Pagsamba sa Dios sa Katotoohan

Tanganing akoon nin Dios an pagsamba, iyan maninigo na basado sa katotoohan. (Juan 4:​23) An tunay na mga parasamba ipinamimidbid kan Biblia na kabilang sa “kongregasyon kan nabubuhay na Dios, harigi asin tukod kan katotoohan.” (1 Timoteo 3:15) An mga minakompuesto kan kongregasyon nin Dios bako sanang nagtutubod sa katotoohan kan Tataramon nin Dios kundi namumuhay man kaoyon kaiyan asin idinedepensa iyan, na ipinahahayag iyan sa bilog na daga.​—Mateo 24:14; Roma 10:​9-​15.

AN Mga Saksi ni Jehova midbid na marhay sa saindang gibohon na pag-edukar sa Biblia, na ngonyan ginigibo sa labing 200 na kadagaan. Pinag-aadalan ninda an Biblia asin itinotokdo iyan bilang an katotoohan, na dai sinasalakan kan nagpapaluyang impluwensia kan mga pilosopiya nin tawo. Pamilyar daw kamo sa saindang mga katokdoan na basado sa Biblia? Dakol an nag-aalangan na maghinanyog sa Mga Saksi ni Jehova huli sa negatibong impormasyon na naglalakop tumang sa sainda. Alagad an mga tawong sadiosan an puso inaagda na sinda mismo an magdesisyon kun baga an ihinuhulit kan mga Saksi iyo an katotoohan o bako. An siring na mahalagang marhay na desisyon dai maninigong ibasar sa mga sabi-sabi. An dakol na sinda mismo an nagsiyasat sa mga katokdoan kan Mga Saksi ni Jehova nakinabang nin dakula.

An Kaaraman sa Katotoohan Hinahale an Takot

Estudyare, halimbawa, an kamugtakan ni Eugenia. Nagdakula sia sa sarong estriktong pamilyang Katoliko. An saiyang ama saro sa mga nag-organisar kan pagsongko kan papa sa Mejico kan 1979. Mantang nagsosongko sa mga katood, nakaolay ni Eugenia an Mga Saksi ni Jehova. Sa tabang ninda pinonan niang analisaron nin mas maingat an sinasabi kan Biblia. Nagigirumdoman nia: “Sa primero, nagpoon akong pangibabawan nin takot. Nanompongan ko na an katotoohan! Alagad nangahulogan ini na an kadaklan kan dati kong mga paniniwala sala. An pamilya ko, an mga katood ko, mga tawong namomotan ko​—sinda gabos sala. Ninerbios ako. Pigparahapot ko an sakong sadiri kun ano an magigin reaksion kan pamilya ko sa sakong bagong nadiskobre. Sa pag-agi nin panahon asin sa tabang ni Jehova, nagpoon na mapangganahan ko an nangingibabaw na eksperyensiang ini. Sarong aldaw nagdesisyon akong magtuga sa sarong katood kan samong pamilya, na sarong propesor sa teolohiya. Sinabi ko sa saiya an gabos manongod sa sakong kamawotan na manompongan an katotoohan. Dangan sinabi nia, ‘Kun gusto mong maaraman an katotoohan, hanapon mo an mga Saksi ni Jehova.’”

Siring kan ikinatakot ni Eugenia, pinalayas sia kan saiyang pamilya. Minsan siring, an mga Saksi padagos na nagtabang sa saiya sa espirituwal. Sia nagkokomento: “Napakosog ako na manindogan para sa katotoohan. Narealisar ko na bawi man an pakinabang na ipakipaglaban iyan. Importanteng marhay an pag-ako sa sako kan Mga Saksi ni Jehova. Namatean ko na ako namomotan sa laog kan Kristianong kongregasyon. An pakikidayupot sa organisasyon nin Dios nakatabang sa sako na daogon an takot nin pangangaipong manindogan dawa solo sana ako.”

Estudyare an saro pang halimbawa. Si Sabrina nagdakula na nakaugalean an pagkaigwa nin regular na pampamilyang pag-orolay manongod sa Biblia. Sa katunayan, naggibo sinda nin sarong porma nin ‘pampamilyang relihion.’ Nagin ugale niang makiasosyar sa mga miembro nin laen-laen na relihion tanganing ibuyagyag an saindang mga sala. Kan alokon sia nin pag-adal sa Biblia kan saro sa Mga Saksi ni Jehova, tolos-tolos niang inako iyan na may intension na pahimutikan an saindang mga paniniwala. Nagigirumdoman nia: “Pakapag-adal sa laog nin labing sarong taon, natakot akong mawara an ‘sakong katotoohan.’ Napasilan ako na ibuyagyag an pandadaya kan dakol na relihion na naasosyaran ko, alagad bakong gayong pasil iyan ngonyan.”

Huli sa takot ni Sabrina nagpondo sia sa pakipag-adal sa Biblia sa Mga Saksi ni Jehova. Alagad ta nakamate sia nin kakulangan sa espirituwal. Nagdesisyon sia na ipadagos an pag-adal asin sa katapustapusi inako an bagong manompongan na katotoohan na ini. Nag-oswag si Sabrina sagkod na gusto na niang ihiras sa iba an saiyang nanonodan. Hinagad pa ngani nia na umiba sa mga Saksi sa saindang ministeryo sa harong-harong. Si Sabrina nagpapaliwanag: “Bago aprobaran na maghulit kaiba kan mga Saksi ni Jehova, hinapot ako: ‘Talaga daw na gusto mong magin saro sa Mga Saksi ni Jehova?’ ‘Dai!’ an simbag ko. Pinangibabawan giraray ako nin takot.” Sa katapustapusi, pakatapos na magpadagos sa pag-atender sa gabos na pagtiripon asin maobserbaran an banwaan nin Dios saka kun paano ninda iinaaplikar an mga prinsipyo sa Biblia, nakapagkonklusyon si Sabrina na iyan na talaga an katotoohan. Sia nabautismohan asin ngonyan saro nang bilog na panahon na paraebanghelyo.

Taano ta Laen na Marhay?

Tibaad may maghapot, ‘Taano an mga katokdoan kan Mga Saksi ni Jehova ta laen na marhay sa ibang relihion?’ An halipot na pagsiyasat sa tinutubod kan mga Saksi makatatabang sa saindo na masabotan na sinda sinserong mga Kristiano, maingat na mga estudyante sa Biblia. Inaagda mi kamo na helingon sa sadiri nindong Biblia an mga teksto sa sumaryo kan saindang pundamental na mga paniniwala na nasa itaas.

Paagi sa mas maingat na pagsiyasat sa tinutubod kan Mga Saksi ni Jehova asin kun paano ninda sinususog an itinotokdo kan Biblia, puede kamong mabendisyonan kan katalingkasan na itinatao kan katotoohan. (Juan 17:17) Mayo nin dahelan na matakot sa katotoohan. Girumdoma an panuga ni Jesus: “Mamimidbid nindo an katotoohan, asin an katotoohan mapatalingkas sa saindo.”​—Juan 8:32.

[Kahon sa pahina 6]

NAGKAPIRANG PUNDAMENTAL NA PANINIWALA KAN MGA SAKSI NI JEHOVA

◯ Si Jehova iyo an Dios na makakamhan sa gabos. An saiyang personal na ngaran minalataw nin labing 7,000 na beses sa kaenot-enoteng mga manuskrito kan Biblia.​—Salmo 83:18.

◯ Si Jesu-Cristo iyo an Aki nin Dios, na nagdigdi sa daga tanganing itao an saiyang buhay para sa katawohan. (Juan 3:​16, 17) Sinusunod kan Mga Saksi ni Jehova an mga katokdoan ni Jesu-Cristo na yaon sa mga Ebanghelyo.

◯ An ngaran na Mga Saksi ni Jehova basado sa Isaias 43:​10, na nagsasabi: “‘Kamo an sakong mga saksi,’ an sabi ni Jehova.”

◯ An Kahadean na ipinamimibi kan mga tawo sa pamibing “Ama Niamo” sarong langitnon na gobyerno na sa dai na mahahaloy mahale kan gabos na pagdusa asin sakit sa kinaban tanganing tawan nin lugar an Paraiso na ipinanunuga kan Biblia.​—Isaias 9:​6, 7; Daniel 2:​44; Mateo 6:​9, 10; Kapahayagan 21:​3, 4.

◯ An gabos na naggigibo kan kabotan nin Dios igwa kan oportunidad na magkamit kan mga bendisyon kan Kahadean sagkod pa man.​—Juan 17:3; 1 Juan 2:​17.

◯ Dapat na moldehon kan mga Kristiano an saindang gawe-gawe sono sa sinasabi kan Biblia. Dapat sindang maghingoa na magin sadiosan, mamuhay na may kalinigan patin tamang moral, asin magpaheling nin pagkamoot sa saindang kataed.​—Mateo 22:39; Juan 13:35; 1 Corinto 6:​9, 10.

[Retrato sa pahina 5]

Ipinahahayag kan Mga Saksi ni Jehova an katotoohan sa Biblia sa mga tawo sa labing 200 na kadagaan