Posible daw an Tunay na Proteksion?

AN PARASURAT na si Ralph Waldo Emerson nagpahayag kaidto: “An mga tawong halipot an kaisipan nagtutubod sa suwerte . . . An mga tawong mahiwas an kaisipan nagtutubod sa causa asin epekto.” Iyo, an tawo na nagtutubod sa puwersa nin mga agimat sa mahika asin anting-anting nin kapaladan isinusuko an pagkontrol kan saiyang buhay sa dai naheheling na mga puwersa. Iinaapon nia sa doros an lohika asin pangangatanosan asin sia nagpapairarom sa bakong makatanosan, superstisyosong takot.

Alagad an Biblia makakapatalingkas sa saro sa siring na takot. Ipinaheheling kaiyan na an mga agimat asin anting-anting mayong maginibo, mayong puwersa. Paano ini ipinaheheling kan Biblia? Bueno, sono sa The New Encyclopædia Britannica, “an mga agimat hinohona na nagkukua nin puwersa hale sa saindang kakoneksion sa [apuwera sa iba pang bagay] mga puwersang naturales.” An mga puwersang ini puwedeng ‘an espiritu kan mga gadan’ o ‘an puwersa nin suwerte.’ Pero malinaw na ipinaheheling kan Biblia na an mga gadan “mayo man lamang . . . nin pakaaram.” (Eclesiastes 9:5) Kaya mayo nin espiritu nin mga gadan na puwedeng makatabang o makakolog sa mga nabubuhay; ni na igwa nin ano man na dai naheheling na puwersa arog nin suwerte na puwedeng humiro para sa saindo.

Kan mga panahon kan Biblia, kinondenar nin Dios an mga nagbabaya saiya, an mga nakakalingaw sa saiyang banal na bukid, “an mga nagpupuwesto nin lamesa para sa dios nin Kapaladan asin idtong nagbubugtak nin tinimplang arak para sa dios nin Kaaabtan.” Imbes na magkamit nin proteksion, an mga parasuportar na idto sa suwerte itinalaga sa kalaglagan. “Itatalaga ko kamong mga tawo sa minasbad,” an sabi ni Jehova Dios.​—Isaias 65:​11, 12.

Paagi sa paggibo nin salamangka, an suanoy na nasyon nin Babilonya nagtubod man sa proteksion nin misteryosong mga puwersa. Pero an Babilonya daing duwa-duwang nagtios nin kalamidad. “Magdanay ka sa saimong mga orasyon asin sa saimong nakakatakot na mga engkanto,” an angat ni propeta Isaias. “Tibaad makakua ka nin tabang hale sainda . . . Pero dai! sa ibong kan saimong kadakol na pakana ika daing puwersa.” (Isaias 47:​12, 13, The New English Bible) Pag-abot nin panahon biyo nang dai nag-eksister an nasyon na iyan. An pagtubod sa okulto napatunayan na daing kamanungdanan. Sa kaagid na paagi, mayo nin agimat sa mahika, o anting-anting, an makakagibo nin ano man tanganing makatabang o makaprotehir saindo.

Sarong Klase nin Idolatriya

An iba tibaad mayo pa man giraray nin naheheling na peligro sa pagdaradara nin sarong kristal, bitis nin kuneho, o relihiyosong medalya. Bako daw saradit na bagay sana ini na dai man nakadadanyar? Bako sono sa Biblia. Nagsasabi iyan na an ginagamit sa okulto bakong daing peligro.

An paggamit nin mga agimat sarong klase nin idolatriya​—bagay na malinaw na kinokondenar sa Tataramon nin Dios. (Exodo 20:​4, 5) Totoo, an saro tibaad dai nakakamate na sia direktang nagsasamba sa agimat o anting-anting. Alagad dai daw iyan nagpapaheling nin magalang, mapagsambang kaisipan sa dai naheheling na mga puwersa nin okulto kun an saro igwa nin saro man sana? Asin bako daw totoo na an mapagsambang atension (siring baga sa paghadok) parateng itinatao sa mismong mga anting-anting? Alagad an Biblia, sa 1 Juan 5:​21, nagsasadol sa mga Kristiano: “Maglikay kamo sa mga ladawan.” Bako daw kabale digdi an mga bagay na minamansay bilang anting-anting o agimat?

An Siod kan Okulto

Paagi sa paggamit nin mga agimat, dakol man an nasiod kan okulto. Totoo, an iba tibaad nagdadaradara nin kristal o bolong sa mahika huli sa kaugalean imbes na huli sa kombiksion. Pero kun paanong an pakigitilan sa sarong patotot tibaad gumiya sa pagkaolakit nin AIDS, an pagkagusto sa okulto puwede man na magkaigwa nin kapahapahamak na mga kaaabtan. Igwa nin marahay na rason na binawalan nin Dios an mga Israelita sa paggibo nin mahika, pagtoodtood, asin paghihimalad. “An gabos na naggigibo kan mga bagay na ini makababalde ki Jehova,” an patanid kan Biblia.​—Deuteronomio 18:​10-14.

Taano ta estriktong gayo an pagbabawal na ini? Huli ta an dai naheheling na mga puwersa sa likod kan siring na mga gibo bako an espiritu nin mga gadan ni an puwersa nin suwerte kundi si Satanas na Diablo asin an saiyang mga demonyo.a Asin an paggamit nin mga agimat direktang konektado sa pagsamba sa demonyo. An Vine’s Expository Dictionary of Old and New Testament Words nagsasabi: “Sa pag-engkanto, an paggamit nin droga, baga man simple o makosog, sa kagabsan iniibanan nin mga orasyon asin pangapodan sa mga puwersa nin okulto, na igwa nin itinataong manlaenlaen na anting-anting, agimat, abp.”

Kun siring an saro na igwa nin anting-anting sa okulto nakikisale sa espiritismo. May peligrong darahon sia sa irarom kan kapahapahamak na impluwensia asin kontrol “kan dios kan palakaw na ini nin mga bagay”​—si Satanas na Diablo. (2 Corinto 4:4) Kaya, igwa nin marahay na dahelan, an Biblia nagboboot sato na lumikay sa gabos na klase nin espiritismo.​—Galacia 5:​19-21.

Paghubad sa mga Kadena nin Superstisyon

Daing duwa-duwang nagsasabi an The World Book Encyclopedia: “An mga superstisyon posibleng magkaigwa nin kabtang sa buhay sagkod na an mga tawo natatakot sa kada saro asin igwa nin mga daing kasiertohan dapit sa ngapit.” Pero an mga Saksi ni Jehova nagtatabang sa dakol na ikatalingkas an saindang sadiri sa nakadadanyar na mga superstisyon. An paggirumdom kan sarong babaeng may agom na taga-Aprika del Sur: “Rinibok ako kan marompot na mga espiritu, asin an sakong harong pano-pano nin muti tanganing protehiran ako tumang sainda.” Tinabangan sia kan mga Saksi ni Jehova na masabotan an mga peligro nin pakikawat sa okulto. An saiyang simbag? “Pinonan kong iapon an gabos na nasa sako na konektado sa demonismo,” an sabi nia. “Nagrahay an sakong salud. Idinusay ko an sakong buhay tanganing maglingkod ki Jehova asin nabautismohan.” Talingkas na sia ngonyan sa superstisyon asin espiritismo.

Horophoropa man an albularyo na taga-Nigeria na isinalak an espiritismo sa saiyang arte nin pagbolong. Sa parateng paggamit nin mga pan-uuma asin panunumpa, ugale na niang palayason sa saiyang harong an mga Saksi ni Jehova kun sinda minasongko. Sarong beses nag-andam pa ngani sia nin espesyal na bolong, nagtaram nin pirang orasyon dian, asin isiniwag iyan sa lalauogon kan sarong lalaking Saksi! “Sa laog nin pitong aldaw magagadan ka!” an kurahaw nia. Dai nahaloy pakalihis nin pitong aldaw nagbuwelta an Saksi, na nagpahiro sa albularyo na maghidaleng lumuwas sa harong, na nagtutubod na nakaheling sia nin kalag! Nahayag ngonyan na daing kamanungdanan an saiyang mahika, nag-oyon sia sa pag-adal sa Biblia asin sa katapustapusi sia nagin Saksi.

Puwede man kamong makatalingkas sa kadena nin pagkatakot asin superstisyon. Totoo, ini tibaad bakong pasil. Tibaad nagdakula kamo sa sarong kultura kun saen lakop an paggamit nin mga agimat asin anting-anting. An mga Kristiano sa suanoy na Efeso napaatubang sa siring na angat. Nabuhay sinda sa kultura na impluwensiadong marhay nin espiritismo. Ano an ginibo ninda kan manodan ninda an katotoohan kan Tataramon nin Dios? An Biblia nagsasabi: “An dakol sa mga salamangkero nagtiripon kan saindang mga libro asin sinolo iyan sa atubang nin gabos. Asin kinarkulo ninda an halaga kan mga iyan asin nakua na an mga iyan nagkakahalaga nin limang polong ribong pidasong pirak.”​—Gibo 19:19.

Pagkamit kan Proteksion nin Dios

Kun hahaleon nindo sa saindong sadiri an gabos na gira kan okulto, dai daw kamo pababayaan na mayo nin proteksion? Al kontraryo, “an Dios pailihan asin kakosogan para sa sato, sarong tabang na danay na makukua sa panahon nin mga kasakitan.” (Salmo 46:1) An proteksion nin Dios partikularmenteng maheheling kun laglagon na nia an maraot na palakaw na ini nin mga bagay. “Si Jehova tataong magligtas sa mga tawong may diosnon na debosyon hale sa pagbalo, alagad itagama an mga tawong maraot para sa aldaw nin paghokom tanganing gadanon.”​—2 Pedro 2:9; ikomparar an Salmo 37:40.

Mientras tanto, ‘an panahon asin pagkanorongod nangyayari sa sato gabos.’ (Eclesiastes 9:11) Dai nanunuga an Dios na an saiyang mga lingkod “masuwerteng” mamumuhay o na saiyang poprotehiran sinda sa gabos na personal na peligro. Minsan siring, talagang nanuga sia na poprotehiran an satong espirituwalidad asin satong relasyon sa saiya. (Salmo 91:​1-9) Paano? Enot, tinatawan nia kita nin mga pagboot asin prinsipyo na mapapakinabangan niato asin maprotehir sato sa nakararaot na impluwensia ni Satanas. (Isaias 48:17) Paagi sa satong pagkamit nin kaaraman manongod sa mga dalan ni Jehova, ‘an kaisipan mismo mag-iingat sa sato, an pakamansay mismo magbabantay sa sato’​—halimbawa, sa daing pakinabang o peligrosong mga aktibidad.​—Talinhaga 2:11.

An saro pang paagi na pinoprotehiran kita nin Dios iyo an pagtao kan “kapangyarihan na lihis sa ordinaryo” sa mga panahon nin pagbalo. (2 Corinto 4:7) Asin kun an mga kamugtakan nag-uuma na malunosan an sarong Kristiano, Saiyang itinatao an “katoninongan nin Dios na minalampas sa gabos na kaisipan” tanganing bantayan an puso asin mental na mga kakayahan. (Filipos 4:7) Iyo, an Kristiano nasasangkapan na “marigon na makapanindogan tumang sa mga pakana kan Diablo.”​—Efeso 6:​11-13.

Paano nindo makukua an siring na proteksion? Ponan paagi sa pagkua nin kaaraman manongod ki Jehova asin sa saiyang Aki, si Jesu-Cristo. (Juan 17:3) Dakol an magigibo nin mga Saksi ni Jehova tanganing tabangan kamo sa mga bagay na ini. Mantang kinukultibar nindo an mainit na relasyon ki Jehova, mapoponan nindong maeksperyensiahan an saiyang mabooton na proteksion. An Dios nagsasabi, arog kan mababasa niato sa Salmo 91:​14: “Huli ta sa sakuya nia ibinugtak an saiyang pagkamoot, tatawan ko man sia nin kaligtasan. Iingatan ko sia huli ta midbid nia an sakuyang ngaran.”

Tunay nanggad, kun maimbod kamo saiya, sa katapustapusi bebendisyonan kamo nin Dios nin buhay na daing katapusan sa maabot na bagong kinaban. Ginagarantiyahan ni Jehova an mga nabubuhay sa panahon na iyan: “Mayo nin siisay man na magpapatakig sa sainda; huli ta an mismong ngoso ni Jehova nin mga hukbo iyo an nagtaram kaiyan.” (Miqueas 4:4) Mawawara na an helang asin kagadanan. (Kapahayagan 21:4) Alagad ngonyan pa, puwede kamong magkamit nin dakulang kaligtasan​—kun kukultibaron nindo an dayupot na relasyon ki Jehova. Arog kan salmista, makakasabi kamo: “An tabang sa sako gikan ki Jehova, an Kaggibo kan langit asin daga?”​—Salmo 121:2.

[Nota sa Ibaba]

[Ritrato sa pahina 6]

An mga Kristiano sa Efeso iinapon an gabos na bagay na konektado sa okultismo

[Ritrato sa pahina 7]

Sa irarom kan Kahadean nin Dios, mawawara na an takot