Kun Taano ta Bakong Maogma an Kamugtakan sa Buhay nin Sarong Reklamador
AN PAG-OGMA nagin kadaihan nin paglaom sa laog sana nin pirang semana. An kaogmahan sa primero kan mga Israelita huli sa saindang bagong katalingkasan sa kaoripnan sa Egipto nagin nang paggumodgumod huli sa kakanon. Sa ikaduwang bulan pagkahale ninda sa Egipto, an diskontentong nasyon nagsabi na mas gusto ninda an buhay nin oripon kisa masakit na buhay sa kapatagan. Sa suminunod na mga bulan, an espiritung ini nin pagrireklamo nakapaluya sa saindang determinasyon na kumuyog ki Jehova asin nakaraot sa paglaom kan kapag-arakian na idto na lumaog sa Dagang Panuga.—Exodo 16:1-3; Bilang 14:26-30.
Siyempre, an pagrireklamo nungka na sa saro sanang kapag-arakian o sarong banwaan. Siisay an dai kun minsan nagrireklamo dapit sa trabaho, kakanon, panahon, mga aki, pagtaraed, o presyo nin mga barakalon? Garo baga an pagkabakong sangkap nin tawo ginigibo siang magkatendensiang magreklamo.—Roma 5:12; Santiago 3:2.
Taano ta madalion kitang magreklamo? Tibaad kita pinanluluyahan nin boot, mamondo, o may helang. An pagreklamo puwedeng magin paluwasan kan satong pagkabigo, o iyan puwedeng bakong direktang paagi nin pagsabing: “Magigibo ko nin mas marahay an trabahong iyan!” Kun beses an mga reklamo gikan sa pagkakatumang nin personalidad. Siring man, may tunay na mga hinanakit.
Ano man an causa, siring sa ipinaheheling kan nasabing halimbawa kan mga Israelita, an pagrireklamo puwedeng magin mapanlaglag kun iyan nagpapadagos. An saro puwedeng magin nagtuod nang reklamador, na naggugumodgumod pati sa mga paagi ni Jehova. Taano ta peligrosong marhay iyan? Asin paano maaasikaso nin tama an totoong mga reklamo?
Totoong mga Reklamo
Kun bako man na seryoso an hinanakit, an enot niatong maninigong ihapot iyo ini, Puwede ko daw iyan na lingawan huli sa pagkamoot? Totoo, tibaad igwa kita nin balidong reklamo tumang sa saro, tibaad sa kapagtubod pa ngani. Tibaad trinato nia kita nin bakong maboot o bakong makatanosan. Minsan siring, an pagrireklamo daw sa iba manongod sa bakong makatanosan na tratamiento maparahay sa mga bagay? Ano an rekomendasyon kan Biblia na magin reaksion niato? An Colosas 3:13 nagsasabi: “Padagos kamong magpatiriostios asin magpatarawadtawadan kun an siisay man igwa nin sumbong tumang sa saro. Kun paanong pinatawad kamo ni Jehova, siring man an gibohon nindo.” Kaya dawa kun may katanosan an reklamo, an irinirekomendar kan Kasuratan pagpapatawad imbes na pagrireklamo.—Mateo 18:21, 22.
Ano kun an bagay seryosong marhay tanganing malingawan? Tibaad may marahay na dahelan na ipahayag an reklamo. Kan an balidong “kurahaw nin reklamo” makaabot ki Jehova dapit sa Sodoma asin Gomorra, huminiro sia sa pagresolber sa makasosopog na situwasyon sa marigsok na mga siudad na idto. (Genesis 18:20, 21) An saro pang tamang reklamo naglataw dai nahaloy pakalihis kan Pentecostes 33 C.E. Kan iwinawaras an kakanon sa dukhang mga balo, ipinaorog an mga babaeng Hebreo. Siyempre, ipinagsentir ini kan mga balong Griego. Sa katapustapusi, nakaabot an reklamo sa pagdangog kan mga apostol, asin listo sindang nag-organisar nin grupo nin responsableng mga lalaki tanganing itanos an problema.—Gibo 6:1-6.
An nombradong Kristianong kamagurangan ngonyan dai man maninigong mag-atraso sa paghiro kun may dinadarang seryosong mga bagay sa saindang atension. An Talinhaga 21:13 nagsasabi: “An nagtatahob kan saiyang talinga sa nagrireklamong agrangay kan dukha, sia man mismo maapod asin dai sisimbagon.” Imbes na dai intindihon an tamang reklamo, an kamagurangan maninigong maghinanyog na may simpatiya. Sa ibong na lado, kita gabos makakokooperar paagi sa pagsabi kan seryosong mga reklamo sa kamagurangan, imbes na isabi iyan sa gabos na gustong maghinanyog.
Minsan siring, an kadaklan sa sato prangkang maadmitir na may mga panahon na an pagkabakong sangkap nin tawo nagigin dahelan na kita magreklamo nin dai man kaipuhan. An orog na pagsiyasat sa iginawe kan mga Israelita sa kapatagan matabang sato na masabotan an peligro nin pagtogot na an paminsanminsan na paggumodgumod magin espiritu nin pagrireklamo.
An Pagheling nin Dios sa mga Reklamador
An paggumodgumod kan mga Israelita dapit sa kakanon nagbubuyagyag nin duwang peligro sa pagrireklamo. Enot, an pagrireklamo nakaoolakit. Sinasabi kan tala na “an bilog na katiriponan kan mga aki ni Israel nagpoon na maggurumodgumod tumang ki Moises asin ki Aaron sa kapatagan.” (Exodo 16:2) Posible na an nagkapira nagpoon na magreklamo manongod sa kakulangan nin kakanon, asin dai nahaloy nagrireklamo na an gabos.
Ikaduwa, sa parate pinadadakula kan reklamador an problema. Sa kasong ini, sinabi kan mga Israelita na magigin mas marahay pa an kamugtakan ninda sa Egipto, na duman makakakan ninda an gabos na tinapay asin karneng gusto ninda. Nagreklamo sinda na dinara sinda sa kapatagan tangani sanang magadan sa gutom.—Exodo 16:3.
Talaga daw na siring kakritikal an kamugtakan kan mga Israelitang idto? Posible na nagkakadikit na an suplay nindang kakanon, alagad ta natanaw na ni Jehova nin patienot an problemang iyan, asin sa igong panahon itinao nia an manna tanganing mapanigoan an saindang pisikal na mga pangangaipo. An sobra nindang mga reklamo nagparisa nin biyong kadaihan nin pagsarig sa Dios. Kan yaon sa Egipto sinda tama sanang nagreklamo manongod sa masakit na mga kamugtakan. (Exodo 2:23) Pero kan kaldahon sinda ni Jehova sa kaoripnan, nagpoon sindang magreklamo manongod sa kakanon. Idto dai kaipuhan na paggumodgumod. “An saindong mga paggumodgumod bakong tumang sa samo, kundi tumang ki Jehova,” an patanid ni Moises.—Exodo 16:8.
An espiritung ini nin pagrireklamo kan mga Israelita paorootrong nahayag. Sa laog nin sarong taon an manna nagin man dahelan nin pagrireklamo. (Bilang 11:4-6) Dai nahaloy an maraot na bareta kan 10 sa 12 espiyang Israelita nagin dahelan nin kurahaw manongod sa ipinamumugtak na mga peligro sa pagdaog sa Dagang Panuga. An banwaan nagsabi pa ngani: “Marahay pang nagadan na kami sa daga nin Egipto, o marahay pang nagadan na kami sa kapatagan na ini!” (Bilang 14:2) Kanigoan kadaing apresasyon! Bakong makangangalas, si Jehova nagsabi ki Moises: “Sagkod noarin na pahehelingan ako nin dai paggalang kan banwaan na ini, asin sagkod noarin na dai sinda matubod sa sako?” (Bilang 14:11) An daing utang na boot na mga reklamador na idto kinondenar na maglagawlagaw sa kapatagan sa laog nin 40 taon sagkod na mawara an kapag-arakian na idto.
Ipinagigirumdom sato ni apostol Pablo an halimbawang ini. Pinatatanidan nia an mga kapwa Kristiano na nungkang umarog sa mga Israelitang idto na nagin mga paragumodgumod, tangani sanang magadan sa kapatagan. (1 Corinto 10:10, 11) Malinaw na an daing katanosan na paggugumodgumod asin espiritu nin pagrireklamo puwedeng makapaluya sa satong pagtubod asin magbunga kan pagkaanggot ni Jehova.
Pero, si Jehova pasensioso sa mga lingkod nia na tibaad paminsanminsan magreklamo huli sa nakapaluluya nin boot na mga kamugtakan. Kan si Elias dumulag pasiring sa Bukid nin Horeb huli sa paglamag kan maraot na si Reyna Jezabel, kombensido sia na natapos na an gibohon nia bilang propeta. Ipinamugtak nia nin sala na sia na sana an natatadang parasamba ki Jehova sa daga. Tanganing pakosogon an pagtubod ni Elias, enot tinawan sia nin Dios nin pagpapaheling kan Saiyang banal na kapangyarihan. Dangan sinabihan an propeta na igwa pa nin 7,000 na maimbod na lingkod ni Jehova sa Israel asin na kadakol pa niang dapat na gibohon. Kaya, nalingawan ni Elias an saiyang mga reklamo asin uminabante na may bagong kosog. (1 Hade 19:4, 10-12, 15-18) Mantang naggagamit nin pagmansay an Kristianong kamagurangan, puwede man nindang rangahon an mga maimbod, na tinatabangan sindang masabotan an saindang kabtang sa pagkaotob kan katuyohan nin Dios.—1 Tesalonica 5:14.
Pagdaog sa Espiritu nin Pagrireklamo
Paano madadaog an espiritu nin pagrireklamo? Bueno, an mga tinawan nin pruweba sa danyos nin tabako sa hawak may makosog na dahelan na pumondo sa pagsisigarilyo. Siring man, an pakasabot kun taano ta nakadadanyar na marhay an espiritu nin pagrireklamo makapahihiro sato na haleon an ano man na ugaleng magreklamo.
Anong mga pakinabang an nakakamtan kan mga nakadadaog sa espiritu nin pagrireklamo? An sarong mahalagang pakinabang na nakakamtan kan mga naglilikay sa pagrireklamo iyo na naheheling ninda an mga bagay nin sono sa Kasuratan asin mas basado sa katunayan. An reklamador bihirang umontok tanganing isip-isipon an problema sa punto-de-vista ni Jehova. Nalingawan kan nagrireklamong mga Israelita na si Jehova Dios kinalda sinda sa kaoripnan asin milagrosong binanga an tubig sa Dagat na Pula para sa sainda. An negatibo nindang kaisipan binuta sinda sa kapangyarihan nin Dios asin hinale sa sainda an saindang kagayagayahan. Bilang resulta, nawara an saindang kompiansa ki Jehova.
Dugang pa, an tawo na kayang turotimbangon nin makatanosan an saiyang mga problema nakamamansay kun an sadiri niang mga sala an orihinal na causa kan saiyang mga problema. Mas kadikit an posibilidad na otrohon nia an salang iyan. Pinatanidan ni Jeremias an mga kapwa nia Israelita na dai magreklamo manongod sa mga kasakitan na inaagihan ninda pagkalaglag kan Jerusalem. An pagsakit ninda direktang resulta kan sainda mismong mga kasalan, asin idto bagay na kaipuhan nindang masabotan tanganing makapagsolsol asin makabalik ki Jehova. (Lamentacion 3:39, 40) Siring man, sinagwe ni disipulo Judas an “mga lalaking marompot” na nagsikwal sa paggiya ni Jehova asin tuod nang “mga parareklamo manongod sa saindang kamugtakan sa buhay.”—Judas 3, 4, 16.
Arog kan sarong beses ikinomento kan madonong na si Hadeng Salomon, “an puso na maogma nakaoomay, alagad an espiritung nagmomondo nakapaaalang sa mga tolang.” (Talinhaga 17:22) An espiritu nin pagrireklamo nakapaluluya sa satong emosyon asin nakahahale sa satong kagayagayahan. Iyan nagpaparisa nin paglaom sa maraot, bakong paglaom sa marahay. Pero an mga nakanonood na mag-isip asin magtaram manongod sa ‘kaomaw-omaw na mga bagay’ may magayagayang puso, na tibaad matao sainda nin mas marahay na pagmate.—Filipos 4:8.
Daing duda, magigin mas maogma an satong buhay kun an naririsa niato mga karahayan nin mga tawo imbes na an saindang mga pagkukulang. Mapaoogma kita kun magdadanay kitang maogma minsan masakit an mga kamugtakan imbes na magngurobngurob dapit sa satong mga pagkabigo. Pati an mga pagbalo puwedeng magin dahelan nin kagayagayahan kun iyan ibibilang niatong mga oportunidad na mapakosog an satong pagtubod asin maparigon an satong pakatagal.—Santiago 1:2, 3.
Mahalaga man na girumdomon na kun kita naggugumodgumod bako sanang kita an nadadanyaran. Sa daing ontok na pagpahayag nin mga reklamo, tibaad mapaluya man niato an pagtubod nin iba. An maraot na bareta kan sampulong espiyang Israelita nagin dahelan na ibilang kan bilog na nasyon na daing paglaom an pagdaog sa Dagang Panuga. (Bilang 13:25–14:4) Sa saro pang okasyon, si Moises namondong marhay huli sa daing ontok na paggumodgumod kan banwaan kaya hinagad nia ki Jehova na halean na sia nin buhay. (Bilang 11:4, 13-15) Sa ibong na lado, kun kita makikipag-olay sa mga bagay sa nakapakokosog na paagi, tibaad mapakosog niato an pagtubod nin iba asin makakontribuwir kita sa saindang kagayagayahan.—Gibo 14:21, 22.
Minsan kita tibaad masugotan na magreklamo dapit sa satong mga katrabaho, sa satong mga katood, sa satong pamilya, o pati sa kamagurangan sa kongregasyon, boot ni Jehova na an saiyang banwaan “magkaigwa nin makosog na pagkamoot sa lambang saro.” An siring na pagkamoot nagpapahiro sato na tahoban an mga sala nin iba imbes na itampok an saindang mga sala. (1 Pedro 4:8) Salamat sana, ginigirumdom ni Jehova na kita kabokabo sana asin dai nia binabantayan an satong mga sala. (Salmo 103:13, 14; 130:3) Kun kita gabos maghihingoang arogon an saiyang halimbawa, sierto na mas kadikit na marhay an reklamo niato.
Kun an katawohan ibalik na sa pagkasangkap, mayo na nin magkakaigwa nin dahelan na magreklamo dapit sa saiyang kamugtakan sa buhay. Sagkod na umabot an panahon na iyan, kaipuhan na labanan niato an sugot na pagreklamo manongod sa iba o manongod sa satong masakit na mga kamugtakan. Tanganing ipaheling na kita may pagsarig ki Jehova asin tunay na namomoot sa satong mga kapagtubod, “padagos [niatong] gibohon an gabos na bagay na mayo nin mga paggumodgumod.” (Filipos 2:14) Ini makapaoogma ki Jehova asin magtatao sato nin dakulang pakinabang. Para sa satong ikararahay asin kan iba, kun siring, dai niato paglingawan na an kamugtakan sa buhay nin sarong reklamador bakong maogma.
[Ritrato sa pahina 20]
Pati an milagrosong probisyon nin Dios na manna nagin dahelan nin pagrireklamo