Ano an Kahulogan Para sa Saindo kan Hikot Asin Sira?
“Itinao sa saindo an pakasabot kan banal na mga hilom kan kahadean nin mga langit.”—MATEO 13:11.
1, 2. Taano ta tibaad magkainteres kita sa mga ilustrasyon ni Jesus?
NAOOGMA daw kamong makaaram nin hilom o masimbag an depisil na iisipon? Ano kun an paggibo kaiyan makatatabang saindo na mas malinaw na masabotan an saindong kabtang sa katuyohan nin Dios? Makaoogma, makakamtan nindo an siring kapalad na pagmansay paagi sa sarong ilustrasyon na itinao ni Jesus. Iyan pinag-isipan nin hararom nin dakol na nakadangog kaiyan asin pinag-isipan man nin hararom nin dai mabilang na iba pa poon kaidto, pero kaya nindong masabotan iyan.
2 Mangnoha an isinabi ni Jesus sa Mateo kapitulo 13 manongod sa paggamit nia nin mga ilustrasyon. An saiyang mga disipulo naghapot: “Taano ta nagtataram ka sa sainda paagi sa mga ilustrasyon?” (Mateo 13:10) Iyo, taano ta naggamit si Jesus nin mga ilustrasyon na dai masasabotan nin dakol? Nagsimbag sia sa bersikulo 11 sagkod 13: “Itinao sa saindo an pakasabot kan banal na mga hilom kan kahadean nin mga langit, alagad dai iyan itinao sa mga tawong idto. . . . Ini an dahelan na ako nagtataram sa sainda paagi sa mga ilustrasyon, huli ta, sa pagheling, dai sinda nakaheheling, asin sa pagdangog, dai sinda nakadadangog, ni nasasabotan man ninda iyan.”
3. Paano magtatao sato nin mga pakinabang an pakasabot sa mga ilustrasyon ni Jesus?
3 Dangan iinaplikar ni Jesus an Isaias 6:9, 10, na naglaladawan sa mga tawo na bongog asin buta sa espirituwal. Alagad kita dai man kaipuhan na magin siring. Kun kita nakasasabot asin minagawe oyon sa saiyang mga ilustrasyon, puwede kitang magin maogmahon—ngonyan asin sagkod sa ngapit na daing katapusan. Itinatao sato ni Jesus an may pagkamoot na garantiyang ini: “Maogma an saindong mga mata huling an mga iyan nakamamansay, asin an saindong mga talinga huling iyan nakadadangog.” (Mateo 13:16) An garantiyang iyan para sa gabos na ilustrasyon ni Jesus, pero isentro niato an satong atension sa halipot na parabola kan hikot, na nasusurat sa Mateo 13:47-50.
Sarong Ilustrasyon na May Hararom na Kahulogan
4. Ano an isinaysay ni Jesus paagi sa ilustrasyon, na nasusurat sa Mateo 13:47-50?
4 “An kahadean kan kalangitan nakaaagid sa sarong hikot na itinaktak sa dagat asin nagtitipon nin gabos na klaseng sira. Kan iyan mapano iyan ginuyod ninda sa baybayon asin, sa pagtukaw, tinipon ninda an mga marahay sa mga lalagan, alagad an mga dai maninigo itinapok ninda. Siring an mangyayari sa pagtatapos kan palakaw nin mga bagay: an mga anghel maruluwas asin ibubulag an mga maraot sa mga matanos asin isusugba sinda sa naglalaad na horno. Dian an saindang pagtangis asin pagragot kan saindang mga ngipon.”
5. Anong klaseng mga hapot an minalataw kun dapit sa kahulogan kan parabola kan hikot?
5 Seguro nakaheling na kamo nin mga nandadakop nin sira paagi sa hikot, kisuerra sa pelikula o sa telebisyon, kaya bakong depisil na imahinaron an parabola ni Jesus. Alagad kumusta an mga detalye asin an kahulogan? Halimbawa, sinabi ni Jesus na an ilustrasyon na ini manongod sa “kahadean kan kalangitan.” Pero, sierto na dai nia boot sabihon na an “gabos na klaseng” tawo, an marahay asin an dai maninigo, o maraot, mapapasa Kahadean. Saro pa, siisay an maninira? An paninira asin pagbubulagbulag daw na ini nangyari kan aldaw ni Jesus, o iyan daw sa sato sanang panahon, “sa pagtatapos kan palakaw nin mga bagay”? Naheheling daw nindo an saindong sadiri sa parabolang ini? Paano nindo malilikayan na mapabilang sa mga nagtatangis asin nagraragot an ngipon?
6. (a) Taano ta maninigo kitang magkainteres na gayo na masabotan an parabola kan hikot? (b) Ano an sarong liyabe sa pagsabot kaiyan?
6 An siring na mga hapot nagpapaheling na bakong simple an ilustrasyon na ini. Pero dai nindo lingawan: “Maogma an saindong mga mata huling an mga iyan nakamamansay, asin an saindong mga talinga huling iyan nakadadangog.” Helingon niato kun masususog niato an kahulogan kaiyan tangani na an satong talinga bakong dai naghihimate asin an satong mata bakong pirong sa kahulogan kaiyan. An totoo, igwa na kita nin mahalagang liyabe sa pagbukas sa kahulogan kaiyan. An sinusundan na artikulo nagsabi manongod sa pag-agda ni Jesus sa mga parasirang taga-Galilea na bayaan an trabahong iyan asin gibohon an espirituwal na trabaho bilang “mga parasira nin mga tawo.” (Marcos 1:17) Sinabihan nia sinda: “Poon ngonyan magdadakop [kamo] nin mga tawong buhay.”—Lucas 5:10.
7. Ano an ipinag-iilustrar ni Jesus kan sia magtaram manongod sa sira?
7 Kaoyon dian, an sira sa parabolang ini nagrerepresentar sa mga tawo. Kaya, sa pagtaram kan bersikulo 49 manongod sa pagbubulag kan mga maraot sa mga matanos, an boot sabihon kaiyan, bakong matanos o maraot na mga sira, kundi matanos o maraot na mga tawo. Siring man, an bersikulo 50 dai maninigong magpagirumdom sato manongod sa mga hayop sa dagat na nananangis o nagraragot an ngipon. Dai. An parabolang ini manongod sa pagtipon sa mga tawo asin sa pagbubulagbulag sa sainda, na seryoso nanggad, siring kan ipinaheheling kan resulta.
8. (a) Ano an manonodan niato kun dapit sa resulta para sa sirang dai maninigo? (b) Huli sa isinabi manongod sa sirang dai maninigo, ano an magigin konklusyon niato mapadapit sa Kahadean?
8 Mangnohon na an sirang dai maninigo, an boot sabihon, an mga maraot, isusugba sa naglalaad na horno, na dian sinda mananangis asin magraragot an ngipon. Sa ibang lugar ikinonektar ni Jesus an siring na pagtangis asin pagragot sa pagigin nasa luwas kan Kahadean. (Mateo 8:12; 13:41, 42) Sa Mateo 5:22 asin 18:9, nasambitan pa ngani nia an “naglalaad na Gehenna,” na an boot sabihon permanenteng kalaglagan. Dai daw ipinaheheling kaiyan kun gurano kahalaga na masabotan an ilustrasyon na ini asin gumawe oyon dian? Kita gabos nakaaaram na mayo ni magkakaigwa man nin mga maraot sa Kahadean nin Dios. Kaya, kan sabihon ni Jesus na “an kahadean kan kalangitan nakaaagid sa sarong hikot,” siertong boot niang sabihon na may koneksion sa Kahadean nin Dios, may sarong bagay na nakaaagid sa sarong hikot na itinataktak tanganing tiponon an laen-laen na klase nin sira.
9. Paano napapalabot an mga anghel sa ilustrasyon kan hikot?
9 Pakataktakan kan hikot asin pakatipona kan mga sira, magkakaigwa nin pagbubulagbulag. Siisay an sinabi ni Jesus na kalabot digdi? Sinabi kan Mateo 13:49 na an mga parasira-parabulag na ini mga anghel. Kaya an sinasabi sato ni Jesus pamamahala nin mga anghel sa sarong instrumento sa daga na ginagamit sa pagmidbid sa mga tawo—an iba marahay asin maninigo sa Kahadean nin langit, an iba man dai maninigo sa pag-apod na iyan.
An Paninira—Noarin?
10. Paagi sa anong pangangatanosan na madideterminaran niato na an paninira naglawig nin panahon?
10 Tinatabangan kita kan konteksto na maaraman kun noarin ini aplikado. Bago kaini, si Jesus nagtao nin ilustrasyon manongod sa pagsabwag nin marahay na banhi, alagad ta may nagsabwag man nin doot sa oma, na naglaladawan sa kinaban. Ipinaliwanag nia sa Mateo 13:38 na an marahay na banhi nagrepresentar sa “mga aki kan kahadean; alagad an mga doot iyo an mga aki kan maraot.” An mga ini magkataed na tuminubo sa dakol na siglo, sagkod sa pag-ani sa pagtatapos kan palakaw nin mga bagay. Dangan an mga doot ibinulag asin pagkatapos sinolo. Sa pagbaing kaini sa ilustrasyon kan hikot, maheheling niato na an pagpalaog nin mga sira sa hikot malawig nin panahon.—Mateo 13:36-43.
11. Paano nagpoon an internasyonal na paninira kan enot na siglo?
11 Sono sa parabola ni Jesus, daing pili an pagtipon sa mga sira, an boot sabihon, dadakopon kan hikot kapwa an marahay na sira asin an dai maninigong sira. Kan buhay pa an mga apostol, an mga anghel na naggigiya sa paninira ginamit an Kristianong organisasyon nin Dios sa pagdakop nin mga “sira” na nagin linahidan na mga Kristiano. Puwedeng sabihon na bago kan Pentecostes 33 C.E., an paninira ni Jesus nin mga tawo nakadakop nin mga 120 disipulo. (Gibo 1:15) Alagad kan maestablisar na an kongregasyon nin linahidan na mga Kristiano, nagpoon an paninira paagi sa instrumentong hikot, asin nadakop an rinibong marahay na sira. Poon kan 36 C.E., an paninira huminiwas sagkod sa internasyonal na kadagatan, kan an mga Hentil maakit sa Kristianismo asin magin mga miembro kan linahidan na kongregasyon ni Cristo.—Gibo 10:1, 2, 23-48.
12. Ano an tuminubo pagkagadan kan mga apostol?
12 Kan mga siglo pagkagadan kan mga apostol, padagos na nagkaigwa nin nagkapirang Kristiano na naghihingoang manompongan asin pangaptan an banal na katotoohan. Kisuerra nagkapira sa mga ini an may pag-oyon nin Dios, asin linahidan nia sinda nin banal na espiritu. Pero, nahale kan pagkagadan kan mga apostol an nakapopogol na impluwensia, na nagtogot na tumubo an lakop na apostasiya. (2 Tesalonica 2:7, 8) May tuminubong organisasyon na naghingako nin dai maninigo bilang kongregasyon nin Dios. Iyan putik na naghingako na iyo an banal na nasyon na linahidan kan espiritu nin Dios na maghade kaiba ni Jesus.
13. Taano ta masasabi na an Kakristianohan nagkaigwa nin kabtang sa pandakop paagi sa hikot?
13 Sa paghona daw nindo an bakong maimbod na mga naghihingako nin Kristianismo nagkaigwa nin kabtang sa ilustrasyon kan hikot? Bueno, may dahelan na sumimbag na iyo. Kabale sa simbolikong hikot an Kakristianohan. Totoo, sa dakol na siglo hiningoa kan Iglesya Katolika na itago sa ordinaryong mga tawo an Biblia. Pero, sa nag-aging mga siglo an mga miembro nin Kakristianohan nagkaigwa nin mayor na kabtang sa pagtradusir, pagkopya, asin pagwaras kan Tataramon nin Dios. Kan huri an mga iglesya nag-organisar o nagsuportar sa mga sosyedad sa Biblia, na nagtradusir kan Biblia sa mga tataramon nin hararayong lugar. Nagsugo man sinda nin mga medikal na misyonero asin paratokdo, na guminibo nin mga Kristiano sa bagas. Tinipon kaini an kadakol na sirang dai maninigo, na mayo kan pag-oyon nin Dios. Pero minsan paano ipinamidbid kaiyan sa minilyon na bakong Kristiano an Biblia asin an sarong klase nin Kristianismo, minsan ngani nagin maraot.
14. Paano an paninira nin marahay na sira natabangan kan ibang trabaho kan mga iglesya nin Kakristianohan?
14 Sa gabos na panahon na ini, an nagkawararak na mga maimbod na nangangapot sa Tataramon nin Dios naghingoa sagkod sa makakaya ninda. Sa ano man na panahon, sinda an tunay na linahidan na kongregasyon nin Dios digdi sa daga. Asin masisierto niato na sinda man nakadadakop nin sira, o mga tawo, na an dakol ibibilang nin Dios na marahay asin lalahidan nia kan saiyang espiritu. (Roma 8:14-17) An marahay na mga naghihingakong ini nin Kristianismo nadara an katotoohan kan Biblia sa dakol na nagin mga Kristiano sa bagas o nagkamit nin limitadong kaaraman sa Biblia gikan sa Kasuratan na trinadusir sa saindang tataramon kan mga sosyedad sa Biblia kan Kakristianohan. Totoo, nagpapadagos an pagtipon sa marahay na sira, minsan ngani an kadaklan na natitipon kan Kakristianohan dai maninigo sa pagheling nin Dios.
15. Ano man nanggad an irinirepresentar kan hikot sa parabola?
15 Kaya an hikot nagrerepresentar sa sarong daganon na instrumento na naghihingakong kongregasyon nin Dios asin nagtitipon nin sira. Kabale dian an Kakristianohan asin an kongregasyon nin linahidan na mga Kristiano, an ikaduwa nagpadagos na magtipon nin marahay na sira, sa irarom kan dai naheheling na paggiya kan mga anghel, kaoyon kan Mateo 13:49.
Espesyal an Satong Panahon
16, 17. Taano an panahon na nabubuhayan niato ta napakahalaga sa kaotoban kan ilustrasyon ni Jesus manongod sa hikot?
16 Pag-olayan niato ngonyan an panahon na napapalabot. Sa dakol na siglo an instrumentong hikot nagtipon nin marahay na sira saka nin dakol na dai maninigo, o maraot. Dangan uminabot an panahon na an mga anghel napalabot sa paggibo nin napakahalagang gibong pagbubulagbulag. Kasuarin? Bueno, malinaw na sinasabi kan bersikulo 49 na iyan sa “pagtatapos kan palakaw nin mga bagay.” Tamang-tama ini sa isinabi ni Jesus sa ilustrasyon kan mga karnero asin kanding: “Kun an Aki nin tawo magdatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamurawayon na trono. Asin an gabos na nasyon titiponon sa atubang nia, asin pagbubulagbulagon nia an mga tawo, kun paanong ibinubulag nin pastor an karnero hale sa mga kanding.”—Mateo 25:31, 32.
17 Kaya, kaoyon sa Mateo 13:47-50, nangyayari an napakahalagang gibong pagbubulagbulag sa paggiya nin mga anghel poon kan pumoon an “pagtatapos kan palakaw nin mga bagay” kan 1914. Ini partikularmenteng nahayag pakalihis kan 1919, kan an natatada sa mga linahidan makalda sa temporaryong espirituwal na kaoripnan, o pagkabihag, asin nagin mas epektibong instrumento para sa paninira.
18. Paano tiniripon sa mga lalagan an marahay na sira?
18 Ano an mangyayari sa ibinulag na marahay na sira? An bersikulo 48 nagsasabi na an mga anghel na parasira-parabulag “tinipon . . . an mga marahay [na sira] sa mga lalagan, alagad an mga dai maninigo itinapok ninda.” An mga lalagan nagpoprotehir na mga bugtakan na dian ilinalaog an marahay na sira. Nangyari daw ini sa satong panahon? Iyo nanggad. Mantang nadadakop nin buhay an marahay na sira, sinda tinitipon sa mga kongregasyon nin tunay na mga Kristiano. An garo-lalagan na mga kongregasyon na ini nakatabang na ingatan asin itagama sinda para sa banal na paglilingkod, bako daw? Pero, tibaad isipon nin iba, ‘Marahay ini, pero ano an koneksion kaiyan sa sakong presenteng buhay asin sa sakong ngapit?’
19, 20. (a) Taano ta kaipuhan ngonyan na masabotan an parabolang ini? (b) Anong mahalagang paninira an ginibo poon kan 1919?
19 An kaotoban kan ipinag-ilustrar digdi bako sanang sa mga siglong nasa pag-oltanan kan panahon nin mga apostol asin kan 1914. Kan panahon na idto, an instrumentong hikot tinipon kapwa an falso asin tunay na mga naghihingako nin Kristianismo. Iyo, tinitipon kaidto an dai maninigong sira asin an marahay na sira. Saro pa, an pagbubulagbulag na ginigibo kan mga anghel dai natapos kaidtong 1919. Dai nanggad. Sa nagkapirang punto an ilustrasyon na ini kan hikot minaaplikar sagkod sa mismong panahon niato. Kalabot kita saka an satong haraning ngapit. Kaipuhan na masabotan niato kun paano asin kun taano ta siring kun boot niato na iladawan kita kan mga tataramon na ini: “Maogma an saindong mga mata huling an mga iyan nakamamansay, asin an saindong mga talinga huling iyan nakadadangog” na may pakasabot.—Mateo 13:16.
20 Posibleng aram nindo na pakalihis kan 1919 an linahidan na natatada nagmasibot sa paghuhulit bilang pagkooperar sa mga anghel, na padagos na naggamit kan simbolikong hikot sa pagguyod sa mga sira pasiring sa baybayon, tanganing ibulag an mga marahay sa mga dai maninigo. Ipinaheheling kan mga estadistika kan panahon na idto na an pagdakop sa marahay na mga sira para sa paglahid kan espiritu nin Dios nagpadagos mantang tinitipon kan simbolikong hikot an mga ultimo kan 144,000. (Kapahayagan 7:1-4) Pero pag-abot kan kabangaan nin mga 1930, sa pundamental natapos na an pagtipon sa marahay na sira para sa paglahid kan banal na espiritu. Itatapok na daw kan kongregasyon nin linahidan na natatada an hikot asin magtutukawtukaw na sana, na hinahalat an saindang langitnon na balos? Dai man!
An Labot Nindo sa Paninira
21. Anong ibang klaseng paninira an nangyari sa satong panahon? (Lucas 23:43)
21 An ilustrasyon ni Jesus kan hikot nasisentro sa marahay na sira na babalosan nin lugar sa Kahadean kan kalangitan. Pero, apuwera sa ilustrasyon na iyan, igwa nin iba pang simbolikong paninira na nangyayari sa mahiwas na sokol, siring kan ipinag-ilustrar sa sinusundan na artikulo. An paninirang ini, bakong sa pagdakop kan marahay na linahidan na sira na sinasabi sa ilustrasyon ni Jesus, kundi para sa simbolikong sira na dadakopon na buhay asin tatawan kan makangangalas na paglaom na buhay sa sarong paraisong daga.—Kapahayagan 7:9, 10; ikomparar an Mateo 25:31-46.
22. Anong maogmang resulta an puwede niatong maeksperyensiahan, asin ano an saro pa?
22 Kun igwa kamo kan paglaom na iyan, kun siring makapag-oogma kamo na itinogot ni Jehova na magpadagos sagkod ngonyan an nagliligtas-buhay na paninira. Ini nagpangyari saindo na magkamit nin makangangalas na paglaom. Paglaom? Iyo, iyan an tamang termino, ta an resulta sono sa satong padagos na kaimbodan sa Saro na naggigiya sa nagpapadagos na paninira. (Sofonias 2:3) Girumdoma sa ilustrasyon na bakong gabos na nadadakop kan hikot nagkakamit nin marahay na resulta. Sinabi ni Jesus na an mga dai maninigo, o maraot, ibubulag sa mga matanos. Sa anong katuyohan? Sa Mateo 13:50, ilinadawan ni Jesus an seryosong resulta para sa dai maninigo, o maraot, na sira. An mga ini isusugba sa naglalaad na horno, na nangangahulogan daing sagkod na kalaglagan.—Kapahayagan 21:8.
23. Taano ta napakahalaga ngonyan kan paninira?
23 Para sa marahay na linahidan na sira, saka sa simbolikong sira na tibaad mabuhay sagkod lamang digdi sa daga, may mamuraway na ngapit. Kaya may marahay na dahelan na sinisierto kan mga anghel na sa panahon mismong ini gibohon an mapangganang paninira sa bilog na kinaban. Asin kadakol nanggad kan nadadakop! Tama kamo sa pagsabi na sa sarong punto-de-vista, iyan arog kamilagroso kan pakadakop nin literal na sira kan mga apostol kan itaktak ninda an saindang mga hikot sa pagboot ni Jesus.
24. Ano an maninigong mawoton niatong gibohon mapadapit sa espirituwal na paninira?
24 Ginigibo daw nindo an pinakaaktibong pakikikabtang na magigibo nindo sa nagliligtas-buhay na gibohon na ini nin espirituwal na paninira? Gurano man kadakula kan satong indibiduwal na kabtang sagkod sa panahon na ini, an kada saro sato makikinabang sa pagheling sa nahahaman sa bilog na kinaban sa makangangalas na paninira asin nagliligtas-buhay na gibohon ngonyan. An paggibo kaiyan maninigong makamotibar sato sa orog pang kaigotan sa pagtaktak kan mga hikot sa pandakop sa nagdadangadang na mga aldaw!—Ikomparar an Mateo 13:23; 1 Tesalonica 4:1.
Nagigirumdoman daw Nindo an mga Puntong Ini?
◻ Ano an irinirepresentar kan duwang klaseng sira sa parabola ni Jesus kan hikot?
◻ Sa anong sentido na an mga iglesya kan Kakristianohan napalabot sa paninira?
◻ Taano ta kritikal an paninira na nangyayari sa satong panahon?
◻ An parabola kan hikot maninigong gumiya sa kada saro sato na gumibo nin anong pagsiyasat sa sadiri?
[Ritrato sa pahina 14]
Dakol nang siglo na ginigibo an paninira sa Dagat nin Galilea
[Credit Line]
Pictorial Archive (Near Eastern History) Est.