Paglilingkod Bilang mga Parasira nin Tawo
“Si Jesus nagsabi ki Simon: ‘Dai ka matakot. Poon ngonyan magdadakop ka nin mga tawong buhay.’”—LUCAS 5:10.
1, 2. (a) Ano an nagin kabtang nin paninira sa kasaysayan nin katawohan? (b) Anong bagong klaseng paninira an iinintrodusir kaidtong haros 2,000 na taon na an nakaagi?
SA LAOG nin rinibong taon, an katawohan nanira para sa pagkakan sa mga dagat, danaw, asin salog sa daga. An sira hale sa Nilo mahalagang kabtang kan pagkakan sa suanoy na Egipto. Kan gibohon na dugo an tubig sa Nilo kan kaaldawan ni Moises, nasakitan an mga Egipcio bako sanang huli ta nagkulang an tubig kundi huli man ta nagadan an mga sira, na nakaapektar sa suplay nindang kakanon. Kan huri, sa Sinai, kan itao ni Jehova an Pagboot sa Israel, sinabihan nia sinda na an nagkapirang sira puwedeng kakanon pero an iba marigsok, dai dapat na kakanon. Ipinarisa kaini na an mga Israelitas makakan nin sira pag-abot ninda sa Dagang Panuga, kaya an iba sa sainda magigin mga parasira.—Exodo 7:20, 21; Levitico 11:9-12.
2 Minsan siring, kaidtong haros 2,000 na taon na an nakaagi, iinintrodusir sa katawohan an saro pang klaseng paninira. Ini espirituwal na klase nin paninira na magtatao nin pakinabang bako sanang sa mga parasira kundi pati sa sira! An klaseng ini nin paninira ginigibo sagkod ngonyan, na may dakulaon na pakinabang sa minilyon sa bilog na kinaban.
‘Pagdakop nin mga Tawong Buhay’
3, 4. Siisay na duwang parasira an nagpaheling nin dakulang interes ki Jesu-Cristo?
3 Kan taon 29 C.E., si Jesus, an Saro na maintrodusir kan bagong klaseng ini nin paninira, binautismohan ni Juan na Bautisador sa Salog nin Jordan. Pakalihis nin pirang semana, si Jesus itinokdo ni Juan sa duwa niang disipulo asin nagsabi: “Uya, an Kordero nin Dios!” An saro sa mga disipulong ini, na an ngaran Andres, sinabihan tolos an tugang niang si Simon Pedro: “Nanompongan mi an Mesiyas”! Interesante nanggad, si Andres asin Simon pareho mga parasira.—Juan 1:35, 36, 40, 41; Mateo 4:18.
4 Pakalihis nin harohalawig na panahon, si Jesus naghuhulit sa mga kadaklan sa gilid kan Dagat nin Galilea, harani sa istada ni Pedro asin Andres. Sinasabihan nia an mga tawo: “Magsorolsol kamo, banwaan, huli ta an kahadean kan kalangitan harani na.” (Mateo 4:13, 17) Maiimahinar niato na si Pedro asin Andres galagang dangogon an saiyang mensahe. Pero posible na dai ninda aram na si Jesus may sasabihon sainda na makaliliwat na sagkod lamang sa saindang buhay. Saro pa, an sasabihon asin gigibohon ni Jesus sa atubangan ninda may mahalagang kahulogan sa sato gabos ngonyan.
5. Paano an parasirang si Pedro nakapaglingkod ki Jesus?
5 Mababasa niato: “Sarong beses kan an mga kadaklan pinipiot sia asin naghihinanyog sa tataramon nin Dios, sia nagtitindog sa gilid kan danaw nin Genesaret. Asin naheling nia an duwang sakayan na naduduong sa gilid kan danaw, alagad ta an mga parasira nagharawas na asin hinuhugasan an saindang mga hikot.” (Lucas 5:1, 2) Kaidto, an propesyonal na mga parasira parateng nagtatrabaho kun banggi, asin linilinigan kan mga lalaking ini an saindang mga hikot pakatapos nin magdamlag na paninira. Nagdesisyon si Jesus na gamiton an saro sa saindang sakayan tanganing mas epektibong makapaghulit sa kadaklan. “Sa pagsakay sa saro sa mga sakayan, na ki Simon, ipinakiolay nia saiya na irayorayo sa daga. Dangan sia nagtukaw, asin gikan sa sakayan pinonan niang tokdoan an mga kadaklan.”—Lucas 5:3.
6, 7. Anong milagro mapadapit sa paninira an ginibo ni Jesus, na nagbunga kan anong kapahayagan manongod sa paninira?
6 Mangnoha na an nasa isip ni Jesus bako sanang tokdoan an mga kadaklan: “Kan sia umontok sa pagtaram, sia nagsabi ki Simon: ‘Magduman ka sa hararom, asin taktakan nindo an saindong mga hikot para sa pagdakop.’” Girumdoma, magdamlag nang nagtrabaho an mga parasirang ini. Bakong makangangalas, si Pedro nagsimbag: “Paratokdo, sa bilog na banggi kami nagpagal asin daing nadakop na ano man, alagad sa tataramon mo itataktak ko an mga hikot.” Ano an nangyari kan ini gibohon ninda? “Nakalaom sinda nin kadakol na sira. An totoo, nagpoon na magisi an saindang mga hikot. Kaya pinaypay ninda an saindang kairiba sa saro pang sakayan na dumolok asin tabangan sinda; asin sinda nagdorolok, asin pinano ninda an duwang sakayan, kaya an mga ini nagpoon na malunod.”—Lucas 5:4-7.
7 Nagmilagro si Jesus. An parteng idto nin dagat daing laog magdamlag; ngonyan idto pano nin sira. An milagrong ini nagkaigwa nin makosog na epekto ki Pedro. “Si Simon Pedro luminuhod sa tuhod ni Jesus, na sinasabi: ‘Humarayo ka sa sako, huli ta ako parakasala, Kagurangnan.’ Huli ta sa kadakolan nin sira na nadakop ninda sia asin an gabos niang kairiba napangalas, asin siring man si Santiago asin si Juan, mga aki ni Zebedeo, na mga kabakas ni Simon.” Kinalma ni Jesus si Pedro dangan isinabi an mga tataramon na maliwat sa buhay ni Pedro. “Dai ka matakot. Poon ngonyan magdadakop ka nin mga tawong buhay.”—Lucas 5:8-10.
Mga Parasira nin mga Tawo
8. Ano an nagin reaksion nin apat na propesyonal na parasira sa pangagda na ‘mandakop nin mga tawong buhay’?
8 Kaya ibinaing ni Jesus an mga tawo sa sira, asin inagda nia an mapakumbabang parasirang ini na bayaan an saiyang sekular na trabaho para sa mas dakulang klase nin paninira—pagdakop sa mga tawong buhay. Inako ni Pedro, asin kan tugang niang si Andres, an imbitasyon. “Tolos-tolos binayaan an mga hikot, sinda nagsunod sa saiya.” (Mateo 4:18-20) Sumunod inapod ni Jesus si Santiago asin Juan, na yaon sa sakayan ninda na nagsusursi kan saindang mga hikot. Inagda man nia an mga ini na magin mga parasira nin mga tawo. Ano an reaksion ninda? “Tolos-tolos na binayaan an sakayan asin an saindang ama, sinda nagsunod sa saiya.” (Mateo 4:21, 22) Ipinaheling ni Jesus an abilidad bilang parasira nin mga kalag. Sa okasyon na ini nakadakop sia nin apat na lalaking buhay.
9, 10. Anong pagtubod an ipinaheling ni Pedro asin kan saiyang kairiba, asin paano sinda tinokdoan sa espirituwal na paninira?
9 An propesyonal na parasira naghahanap-buhay paagi sa pagtinda kan nadakop nia, alagad ta dai iyan magigibo nin espirituwal na parasira. Kaya, an mga disipulong ini nagpaheling nin dakulang pagtubod kan bayaan ninda an gabos tanganing sumunod ki Jesus. Pero dai sinda nin pagduda na magigin mapanggana an saindang espirituwal na paninira. Nahimo ni Jesus na panoon nin literal na sira an dagat na daing laog. Siring man, pagtaktakan ninda kan saindang mga hikot sa dagat kan nasyon nin Israel, makaseseguro an mga disipulo na, sa tabang nin Dios, makadadakop sinda nin mga tawong buhay. An gibong espirituwal na paninira na nagpoon kaidto nagpapadagos, asin sagkod ngonyan si Jehova nagtatao pa nin mayaman na ani.
10 Sa laog nin labing duwang taon, an mga disipulong idto tinokdoan ni Jesus sa paninira nin mga tawo. Kun beses tinatawan nia sinda nin maingat na instruksion asin isinusugo sindang maenot sa saiya sa paghulit. (Mateo 10:1-7; Lucas 10:1-11) Kan si Jesus pasaloiban asin gadanon, namungnan an mga disipulo. Alagad an kagadanan daw ni Jesus nangahulogan na napondo na an paninira nin mga tawo? Dai nahaloy iyan sinimbag kan mga pangyayari.
Paninira sa Dagat nin Katawohan
11, 12. Pagkabuhay nia liwat, anong milagro an ginibo ni Jesus na may koneksion sa paninira?
11 Dai nahaloy pagkagadan ni Jesus sa luwas nin Jerusalem asin pagkabuhay nia liwat, an mga disipulo nagpuli sa Galilea. Sarong beses an pito sa sainda iriba harani sa Dagat nin Galilea. Nagsabi si Pedro na sia maninira, asin uminiba saiya an iba. Arog kan dati, banggi sindang nanira. An totoo, magdamlag na naman nindang itinaktak an saindang hikot sa dagat na dai nakadadakop nin ano man. Dangan kan magliliwanag na, an sarong pigura na naheling na nagtitindog sa baybayon nag-apod sa sainda sa ibong kan dagat: “Mga aki, mayo kamo nin makakakan, ano?” An mga disipulo nagsirimbag: “Mayo!” Kaya an nagtitindog sa baybayon nagsabi sainda: “‘Taktakan nindo an hikot sa too kan sakayan asin may makukua kamo.’ Dangan iyan itinaktak ninda, alagad ta dai na ninda makayang batonon idto huli sa kadakolan kan sira.”—Juan 21:5, 6.
12 Kanigoan kamakangangalas na eksperyensia! Posibleng nagirumdoman kan mga disipulo an naenot na milagro may labot sa paninira, asin kisuerra saro sa sainda an nakarealisar kun siisay an pigura sa baybayon. “An disipulo na namotan ni Jesus nagsabi ki Pedro: ‘An Kagurangnan ini!’ Kaya si Simon Pedro, kan madangog na idto an Kagurangnan, nagsolog kan saiyang pan-ibabaw na gubing, ta sia hukas, asin tuminagbang sa dagat. Alagad an ibang disipulo naggirilid sa sadit na sakayan, huli ta sinda bako man na harayo sa daga, mga tolong gatos na piye sana an rayo.”—Juan 21:7, 8.
13. Pagkasakat ni Jesus sa langit, anong internasyonal na programa nin paninira an pinonan?
13 Ano an ipinarisa kan milagrong ini? Na bako pang tapos an trabahong paninira nin mga tawo. An bagay na ini idinoon kan si Jesus tolong beses na magsabi ki Pedro—asin paagi sa saiya sa gabos na disipulo—na pasabsabon an mga karnero ni Jesus. (Juan 21:15-17) Iyo, natatagama sa enotan an espirituwal na programa nin pagpapasabsab. Bago sia nagadan, sia naghula: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon.” (Mateo 24:14) Ngonyan panahon nang pumoon an kaotoban kan hulang iyan kan enot na siglo. An mga disipulo nia itataktak na an saindang mga hikot sa dagat nin katawohan, asin an mga hikot dai babatonon na daing laog.—Mateo 28:19, 20.
14. Sa anong paagi na an paninira kan mga parasunod ni Jesus binendisyonan kaidtong mga taon bago an pagkalaglag kan Jerusalem?
14 Bago sia suminakat sa trono kan saiyang Ama sa langit, sinabihan ni Jesus an saiyang mga parasunod: “Kamo mag-aako nin kapangyarihan kun dumatong na saindo an banal na espiritu, asin kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi nin daga.” (Gibo 1:8) Kan ibubo an banal na espiritu sa mga disipulo kan Pentecostes 33 C.E., nagpoon sa gabos na nasyon an dakulang trabahong espirituwal na paninira. Kaidto sanang aldaw nin Pentecostes, tolong ribong kalag an nadakop na buhay, asin dai nahaloy “an kabilangan kan mga lalaki nagin mga limang ribo.” (Gibo 2:41; 4:4) Nagpadagos an pagdakol. Sinasabi sato kan rekord: “An mga nagturubod sa Kagurangnan padagos na idinadagdag, mga kadaklan nin mga lalaki asin babae.” (Gibo 5:14) Dai nahaloy, an mga Samaritano nagdangog sa maogmang bareta, asin paghaloyhaloy pa an dai turing mga Hentil. (Gibo 8:4-8; 10:24, 44-48) Mga 27 taon pakalihis kan Pentecostes, si apostol Pablo nagsurat sa mga Kristianong taga-Colosas na an maogmang bareta “ikinahulit [na] sa gabos na linalang sa sirong nin langit.” (Colosas 1:23) Malinaw na an mga disipulo ni Jesus naninira na nin harayo sa kadagatan nin Galilea. Itinaktak ninda an saindang mga hikot sa mga Judiong wararak sa Imperyo nin Roma, saka sa garo baga daing malalaoman na kadagatan kan mga bakong Judio. Asin ta napano an saindang mga hikot. Para sa mga pangangaipo kan mga Kristiano kan enot na siglo, an hula ni Jesus sa Mateo 24:14 naotob bago laglagon an Jerusalem kan 70 C.E.
Paninira nin mga Tawo sa “Aldaw kan Kagurangnan”
15. Sa libro nin Kapahayagan, ano pang paninira an ihinula, asin noarin iyan gigibohon?
15 Minsan siring, labi pa dian an natatagama sa ngapit. Sa paghinanapos kan enot na siglo, tinawan ni Jehova an natatadang apostol, si Juan, nin kapahayagan kan mga bagay na mangyayari sa “aldaw kan Kagurangnan.” (Kapahayagan 1:1, 10) An sarong lataw na kabtang iyo an pagpahayag kan maogmang bareta sa bilog na kinaban. Mababasa niato: “Naheling ko pa an sarong anghel na naglalayog sa tahaw kan langit, asin igwa sia nin daing katapusan na maogmang bareta na ipahahayag sa mga nag-eerok sa daga, asin sa lambang nasyon asin tribo asin tataramon patin banwaan.” (Kapahayagan 14:6) Sa paggiya nin mga anghel literal na ihuhulit kan mga lingkod nin Dios an maogmang bareta sa bilog na ineerokan na daga, bako sanang sa bilog na Imperyo nin Roma. Gigibohon an panglobong paninira nin mga kalag, asin naheling kan satong kaaldawan an kaotoban kan bisyon na iyan.
16, 17. Kasuarin nagpoon an nahuhuring espirituwal na paninira, asin paano iyan binendisyonan ni Jehova?
16 Kumusta an paninira sa ika-20 siglong ini? Sa primero, pipira sana an mga parasira. Pagkatapos kan Guerra Mundial I, igwa sana nin mga apat na ribong aktibong parahulit kan maogmang bareta, mahihigos na lalaki asin babae na an kadaklan linahidan. Itinaktak ninda an saindang hikot saen man bukasan ni Jehova an dalan, asin dakol na kalag an nadakop na buhay. Pakalihis kan ikaduwang guerra mundial, binukasan ni Jehova an bagong kadagatan para sa paninira. An mga misyonero na nag-eskuwela sa Watchtower Bible School of Gilead nangenotan sa gibohon sa dakol na kadagaan. An mga nasyon arog kan Hapon, Italia, asin España, na sa primero garo baga daing laog, kan huri naanihan nin dakol na kalag. Bago ta pa sana man na naaraman kun gurano kamapanggana an paninira sa Sirangan na Europa.
17 Ngonyan, sa dakol na nasyon haros nagigisi an mga hikot. Huli sa kadakol na naaaning kalag kinaipuhan an pag-organisar nin bagong mga kongregasyon asin sirkito. Tanganing matawan nin lugar an mga ini, daing ontok na itinotogdok an bagong mga Kingdom Hall asin Assembly Hall. Kaipuhan an dagdag pang mga magurang asin ministeryal na lingkod tanganing maasikaso an pagdakol. Makapangyarihan na gibohon an pinonan kan mga maimbod na idto kan 1919. Sa literal na paagi, naotob an Isaias 60:22. ‘An sadit nagin sangribo,’ mantang an apat na ribong parasira nagin nang labing apat na milyon ngonyan. Asin mayo pa an katapusan.
18. Paano niato maaarog an marahay na halimbawa kan espirituwal na mga parasira nin tawo kan enot na siglo?
18 Ano an kahulogan kaini gabos para sa sato bilang mga indibiduwal? Sinasabi kan kasuratan na kan si Pedro, Andres, Santiago, asin Juan agdahon na magin mga parasira nin mga tawo, saindang “binayaan an gabos patin suminunod [ki Jesus].” (Lucas 5:11) Kanigoan karahay na halimbawa nin pagtubod asin kaimbodan! Mapatatalubo man daw niato an kaparehong espiritu nin pagsasakripisyo sa sadiri, an kaparehong pagkaandam na maglingkod ki Jehova ano man an kaipuhan? Minilyon an nagsimbag na kaya ninda. Kan enot na siglo, an mga disipulo nanira nin mga tawo saen man itogot ni Jehova. Baga man sa tahaw nin mga Judio o Hentil, nanira sindang daing pag-urong-sulong. Maghulit man kita sa gabos na daing ano man na pagpopogol o pagpalaenlaen.
19. Ano an maninigo niatong gibohon kun an kadagatan na satuyang dinadakopan nin sira garo baga bakong mabunga?
19 Alagad ano kun an saindong teritoryo sa presente garo baga bakong mabunga? Dai kamo panluyahan nin boot. Girumdoma, pinano ni Jesus an mga hikot kan mga disipulo pakatapos na sinda manira nin magdamlag na daing resulta. Puwede man na mangyari an siring sa espirituwal na paagi. Sa Irlandia, halimbawa, an maimbod na mga Saksi dakol na taon na nagpagal na medyo limitado an resulta. Pero, iyan bago pa sanang naliwat. An 1991 Yearbook of Jehovah’s Witnesses nagbabareta na sa katapusan kan 1990 taon nin paglilingkod, an Irlandia nagkaigwa na nin 29 sunod-sunod na pinakahalangkaw na kabilangan! Tibaad maabot an aldaw na magbubunga man nin siring an saindong teritoryo. Sagkod na itinotogot ni Jehova, ipagpadagos an paninira!
20. Noarin kita maninigong manira nin tawo?
20 Sa Israel, an mga parasira naninira kun banggi, kun an gabos mahimbong asin komportable sa higdaan. Sinda minaluwas, bakong kun noarin kombenyente para sa sainda, kundi kun noarin sinda makadadakop kan pinakadakol na sira. Maninigo man niatong pag-adalan an satong teritoryo tanganing kita makapanira man, sabi ngani, sa oras na an kadaklan na tawo nasa harong asin maghihinanyog. Tibaad ini sa mga banggi, katapusan nin semana, o sa ibang oras. Noarin man iyan, gibohon niato an gabos niatong makakaya na manompongan an mga tawong may matanos na puso.
21. Ano an maninigo niatong girumdomon kun parateng hinuhulitan an satong teritoryo?
21 Ano kun parateng nahuhulitan an satong teritoryo? An propesyonal na mga parasira sa kinaban parateng nagrereklamo na sobra an paninira sa saindang mga pinagdadakopan nin sira. Pero puwede daw na masobrahan sa paninira an satong espirituwal na pinagdadakopan nin sira? Dai man! An dakol na teritoryo nagbubunga nin pag-oswag dawa kun parateng hinuhulitan. An iba mas nagigin mabunga huli ta nahuhulitan nin marhay. Minsan siring, kun parateng nasosongko an mga harong, siertohon na marhay na an gabos na harong na mayong tawo isinurat asin songkoon sa sunod. Adalan an laen-laen na tema sa pakikipag-olay. Girumdomon na may masongko liwat dai mahaloy, kaya dai maghaloy nin sobra o sa dai tinutuyo paanggoton an kagharong. Asin pataluboon an saindong abilidad sa paghuhulit sa tinampo saka impormal na pagpapatotoo. Itaktak an saindong espirituwal na mga hikot sa gabos na okasyon asin sa gabos na posibleng paagi.
22. Ano an dakula niatong pribilehiyo sa panahon na ini?
22 Girumdoma, sa paninirang ini nakikinabang kapwa an mga parasira asin an sira. Kun magpapadagos an mga nadakop niato, sinda mabubuhay sagkod lamang. Dinagka ni Pablo si Timoteo: “Magdanay ka sa mga bagay na ini, huli ta sa paggibo mo kaini ililigtas mo an saimo man sana asin idtong naghihinanyog sa saimo.” (1 Timoteo 4:16) Si Jesus an enot na nagtokdo sa saiyang mga disipulo sa espirituwal na paninira, asin an trabahong ini sagkod ngonyan ginigibo sa irarom kan saiyang paggiya. (Ikomparar an Kapahayagan 14:14-16.) Kanigoan kadakula kan pribilehiyo niato na magtrabaho sakop nia sa paghaman kaiyan! Ipagpadagos niatong itaktak an satong mga hikot sagkod na itinotogot ni Jehova. Anong trabaho an maorog pa sa pagdakop sa mga kalag na buhay?
Nagigirumdoman daw Nindo?
◻ Anong trabaho an itinokdo ni Jesus sa saiyang mga parasunod na gibohon?
◻ Paano ipinaheling ni Jesus na an espirituwal na paninira dai natapos sa saiyang kagadanan?
◻ Sa anong paagi na binendisyonan ni Jehova an espirituwal na paninira kan enot na siglo?
◻ Anong kadakol na sira an nadakop sa “aldaw kan Kagurangnan”?
◻ Paano kita bilang mga indibiduwal puwedeng magin orog pang mapangganang mga parasira nin tawo?
[Ritrato sa pahina 15]
Pagkabuhay liwat ni Jesus, pinahiwas kan saiyang mga apostol an banal na trabahong paninira nin mga tawo