsan siring, an pagkaigwa sana kan Tataramon nin Dios asin personal na pagbasa kaiyan bakong igo tanganing magkamit kan tamang kaaraman na nagpapangyari sa saro na lumakaw sa dalan pasiring sa buhay. Girumdoma an Etiopeng opisyal sa palasyo na nagbabasa sa hula ni Isaias alagad ta dai nasasabotan an saiyang binabasa. An ebanghelisador na si Felipe ipinaliwanag sa saiya an hula, na pakatapos sia andam nang magpabautismo bilang disipulo ni Cristo. (Gibo 8:27-38) An bagay na an kaipuhan labi pa sa pagbasa sana nin solo sa Biblia maheheling sa Efeso 4:11-13, na dian ipinaheheling ni Pablo na si Cristo bako sana na itinao an nagkapira bilang pinasabngan na mga apostol asin propeta kundi itinao man nia “an nagkapira bilang mga paraebanghelyo, an nagkapira bilang mga pastor asin paratokdo, manongod sa paghusay liwat kan mga banal, manongod sa gibohon nin paglingkod, manongod sa pagpakosog kan hawak ni Cristo, sagkod na kita gabos makaabot sa pagkasararo sa pagtubod asin sa tamang kaaraman dapit sa Aki nin Dios, sa lubos na pagkatawo.”

17. Paagi sa anong mga midbidan na mamimidbid niato an ahensiang ginagamit ngonyan ni Jehova sa pagkomunikar kan saiyang mga katuyohan sa katawohan?

¹⁷ Paano niato mamimidbid an mga ginagamit ni Jehova Dios asin ni Jesu-Cristo na tumabang sa mga tawong magigin Kristiano na makaabot sa lubos na pagkatawo? Sono ki Jesus, an sarong midbidan iyo na an mga ini nagkakaminootan kun paanong namoot si Jesus sa saiyang mga parasunod. (Juan 13:34, 35) Saro pang midbidan: Sinda bakong kabtang kan kinaban, kun paanong si Jesus bakong kabtang kan kinaban. (Juan 15:19; 17:16) An saro pang tanda iyo na minimidbid ninda an Tataramon nin Dios bilang katotoohan, arog ki Jesus, na perming ginagamit an autoridad kaiyan. (Mateo 22:29; Juan 17:17) An pagpabantog kan ngaran nin Dios, arog kan ginibo ni Jesus, saro pang tanda. (Mateo 6:9; Juan 17:6) Asin an saro pang tanda iyo an pag-arog sa halimbawa ni Jesus sa paghuhulit kan Kahadean nin Dios. (Mateo 4:17; 24:14) Saro sana an grupo na nakaootob sa mga kahagadan na ini, arin na baga, an internasyonal na mga parakomunikar na inaapod Kristianong mga Saksi ni Jehova.

18. Anong tolong bagay sa komunikasyon an ipaliliwanag nin masurunod pang artikulo?

¹⁸ Minsan siring, an komunikasyon nagpaparisa nin responsibilidad sa iba. Kiisay may paninimbagan an mga Kristiano na makikomunikar? Sa pundamental, may tolong bagay na dian dapat na pagmaigotan nin mga Kristiano na papagdanayon na bukas an mga linya nin komunikasyon: pamilya, Kristianong kongregasyon, asin Kristianong ministeryo sa langtad. An minasunod na mga artikulo magpapaliwanag kan mga kabtang na ini kan satong tema.

[Nota sa Ibaba]

Ano an Isisimbag Nindo?

◻ Ano an puwedeng ibungang danyos nin kakulangan nin komunikasyon?

◻ Sairisay an duwang pangenot na mga parakomunikar?

◻ Anong laen-laen na paagi an ginamit nin Dios sa pagkomunikar sa tawo?

◻ Paano nangorog si Jesus bilang parakomunikar?

◻ Gurano kamapanggana an enot na mga Kristiano sa pagkomunikar?

[Ritrato sa pahina 17]

Kapareho kan saiyang langitnon na Ama, si Jesus maheherakon na parakomunikar