Bendisyon o Maldisyon—Mga Halimbawa Para sa Sato Ngonyan
“An mga bagay na ini nangyari sa sainda bilang mga halimbawa, asin an mga iyan isinurat para sa pagpatanid sa sato na inabotan kan mga katapusan kan mga palakaw nin mga bagay.”—1 CORINTO 10:11.
1. Kun paanong iniinspeksion nin saro an sarong kasangkapan, anong pag-inspeksion an maninigo niatong gibohon?
NATATAGO sa irarom nin pintura, an takla puedeng ponan na raoton nin diit-diit an sarong kasangkapan na gibo sa batbat. Tibaad mahaloyhaloy bago maheling sa ibabaw an takla. Sa kaagid na paagi, an mga kaisipan asin kamawotan kan puso nin saro tibaad pumoon na rumaot haloy pa bago ini magbunga nin seryosong mga resulta o marisa ngani nin iba. Kun paanong madonong niatong iinspeksionon an sarong kasangkapan tanganing helingon kun iyan tinatakla, siring man an estriktong pag-inspeksion sa satong puso asin napapanahon na mantension tibaad makapadanay sa satong Kristianong integridad. Sa ibang pagtaram, puede niatong akoon an mga bendisyon nin Dios asin likayan an mga maldisyon nin Dios. An iba tibaad maghona na an mga bendisyon asin maldisyon na isinabi sa suanoy na Israel mayong gayong halaga sa mga napapaatubang sa pagtatapos kan palakaw na ini nin mga bagay. (Josue 8:34, 35; Mateo 13:49, 50; 24:3) Minsan siring, bako iyan na totoo. Puede kitang makinabang na gayo sa nagpapatanid na mga halimbawa may labot sa Israel, arog kan sinasabi sa 1 Corinto kapitulo 10.
2. Ano an sinasabi kan 1 Corinto 10:5, 6 manongod sa mga eksperyensia kan Israel sa kaawagan?
2 Ibinabaing ni apostol Pablo an mga Israelita na sakop ni Moises sa mga Kristiano na sakop ni Cristo. (1 Corinto 10:1-4) Minsan ngani an banwaan nin Israel puede kutanang nakalaog sa Dagang Panuga, “sa kadaklan sa sainda an Dios dai nagpahayag kan saiyang pag-oyon, huli ta sinda nagkagaradan sa kaawagan.” Kun siring sinabihan ni Pablo an mga kapwa nia Kristiano: “Ngonyan an mga bagay na ini nagin satong mga halimbawa, na kita dai magin mga tawo na nagmamawot nin mga bagay na nakararaot, kun paanong iyan pinagmawot ninda.” (1 Corinto 10:5, 6) An mga kamawotan pinatutubo sa puso, kaya kaipuhan na himateon niato an nagpapatanid na mga halimbawa na sinitar ni Pablo.
Patanid Tumang sa Idolatriya
3. Paano nagkasala an mga Israelita may koneksion sa bulawan na ogbon na baka?
3 An enot na patanid ni Pablo: “Ni magin kamong mga parasamba sa idolo, arog kan iba sa sainda; siring sa nasusurat: ‘An banwaan nagturukaw sa pagkakan asin pag-inom, asin nagburuhat sinda sa pag-oroogma.’” (1 Corinto 10:7) An nagpapatanid na halimbawa na ini iyo an pagbalik kan mga Israelita sa mga gibo nin Egipto asin paggibo nin idolatrosong bulawan na ogbon na baka. (Exodo, kapitulo 32) Ipinarisa kan disipulong si Esteban an pundamental na problema: “[Ki Moises, an representante nin Dios] an satong mga apoon nagsayumang magin makinuyog, kundi sia isinikwal ninda asin sa saindang puso sinda nagbuelta sa Egipto, na sinasabi ki Aaron, ‘Gibohan kami nin mga dios na mangengenot sa samo. Kun dapit sa Moises na ini, na nangenot sa samo hale sa daga nin Egipto, dai niamo aram kun ano na an nangyari sa saiya.’ Kaya guminibo sinda nin ogbon na baka kan mga aldaw na idto asin nagdara nin atang sa idolo patin nagpoon na mag-oroogma sa mga gibo kan saindang mga kamot.” (Gibo 7:39-41) Mangnoha na “sa saindang puso” an sumbikalan na mga Israelita may salang mga kamawotan na nagdara sa idolatriya. “Guminibo sinda nin ogbon na baka . . . asin nagdara nin atang sa idolo.” Dugang pa, sinda “nagpoon na mag-oroogma sa mga gibo kan saindang mga kamot.” Nagkaigwa nin musika, karantahan, baraylihan, karakanan, asin irinoman. Maliwanag na nakaaakit asin nakaaaling an idolatriya.
4, 5. Anong idolatrosong mga gibo an kaipuhan na likayan niato?
4 An antitipikong Egipto—an kinaban ni Satanas—haros sinasamba an pag-aling-aling. (1 Juan 5:19; Kapahayagan 11:8) Iniidolo kaiyan an mga aktor, parakanta, asin sikat na parakawat, saka an saindang pagbayle, an saindang musika, an saindang mga ideya sa kun ano an nakaaaling asin maogmang mga panahon. Dakol an nasugotan na biyong mabangkag sa pag-aling-aling mantang naghihingako pa man giraray na nagsasamba ki Jehova. Kun an Kristiano kaipuhan na sagweon huli sa salang gibo, sa parate an luminuya niang kamugtakan sa espirituwal masususog na gikan sa pag-inom nin mga inomon na de alkohol, pagbayle, asin pag-oroogma sa paagi na tibaad harani na sa idolatriya. (Exodo 32:5, 6, 17, 18) An ibang pag-aling-aling nakararahay asin nakagagayagaya. Pero, ngonyan an kadaklan na kinabanon na musika, bayle, pelikula, asin video nagpapanigo sa maraot na mga horot nin laman.
5 An tunay na mga Kristiano dai napadadara sa pagsamba sa mga idolo. (2 Corinto 6:16; 1 Juan 5:21) Logod na an lambang saro sa sato magin siring man kaiyan kaingat na dai maadikto sa idolatrosong pag-aling-aling asin mameligrong magtios kan nakadadanyar na mga epekto nin pagigin bangkag sa pag-oroogma sa kinabanon na paagi. Kun kita mapadara sa kinabanon na mga impluwensia, haros dai maririsa na matatanom sa isip asin puso an nakararaot na mga kamawotan asin kaisipan. Kun dai itatanos, sa huri ini puedeng magbunga kan ‘pagkagadan sa kaawagan’ kan palakaw ni Satanas.
6. Anong positibong aksion an tibaad kaipuhan na gibohon niato mapadapit sa aling-alingan?
6 Kapareho ni Moises kaidtong insidente dapit sa bulawan na ogbon na baka, an “fiel asin madonong na oripon” garo baga nagsasabi: “Siisay an ki Jehova? Sa sako!” Puedeng makapagligtas nin buhay an paggibo nin positibong aksion tanganing ipaheling na kita marigon na naninindogan sa tunay na pagsamba. An tribo ni Moises na Levi tolos na naghiro na haleon an nakaparirigsok na mga impluwensia. (Mateo 24:45-47; Exodo 32:26-28) Kun siring, maingat na siyasaton an pinipili nindong aling-alingan, musika, video, asin iba pa. Kun iyan maraot sa ano man na paagi, manindogan kamo para ki Jehova. May mapagngayongayong pagsarig sa Dios, gumibo nin mga pagbabago sa saindong pagpili nin aling-alingan asin musika, asin laglagon an mga nakadadanyar sa espirituwal, kun paanong linaglag ni Moises an bulawan na ogbon na baka.—Exodo 32:20; Deuteronomio 9:21.
7. Paano niato mapoprotehiran an piguratibong puso?
7 Paano daw niato malalabanan an diit-diit na pagkaraot kan puso? Paagi sa maigot na pag-adal kan Tataramon nin Dios, na pinatataros an mga katotoohan kaiyan sa satong isip asin puso. (Roma 12:1, 2) Siempre, maninigo na dayaday kitang umatender sa Kristianong mga pagtiripon. (Hebreo 10:24, 25) An daing ganang pag-atender sa mga pagtiripon ikababaing sa pagpintura sa ibabaw nin may takla. Ini tibaad magpaogma sa sato sa kadikit na panahon, alagad ta dai kaiyan nareresolberan an pundamental na problema. Imbes, paagi sa patienot na pag-andam, paghorophorop, asin aktibong pagpartisipar sa mga pagtiripon, puede niatong enotan na haleon an mga elementong diit-diit na nakararaot na tibaad nagdadanay sa tagong mga lugar kan satong piguratibong puso. Ini makatatabang sa sato na pangaptan an Tataramon nin Dios asin makapakokosog sa sato na tagalan an mga pagbalo sa pagtubod asin magin “marigon sa gabos na bagay.”—Santiago 1:3, 4; Talinhaga 15:28.
Patanid Tumang sa Pakikisaro
8-10. (a) Anong nagpapatanid na halimbawa an sinasabi sa 1 Corinto 10:8? (b) Paano ikaaaplikar sa kapakipakinabang na paagi an mga tataramon ni Jesus na yaon sa Mateo 5:27, 28?
8 Sa sunod na halimbawa ni Pablo, kita hinahatolan: “Ni makisaro man kita, arog sa nagkapira sa sainda na nakisaro, tangani sanang magadan, duwang polo may tolong ribo sa sainda sa sarong aldaw.”a (1 Corinto 10:8) An boot sabihon kan apostol an panahon na an mga Israelita naghuruhod sa falsong mga dios asin nagkaigwa nin “inmoral na relasyon sa mga aking babae ni Moab.” (Bilang 25:1-9) An seksuwal na inmoralidad nakagagadan! An pagtogot na an inmoral na mga kaisipan asin kamawotan magpadagos na daing kontrol garo pagtogot na “taklaon” an puso. Sinabi ni Jesus: “Nadangog nindo na sinabi, ‘Dai ka magsambay.’ Alagad ako nagsasabi sa saindo na an lambang saro na magparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso.”—Mateo 5:27, 28.
9 Nagpapatunay sa mga bunga nin ‘pagparaheling tanganing magkaigwa nin horot sa sarong babae’ an resulta kan maraot na kaisipan kan sumbikalan na mga anghel bago kan Baha kaidtong aldaw ni Noe. (Genesis 6:1, 2) Girumdoma man na an saro sa pinakamakaturotristeng pangyayari sa buhay ni Hadeng David nagpoon sa pagparaheling nia sa sarong babae sa salang paagi. (2 Samuel 11:1-4) Kabaliktaran, an matanos na tawong may agom na si Job ‘nakipagtipan sa saiyang mga mata na dai sia mapaheling nin atension sa sarong daraga,’ sa siring linilikayan an inmoralidad asin pinatutunayan na sia nagdadanay sa integridad. (Job 31:1-3, 6-11) An mga mata ikababaing sa mga bintana kan puso. Asin gikan sa maraot na puso na minaluwas an dakol na maraot na bagay.—Marcos 7:20-23.
10 Kun iaaplikar niato an mga tataramon ni Jesus, dai niato totogotan na magpadagos an salang mga kaisipan paagi sa pagheling nin pornograpikong mga bagay o pagparapensar sa inmoral na mga kaisipan mapadapit sa sarong kapwa Kristiano, katrabaho, o siisay pa man. An takla dai nahahale sa metal paagi sa pagtakpid sana sa diit-diit na pagkaraot. Kun siring, dai basta sana takpidon an inmoral na mga ideya asin tendensia na garo iyan bakong gayong mahalaga. Gumibo nin mapuersang mga paghiro tanganing mahale sa saindo an inmoral na mga tendensia. (Ikomparar an Mateo 5:29, 30.) Sinasadol ni Pablo an mga kapagtubod: “Gadanon nindo an mga kabtang kan saindong hawak na yaon sa ibabaw kan daga kun dapit sa pakikisaro, karigsokan, seksuwal na horot, maraot na mawot, asin kaaraan, na idolatriya. Huli sa mga bagay na iyan madatong an kaanggotan nin Dios.” Iyo, huli sa mga bagay na arog baga nin seksuwal na inmoralidad, “madatong an kaanggotan nin Dios” bilang kapahayagan kan saiyang maldisyon. Kaya kaipuhan na “gadanon” niato an mga kabtang kan satong hawak kun dapit sa mga bagay na ini.—Colosas 3:5, 6.
Patanid Tumang sa Rebeldeng mga Reklamo
11, 12. (a) Anong patanid an itinao sa 1 Corinto 10:9, asin anong pangyayari an boot sabihon? (b) Paano kita maninigong maapektaran kan patanid ni Pablo?
11 Si Pablo sunod na nagpatanid: “Ni baloon man niato si Jehova, siring na an iba sa sainda binalo sia, tangani sanang mapara paagi sa mga halas.” (1 Corinto 10:9) Mantang nagbabaklay sa kaawagan harani sa linderos nin Edom, an mga Israelita “padagos na nagtaram tumang sa Dios asin ki Moises: ‘Taano ta ilinuwas nindo kami sa Egipto tanganing magadan sa kaawagan? Huli ta mayo nin tinapay asin mayo nin tubig, asin ikinabalde na kan samong kalag an daing kuentang tinapay,’” an mana na milagrosong itinao. (Bilang 21:4, 5) Isip-isipa! An mga Israelitang idto “padagos na nagtaram tumang sa Dios,” na inaapod na daing kuenta an saiyang mga probisyon!
12 Paagi sa saindang mga reklamo, binabalo kan mga Israelita an pasensia ni Jehova. Itinao an padusa, huli ta si Jehova nagsobol nin mararang mga halas sa tahaw ninda, asin dakol an nagadan sa tuka nin halas. Pakatapos na an banwaan magsolsol asin mangoltanan si Moises para sa sainda, natapos an damat. (Bilang 21:6-9) Tunay na an pangyayaring ini maninigong magserbing patanid para sa sato na dai magpaheling nin rebelde, mapagreklamong espiritu, nangorogna tumang sa Dios asin sa saiyang teokratikong mga areglo.
Patanid Tumang sa Paggumodgumod
13. Tumang sa ano nagpapatanid an 1 Corinto 10:10, asin anong pagrebelde an nasa isip ni Pablo?
13 Sinisitar an ultimo niang halimbawa may labot sa mga Israelita sa kaawagan, si Pablo nagsurat: “Ni magin kamong paragumodgumod, arog kan nagkapira sa sainda na naggumodgumod, tangani sanang mapara paagi sa paralaglag.” (1 Corinto 10:10) Puminutok an pagrebelde kan si Core, Datan, Abiram, asin an kairiba ninda guminawe sa paaging bakong teokratiko asin inangat an autoridad ni Moises asin Aaron. (Bilang 16:1-3) Pakalaglaga kan mga rebelde, an mga Israelita nagporoon na maggumodgumod. Ini huli ta nagpoon sindang mangatanosan na bakong makatanosan an paglaglag sa mga rebelde. An Bilang 16:41 nagsasabi: “Tolos-tolos kan sumunod na aldaw an bilog na kasararoan kan mga aki ni Israel nagpoon na maggumodgumod tumang ki Moises asin Aaron, na sinasabi: ‘Kamo, ginadan nindo an banwaan ni Jehova.’” Bilang resulta kan pagtatsar ninda sa paagi nin pagtao nin hustisya kan okasyon na idto, 14,700 na Israelita an nagadan huli sa damat na itinao nin Dios.—Bilang 16:49.
14, 15. (a) Ano an saro sa mga kasalan kan “mga lalaking marompot” na tusong naglaog sa kongregasyon? (b) Ano an manonodan sa pangyayari may labot ki Core?
14 Kan enot na siglo C.E., an “mga lalaking marompot” na tusong naglaog sa Kristianong kongregasyon nagin mga falsong paratokdo saka paragumodgumod. An mga lalaking ini “nagbabasangbasang sa kapangyarihan patin nagmumuda sa mga mamuraway,” linahidan na mga lalaki na pinaniwalaan kaidto na mag-ataman sa kongregasyon sa espirituwal na paagi. Manongod sa marompot na mga apostata, an disipulong si Judas nagsabi man: “An mga tawong ini mga paragumodgumod, mga parareklamo manongod sa saindang kamugtakan sa buhay, na naglalakaw sono sa saindang mga horot.” (Judas 3, 4, 8, 16) Ngonyan, may mga indibiduwal na nagigin mga paragumodgumod huli ta tinotogotan nindang tumalubo sa saindang puso an kaisipan na diit-diit na nakararaot sa espirituwal. Sa parate sinda nagkokonsentrar sa mga pagkabakong sangkap kan mga nasa katongdan nin pangangataman sa kongregasyon asin nagpopoon na maggumodgumod tumang sa sainda. An saindang paggumodgumod asin pagrereklamo tibaad umabot pa sa pagtatsar sa mga publikasyon kan ‘fiel na oripon.’
15 Tama na maghapot nin sinsero manongod sa sarong Makakasuratan na tema. Alagad ano kun magpatalubo kita nin negatibong kaisipan na nahahayag sa mapagtatsar na orolay nin magkakadayupot na mag-aramigo? Marahay na ihapot niato sa satong sadiri, ‘Ano an posibleng kasagkodan kaini? Bako daw na mas marahay na pumondo sa paggumodgumod asin mapakumbabang mag-arang nin kadonongan?’ (Santiago 1:5-8; Judas 17-21) Si Core asin an mga parasuportar nia, na nagrebelde tumang sa autoridad ni Moises asin Aaron, tibaad kombensidong marhay na tama an punto-de-vista ninda kaya dai ninda siniyasat an saindang mga motibo. Minsan siring, sinda biyong sala. Iyo man an mga Israelita na naggumodgumod manongod sa paglaglag ki Core asin sa iba pang rebelde. Madonong nanggad na itogot na an siring na mga halimbawa magpahiro sa sato na siyasaton an satong mga motibo, haleon an paggumodgumod o pagrereklamo, asin togotan si Jehova na dalisayon kita!—Salmo 17:1-3.
Makanood, Asin Kamtan an mga Bendisyon
16. Ano an pinakasustansia kan sadol sa 1 Corinto 10:11, 12?
16 Sa irarom kan pasabong nin Dios, tinapos ni Pablo an listahan nin nagpapatanid na mga mensahe paagi sa pagsadol: “Ngonyan an mga bagay na ini nangyari sa sainda bilang mga halimbawa, asin an mga iyan isinurat para sa pagpatanid sa sato na inabotan kan mga katapusan kan mga palakaw nin mga bagay. Bilang resulta mag-ingat an siisay man na naghohona na nagtitindog na dai sia mapukan.” (1 Corinto 10:11, 12) Logod na dai niato pagbasangbasangon an satong kamugtakan sa Kristianong kongregasyon.
17. Kun nakaririsa kita nin salang motibo sa satong puso, ano an maninigo niatong gibohon?
17 Kun paanong an batbat may tendensiang taklaon, siring man kita na mga gikan kan makasalan na si Adan nakamana nin tendensia sa karatan. (Genesis 8:21; Roma 5:12) Huli kaini, dai kita maninigong madisganar kun nakaririsa kita nin salang motibo sa satong puso. Imbes, gumibo kita nin desisyonadong paghiro. Kun an batbat natatamaan nin alumaad na doros o namumugtak sa nakatutunaw na kemikal, naparirikas na marhay an diit-diit na pagkaraot kaiyan. Kaipuhan na likayan niatong makahangos kan “doros” kan kinaban ni Satanas, na igwa nin marigsok na aling-alingan, lakop na inmoralidad, asin negatibong dalagan nin isip.—Efeso 2:1, 2.
18. Ano an ginibo ni Jehova mapadapit sa salang mga tendensia nin katawohan?
18 An katawohan tinawan ni Jehova nin paagi na malabanan an salang mga tendensia na minana niato. Itinao nia an saiyang Aking bugtong tangani na an mga naggigibo nin pagtubod sa saiya magkaigwa nin buhay na daing katapusan. (Juan 3:16) Kun estrikto niatong susunodon an mga lakad ni Jesus asin mapaheling kita nin arog-Cristong pagkatawo, kita magigin bendisyon sa iba. (1 Pedro 2:21) Aakoon man niato an, bakong mga maldisyon, kundi mga bendisyon nin Dios.
19. Paano kita makikinabang sa paghorophorop sa mga halimbawa sa Kasuratan?
19 Minsan ngani kita ngonyan madali man na masala arog kan mga Israelita kan suanoy, nasa sato an kompletong nasusurat na Tataramon nin Dios na magiya sa sato. Sa mga pahina kaiyan nanonodan niato an manongod sa mga ginibo ni Jehova sa katawohan saka sa saiyang mga kualidad na ipinaheling ni Jesus, ‘an ladawan kan kamurawayan nin Dios asin an eksaktong representasyon kan Saiya mismong naturalesa.’ (Hebreo 1:1-3; Juan 14:9, 10) Paagi sa pamibi asin maigot na pag-adal kan Kasuratan, puede kitang magkaigwa kan “kaisipan ni Cristo.” (1 Corinto 2:16) Kun napapaatubang sa mga sugot asin iba pang pagbalo sa satong pagtubod, makikinabang kita sa paghorophorop sa suanoy na mga halimbawa sa Kasuratan asin nangorogna sa superlatibong halimbawa ni Jesu-Cristo. Kun iyan gigibohon niato, dai niato kaipuhan na maeksperyensiahan an pagkaotob kan mga maldisyon nin Dios. Imbes, kakamtan niato an pag-oyon ni Jehova ngonyan asin an saiyang mga bendisyon sagkod lamang.
[Nota sa ibaba]
a Helingon an The Watchtower na Hulyo 15, 1992, pahina 4.
Ano an Isisimbag Nindo?
◻ Paano niato ikaaaplikar an hatol ni Pablo na dai magin mga parasamba sa idolo?
◻ Ano an magigibo niato tanganing mahimate an patanid kan apostol tumang sa pakikisaro?
◻ Taano ta maninigo niatong likayan an paggumodgumod asin pagrereklamo?
◻ Paano niato aakoon an mga bendisyon nin Dios, bakong mga maldisyon?
[Retrato sa pahina 18]
Kun gusto niato kan mga bendisyon nin Dios, dapat na likayan niato an idolatriya
[Mga retrato sa pahina 20]
Kun paanong an takla kaipuhan na haleon, gumibo kita nin positibong paghiro na haleon an salang mga kamawotan sa satong puso