Bareta kan mga Parabalangibog kan Kahadean
Paggalang sa Kabanalan nin Buhay
IPINAHEHELING kan Biblia na an dugo mahalaga sa mga mata nin Dios asin na kinokondenar nia an salang paggamit kaiyan. (Levitico 17:14; Gibo 15:19, 20, 28, 29) Huli sa mga pagboot na ini kan Biblia, an mga Saksi ni Jehova dai nag-aako nin pag-ineksion nin dugo.
Tanganing matabangan an mga doktor asin nagtatrabaho sa ospital na masabotan an relihiyosong paninindogan nin mga Saksi ni Jehova manongod sa bagay na ini asin maaraman na an mga Saksi mag-aako nin pansalidang pagbolong, an Watch Tower Society nag-organisar nin mga Hospital Liaison Committee (HLC) sa laen-laen na nasyon. An mga miembro kan mga komiteng ini nagduduman sa mga ospital tanganing kaolayon an mga doktor. Kasuarin pa sana, sa 12 siudad sa Polandia, nagibo an labi sa 200 na miting, na an napalabot labing 500 na doktor, sa pangenot namomoon sa mga klinika o sa mga ward sa ospital. Ini an nangyari sa sarong pagbisita:
“An miting sa Klinika sa Operasyon sa Puso sa Zabrze nagin mapanggana nanggad. Poon kan 1986 an mga doktor sa klinikang iyan nag-ooperar na sa satong mga tugang na daing dugo. Sagkod ngonyan, 40 nang operasyon an nagibo. An klinika andam na umako nin mga pasyente hale sa bilog na Polandia asin pati sa ibang nasyon. Pakalihis nin 50 minutos na orolay, ipinamidbid nin sarong katabang na namomoon sa sarong ward an mga miembro kan HLC sa sarong grupo nin mga pasyente asin nagsabi: ‘An mga tawong ini mga Saksi ni Jehova. Sinda nakikikooperar sa satong klinika, asin tinatabangan kita ninda. Bako sanang an saindang mga kapagtubod kundi pati an gabos na ibang pasyente nakikinabang sa saindang tabang. Salamat sa mga Saksi ni Jehova, nakombensir kami na an mayor na operasyon sa puso puwedeng gibohon na daing dugo.
“‘Halimbawa, inoperaran mi ining si misis [na itinotokdo an saro sa saiyang mga pasyente] na daing dugo, asin sa Lunes mapuli na sia. Boot kong sabihon na mas bihira mi nang gamiton an dugo kisa kaidto ta iyan peligroso. Iyan konektado sa HIV, hepatitis, asin mas haloy na pagkaomayi.
“‘Katoliko ako, pero sa harong mi dati na kaming mapagsabot sa opinyon nin iba. Sarong aldaw namasyar ako sa Slaski Istadyum kaiba kan sakong mga aki. Dati, napabayaan na an istadyum na ini, pero narisa mi na ngonyan nabago na iyan na haros dai mo na mamidbid. Hinapot ko an saro sa mga trabahador kun paano nangyari an pagkabagong ini. Sinabi nia na haros nawaran na nin paglaom an mga namamahala na mahirahay an istadyum, alagad ta idto pinaarkilahan sa mga Saksi ni Jehova, asin idto hinirahay ninda.
“‘Kaya an mga ini mga tawo na kita gabos dakol an manonodan. Sa paghona ko digdi sa ward na ini maninigo kitang magin mapagsabot sa opinyon nin iba.’ Dangan, itinotokdo an sarong Saksi na ooperaran sa maabot na pirang aldaw, sia nagsabi: ‘Ining si misis saro sa mga Saksi ni Jehova, asin ooperaran sia na daing dugo.’”
Minsan ngani an mga Saksi ni Jehova dai ipinipirit sa iba an saindang mga paniniwala, sinda mismo nag-aarog sa halimbawa kan mga apostol asin ‘kinukuyog an Dios bilang poon kisa mga tawo.’ (Gibo 5:29) Kaiba digdi an paggalang sa dugo. Pinasasalamatan ninda kun iginagalang nin iba an saindang relihiyosong pagtubod sa bagay na ini.