An Gabos daw na Pagreklamo Maraot?
Anong mga kinauuyaman an mas makolog kisa kan mga dai niato ikareklamo?—Marquis De Custine, 1790-1857.
SA laog nin duwang taon sia nagtios nin seksuwal na panriribok nin saro niang katrabaho. An saiyang mga protesta nagresulta sa pan-iinsulto asin tuyong dai pag-intindi. An dai ikinaluluwas na tension nakaaapektar na sa saiyang salud, alagad ano an puede niang gibohon? Kaagid kaiyan, an sarong estudyante na nagpiprimera sa saiyang klase pinahale huli ta dai itinotogot kan saiyang konsensia na makikabtang sa pagpraktis nin mga abilidad sa pagdepensa sa sadiri na hinahagad kan eskuelahan. Pareho sinda naniniwala na sinda ginibohan nin sala, alagad dapat daw sindang magreklamo? Kun iyo, puede daw nindang laoman an pakaginhawa o orog daw iyan na maparaot sa kamugtakan?
An mga reklamo na arog kaini asin iba pa ordinaryo ngonyan, mantang kita nabubuhay kairiba an bakong sangkap na mga tawo sa bako nanggad na sangkap na kinaban. An pagreklamo poon sa daing girong na pagkauyam, pagmondo, kakologan, o paghinanakit huli sa sarong situwasyon sagkod sa pormal na alegasyon tumang sa sarong lado. An dakol mas pinipili na maglikay sa pagreklamo asin enkuentro; alagad ta, an saro daw dapat na pirme na sanang magin silensio? Ano daw an pagmansay kan Biblia?
Maraot na mga Epekto sa Sadiri Asin sa Iba
Daing duda na an pabalikbalik na espiritu nin pagreklamo nakadadanyar, asin iyan kinokondenar sa Biblia. An sarong reklamador magtatao nin pisikal asin espirituwal na danyos sa sadiri nia asin nin pagkauyam kan mga ipinagrereklamo nia. Nagtataram manongod sa sarong reklamador na agom na babae, an talinhaga kan Biblia nagsasabi: “An labot na atop na nagpaparayo sa saro sa aldaw nin oran na dai naghuhuraw asin an parapakisuhay na agom na babae magkaagid.” (Talinhaga 27:15) An pagreklamo tumang ki Jehova o sa saro kan saiyang mga probisyon partikularmenteng maninigong kondenaron. Kan an nasyon nin Israel magreklamo manongod sa milagrosong mana na itinao sa laog kan 40 taon na pagbaklay ninda sa kaawagan, na inaapod idtong “daing kuentang tinapay,” si Jehova nagpadara nin makamandag na mga halas tanganing kastigohon an daing galang na mga reklamador, asin dakol an nagadan.—Bilang 21:5, 6.
Dugang pa, si Jesus naghatol sa saiyang mga parasunod, bako na magreklamo manongod sa “dagami” na mga kaluyahan na naoobserbaran sa satuyang mga kapwa, kundi magin mapagbantay sa mas darakulang “pasagi” na mga pagkukulang niato mismo. (Mateo 7:1-5) Kaagid kaiyan, kinondenar ni Pablo an paghokom (sarong porma nin pagreklamo) sa iba bilang “dai . . . nin sarahotan . . . huli ta ika na naghohokom naggigibo nin siring man sana.” An mga patanid na ini tumang sa pagreklamo maninigo na magpahiro sa sato na likayan an dai kinakaipuhan na pagtatsar asin pagkaigwa nin espiritu nin pagreklamo.—Roma 2:1.
An Gabos daw na Pagreklamo Kinokondenar?
Kun siring, makonklusyon daw kita na gabos na klase nin reklamo dapat na kondenaron? Dai man. Sinasabi kan Biblia na dakol an inhustisya sa depektosong kinaban na nabubuhayan niato na nangangaipo talaga nin pagkorehir. Sa sarong ilustrasyon, si Jesus nagsambit nin sarong bakong matanos na huwes na napiritan na sanang magtao nin hustisya sa sarong inaaping balo tanganing ini dai na “magparadigdi asin pagparapurisawon [sia] nin biyo.” (Lucas 18:1-8) Sa nagkapirang bagay tibaad dapat man niatong ipagpadagos an satuyang mga reklamo sagkod na ikatanos an mga sala.
Sa pag-enkaminar sa sato na mamibi na umabot an Kahadean nin Dios, bako daw na sinasadol kita ni Jesus na midbidon an mga kakulangan kan presenteng kinaban na ini asin ‘mag-agrangay’ sa Dios para sa remedyo? (Mateo 6:10) Kan “an kurahaw nin reklamo” manongod sa karatan kan suanoy na Sodoma asin Gomorra makaabot sa saiyang pandangog, si Jehova nagsugo kan saiyang mga mensahero tanganing “maheling . . . kun baga sinda [guminawe] man nanggad sono sa kurahaw dapit dian” asin magtao nin remedyo. (Genesis 18:20, 21) Sa pakaginhawa kan mga nagreklamo sa saiya, itinanos ni Jehova an situwasyon paagi sa paglaglag kan duwang siudad asin kan inmoral na mga nag-eerok dian.
An Kristianong Kongregasyon
Maninigo daw na may kalaenan sa tahaw nin mga tugang sa laog kan Kristianong kongregasyon? Minsan ngani bakong sangkap na mga lalaki asin babae, an mga Kristiano odok na nagmamaigot na maglingkod sa Dios sa katoninongan asin pagkasararo. Alagad ta may malataw na mga situwasyon sa tahaw ninda na iyo an magigin dahelan nin reklamo asin iyan naghahagad nin remedyo. Kan enot na siglo, sarong situwasyon an naglataw sa laog kan kongregasyon nin mga linahidan dai nahaloy pakalihis kan Pentecostes. Dakol sa mga bagong nakombertir na Kristiano an nagpawalat sa Jerusalem para sa dugang na pagtotokdo asin pagparigon nin boot. Nagkaigwa nin paghiras sa kun anong yaon na mga pagkakan. Minsan siring, “nagkaigwa nin paggurumodgumod kan mga Judiong Griego an tataramon tumang sa mga Judiong Hebreo an tataramon, huli ta an saindang mga balong babae napababayaan sa aroaldaw na pagwaras.” Imbes na kondenaron an mga nagrereklamong ini bilang makiiwalon, an mga apostol naghiro tanganing itanos an situwasyon. Iyo, an makatanosan na mga reklamo na ginigibong may igong paggalang asin sa tamang espiritu mapakumbabang dadangogon asin gigibohan nin aksion kan mga nag-aataman kan kongregasyon.—Gibo 6:1-6; 1 Pedro 5:3.
Sa Tamang Autoridad
Narisa daw nindo sa mga halimbawa sa enotan na an mga reklamo maninigo na gibohon sa tamang espiritu asin sa tamang autoridad? Halimbawa, magigin mayong kamanungdanan kun magreklamo sa pulis manongod sa pagabat na buhis o sa sarong huwes manongod sa pisikal na mga kamatean nin saro. Siring man, magigin sala na ireklamo an manongod sa sarong situwasyon sa laog o sa luwas kan kongregasyon sa sarong tawo na mayo nin autoridad o abilidad na tumabang.
Sa kadaklan na kadagaan ngonyan, igwa nin mga husgado asin ibang tamang autoridad na puedeng apelaran ta tibaad makaako nin kadikit na pakaginhawa. Kan an estudyante na nasambitan sa kapinonan kan artikulo dinara an saiyang reklamo sa husgado, an mga huwes nagdesisyon apabor sa saiya, asin sia pinabalik na may kaibang paghagad nin dispensasyon hale sa eskuelahan. Siring man, an empleyada na seksuwal na riniribok nakanompong nin ginhawa paagi sa sarong unyon nin mga babaeng nagtatrabaho. Sia hinagadan nin dispensasyon kan hunta kan eskuelahan. An saiyang mga among naggibo nin mga paagi tanganing mapondo an seksuwal na panriribok.
Minsan siring, dai maninigong laoman na an gabos na reklamo magkakaigwa nin kaparehong resulta. An madonong na si Hadeng Salomon realistikong nagkomento: “An ginibong biko dai ikatatanos.” (Eclesiastes 1:15) Marahay na midbidon niato na an nagkapirang bagay mahalat na sanang itanos nin Dios sa saiyang itinalaan na panahon.
[Retrato sa pahina 31]
An kamagurangan naghihinanyog asin inaaksionan an makatanosan na mga reklamo