Magin Parakomunikar!
1 Tangani na magibo an sugo sa sato na maghulit asin gumibo nin mga disipulo, kaipuhan na magtao kita nin impormasyon sa iba. (Mat. 24:14; 28:19, 20) Puedeng magin depisil an pagkomunikar dawa sa mga magkakatood. Ano an puedeng makatabang sa sato tangani na mapaabotan kan maogmang bareta an mga dai kamidbid?
2 Hale sa Pagigin Bakong Kamidbid Pasiring sa Pagigin Katood: Probaran na ibugtak an saindong sadiri sa lugar kan mga dinodolok nindo sa ministeryo. Sa kinaban ngonyan, masasabotan kun taano an nagkapira ta tibaad suspetsoso, o takot pa ngani, sa mga dai kamidbid. Ini puedeng makapogol sa komunikasyon. Paano nindo mapanggaganahan an pagkahandal sa primero kan mga nanunuparan nindo? Dawa bago pa man kita magtaram, an sarong paagi na kita nagkokomunikar iyo an satong mabining personal na itsura. An satong husay na marhay na gubing asin may dignidad na postura nakakatabang na mainaan an takot.—1 Tim. 2:9, 10.
3 An saro pang pantabang sa pagkomunikar iyo an relaks, makikatood na paagi. Nakatatabang ini na pamugtakon an boot kan iba asin pinangyayari sinda na mas magustong maghinanyog. Kaipuhan an marahay na pag-andam sa bagay na ini. Kun malinaw na sa isip niato an satong sasabihon, dai nang gayo kita ninenerbios. Asin an toninong na kamugtakan na ini kan isip niato puedeng makaakit sa iba sa satong mensahe. Ini an sabi nin sarong babae manongod sa pagdalaw nin sarong Saksi: “An nagigirumdoman ko sa saiyang nakahuyom na lalauogon iyo an katoninongan. Napukaw an interes ko.” Binuksan kaini an dalan para sa babaeng idto na maghinanyog sa maogmang bareta.
4 Mga Kualidad na Nakakaakit: Kaipuhan niato na magkaigwa nin sinserong personal na interes sa iba. (Fil. 2:4) An sarong paagi na magibo ini iyo an dai pagdominar sa pag-orolay. Total, kalabot man sa komunikasyon an paghinanyog. Kun iniimbitaran niato an mga naghihinanyog sa sato na ipahayag an saindang sadiri asin interesado kitang naghihinanyog sa saindang mga komento, namamatean ninda na kita nagmamakolog sa sainda. Kaya kun nagtataram an mga naghihinanyog sa saindo, dai maghidali na bumalik sa iinandam nindong pag-atubang. Komendaran sinda kun magigibo nindo iyan nin sinsero, asin pagmaigotan na gamiton na basehan an sinasabi ninda. Kun ihinahayag kan mga komento ninda kun sa ano sinda interesadong marhay, ibagay an pag-atubang nindo tangani na mapag-olayan an saindang mga pinagkakainteresan.
5 An kababaan nin boot asin kababaan nin pag-isip nakatatabang na magpadagos an komunikasyon. (Tal. 11:2; Gibo 20:19) Naakit ki Jesus an mga tawo huli ta sia “mahoyo asin may kababaan an puso.” (Mat. 11:29) Sa ibong na lado, nakapararayo an mapalangkaw na aktitud. Sa siring, minsan ngani kombensido kitang marhay na yaon sa sato an katotoohan, madonong na linilikayan niato na magtaram sa dogmatikong paagi.
6 Kumusta kun an mga komento nin saro nagpapabanaag nin paniniwala na bakong kaoyon kan itinotokdo kan Biblia? Kita daw obligadong itanos sia? Iyo, pag-abot nin panahon, alagad dai niato kaipuhan na pagmaigotan na gibohon iyan sa enot na pagsongko. Sa parate may bentaha na gamiton na basehan an mga ideya na pinagkakaoyonan niato asin kan kaolay niato bago ihiras an mga katokdoan sa Biblia na tibaad mas depisil para sa saiya na akoon. Ini nagkakaipo nin pasensia asin pagkamataktika. Si Pablo nagtao nin marahay na halimbawa sa bagay na ini kan nagpapatotoo sa mga hokom sa Areopago.—Gibo 17:18, 22-31.
7 Orog sa gabos, an daing kaimotan na pagkamoot makakatabang sa sato na magin epektibong mga parakomunikar. Siring ki Jesus, dapat kitang maherak sa mga tawo na “naanitan asin nagkakaralagalag siring sa mga karnero na mayong pastor.” (Mat. 9:36) Pinahihiro kita kaini na darahon sa sainda an maogmang bareta asin tabangan sindang makalaog sa dalan pasiring sa buhay. An dara niato mensahe nin pagkamoot, kaya padagos na sabihon niato iyan sa mamomoton na paagi. Sa paggibo kaiyan, inaarog niato si Jehova Dios asin si Jesu-Cristo—an pangenot na mga Parakomunikar sa uniberso.