Magpadagos sa Pagpapayunir

MGA 4,500,000 na Saksi ni Jehova an nagpapahayag kan maogmang bareta sa bilog na kinaban. Kabilang sa sainda an labing 600,000 na payunir, o bilog na panahon na mga parabalangibog kan Kahadean. An mga nasa dakulang hukbong ini nin mga payunir may edad na poon sa mga bako pang tin-edyer sagkod sa mga retirado na mga 90 anyos na. Gikan sinda sa gabos na klase nin pinaghalean asin pamumuhay.

Daing duwa-duwa, an gabos na bilog na panahon na parahulit na ini gustong magin mapanggana sa ministeryo nin pagpapayunir. Dakol an boot na gibohon iyan na parasiyempre nindang karera. An iba dai nakagigibo kaiyan huli sa nagkapirang dahelan. Pero an iba nahimong magpadagos sa pagpapayunir sa ibong nin mga kasakitan sa pagbuhay, maluyang salud, panluluya nin boot, asin iba pang problema. Kaya paano daw makakaya nin bilog na panahon na mga parahulit an siring na mga problema asin makapagpadagos pa man giraray sa pagpapayunir?

Pagpanigo sa Pinansial na mga Pangangaipo

Sa pankagabsan, an mga payunir naghahanapbuhay tanganing masustentohan an saindang mga gastos, arog ni apostol Pablo. (1 Tesalonica 2:9) Sa kadaklan na parte kan kinaban, sinda napapaatubang sa sobra an paglangkaw nin mga presyo sa kakanon, gubing, istaran, asin transportasyon. Parate na depisil na makakua kan kaipuhan nindang trabahong por ora. Kun igwa man, sa parate pinakahababa an suweldo sa siring na mga trabaho, na daing benepisyong seguro sa salud.

Kun kita ‘padagos na hahanapon nguna an Kahadean nin Dios asin an saiyang katanosan,’ makatutubod kita na itatao ni Jehova an satong materyal na mga pangangaipo. Kun siring, kun nasasakitan sa pinansial an mga payunir dai kaipuhan na ‘maghadit dapit sa masunod na aldaw.’ (Mateo 6:​25-34) Minsan ngani minagibo sinda nin odok na mga paghihingoa na maresolberan an siring na mga problema, maliligtas sinda sa dai maninigong kahaditan huli sa marigon na pagtubod ki Jehova.

Kun an saro napapaatubang sa pinansial na mga kasakitan, tibaad puwedeng inaan an mga gastos. Paagi sa pirang pagliwat sa badyet, tibaad mahimo na mapanigoan an mga pangangaipo, minsan dai an materyal na mga gusto sana. Tanganing mainaan an gastos, may mga payunir na nakisasaro sa ibang Kristiano sa apartment. Sa pagtabang sa saindang mga aki na makapagpayunir, kun beses an mga magurang nagtatao nin istaran na libre o sa hababaon na halaga. An iba man tinatabangan an mga payunir sa paragastos sa pagkakan asin transportasyon. Pero an mga payunir habo man na magin pagabat sa iba, ta sinda may Makakasuratan na obligasyon na buhayon an saindang sadiri.​—2 Tesalonica 3:​10-12.

Puwedeng mainaan an gastos sa transportasyon paagi sa pakikibanga sa ibang payunir sa gastos. Kun may kotse an duwang payunir, tibaad puwede sindang mag-iba sa paghuhulit sa sarong lugar, na ginagamit an sarong kotse asin hinahale an gastos sa paggamit nin duwang sakayan. An mga payunir na mayo nin kotse tibaad puwedeng makiiba sa mga igwa asin makihiras sa gastos sa transportasyon. Maiinaan pa an gastos sa pagbiyahe paagi sa paglakaw pasiring sa hararaning teritoryo. Sa dakol na nasyon an mga payunir ginagamit an ekonomiyang mga sakayan na pampubliko.

Kabilang sa mga napangganahan an pinansial na mga problema asin nakapagpadagos sa bilog na panahon na paglilingkod iyo si Newton Cantwell asin an saiyang agom. Ipinabakal ninda an saindang oma asin nagpoon na magpayunir kaiba an anom sa pito nindang aki kan 1932, kaidtong Dakulang Krisis. “Dai nahaloy nagastos mi na an gabos na kabakalan kan samong oma​—an kadaklan sa doktor,” an surat ni Tugang na Cantwell. “Nagigirumdoman mi na kan bumalyo kami sa ikaduwa ming destino, an kuwarta mi igo sanang iantisipo sa duwang semanang arkila, na may sobrang limang dolyar. Minsan siring, aram mi na si Jehova magtatagama basta mahigos ming otobon an samong paglilingkod. . . . Nakanood kaming mag-ekonomiya sa laen-laen na paagi. Pagbalyo sa bagong teritoryo, halimbawa, kinakaolay ko an pirang kagsadiri nin gasolinahan asin ipinaliliwanag na aroaldaw tolong kotse mi an nagdadalagan may koneksion sa satong Kristianong gibohon. Parate na ini nagbubunga kan pakabakal mi nin gasolina na may diskuento. Dai nahaloy nakanood an mga aki mi na asikasohon an mga paghirahay sa samong kotse, na nakaeekonomiyang marhay sa pagpahirahay.” Kaya an pamilyang Cantwell mapangganang naatubang an pinansial na mga angat asin nakapagpadagos sa bilog na panahon na paglilingkod. Si Tugang na Cantwell nasa listahan pa nin mga payunir kan sia magadan sa edad na 103.

Pakakua nin Trabahong Por Ora

An dakol na payunir sinusustentohan an sadiri sa pinansial paagi sa mga trabahong por ora. Tanganing masustentohan an sadiri sa ministeryo sa Corinto, si Pablo nagtrabaho bilang paragibo nin tolda kaiba an mga kapagtubod niang si Aquila asin Priscila. (Gibo 18:​1-11) Ngonyan, an espirituwal na mga tugang parateng naoogma na tawan nin trabahong por ora an mga payunir. An ibang payunir nakakakua nin siring na trabaho paagi sa mga ahensia nin trabaho na nag-oopresir nin temporaryong mga trabaho. Kaipuhan an pagtubod sa Dios, saka an odok na pag-arang kan saiyang paggiya sa mga pagdedesisyon sa trabaho.​—Talinhaga 15:29.

“Pakatapos na mapakosog na marhay nin mapagngayongayong paghorophorop,” sabi nin sarong payunir, “pinaisi ko an sakong superbisor na an gibohon ko sa ministeryo sarong magabat na personal na responsibilidad asin na dai ko maaako an pambilog na panahon na katongdan. Pag-Miyerkoles, hinapot ako kun kokonsideraron ko liwat an trabaho pero por ora na sana. Iyan maogma kong inako.” Dai pagmenuson an puwersa nin pamibi, asin sundan nin hiro an saindong mga pamibi.

Tibaad marahay na sabihan nin mga payunir an magigin mga among ninda na an katuyohan ninda sa paghanap nin trabahong por ora sustentohan an saindang sadiri sa ministeryo. Puwede nindang isabi an mga aldaw na puwede sinda asin kun pirang oras kada semana an ikatatao ninda sa trabaho. Napagbanga nin duwang magtugang an sarong bilog na panahon na trabaho sa sarong kompaniya na nagtatao nin legal na tabang, na nagtogot sa kada saro na magtrabaho nin duwa may kabangang aldaw kada semana. Ini nakasustento sa sainda bilang mga payunir sagkod na lumaog sinda sa Paadalan sa Biblia kan Watchtower sa Gilead asin mag-ako nin mga destino bilang misyonera.

An laen-laen na klase nin trabahong puwede sa Kasuratan manonompongan paagi sa pakikipag-olay sa mga kapagtubod asin iba pa o sa pagheling sa mga anunsio sa diaryo. Nakatatabang an kapakumbabaan, ta makaoolang iyan sa mga payunir sa pagigin sobra kamapamili sa klase nin trabahong gigibohon ninda. (Ikomparar an Santiago 4:10.) Tanganing makapagpadagos sa pagpayunir tibaad kaipuhan na gumibo sinda nin trabaho na ibinibilang nin iba na hababa o menus. Kun aakoon an siring na trabaho pero may ibang gusto, tibaad sa huri puwedeng bumalyo nin trabaho.

Maluyang Salud Asin Panluluya nin Boot

An iba kaipuhan na pumondo sa saindang pagpapayunir huli sa magagabat na problema sa salud. Pero kun an mga payunir dai magpapabiglabigla sa bagay na ini, tibaad maheling ninda na an helang puwedeng maomayan o puwedeng kumosog nin igo an salud tangani na sinda makapagpadagos sa pagpapayunir. Dakol an kayang magpayunir sa ibong nin mga problema sa salud ta sinda nagpapabolong, nagdadanay sa mga pagkakan na angay sa sainda, asin ginigibo an kinakaipuhan na pagpahingalo asin ehersisyo. Namasdan nin sarong nagbibiyaheng paraataman an sarong tugang na babaeng payunir na grabe an artritis kaya kaipuhan niang tabangan sa paglakaw sa harong-harong sa ministeryo. (Gibo 20:20) Pero, sinda mag-agom may pinangenotan na 33 na pag-adal sa Biblia asin nakatabang sa 83 katawo na umako kan katotoohan nin Dios. Pag-abot nin panahon ruminahay an saiyang salud, asin nag-atender sia sa Paadalan sa Paglilingkod Bilang Payunir pakalihis nin 11 taon.

An panluluya nin boot puwedeng magin dahelan na an iba humale sa ministeryong pagpapayunir. (Talinhaga 24:10) An sarong payunir nagsabi sa sarong nagbibiyaheng paraataman: “Mapondo na ako sa pagpapayunir. . . . May mga babayadan ako.” Kaipuhan nia nin antipara na 20 dolyares an halaga. “Ano mapondo ka sa pagpapayunir huli sa sarong 20-dolyares na pangangaipo?” an hapot kan paraataman. Isinuherir na an payunir magtrabaho nin sarong aldaw sa lokal na hasyenda nin kape, magpatangdan nin 20 dolyares, bakalon an antipara, asin magpadagos na magpayunir. Ipinahayag nin dugang pang orolay na an pundamental na problema iyo an panluluya nin boot huli sa magastos na mga pagpahirahay sa kotse. Irinekomendar na inaan kan payunir an gastos paagi sa pagdara kan kotse aroaldaw sa lugar na mga pirang milya sana an hiwas imbes na sa mahiwason na lugar. Hinatolan man sia na papagdanayon an saiyang espirituwalidad. Iinaplikar kan payunir an hatol asin pakalihis nin anom na bulan nag-ako kan pag-apod saiya na lumaog sa Paadalan nin Gilead. Pagkagraduwar nadestino sia sa ibang nasyon asin maimbod na naglingkod duman nin dakol na taon sagkod na sia magadan. Iyo, darakulang bendisyon an parateng ibinubunga kun dai kita padadaog sa panluluya nin boot kundi gigirumdomon na si Jehova nasa sato.

Padangaton an Saindong Pribilehiyo nin Paglilingkod

Sa ibong nin mga pagbalo, arog baga nin mga kamugtakan nin pangangaipo asin mga panahon na daing pagkakan, ibinilang ni Pablo na kayamanan an saiyang ministeryo. (2 Corinto 4:​7; 6:​3-6) Sa atubang nin kasakitan asin paglamag ngonyan, an dakol na lingkod ni Jehova sa Aprika, Asia, Sirangan na Europa, asin sa iba pa nangapot sa saindang pribilehiyong magpayunir. Kun siring, kun inaatubang an mga pagbalo, gibohon an gabos na paghihingoa na magpadagos sa mapalad na paglilingkod na ini, sa ikaoomaw ni Jehova.

An kadaklan na payunir nakalaog sana sa bilog na panahon na paghuhulit ta ginibo nindang simple an saindang pamumuhay. Arog ni Pablo, pinaglabanan ninda an materyalistikong mga pan-akit asin pinatalubo an pagkakontento sa “kakanon asin gubing.” Tanganing makapagpadagos sa pagpapayunir, kaipuhan sindang magdanay na kontento sa kinakaipuhan na mga bagay. (1 Timoteo 6:8) Kagayagayahan an ibinubunga kan pagpadangat sa satong mga pribilehiyo na itinao nin Dios, na ipinaoorog iyan sa materyal na mga rogaring.

Bilang ilustrasyon: si Anton Koerber nagkapribilehiyong irepresentar an intereses kan Kahadean sa mga opisyales nin gobyerno sa Washington, D.C. Sia naglingkod bilang payunir sa kadikit na panahon asin paraataman sa sirkito kan mga taon nin 1950. Sarong beses dinolok sia kan dati niang mga kairiba sa negosyo dara an sarong proposisyon na magpapangyari saiya na makaganansia nin sarong milyon na dolyar. Pero tanganing magibo iyan kaipuhan na idusay nia an gabos niang oras sa negosyo sa laog nin mga sarong taon. Pakaarang nin paggiya asin espiritu nin toltol na isip, sia nagsabi: “Dai ko puwedeng talikdan an makangangalas kong mga pribilehiyo sa paglilingkod ki Jehova digdi minsan sa laog sana nin sarong taon, dai, minsan an karibay gabos na kuwarta sa kinaban. An paglilingkod sa sakong mga tugang digdi sa Washington mas mahalaga para sa sako, asin digdi aram ko na nasa sako an bendisyon ni Jehova. Sierto na makakaganansia ako nin sarong milyon na dolyar, pero sa katapusan kan taon nin siring na pamumuhay, kumusta na daw ako sa espirituwal, o minsan sa pisikal?” Kaya sinayumahan nia an alok. An pagpadangat sa saindang mga pribilehiyo sa kaagid na paagi nakatatabang sa dakol na magpadagos sa pagpapayunir.

Kanigoan kamakangangalas na mga bendisyon an nakakamtan nin mga payunir! Sarong bendisyon an gamiton an dakol na oras sa pagtaram manongod sa mamuraway na pagkahade ni Jehova. (Salmo 145:​11-13) Huli sa pagdusay nin kadakol na oras sa ministeryo, an mga payunir igwa kan bendisyon nin pagdara nin espirituwal na ranga sa mga dukha asin inaapi, naghehelang o nagmomondo, asin sa iba na nasasakitan na marhay asin nagkakaipo nin seguradong paglaom. Kaya, kun itinotogot nin mga kamugtakan na kita makikabtang sa bilog na panahon na paghuhulit, tunay na magkakamit kita nin dakol na bendisyon. An ‘bendisyon ni Jehova iyo an nakapayayaman.’ (Talinhaga 10:22) Asin sa tabang asin bendisyon nia na an dakol na parabalangibog kan Kahadean magayagayang nagpapadagos sa pagpapayunir.