Mga Hobenes na ‘Nananarig ki Jehova’

AN MGA hobenes bakong iyo sana an may kagayonan, ni solo man kan mga gurang an kadonongan. (Ikomparar an Talinhaga 11:22; Eclesiastes 10:1.) Imbes, an mga igwa nin nagdadanay na kagayonan asin tunay na kadonongan iyo an mga nananarig ki Jehova asin bilog na pusong nagsasabi dapit sa saiya: “Ika an sakuyang Dios.”​—Salmo 31:14; Talinhaga 9:10; 16:31.

Sa bilog na kinaban igwa nin nagdadakol na kaburonyogan nin magagayon na tawo, kapwa hoben asin gurang, na ipinaheheling an saindang kadonongan paagi sa paglilingkod sa Dios asin paghuhulit kan maogmang bareta kan Kahadean nin Dios. Halimbawa, horophoropa an otso anyos na si Sabrina.

Si Sabrina nag-iistar sa Alemania asin nasa ikaduwang grado. Sia an kaenot-enote sa mga Saksi ni Jehova na naglaog sa eskuwelahan nia. Makamomondo, sia an punteriya nin mga pan-iinsulto kan saiyang mga kaklase sagkod sa aldaw na hinagad kan maestra sa mga estudyante na darahon sa klase an saindang paboritong libro. Nagdesisyon si Sabrina na darahon an My Book of Bible Stories. Kan banggi bago kaini, minsan ngani nininerbiyos, nag-andam siang marhay para sa klase. Huling igwa nin 26 na estudyante sa saiyang klase, aram nia na puwedeng mayo sia nin dakol na panahon. Pero determinado sia na dai pagtogotan an siisay man na papondohon an saiyang presentasyon asin nakasisierto na tatabangan sia ni Jehova. Sa itinalaan na aldaw, naghapot an maestra kun siisay an nagdara nin libro asin gustong maenot na ipaheling iyan. Makangangalas, si Sabrina sana an may darang libro. Nagtindog sia sa atubangan kan klase asin nagpoon na magtaram, na binabasa asin ipinaheheling an mga retrato sa libro patin ipinaliliwanag na an gabos basado sa Biblia. Sa katapusan naghapot sia: “Siisay an interesado na magkaigwa kan librong ini?” Tinawan nia nin sarong kopya an maestra, asin durante kan sumunod na pirang aldaw, nagtao sia nin sampulong dagdag pang libro sa iba niang kaklase. An solamenteng komento kan maestra sa saiyang presentasyon iyo ini: “Dai pa ako nakaheling nin siring kaiyan.” Tinawan nia si Sabrina kan pinakahalangkaw na grado para sa saiyang ginibo.

Sa katunayan, an dakol na hoben na Saksi maogmang mga parahayag kan maogmang bareta sa eskuwelahan. An saro pang halimbawa iyo si Erika, 11 anyos na parahayag sa Mejico. Tinokdoan na sia poon sa pagkaomboy na mamotan si Jehova. Ekselente an saiyang pag-eskuwela. An saro sa saiyang mga asignasyon iyo na andamon an materyal manongod sa AIDS asin pagkaadikto sa tabako asin alkohol. Nag-andam siang marhay, na ginagamit an magasin na Awake!, asin nag-ako kan pinakahalangkaw na mga grado. Naghapot an saiyang maestra kun saen nia kinua an impormasyon asin tinawan ini kan mga magasin na naglalaman nin mga artikulo manongod sa mga temang iyan. Dai nahaloy, ginamit kan maestra an mga magasin na ini tanganing pag-olayan an mga tema kaiba kan bilog na klase. Huli sa gawe ni Erika, sa paggalang nia sa saiyang mga maestro, asin sa saiyang haralangkaw na grado, nakuwalipikar sia para sa mga regalo, diploma, asin parsial na mga libreng pag-eskuwela. Minsan siring, para sa saiya an pinakadakulang nagibo nia iyo na ipinamidbid nia an sadiri bilang saro sa mga Saksi ni Jehova, nakapasakamot sia nin literatura sa Biblia, asin inomaw an ngaran nin Dios.

Yaon man si Shannon, dies anyos na aking lalaki na nag-iistar sa New Zealand. May saro sana siang nakaheheling na mata; an saro nagkakanser kan sia omboy pa. Kan siete anyos na si Shannon, an saiyang ina nagpoon na mag-adal nin Biblia kaiba kan mga Saksi ni Jehova. Alagad, dai nahaloy pakapoon nia kan saiyang mga leksion sa Biblia, nagpoon siang makisaro sa sarong lalaki na dai kasal asin nagdesisyon na pondohon an saiyang pag-adal. Nakimaherak si Shannon na ipadagos an saiyang pag-adal sa Biblia. Itinao an saiyang kamawotan. Padagos na nagsongko an mga Saksi, asin sa katapustapusi an tolong miembro kan pamilya nag-adal sa Biblia asin guminibo nin espirituwal na pag-oswag. Pakapakasal nin legal, an ina asin padrasto ni Shannon binautismohan.

Sarong aldaw si Shannon asin an agom kan paraataman sa sirkito magkaibanan sa paglilingkod sa langtad. Hinapot nin sarong kagharong si Shannon: “Ano an nangyari sa mata mo?” “Nagkakanser po, asin kinaipuhan na haleon iyan,” an simbag nia. “Dai na mahahaloy tatawan po ako ni Jehova nin sarong bagong mata sa Paraiso, asin kaya po kami yaon digdi tanganing sabihon saindo an manongod dian.”