Watchtower ONLINE NA LIBRARYA
Watchtower
ONLINE NA LIBRARYA
Bicol
  • BIBLIYA
  • PUBLIKASYON
  • PAGTIRIPON
  • w96 6/15 p. 12-17
  • Bendisyon o Maldisyon—Puedeng Pumili!

Mayong video na available para digdi.

Sori, may error sa pag-load kan video.

  • Bendisyon o Maldisyon—Puedeng Pumili!
  • An Torrengbantayan Nagpapahayag kan Kahadean ni Jehova—1996
  • Mga Subtema
  • Kaagid na Materyal
  • Ginibong Posible an mga Bendisyon
  • Ano Man an mga Maldisyon?
  • Kapahayagan nin mga Bendisyon Asin Maldisyon
  • Pagkaigwa nin Mas Eksaktong Pagmansay
  • An Pagpili kan Israel Iyong Nagdeterminar
  • Bendisyon o Maldisyon​—Mga Halimbawa Para sa Sato Ngonyan
    An Torrengbantayan Nagpapahayag kan Kahadean ni Jehova—1996
  • ‘Pilion an Buhay Tanganing Makapagpadagos na Mabuhay’
    An Torrengbantayan Nagpapahayag kan Kahadean ni Jehova—2006
  • Siquem—An Siudad sa Kababan
    An Torrengbantayan Nagpapahayag kan Kahadean ni Jehova—1997
  • Aabotan Ka daw kan Bendisyon ni Jehova?
    An Torrengbantayan Nagpapahayag kan Kahadean ni Jehova—2001
Iba Pa
An Torrengbantayan Nagpapahayag kan Kahadean ni Jehova—1996
w96 6/15 p. 12-17

Bendisyon o Maldisyon—Puedeng Pumili!

“Ibinugtak ko an buhay asin kagadanan sa atubangan mo, an bendisyon asin an maldisyon; asin kaipuhan na pilion mo an buhay tanganing makapagpadagos kang mabuhay.”​—DEUTERONOMIO 30:19.

1. An mga tawo tinawan nin anong kapasidad?

SI Jehova Dios ginibo kita​—an saiyang intelihenteng linalang na mga tawo—​na may sadiring boot. Dai kita linalang na mga automaton, o robot sana, kundi tinawan kan pribilehio asin responsibilidad na pumili. (Salmo 100:3) An enot na mga tawo​—si Adan asin Eva—​libreng pumili kan saindang gigibohon, asin nanimbag sinda sa Dios para sa saindang pinili.

2. Ano an pinili ni Adan, asin may anong resulta?

2 An Kaglalang abundang nagtagama para sa buhay nin tawo na may daing katapusan na bendisyon sa sarong paraisong daga. Taano ta dai pa naootob an katuyohan na iyan? Huli ta sala an pinili ni Adan. An lalaki pinagbotan nin arog kaini ni Jehova: “Hale sa gabos na kahoy sa tatamnan puede kang magkakan sagkod na ika mabasog. Alagad kun dapit sa kahoy kan pakamidbid sa marahay asin maraot dai ka magkakan kaiyan, huli ta sa aldaw na kumakan ka kaiyan ika siertong magagadan.” (Genesis 2:​16, 17) Kun pinili ni Adan na kumuyog, binendisyonan kutana an enot niatong mga magurang. An pakisuway nagbunga nin kagadanan. (Genesis 3:​6, 18, 19) Kaya an kasalan asin kagadanan ipinamana sa gabos na aki ni Adan.​—Roma 5:12.

Ginibong Posible an mga Bendisyon

3. Paano nagtao nin garantiya an Dios na an saiyang katuyohan para sa katawohan maootob?

3 Inestablisar ni Jehova Dios an sarong paagi na an saiyang katuyohan sa pagbendisyon sa katawohan maotob sa kahurihurihi. Ihinula nia mismo an sarong Banhi, na ihinula sa Eden: “Bubugtakan ko nin pakikienemigo sa pag-oltanan mo asin kan babae saka sa pag-oltanan kan saimong banhi asin kan saiyang banhi. Lulugadon ka nia sa payo asin lulugadon mo sia sa bool.” (Genesis 3:15) Kan huri ipinanuga nin Dios na an mga bendisyon kakamtan nin makinuyog na katawohan paagi sa Banhing ini, na sarong gikan ni Abraham.​—Genesis 22:​15-18.

4. Anong areglo an ginibo ni Jehova para sa pagbendisyon sa katawohan?

4 An ipinanugang Banhi na iyan nin bendisyon napatunayan na si Jesu-Cristo. Mapadapit sa katongdan ni Jesus sa areglo ni Jehova para sa pagbendisyon sa katawohan, an Kristianong apostol na si Pablo nagsurat: “Ipinamimidbid nin Dios an saiyang pagkamoot sa sato sa paagi na, mantang kita mga parakasala pa, si Cristo nagadan para sa sato.” (Roma 5:8) Magkakamit nin mga bendisyon an mga kabilang sa makasalan na katawohan na nagkukuyog sa Dios asin inaaprobetsaran an merito kan pantubos na atang ni Jesu-Cristo. (Gibo 4:12) Pipilion daw nindo an pagkuyog asin mga bendisyon? An pakisuway magbubunga nin laen na marhay.

Ano Man an mga Maldisyon?

5. Ano an kahulogan kan terminong “maldisyon”?

5 An kabaliktaran nin bendisyon maldisyon. An terminong “maldisyon” nangangahulogan nin pagtaram nin maraot manongod sa saro o pagpahayag nin maraot tumang sa saiya. An termino sa Hebreo na qela·lahʹ kinua sa pinakagamot na berbo na qa·lalʹ, na sa literal nangangahulogan “magin magian.” Minsan siring, kun ginagamit sa piguratibong sentido, iyan nangangahulogan “mag-arang nin maraot para sa” o ‘tratohon na may pagduhagi.’​—Levitico 20:​9; 2 Samuel 19:43.

6. Anong pangyayari may labot ki Eliseo an nangyari harani sa suanoy na Betel?

6 Horophoropa an sarong dramatikong halimbawa nin listong aksion may labot sa maldisyon. Nangyari ini mantang an propeta nin Dios na si Eliseo naglalakaw hale sa Jerico pasiring sa Betel. An tala nagsasabi: “Mantang sia nagtutukad sa dalan, may saradit na aking lalaki na luminuruwas sa siudad asin nagpoon na tuyatuyaon sia patin padagos na nagsasarabi sa saiya: ‘Tukad, pangas! Tukad, pangas!’ Sa katapustapusi sia suminalingoy asin naheling sinda patin nag-arang nin maraot para sa sainda sa ngaran ni Jehova. Dangan duwang babaeng oso an luminuwas sa kakahoyan asin pinisangpisang an apat na polo may duwang aki sa sainda.” (2 Hade 2:​23, 24) Dai sinasabi kun ano an eksaktong isinabi ni Eliseo kan itaram nia an maldisyon na idto paagi sa pag-arang nin maraot para sa nagtutuyatuyang mga aking idto. Minsan siring, nagkabunga an berbal na kapahayagan na idto ta idto isinabi sa ngaran ni Jehova nin sarong propeta nin Dios na naghihiro kaoyon sa kabotan nin Dios.

7. Ano an nangyari sa mga aki na nagtuyatuya ki Eliseo, asin taano?

7 An pangenot na dahelan kan pagtuyatuya garo baga an bagay na sulot ni Eliseo an pamilyar na opisyal na gubing ni Elias, asin habo kan mga aki na makaheling nin siisay man na kasalihid kan propetang idto. (2 Hade 2:13) Tanganing simbagon an angat kun baga sia an kasalihid ni Elias asin tanganing tokdoan nin tamang paggalang sa propeta ni Jehova an mga hoben na ini saka an saindang mga magurang, si Eliseo nag-arang nin maraot para sa nagtutuyatuyang kadaklan sa ngaran kan Dios ni Elias. Ipinaheling ni Jehova an pag-oyon nia ki Eliseo bilang saiyang propeta paagi sa pagpangyari na an duwang babaeng oso lumuwas sa kakahoyan asin pisangpisangon an 42 sa mga paraolog-olog na idto. Si Jehova huminiro nin dai mapagdududahan huli sa saindang hayag na kadaihan nin paggalang sa pinakapaagihan sa pagkomunikar na ginagamit nia digdi sa daga kan panahon na idto.

8. Ano an inoyonan na gibohon kan banwaan nin Israel, asin may anong mga malalaoman?

8 Mga taon bago kaini, an mga Israelita nagpaheling nin kaagid na kadaihan nin paggalang sa mga areglo nin Dios. Ini an nangyari: Kan 1513 B.C.E., pinahelingan nin pabor ni Jehova an banwaan nin Israel paagi sa pagkalda sa sainda sa kaoripnan sa Egipto na garo “sa mga pakpak nin mga agila.” Dai nahaloy pakalihis kaiyan, nanuga sinda na kuyogon an Dios. Mangnoha kun paanong an pagkuyog konektadong marhay sa pag-ako kan pag-oyon nin Dios. Si Jehova nagsabi paagi ki Moises: “Kun maingat nanggad nindong kukuyogon an sakong tingog asin ootobon nanggad an sakong tipan, dangan kamo sierto nanggad na magigin sakong espesyal na sadiri hale sa gabos na ibang banwaan, huli ta sadiri ko an bilog na daga.” Dangan, suminimbag nin iyo an banwaan, na sinasabi: “Andam kaming gibohon an gabos na itinaram ni Jehova.” (Exodo 19:​4, 5, 8; 24:3) An mga Israelita naghingako na namomoot ki Jehova, dusay sa saiya, asin nagpromesa na kuyogon an saiyang tingog. An paggibo kaiyan magbubunga nin darakulang bendisyon.

9, 10. Mantang si Moises yaon sa Bukid nin Sinai, ano an ginibo kan mga Israelita, asin may anong mga resulta?

9 Pero, bago an pundamental na mga prinsipyo kan kondisyon na iyan iukit sa gapo kan ‘moro nin Dios,’ kinaipuhan an mga maldisyon nin Dios. (Exodo 31:18) Taano ta maninigo an siring na makaturotristeng mga resulta? Bako daw na sinabi kan mga Israelita na mawot nindang gibohon an gabos na itinaram ni Jehova? Iyo, sa tataramon gusto ninda nin mga bendisyon, alagad paagi sa saindang mga gibo pinili ninda an dalan na maninigo sa mga maldisyon.

10 Sa laog nin 40 aldaw kan si Moises yaon sa Bukid nin Sinai na nag-aako kan Sampulong Togon, binalga kan mga Israelita an naenot nindang kapanugaan nin kaimbodan ki Jehova. “Mientras tanto,” an sabi kan tala, “naheling kan banwaan na si Moises nahahaloy na humilig hale sa bukid. Kaya an banwaan nagtiripon ki Aaron asin nagsabi sa saiya: ‘Buhat, gibohan kami nin sarong dios na mangengenot sa samo, huli ta kun dapit sa Moises na ini, an lalaki na nangenot sa samo hale sa daga nin Egipto, dai nanggad niamo aram kun ano na an nangyari sa saiya.’” (Exodo 32:1) Ini saro na naman na halimbawa nin daing galang na kaisipan na ipinaheling sa tawo na ginagamit kaidto ni Jehova na mangenot asin magdirehir sa saiyang banwaan. An mga Israelita natentaran na umarog sa idolatriya nin mga Egipcio asin nag-ani nin makamomondong mga resulta kan an mga 3,000 sa sainda magadan paagi sa minasbad sa laog nin sarong aldaw.​—Exodo 32:​2-6, 25-29.

Kapahayagan nin mga Bendisyon Asin Maldisyon

11. Anong mga instruksion mapadapit sa mga bendisyon asin maldisyon an inotob ni Josue?

11 Sa paghinanapos kan 40 taon na pagbaklay kan Israel sa kaawagan, sinarosaro ni Moises an mga bendisyon na aanihon paagi sa pagpili sa dalan nin pagkuyog sa Dios. Sinarosaro man nia an mga maldisyon na aagihan kan mga Israelita kun pilion nindang makisuway ki Jehova. (Deuteronomio 27:​11–​28:10) Dai nahaloy pakalaog kan Israel sa Dagang Panuga, inotob ni Josue an mga instruksion ni Moises mapadapit sa mga bendisyon asin maldisyon na ini. Anom na tribo nin Israel an nagtirindog sa ibaba kan Bukid nin Ebal, asin an anom pa puminosisyon sa atubangan kan Bukid nin Gerizim. An mga Levita tuminindog sa kababan sa pag-oltanan. Minalataw na an mga tribong yaon sa atubangan kan Bukid nin Ebal nagsabi nin “Amen!” sa mga maldisyon, o sumpa, na binasa sa sainda. An iba man nagsimbag sa mga bendisyon na binasa kan mga Levita sa sainda na yaon sa ibaba kan Bukid nin Gerizim.​—Josue 8:​30-35.

12. Ano an nagkapira sa mga maldisyon na isinabi kan mga Levita?

12 Imahinara na nadadangog nindong sinasabi kan mga Levita: “Isumpa an tawo na maggibo nin inukit na imahen o minoldeng estatuwa, bagay na makababalde para ki Jehova, ginibo kan mga kamot nin panday sa kahoy asin metal, asin ibinugtak iyan sa lugar na tagoan. . . . Isumpa an saro na magtrato sa saiyang ama o sa saiyang ina na may pagduhagi. . . . Isumpa an saro na magsibog kan muhon kan saiyang kapwa. . . . Isumpa an saro na magpangyaring an buta malagalag sa dalan. . . . Isumpa an saro na magbiribid kan paghokom sa nakikihimanwa, sa aking lalaki na daing ama asin sa babaeng balo. . . . Isumpa an saro na magdorog sa agom na babae kan saiyang ama, huli ta tinuklab nia an gayad kan gubing kan saiyang ama. . . . Isumpa an saro na magdorog sa ano man na hayop. . . . Isumpa an saro na magdorog sa saiyang tugang na babae, an aking babae kan saiyang ama o an aking babae kan saiyang ina. . . . Isumpa an saro na magdorog sa saiyang panugangan na babae. . . . Isumpa an saro na manlugad nin ikagagadan sa saiyang kapwa gikan sa sarong tagoan. . . . Isumpa an saro na mag-ako nin suhol na lugadan nin ikagagadan an sarong kalag, kun iyan dugong daing sala. . . . Isumpa an saro na dai magpaotob kan mga tataramon kan ley na ini paagi sa paggibo kaiyan.” Pakatapos kan kada maldisyon, an mga tribo na nasa atubangan kan Bukid nin Ebal minasabi, “Amen!”​—Deuteronomio 27:​15-26.

13. Sa sadiri nindong pananaram, paano nindo isasabi an nagkapirang bendisyon na ipinahayag kan mga Levita?

13 Ngonyan imahinara na nadadangog nindo na an mga nasa atubangan kan Bukid nin Gerizim berbal na minasimbag sa kada bendisyon mantang ikinukurahaw kan mga Levita: “Bebendisyonan ka sa siudad, asin bebendisyonan ka sa oma. Bebendisyonan an bunga kan saimong tulak asin an bunga kan saimong daga asin an bunga kan saimong magarong hayop, an ogbon kan saimong baka asin an mga aki kan saimong aripompon. Bebendisyonan an saimong basket asin an saimong ramasan. Bebendisyonan ka sa saimong paglaog, asin bebendisyonan ka sa saimong pagluwas.”​—Deuteronomio 28:​3-6.

14. Basado sa ano na an mga Israelita mag-aako nin mga bendisyon?

14 Ano an basihan sa pag-ako kan mga bendisyon na ini? An tala nagsasabi: “Kun ika maghinanyog nanggad sa tingog ni Jehova na saimong Dios paagi sa pag-iingat na gibohon an gabos niang togon na ipinagboboot ko sa saimo ngonyan, si Jehova na saimong Dios ilalangkaw ka man sa gabos na ibang nasyon sa daga. Asin an gabos na bendisyon na ini maabot nanggad sa saimo asin aabotan ka, huli ta ika danay na naghihinanyog sa tingog ni Jehova na saimong Dios.” (Deuteronomio 28:​1, 2) Iyo, an paagi na kamtan an mga bendisyon nin Dios iyo an pagkuyog sa Dios. Alagad kumusta man kita ngonyan? Kita daw bilang indibiduwal pipilion an mga bendisyon asin buhay paagi sa pagpadagos na ‘maghinanyog sa tingog ni Jehova’?​—Deuteronomio 30:​19, 20.

Pagkaigwa nin Mas Eksaktong Pagmansay

15. Ano an puntong idinoon sa bendisyon na nasusurat sa Deuteronomio 28:​3, asin paano kita makikinabang dian?

15 Pensaron niato an nagkapirang bendisyon na puedeng kamtan nin sarong Israelita huli sa pagkuyog ki Jehova. Halimbawa, an Deuteronomio 28:​3 nagsasabi: “Bebendisyonan ka sa siudad, asin bebendisyonan ka sa oma.” An pag-ako kan bendisyon nin Dios bakong depende sa lugar o asignasyon. An iba tibaad an pagmate garo sinda laom sa saindang mga kamugtakan, tibaad huli ta nag-iistar sinda sa lugar na dukha sa materyal o sa nasyon na ginaba nin guerra. An iba tibaad maghimuyawot na paglingkodan si Jehova sa ibang lugar. An ibang lalaking Kristiano tibaad nadidisganar huli ta dai pa sinda nanombrahan na ministeryal na lingkod o magurang sa kongregasyon. Kun beses, an mga Kristiana pinanluluyahan nin boot huli ta mayo sinda sa kamugtakan na makikabtang sa bilog na panahon na ministeryo bilang payunir o misyonera. Pero, an gabos na ‘naghihinanyog sa tingog ni Jehova asin maingat na ginigibo an gabos niang kahagadan’ bebendisyonan ngonyan asin sagkod lamang.

16. Paano an prinsipyo kan Deuteronomio 28:​4 naeeksperyensiahan kan organisasyon ni Jehova ngonyan?

16 An Deuteronomio 28:​4 nagsasabi: “Bebendisyonan an bunga kan saimong tulak asin an bunga kan saimong daga asin an bunga kan saimong magarong hayop, an ogbon kan saimong baka asin an mga aki kan saimong aripompon.” An paggamit kan singular na pronombreng Hebreo na trinadusir na “saimo” nagpaparisa na ini an magigin personal na eksperyensia nin makinuyog na Israelita. Kumusta man an makinuyog na mga lingkod ni Jehova ngonyan? An lakop sa kinaban na pagdakol asin paghiwas na nangyayari sa organisasyon kan Mga Saksi ni Jehova bunga kan bendisyon nin Dios sa maigot na mga paghihingoa nin labing 5,000,000 na parabalangibog kan maogmang bareta kan Kahadean. (Marcos 13:10) Asin risa an potensial sa orog pang pagdakol huli ta labing 13,000,000 an nag-atender sa selebrasyon kan Pamanggihan kan Kagurangnan kaidtong 1995. Kamo daw nagkakamit nin mga bendisyon kan Kahadean?

An Pagpili kan Israel Iyong Nagdeterminar

17. Depende sa ano an “pakaaboti’ nin mga bendisyon o mga maldisyon?

17 An makinuyog na Israelita garo baga lalapagon nin mga bendisyon. Ipinanuga: “An gabos na bendisyon na ini maabot nanggad sa saimo asin aabotan ka.” (Deuteronomio 28:2) Sa kaagid na paagi, sinabi manongod sa mga maldisyon: “An gabos na maldisyon na ini maabot man sa saimo asin aabotan ka.” (Deuteronomio 28:15) Kun kamo nagin Israelita kan suanoy, kamo daw “aabotan” nin mga bendisyon o nin mga maldisyon? Depende iyan sa kun baga kamo nagkuyog sa Dios o nakisuway sa saiya.

18. Paano kutana nalikayan nin mga Israelita an mga maldisyon?

18 Sa Deuteronomio 28:​15-68, an makolog na mga bunga nin pakisuway isinabi bilang mga maldisyon. An iba eksaktong kabaliktaran kan mga bendisyon huli sa pagkuyog na sinarosaro sa Deuteronomio 28:​3-14. Sa parate, an banwaan nin Israel nag-ani kan grabeng mga resulta nin mga maldisyon huli ta pinili nindang gumibo nin falsong pagsamba. (Esdras 9:​7; Jeremias 6:​6-8; 44:​2-6) Makaturotriste nanggad! Nalikayan kutana an siring na mga bunga paagi sa pagpili kan tama, an pagkuyog sa nakararahay na mga ley asin prinsipyo ni Jehova, na malinaw na nagsasabi kun ano an marahay asin maraot. An dakol ngonyan nagtitios nin kolog asin trahedya huli ta pinili nindang gumawe tumang sa mga prinsipyo kan Biblia paagi sa paggibo nin falsong relihion, pakikikabtang sa seksuwal na inmoralidad, paggamit nin bawal na droga, pagpangana sa mga inomon na de alkohol, asin kaagid na mga bagay. Arog kaidto sa suanoy na Israel asin Juda, an siring na salang mga pagpili nagbubunga nin pagkaanggot nin Dios asin dai kinakaipuhan na kakologan sa puso.​—Isaias 65:​12-14.

19. Iladawan an nakakamtan na mga kamugtakan kun pinipili kan Juda asin Israel na kuyogon si Jehova.

19 Abunda an mga bendisyon asin nagigin trangkilo sana kun an Israel nagkukuyog ki Jehova. Halimbawa, manongod sa kaaldawan ni Hadeng Salomon, mababasa niato: “Kadakoldakol kan Juda asin Israel, siring kadakol kan mga baybay na yaon sa gilid nin dagat, na nagkakarakan asin nag-iirinom patin nag-oorogma. . . . Asin an Juda asin Israel padagos na nag-erok na may seguridad, an lambang saro sa sirong kan saiyang ubasan asin sa sirong kan saiyang higuerra, poon sa Dan sagkod sa Beer-seba, sa gabos na aldaw ni Salomon.” (1 Hade 4:​20-25) Dawa kaidtong panahon ni Hadeng David, na nagkaigwa nin grabeng pagtumang gikan sa mga kaiwal nin Dios, namamatean kan nasyon an pagtabang asin bendisyon ni Jehova kun pinipili nindang kuyogon an Dios nin katotoohan.​—2 Samuel 7:​28, 29; 8:​1-15.

20. An Dios kompiado sa ano mapadapit sa mga tawo?

20 Kamo daw makuyog sa Dios, o kamo daw makikisuway sa saiya? Puedeng pumili an mga Israelita. Minsan ngani kita gabos nagmana nin makasalan na tendensia ki Adan, nag-ako man kita kan balaog na libreng pagpili. Apisar ki Satanas, kan maraot na kinaban na ini, asin kan satong mga pagkabakong sangkap, puede kitang pumili kan tama. Dugang pa, kompiado an satong Kaglalang na sa atubangan nin lambang pagbalo asin sugot, igwa nin mga mapili kan tama, bako sanang sa tataramon kundi pati sa gibo. (1 Pedro 5:​8-10) Kamo daw magigin kabilang ninda?

21. Ano an sisiyasaton sa masunod na artikulo?

21 Sa masunod na artikulo, mapagtuturotimbang niato an satong mga kaisipan asin gibo sa liwanag nin nakaaging mga halimbawa. An lambang saro logod sa sato maghimate na may pagpasalamat sa mga tataramon nin Dios paagi ki Moises: “Ibinugtak ko an buhay asin kagadanan sa atubangan mo, an bendisyon asin an maldisyon; asin kaipuhan na pilion mo an buhay tanganing makapagpadagos kang mabuhay.”​—Deuteronomio 30:19.

Ano an Isisimbag Nindo?

◻ Paano ginibong posible ni Jehova an mga bendisyon para sa makasalan na katawohan?

◻ Ano an mga maldisyon?

◻ Paano kutana an mga Israelita nag-ako nin mga bendisyon imbes na mga maldisyon?

◻ Anong mga bendisyon an nakamtan nin Israel huli sa pagkuyog sa Dios?

[Retrato sa pahina 15]

An mga Israelita nagtiripon sa atubangan kan Bukid nin Gerizim asin Bukid nin Ebal

[Pasasalamat para sa pinagkuanan]

Pictorial Archive (Near Eastern History) Est.

    Bicol Publications (1983-2025)
    Mag-log Out
    Mag-log In
    • Bicol
    • I-share
    • Settings na Gusto Mo
    • Copyright © 2025 Watch Tower Bible and Tract Society of Pennsylvania
    • Kasunduan sa Paggamit
    • Palisiya sa Privacy
    • Privacy Settings
    • JW.ORG
    • Mag-log In
    I-share