Paninira nin mga Tawo sa Panglobong Kadagatan

“Ngonyan, kun ako nagpapahayag kan maogmang bareta, bako iyan na dahelan na ako maghambog, huli ta iyan kaipuhan na gibohon ko. Sa katotoohan, herak man sa sako kun dai ako maghulit kan maogmang bareta!”​—1 CORINTO 9:16.

1, 2. (a) Siisay an tunay na nakaatubang sa angat na ipinaririsa sa 1 Corinto 9:​16, asin taano ta siring an saindong simbag? (b) Anong paninimbagan an inako kan mga Saksi ni Jehova?

SIISAY sa ika-20 siglong ini an tunay na nakaatubang sa angat na itinatao kan mga tataramon ni Pablo na nasa itaas? Siisay an minilyon na nagluwas sa kinaban tanganing manira nin mga lalaki asin babae na “nakamamate kan saindang espirituwal na pangangaipo”? (Mateo 5:3) Siisay an inatubang pati pagkabilanggo asin kagadanan, asin siisay an nag-agi sa siring sa dakol na nasyon huli sa pag-otob kan pagboot ni Cristo sa Mateo 24:14?

² An rekord minasimbag: an mga Saksi ni Jehova. Kaidto sanang nakaaging taon labing apat na milyon na Saksi an nagharongharong na ‘nagpapahayag kan maogmang bareta’ sa 211 nasyon asin teritoryo asin sa labing 200 na tataramon. An mga ini bako sanang piling grupo nin sinanay na mga misyonero. Bako, an gabos na Saksi ni Jehova nakamamate nin paninimbagan na maghulit asin magtokdo sa harong-harong asin sa gabos na angay na okasyon. Taano ta namamatean ninda an pangangaipong iyan na ihiras sa iba an saindang mga tinutubod? Huli ta minimidbid ninda na an kaaraman may kaibang paninimbagan.​—Ezequiel 33:​8, 9; Roma 10:​14, 15; 1 Corinto 9:​16, 17.

Paninira nin mga Tawo, Panglobong Angat

3. Gurano kahiwas dapat na gibohon an paninira?

³ An dakulang paninirang ini bako sanang sa sarong salog o danaw o minsan sa sarong oseano. Bako, arog kan ipinagboot ni Jesus, iyan gigibohon “sa gabos na nasyon.” (Marcos 13:10) Bago sumakat sa saiyang Ama, sinabihan ni Jesus an saiyang mga disipulo: “Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako danay na nasa saindo sagkod sa pagtatapos kan palakaw nin mga bagay.”​—Mateo 28:​19, 20.

4. (a) Ano an seguradong nakasorpresa sa enot na mga parasunod ni Jesus na Judio? (b) Ano an punto-de-vista kan mga Saksi ni Jehova dapit sa hiwas kan saindang paghuhulit?

⁴ Para sa Judiong mga parasunod ni Jesus, segurado na iyan nakabibiglang sugo. Sinasabihan nia an saiyang mga disipulong Judio na ngonyan kaipuhan sindang dumuman sa “marigsok” na mga Hentil sa gabos na nasyon asin tokdoan sinda. Kinaipuhan ninda an pagliliwat tanganing masabotan an halaga kan asin makuyog an asignasyon na iyan. (Gibo 10:​9-35) Alagad ta dai sinda nin ibang magigibo; sinabihan sinda ni Jesus sa sarong parabola na “an oma iyo an kinaban.” Kun siring, ibinibilang ngonyan nin mga Saksi ni Jehova na sinda may diretsong manira sa bilog na kinaban. Dai puwedeng magkaigwa nin “20-kilometros na limite” o “sakop na kadagatan” na nakalilimitar sa isinugo sainda nin Dios. Kun beses kaipuhan an pag-iingat kun mayo nin relihiyosong katalingkasan. Pero, sinda naninira na may pag-apreta. Taano daw? Huli ta ipinaririsa kan mga pangyayari sa kinaban asin kan kaotoban kan hula sa Biblia na kita yaon na sa huring kabtang kan panglobong paninira.​—Mateo 13:38; Lucas 21:​28-33.

Pag-oswag sa Panglobong Paninira

5. Anong klaseng mga tawo an naghihimate sa panglobong paninira?

⁵ An kadaklan sa linahidan na mga paramana kan Kahadean “nadakop” na sa mga nasyon bago kan 1935, kaya sa pundamental nakompleto na an bilang ninda. Kun siring, nangorogna poon kan 1935, an hinahanap kan mga Saksi ni Jehova mapakumbabang mga tawo na maaapod na “mga mahoyo” na “magmamana kan daga.” (Salmo 37:​11, 29) An mga ini mga tawo na “nag-aaragagha asin nag-aaragrangay huli sa gabos na makababaldeng bagay na ginigibo.” Sinda minahiro apabor sa pamamahala kan Kahadean nin Dios bago umabot an “dakulang kahorasaan” sa maraot asin marigsok na palakaw ni Satanas asin isugba sa “naglalaad na horno” nin ultimong kalaglagan an saiyang mga parasamba.​—Ezequiel 9:4; Mateo 13:​47-50; 24:21.

6, 7. (a) Anong mga tangga an ginibo kan 1943 mapadapit sa paghuhulit? (b) Ano an nagin mga resulta?

⁶ Nagin mapanggana daw an panglobong paninira? Pabayaan ta na an mga katunayan an magtaram. Kaidtong 1943, nasa kainitan pa an Guerra Mundial II, pero natanaw na kan maimbod na linahidan na mga tugang sa pankinaban na opisina prinsipal nin mga Saksi ni Jehova sa Brooklyn, Nueva York, na kaipuhan na gibohon an mahiwas na panglobong paninira. Kaya, anong mga tangga an ginibo?a​—Kapahayagan 12:​16, 17.

⁷ Kan 1943 an Watchtower Society nag-​establisar nin paadalan sa pagmimisyonero na inaapod Gilead (Hebreo, “Tompok na Saksi”; Genesis 31:​47, 48) na nagpoon na tokdoan an sanggatos na misyonero kada anom na bulan tangani sindang ikasugo bilang simbolikong mga parasira sa bilog na daga. Kaidto, 126,329 sana an Saksi na aktibong naninira nin tawo sa 54 kadagaan. Sa laog nin sampulong taon an kabilangan na iyan luminukso sa 519,982 na Saksi sa 143 na kadagaan! Tunay nanggad, an Paadalan nin Gilead nagpapaluwas nin mapusong mga parasirang lalaki asin babae, na andam na pumaduman sa ibang mga kultura asin makibagay sa bagong lugar sa paninira. Bilang resulta, rinibong may sadiosan na puso an naghimate. An mga misyonerong idto, asin an lokal na mga Saksi na katabang ninda, nagbugtak nin pundasyon para sa makangangalas na pag-oswag na nangyayari ngonyan.

8, 9. (a) Anong mga halimbawa nin pambihirang pagmimisyonero an puwedeng sitaron? (b) Paano an mga misyonero nakaheling nin pambihirang pag-oswag sa saindang mga teritoryo? (Helingon man an 1992 Yearbook of Jehovah’s Witnesses.)

⁸ An dakol na maimbod na beterano kan enot na mga klaseng idto nin Gilead sagkod ngonyan naglilingkod sa saindang mga asignasyon sa ibang nasyon, minsan ngani ngonyan sinda labi nang 70 o 80 anyos pa ngani. An sarong halimbawa kan dakol sa sainda iyo an 82 anyos na si Eric Britten asin an agom nia, si Christina, na naggraduwar sa ika-15 klase nin Gilead kan 1950 asin sagkod ngonyan naglilingkod sa Brazil. Kan sinda magduman sa paglilingkod sa Brazil, mayo pang 3,000 na Saksi sa nasyon na iyan. Ngonyan labi nang 300,000! Tunay na ‘an sadangoton nagin makosog na nasyon’ sa Brazil huli ta nagin mabunga an paninira.​—Isaias 60:22.

⁹ Asin ano man an masasabi niato manongod sa mga misyonero sa Aprika? An kadaklan nakibagay sa laen nanggad na kultura asin namotan na an mga taga-Aprika. An halimbawa digdi iyo an magtugang na si John asin Eric Cooke saka an saindang mga agom, si Kathleen asin Myrtle, na ngonyan naglilingkod sa Aprika del Sur. Si John asin Eric naggraduwar sa ikawalong klase kan 1947. Sa pag-oltanan ninda nakapaglingkod na sinda sa Angola, Zimbabwe, Mozambique, asin Aprika del Sur. An ibang misyonero nagadan sa Aprika huli sa helang, asin an iba man huli sa guerra asin paglamag, arog ni Alan Battey asin Arthur Lawson, na nagadan kaidtong bago pa sanang guerra sibil sa Liberia. Pero, an kadagatan sa Aprika nagin mabunga nanggad. Igwa na ngonyan nin 400,000 na Saksi na lakop sa mahiwas na kontinenteng iyan.

An Gabos May Kabtang

10. Taano asin sa anong paagi na an mga payunir naggigibo nin marahayon na trabaho?

¹⁰ Minsan siring, minimidbid niato na mantang an dayong mga misyonero rinibo an kabilangan, an lokal na mga parahayag asin payunirb minilyon na. Sinda an naggigibo kan kadaklan na paghuhulit sa bilog na daga. Kan 1991 may promedyong labing 550,000 na payunir asin nagbibiyaheng mga ministro. Iyan kahangahanga nanggad na kabilangan kun iisipon niato na an gabos na maimbod na Saksing ini naggigibo nin espesyal na paghihingoa na makikabtang sa dakulang paninira, na nagpopromedyo nin poon 60 sagkod 140 oras sa paghuhulit kada bulan. An dakol ginigibo ini na dakula an personal na sakripisyo asin gasto. Alagad taano? Huli ta namomotan ninda si Jehova na saindang Dios sa bilog nindang puso, isip, kalag, asin kosog, asin namomotan ninda an saindang kataed nin siring sa sainda man sana.​—Mateo 22:​37-39.

11. Ano an siertong ebidensia kan paghiro kan espiritu ni Jehova sa tahaw kan saiyang banwaan?

¹¹ Ano an masasabi niato manongod sa labing tolo may kabangang milyon na iba pang Saksi na mayo sa bilog na panahon na paglilingkod pero 100 porsiento pa man giraray an itinatao sa paglilingkod ki Jehova, sono sa saindang mga kamugtakan? An iba mga agom na babae, mga ina pa ngani na may inaataman na saradit na aki, na nagdudusay kan iba sa saindang mahalagang panahon sa panglobong paninira. An dakol mga agom na lalaki o ama na may bilog na panahon na sekular na trabaho; pero, nagtatagama sinda nin panahon sa Sabado asin Domingo saka sa mga banggi na magtokdo kan katotoohan sa mga estranghero. Yaon man an dakulang kadaklan nin daing agom na mga lalaki asin babae saka mga hobenes na nakikakabtang sa paghuhulit asin irinirekomendar an katotoohan paagi sa saindang gawe. Ano pang ibang relihiyosong grupo an igwa nin labi sa apat na milyon na daing suweldong mga boluntaryo na bulan-bulan naghuhulit kan maogmang bareta manongod sa Kahadean nin Dios? Tunay na ebidensia ini kan paghiro kan espiritu ni Jehova!​—Salmo 68:11; Gibo 2:​16-18; ikomparar an Zacarias 4:6.

Mga Bagay na Nakakokontribuwir sa Pag-oswag

12. Taano asin sa anong mga kabilangan na an mga tawo naghihimate sa katotoohan?

¹² An mahiwas na paghuhulit na ini nagbubunga nin pambihirang mga resulta kada taon. Kan 1991 labing 300,000 na bagong Saksi an nabautismohan paagi sa lubos na pagpairarom sa tubig. Katimbang iyan nin labing 3,000 na kongregasyon na may 100 na Saksi an kada saro! Paano nagigibo an gabos na ini? Girumdomon niato an isinabi ni Jesus: “Dai nin nakadodolok sa sako kun dai sia dagkahon kan Ama . . . Nasusurat sa Mga Propeta, ‘Asin sinda gabos totokdoan ni Jehova.’ An gabos na nakadangog sa Ama asin nakanood minadolok sa sako.” Kun siring, bako sanang sa paghihingoa nin tawo na an saro naghihimate sa panglobong paninira. Namamansayan ni Jehova an kamugtakan nin puso asin dinadagka an mga maninigo na rumani sa saiya.​—Juan 6:​44, 45; Mateo 10:​11-13; Gibo 13:48.

13, 14. Anong marahay na kaisipan an ipinaheling nin dakol na Saksi?

¹³ Minsan siring, an parasirang mga tawo iyo an mga ahenteng ginagamit ni Jehova sa pagdagka sa mga tawo na rumani sa saiya. Kaya, mahalaga an kaisipan ninda manongod sa mga tawo asin sa teritoryong pinaniniraan ninda. Nakapakokosog nanggad na maheling na an kadaklan isinapuso an mga tataramon ni Pablo sa mga taga-Galacia: “Kaya dai kita mag-ontok sa paggibo nin karahayan, huli ta sa kapanahonan kita mag-aani kun kita dai mapagal.”​—Galacia 6:9.

¹⁴ An dakol na maimbod na Saksi dakol nang dekadang naghuhulit, mantang binabantayan na marhay an mga nangyayari sa kinaban. Naheling ninda an paglataw asin pagbagsak nin Nazismo, Fascismo, asin iba pang sistemang totalitaryo. An iba naheling an dakol na guerrang nangyari poon kan 1914. Naheling ninda an pagbugtak kan mga namomoon sa kinaban kan saindang paglaom sa Liga de Naciones dangan sa Naciones Unidas. Naheling ninda an pagprohibir sa dangan pagigin legal kan gibohon ni Jehova sa dakol na kadagaan. Sa gabos na pangyayaring ini, an mga Saksi ni Jehova dai nag-ontok sa paggibo kan marahay, pati an paglilingkod bilang mga parasira nin tawo. Pambihira nanggad na rekord nin integridad!​—Mateo 24:13.

15. (a) Ano an tabang na nakamtan niato sa pakikibagay sa mga pangangaipo kan satong pankinaban na teritoryo? (b) Paano nakatabang an mga babasahon sa saindong asignasyon?

¹⁵ Igwa pa nin ibang bagay na nakakontribuwir sa lakop sa kinaban na pagtalubong ini. An saro iyo an ikinababagay na kaisipan kan mga parasira nin tawo dapit sa mga pangangaipo kan teritoryo. Huli sa pagbalyo nin mga tawong hale sa laen man na kultura, relihiyon, asin tataramon, pinahiwas kan mga Saksi ni Jehova an pakasabot ninda sa laen-laen na mga punto-de-vistang ini. Asin an pankinaban na kongregasyon nakatabang na gayo paagi sa paggibo nin mga Biblia asin babasahon sa Biblia sa labing 200 na tataramon. An New World Translation of the Holy Scriptures, bilog o kabtang sana, ngonyan nasa 13 tataramon, kabale an Czech asin Eslovaco. An pulyetong Enjoy Life on Earth Forever! nasa 198 tataramon na ngonyan, magpoon sa Albaniano sagkod sa Zulu, na may naimprenta nang 67 milyones na kopya. An librong The Greatest Man Who Ever Lived nasa 69 nang tataramon. An Mankind’s Search for God, na ipinublikar sa 29 tataramon, nagtatao nin pagmansay sa ginikanan asin mga paniniwala kan mayor na mga sistema relihiyoso sa kinaban asin nagigin pambihirang tabang sa panglobong paninira.

16. Paano huminiro an iba bilang simbag sa mga pangangaipo sa ibang nasyon?

¹⁶ Ano pa an nakapaoswag sa panglobong paninira? Rinibo an suminimbag sa ‘pag-apod kan Macedonio.’ Kun paanong si Pablo nagustong bumalyo hale sa Asia Minor pasiring sa Macedonia sa Europa, sa pag-apod nin Dios, dakol na Saksi an nagbalyo sa kadagaan asin teritoryo na mas dakula an pangangaipo para sa mga parahulit kan Kahadean, saka sa mga magurang asin ministeryal na lingkod. Garo sinda literal na mga parasira na naheling na dakol na an parasira sa saindang lokal na dagat asin minabalyo sa kadagatan na mas kadikit an sakayan asin dakol an sira.​—Gibo 16:​9-12; Lucas 5:​4-10.

17. Ano an mga halimbawa niato kan mga naghimate sa ‘pag-apod kan Macedonio’?

¹⁷ Kabale sa bago pa sanang mga klase kan paadalan nin Gilead sa pagmimisyonero an mga estudyante hale sa laen-laen na nasyon sa Europa na nag-adal nin Ingles asin nagpresentar na maglingkod sa ibang nasyon asin kultura. Siring man, paagi sa Paadalan sa Ministeryal na Pagtotokdo, an dakol na tugang na lalaking daing agom tinatawan nin duwang bulan na sigidong pagtotokdo dangan isinusugo sa ibang nasyon tanganing magpakosog sa mga kongregasyon asin sirkito. An iba pang pambihirang lugar sa paninira yaon sa mga teritoryo na ngonyan nabubukasan sa Sirangan na Europa asin sa dating mga republikang Sobyet.​—Ikomparar an Roma 15:​20, 21.

18. (a) Taano ta sa parate epektibong mga ministro an mga payunir? (b) Paano ninda matatabangan an iba sa kongregasyon?

¹⁸ An dugang pang tabang sa pankinaban na paninira iyo an Paadalan sa Payunir na Paglilingkod na inaatenderan nin mga regular payunir. Paagi sa duwang semanang sigidong pag-adal sa librong Nagliliwanag Siring sa mga Ilaw sa Kinaban, na esklusibong inandam para sa mga payunir, pinaooswag ninda an saindang abilidad sa ministeryo mantang pinag-aadalan ninda an mga tema na arog kan “Paghihingoa na Maotob an Dalan nin Pagkamoot,” “Sumunod ki Jesus Bilang Padara,” asin “Pagkultibar kan Abilidad sa Pagtotokdo.” Kanigoan an pagpasalamat kan gabos na kongregasyon na magkaigwa kan mga grupong ini nin kuwalipikadong mga parasira sa harong-harong na makatotokdo sa dakol sa dakulang paninirang ini!​—Mateo 5:​14-16; Filipos 2:15; 2 Timoteo 2:​1, 2.

Puwede daw Kitang Umoswag?

19. Kapareho ni apostol Pablo, paano niato mapaooswag an satong ministeryo?

¹⁹ Kapareho ni Pablo, boot niatong magkaigwa nin positibo, nakatanaw sa enotan na kaisipan. (Filipos 3:​13, 14) Nakibagay sia sa gabos na klase nin tawo asin mga kamugtakan. Tatao siang humanap nin puntong mapagkakaoyonan asin mangatanosan basado sa lokal na mga kaisipan asin kultura. Makapopoon kita nin mga pag-adal sa Biblia paagi sa pagigin alisto sa reaksion nin kagharong sa mensahe kan Kahadean dangan pagbagay kan satong pag-aatubang sa mga pangangaipo kan tawo. Mantang kadakol na klase kan satong mga pantabang sa pag-adal sa Biblia, ikaaalok niato an angay sa punto-de-vista kan tawo. An satuyang pagigin madaling makibagay asin alisto mahalaga man na mga bagay sa mabungang paninira.​—Gibo 17:​1-4, 22-28, 34; 1 Corinto 9:​19-23.

20. (a) Taano ta napakahalaga ngonyan kan satong paninira? (b) Ano an satong indibiduwal na paninimbagan ngonyan?

²⁰ Taano ta napakahalaga ngonyan kan pambihirang panglobong paninirang ini? Huli ta sa mga hula kan Biblia na naririsa sa mga nangyari asin sa mga nangyayari pa, risa na an pankinaban na palakaw ni Satanas pasiring sa kapahapahamak na katapusan. Kaya, ano an maninigong gibohon niato na mga Saksi ni Jehova? An tolong artikulong pag-aadalan sa magasin na ini nagtampok kan paninimbagan niato na magin mahigos asin maigot sa satong paninira sa satong kabtang sa panglobong kadagatan. Nasa sato an marigon na garantiya hale sa Biblia na dai lilingawan ni Jehova an satong mahigos na paninira. Si Pablo nagsabi: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod. Alagad minamawot niamo na an lambang saro sa saindo magpaheling kan kaparehong kahigosan tanganing magkaigwa kan biyong kasiertohan kan paglaom sagkod sa katapusan.”​—Hebreo 6:​10-12.

[Mga Nota sa Ibaba]

Nagigirumdoman daw Nindo?

◻ Taano ta ibinibilang kan mga Saksi ni Jehova an bilog na kinaban na teritoryo ninda sa paninira?

◻ Anong bendisyon an itinao kan paadalan nin Gilead sa pagmimisyonero sa paninira?

◻ Ano an nagkapirang bagay na nakakontribuwir sa kapangganahan kan mga Saksi ni Jehova?

◻ Paano niato mapaooswag bilang indibiduwal an satong Kristianong ministeryo?

[Tsart sa pahina 20]

Mga Resulta nin Internasyonal na Paninira

Taon Nasyon Saksi

1939 61 71,509

1943 54 126,329

1953 143 519,982

1973 208 1,758,429

1983 205 2,652,323

1991 211 4,278,820

[Ritrato sa pahina 21]

An paghuhulit sagkod ngonyan ginigibo sa mga parasira sa Galilea