Mga Pastor Asin Karnero sa Sarong Teokrasya
“Si Jehova iyo an satong Hokom, si Jehova iyo an satong Paraboot, si Jehova iyo an satong Hade; sia mismo an magliligtas sato.”—ISAIAS 33:22.
1. Paano masasabi na teokrasya an mga Kristiano kan enot na siglo asin an mga Kristiano ngonyan?
AN TEOKRASYA nangangahulogan na pamamahala nin Dios. Kalabot dian an pag-ako sa autoridad ni Jehova asin pagsunod sa saiyang mga giya asin instruksion sa darakula asin saradit na desisyon na ginigibo niato sa buhay. An kongregasyon kan enot na siglo tunay na teokrasya. An mga Kristiano kaidto sadiosan na makasasabi: “Si Jehova iyo an satong Hokom, si Jehova iyo an satong Paraboot, si Jehova iyo an satong Hade.” (Isaias 33:22) Sa pagkaigwa kan linahidan na natatada bilang nukleo kaiyan, an organisasyon ni Jehova Dios ngonyan tunay man na teokrasya.
Sa Anong mga Paagi Kita Teokratiko Ngonyan?
2. Ano an sarong paagi na an mga Saksi ni Jehova nagpapasakop sa pamamahala ni Jehova?
2 Paano niato masasabi na teokrasya an daganon na organisasyon ni Jehova? Huli ta an mga kabilang dian tunay nanggad na nagpapasakop sa pamamahala ni Jehova. Asin sinusunod ninda an pangengenot ni Jesu-Cristo, an saro na pinatukaw ni Jehova sa trono bilang Hade. Halimbawa, sa panahon kan katapusan, an direktang pagboot na ini gikan sa Dakulang Teokrata itinao ki Jesus: “Tigpasan an saimong kagot asin mag-ani ka, huli ta nagdatong na an oras na mag-ani, ta an anihon kan daga hinog na.” (Kapahayagan 14:15) Si Jesus nagkukuyog asin ginigibo an pag-ani sa daga. Sinusuportaran kan mga Kristiano an saindang Hade sa dakulang gibohon na ini paagi sa maigot na paghuhulit kan maogmang bareta asin paggibo nin mga disipulo. (Mateo 28:19; Marcos 13:10; Gibo 1:8) Sa paggibo kaiyan, sinda mga katabang man ni Jehova, an Dakulang Teokrata.—1 Corinto 3:9.
3. Paano an mga Kristiano nagpapasakop sa teokrasya kun manongod sa moralidad?
3 Sa paggawe man, an mga Kristiano nagpapasakop sa pamamahala nin Dios. Sinabi ni Jesus: “An naggigibo nin totoo minadolok sa liwanag, tanganing an saiyang mga gibo mahayag na ginibong kaoyon sa Dios.” (Juan 3:21) Ngonyan, igwa nin dai matapostapos na mga debate manongod sa moral na mga pamantayan, pero an pasuruhay na ini mayong lugar sa tahaw nin mga Kristiano. Minamansay ninda na inmoral kun ano an sinasabi ni Jehova na inmoral, asin linilikayan ninda iyan siring sa damat! Inaataman man ninda an saindang mga pamilya, kinukuyog an saindang mga magurang, asin nagpapasakop sa haralangkaw na kapangyarihan. (Efeso 5:3-5, 22-33; 6:1-4; 1 Timoteo 5:8; Tito 3:1) Sa siring, sinda naghihirong teokratiko, na kaoyon nin Dios.
4. Anong salang mga ugale an ipinaheling ni Adan asin Eva saka ni Saul, asin paano an mga Kristiano nagpapaheling nin laen na ugale?
4 Nawara ni Adan asin Eva an Paraiso huli ta gusto nindang gibohon an sadiri nindang mga desisyon dapit sa kun ano an tama asin sala. An mismong kabaliktaran iyo an boot ni Jesus. Sia nagsabi: “Pinagmamaigotan kong maotob, bakong an sadiri kong kabotan, kundi an kabotan nia na nagsugo sa sako.” Iyan man an pinagmamaigotan na maotob nin mga Kristiano. (Juan 5:30; Lucas 22:42; Roma 12:2; Hebreo 10:7) Si Saul, an enot na hade sa Israel, nagkuyog nanggad ki Jehova—pero sa pirang kabtang sana. Isinikwal sia huli kaini. Sinabihan sia ni Samuel: “An pagkuyog orog na marahay kisa pag-atang, an pagtao nin atension kisa taba nin mga karnero.” (1 Samuel 15:22) Teokratiko daw na sunodon an kabotan nin Dios sagkod sa sarong kabtang sana, tibaad paagi sa pagigin regular sa paghuhulit o sa pag-atender sa mga pagtiripon, dangan makikompromiso sa mga bagay na dapit sa moralidad o sa iba pang paagi? Siyempre bako! Pinagmamaigotan tang ‘gibohon an kabotan nin Dios nin bilog na kalag.’ (Efeso 6:6; 1 Pedro 4:1, 2) Bakong arog ni Saul, kita lubos na nagpapasakop sa pamamahala nin Dios.
Sarong Modernong Teokrasya
5, 6. Paano tinatratar ni Jehova an katawohan ngonyan, asin ano an ibinubunga kan pakikikooperar sa areglong ini?
5 Kan nakaagi, si Jehova namahala asin ihinayag an mga katotoohan paagi sa mga indibiduwal, siring baga kan mga propeta, hade, asin apostol. Ngonyan, bako na iyan an kamugtakan; mayo nang pinasabngan na mga propeta asin apostol. Imbes, sinabi ni Jesus na durante kan saiyang makahadeng presensia, may mimidbidon siang sarong maimbod na grupo nin mga parasunod, sarong “maimbod asin madonong na oripon,” asin saiyang nonombrahan iyan na mamahala sa gabos niang sadiri. (Mateo 24:45-47; Isaias 43:10) Kan 1919 an oripon na iyan namidbid bilang an natatada sa linahidan na mga Kristiano. Poon kaidto, irinirepresentar kan Namamahalang Grupo kan mga Saksi ni Jehova, iyan an sentro nin teokrasya digdi sa daga. Sa bilog na kinaban, an Namamahalang Grupo irinirepresentar kan mga Komite kan Sanga, nagbibiyaheng mga paraataman, asin mga magurang sa kongregasyon.
6 An pakikikooperar sa teokratikong organisasyon sarong mahalagang kabtang nin pagpapasakop sa teokrasya. An siring na kooperasyon nakakokontribuwir sa pankinaban na pagkasararo asin areglo sa “bilog na kasararoan nin mga tugang.” (1 Pedro 2:17) Ini nakakapaoyon man ki Jehova, an “Dios, bakong nin karibarawan, kundi nin katoninongan.”—1 Corinto 14:33.
Mga Magurang sa Sarong Teokrasya
7. Taano ta masasabi na an Kristianong mga magurang ninombrahan sa teokratikong paagi?
7 An gabos na nombradong kamagurangan na lalaki, ano man an saindang katongdan nin autoridad, naaabot an mga kuwalipikasyon na nakasurat sa Biblia para sa katongdan nin pangangataman, o magurang na lalaki. (1 Timoteo 3:1-7; Tito 1:5-9) Dugang pa, an mga tataramon ni Pablo para sa mga magurang sa Efeso aplikado sa gabos na magurang: “Mag-ingat kamo sa saindong sadiri asin sa bilog na aripompon, na sa tahaw kaiyan kamo ninombrahan kan banal na espiritu bilang mga paraataman, na pastoran an kongregasyon nin Dios.” (Gibo 20:28) Iyo, an mga magurang ninombrahan kan banal na espiritu, na hale ki Jehova Dios. (Juan 14:26) Teokratiko an saindang nombramiento. Saro pa, saindang pinapastoran an aripompon nin Dios. An aripompon sadiri ni Jehova, bakong kan mga magurang. Iyan sarong teokrasya.
8. Ano an pankagabsan na mga paninimbagan kan mga magurang ngonyan?
8 Sa saiyang surat sa mga taga-Efeso, isinurat ni apostol Pablo an pankagabsan na mga paninimbagan kan mga magurang, na sinasabi: “Itinao nia an nagkapira bilang mga apostol, an nagkapira bilang mga propeta, an nagkapira bilang mga paraebanghelyo, an nagkapira bilang mga pastor asin paratokdo, manongod sa paghusay liwat kan mga banal, manongod sa gibohon nin paglingkod, manongod sa pagpakosog kan hawak ni Cristo.” (Efeso 4:11, 12) An mga apostol asin propeta wara na pakatapos kan enot na mga taon kan “hawak ni Cristo.” (Ikomparar an 1 Corinto 13:8.) Pero an mga magurang sibot-sibot pa sagkod ngonyan sa pag-eebanghelyo, pagpapastor, asin pagtotokdo.—2 Timoteo 4:2; Tito 1:9.
9. Paano maninigong andamon nin mga magurang an saindang sadiri sa pagrepresentar kan kabotan nin Dios sa kongregasyon?
9 Huling an teokrasya pamamahala nin Dios, an epektibong mga magurang lubos na pamilyar sa kabotan nin Dios. Si Josue pinagbotan na basahon an Pagboot aroaldaw. An mga magurang kaipuhan man na regular na mag-adal asin magkonsulta sa Kasuratan asin magin lubos na pamilyar sa mga literatura sa Biblia na ipinublikar kan maimbod asin madonong na oripon. (2 Timoteo 3:14, 15) Kabale dian an mga magasin na Torrengbantayan asin Awake! asin iba pang publikasyon na nagpapaheling kun paano an mga prinsipyo sa Biblia minaaplikar sa espisipikong mga situwasyon.a Alagad, minsan ngani mahalaga na aramon asin sunodon nin magurang an mga giya na ipinublikar sa mga literatura kan Watch Tower Society, maninigo man siang lubos na pamilyar sa Makakasuratan na mga prinsipyo na pinagbasihan kaiyan. Sa siring puwede niang gamiton an Makakasuratan na mga giya na may pakasabot asin pagkaherak.—Ikomparar an Miqueas 6:8.
Paglilingkod na May Kristianong Espiritu
10. Anong maraot na ugale an maninigong likayan nin mga magurang, asin paano?
10 Kan mga taon 55 C.E., isinurat ni apostol Pablo an saiyang enot na surat sa kongregasyon nin Corinto. An saro sa mga problema na rinesolberan nia may koneksion sa nagkapirang lalaki na gustong magin prominente sa kongregasyon. Si Pablo nagsurat: “Mga basog na kamo, bakong iyo? Mga mayaman na kamo, bako daw? Naghade na kamo minsan dai kami, bakong iyo? Asin awot pa logod na kamo nagpoon na sa paghade, tanganing kami man maghade sa kaibanan nindo.” (1 Corinto 4:8) Kan enot na siglo C.E., an gabos na Kristiano igwa kan paglaom na mamahala bilang langitnon na mga hade asin saserdote kaibanan ni Jesus. (Kapahayagan 20:4, 6) Pero, risa nanggad na an nagkapira sa Corinto nakalingaw na digdi sa daga mayo nin mga hade sa Kristianong teokrasya. Imbes na gumawe na siring sa mga hade kan kinaban na ini, an Kristianong mga pastor pinatatalubo an kapakumbabaan, sarong kuwalidad na nakakapaoyon ki Jehova.—Salmo 138:6; Lucas 22:25-27.
11. (a) Ano an pirang pambihirang halimbawa nin kapakumbabaan? (b) Ano an maninigong magin pagmansay sa sadiri kan mga magurang asin kan gabos na iba pang Kristiano?
11 Kaluyahan daw an kapakumbabaan? Bako nanggad! Si Jehova mismo ilinaladawan na mapakumbaba. (Salmo 18:35) An mga hade sa Israel pinangenotan an mga hukbo sa ralaban asin pinamahalaan an nasyon sa irarom ni Jehova. Alagad, an lambang saro dapat na mag-ingat na “an saiyang puso dai magpalangkaw sa saiyang mga tugang na lalaki.” (Deuteronomio 17:20) An binuhay liwat na si Jesus saro nang langitnon na Hade. Pero, kan uya sa daga, hinanawan nia an mga bitis kan saiyang mga disipulo. Kanigoan na kapakumbabaan nanggad! Asin sa pagpaheling na boot niang magin mapakumbaba man an saiyang mga apostol, sinabi nia: “Kun ako, minsan Kagurangnan asin Paratokdo, naghanaw kan saindong mga bitis, maninigo na hanawan man nindo an bitis kan lambang saro.” (Juan 13:14; Filipos 2:5-8) An gabos na kamurawayan asin kaomawan maninigong mapaduman ki Jehova, bakong sa siisay man na tawo. (Kapahayagan 4:11) Baga man sinda magurang o bako, an gabos na Kristiano maninigong mansayon an sadiri sa liwanag kan mga tataramon ni Jesus: “Kami mga oripon na daing kamanungdanan. An ginibo niamo iyo an katongdan niamong gibohon.” (Lucas 17:10) An arin man na iba pang pagmansay bakong teokratiko.
12. Taano an pagkamoot ta mahalagang kuwalidad na dapat kultibaron nin Kristianong mga magurang?
12 Kadungan kan kapakumbabaan, an Kristianong mga magurang kinukultibar an pagkamoot. Ipinaheling ni apostol Juan an halaga nin pagkamoot kan sabihon nia: “An dai namomoot dai nakakamidbid sa Dios, huli ta an Dios pagkamoot.” (1 Juan 4:8) An daing pagkamoot na mga tawo bakong teokratiko. Dai ninda midbid si Jehova. Mapadapit sa Aki nin Dios, an Biblia nagsasabi: “Si Jesus, na namoot sa saiyang mga sadiri digdi sa kinaban, namoot sainda sagkod sa katapusan.” (Juan 13:1) Sa pakipag-olay sa 11 lalaki na magigin kabtang kan namamahalang grupo sa Kristianong kongregasyon, sinabi ni Jesus: “Ini an sakong togon, na kamo magkaminorootmootan siring kan pagkamoot ko sa saindo.” (Juan 15:12) An pagkamoot iyo an nagpapamidbid na tanda kan tunay na Kristianismo. Inaakit kaiyan an mga laglag an puso, an mga nagtatangis, asin an espirituwal na mga bihag na nagmamawot nin katalingkasan. (Isaias 61:1, 2; Juan 13:35) An mga magurang dapat na magin marahay na halimbawa sa pagpaheling kaiyan.
13. Minsan ngani an mga problema ngonyan tibaad masakit, paano an sarong magurang puwedeng magin puwersa para sa ikararahay sa gabos na situwasyon?
13 Ngonyan, an mga magurang parateng hinahagadan na tumabang sa pagresolber sa depisil na gayong mga problema. An mga problema nin mag-agom tibaad hararomon an pakagamot asin nagpapadagos. May mga problema an mga hobenes na tibaad masakiton saboton kan mga adulto. An mga helang sa emosyon parateng depisilon intindihon. An sarong magurang na napapaatubang sa mga siring tibaad dai segurado kun ano an gigibohon. Pero makapananarig sia na kun mapagngayongayo siang magtitiwala sa kadonongan ni Jehova, kun nagsisiyasat sia sa Biblia asin sa mga impormasyon na ipinublikar kan maimbod asin madonong na oripon, asin kun mapakumbaba asin mamomoton niang tinatratar an mga karnero, magigin sia puwersa para sa ikararahay dawa sa pinakamasakit na situwasyon.
14, 15. Ano an pirang kapahayagan na nagpapaheling na binendisyonan ni Jehova nin dakol na marahay na magurang an saiyang banwaan?
14 Si Jehova mayaman na binendisyonan nin “balaog na mga lalaki” an saiyang organisasyon. (Efeso 4:8) Sa panapanahon, an Watch Tower Society nakareresibi nin nakaoogmang mga surat na nagpapatotoo sa pagkamoot na ipinaheling nin mapakumbabang mga magurang na maheherakon na nagpapastor sa mga karnero nin Dios. Halimbawa, an sarong magurang sa kongregasyon suminurat: “Dai akong magirumdoman na pagsongko nin paraataman sa sirkito na orog na nakaapektar sako o na pinag-oorolayan pa sagkod ngonyan sa kongregasyon. An paraataman sa sirkito tinabangan akong masabotan an kahalagahan nin positibong kaisipan kun nakikipag-olay sa mga tugang, na may pagdodoon sa pagtao nin komendasyon.”
15 An sarong tugang na babae na nagbiyahe pasiring sa harayong ospital para sa pagpabolong nagsurat: “Kanigoan kanakapakokosog sa boot na makamidbid an sarong magurang kaidtong enot na makahahadit na banggi sa ospital na harayoon sa harong! Sia asin an iba pang tugang haloy akong binantayan. Minsan an mga tawo sa kinaban na nakakaaram kan pinagmamate ko naghona na dai kutana ako nakaligtas kun mayo an pagranga, pag-ataman, asin mga pamibi kan mamomoton asin debotadong mga tugang na idto.” An saro pang tugang na babae suminurat: “Buhay ako ngonyan huli ta an grupo nin mga magurang mapasensiang naggiya sako sa sakong pakikilaban sa grabeng depresyon. . . . An sarong tugang na lalaki asin an saiyang agom dai aram kun ano an sasabihon sako. . . . Pero an nakapahirong gayo sa boot ko iyo na minsan ngani dai ninda lubos na nasabotan an namamatean ko, igwa sindang mamomoton na pagmakolog sa sakuya.”
16. Anong sadol an itinao ni Pedro sa mga magurang?
16 Iyo, iinaaplikar kan dakol na magurang an sadol ni apostol Pablo: “Pastoran an aripompon nin Dios na nasa saindong pangataman, bakong sa kapiritan, kundi gikan sa boot; bakong huli sa pagkamoot sa madayang pakinabang, kundi may kaigotan; ni siring sa naghahade sa mga mana nin Dios, kundi magin mga halimbawa sa aripompon.” (1 Pedro 5:1-3) Bendisyon nanggad an siring na teokratikong mga magurang!
Mga Karnero sa Teokrasya
17. Ngaranan an nagkapirang kuwalidad na maninigong pataluboon kan gabos na miembro kan kongregasyon.
17 Alagad, an teokrasya dai binibilog nin mga magurang sana. Kun an mga pastor dapat na magin teokratiko, iyo man dapat an mga karnero. Sa anong mga paagi? Bueno, an iyo man sanang mga prinsipyo na naggigiya sa mga pastor dapat na gumiya sa mga karnero. An gabos na Kristiano, bako sana an mga magurang, kaipuhan na magin mapakumbaba kun boot nindang kamtan an bendisyon ni Jehova. (Santiago 4:6) Kaipuhan na pataluboon nin gabos an pagkamoot huli ta kun mayo kaini an satong mga atang ki Jehova dai makakapaoyon saiya. (1 Corinto 13:1-3) Asin gabos kita, bako sana an mga magurang, maninigong ‘mapano nin tamang kaaraman kan kabotan ni Jehova sa bilog na kadonongan asin espirituwal na pakatalastas.’—Colosas 1:9.
18. (a) Taano an pan-ibabaw na kaaraman sa katotoohan ta bako pang igo? (b) Paano kita gabos mapapano nin tamang kaaraman?
18 An mga hoben asin gurang pararehong napapaatubang permi sa depisil na mga desisyon mantang hinihingoa nindang magdanay na maimbod sa ibong kan pamumuhay sa kinaban ni Satanas. An paggubing, musika, pelikula, asin babasahon na uso sa kinaban binabalo an espirituwalidad nin iba. An pan-ibabaw na kaaraman sa katotoohan bakong igo na tabangan kitang mapagdanay an satong pagkatimbang. Tanganing masierto an pagdadanay na maimbod, kaipuhan kitang mapano nin tamang kaaraman. Kaipuhan ta an pakamansay asin kadonongan na an Tataramon nin Dios sana an makatatao sato. (Talinhaga 2:1-5) Nangangahulogan ini nin pagpapatalubo nin marahay na mga ugale sa pag-adal, paghorophorop sa satong mga nanonodan, asin pagsagibo kaiyan. (Salmo 1:1-3; Kapahayagan 1:3) Si Pablo nagsurat sa gabos na Kristiano, bako sanang sa mga magurang, kan sabihon nia: “An matagas na kakanon para sa mga maygurang, duman sa mga tawo na huli sa paggamit kan saindang kakayahan nin pagmansay napatood na mamidbid kun ano an tama asin sala.”—Hebreo 5:14.
An mga Pastor Asin Karnero Nagtatarabang
19, 20. Anong mga sadol an itinao sa gabos na makipagtabangan sinda sa mga magurang, asin taano?
19 Pangultimo, maninigong sabihon na an tunay na teokratikong espiritu ipinaheheling kan mga nakikipagtabangan sa mga magurang. Nagsurat si Pablo ki Timoteo: “An kamagurangan na lalaki na nangengenot sa marahay na paagi ibilang na angay sa dobleng onra, orog na idtong mga nagmamaigot sa pagtaram asin pagtokdo.” (1 Timoteo 5:17; 1 Pedro 5:5, 6) An pagigin magurang sarong magayonon na pribilehiyo, pero an kadaklan na magurang may mga pamilya na nagtatrabaho sa sekular aroaldaw asin may mga agom asin aki na dapat atamanon. Minsan ngani naoogma sindang maglingkod, an saindang paglilingkod magigin mas pasil asin mas maogma kun an kongregasyon mapagsuportar, bakong mapagkritika asin mapaghanap.—Hebreo 13:17.
20 Si apostol Pablo nagsabi: “Girumdoma nindo idtong mga nangengenot saindo, na nagsabi saindo kan tataramon nin Dios, asin mantang pinaghohorophorop nindo an saindang gawe aroga nindo an saindang pagtubod.” (Hebreo 13:7) Dai sinadol ni Pablo an mga tugang na sunodon an mga magurang. (1 Corinto 1:12) An pagsunod sa tawo bakong teokratiko. Pero madonong nanggad na arogon an probadong pagtubod nin sarong teokratikong magurang na aktibo sa pag-ebanghelyo, regular sa mga pagtiripon, asin mapakumbaba asin mamomoton na pinakikiibanan an kongregasyon.
Sarong Patotoo sa Pagtubod
21. Paano ipinaheheling nin mga Kristiano an makosog na pagtubod siring kan ki Moises?
21 Tunay nanggad, an pag-eksister nin teokratikong organisasyon sa pinakamaraot na panahon na ini sa kasaysayan nin tawo sarong patotoo sa kapangyarihan kan Dakulang Teokrata. (Isaias 2:2-5) Patotoo man iyan sa pagtubod kan haros limang milyon na Kristianong lalaki, babae, asin mga aki, na naghihingoang atubangon an mga problema nin buhay sa aroaldaw pero nungkang nakalilingaw na si Jehova an saindang Poon. Kun paanong an maimbod na si Moises “nagpadagos na marigon na garo baga nakakaheling kan Saro na dai naheheling,” an mga Kristiano ngonyan makosog man an pagtubod. (Hebreo 11:27) Pribilehiyo ninda na mamuhay sa teokrasya, asin aroaldaw nindang pinasasalamatan si Jehova huli kaiyan. (Salmo 100:4, 5) Mantang naeeksperyensiahan ninda an nagliligtas na kapangyarihan ni Jehova, naoogma sindang magpahayag: “Si Jehova iyo an satong Hokom, si Jehova iyo an satong Paraboot, si Jehova iyo an satong Hade; sia mismo an magliligtas sato.”—Isaias 33:22.
[Mga Nota sa Ibaba]
a Kaiba sa mga publikasyon na iyan an librong “Mag-ingat Kamo sa Saindong Sadiri Asin sa Bilog na Aripompon,” na naglalaman nin Makakasuratan na mga giya asin itinao sa nombradong mga paraataman sa kongregasyon, o mga magurang.
Ano an Ipinaheheling kan Biblia?
◻ Sa anong paagi an mga Kristiano nagpapasakop sa teokrasya?
◻ Paano inoorganisar ngonyan an teokrasya?
◻ Sa anong mga paagi maninigong andamon nin mga magurang an saindang sadiri sa pag-otob kan saindang mga paninimbagan?
◻ Anong Kristianong mga kuwalidad an mahalagang pataluboon asin ipaheling kan mga magurang?
◻ Sa teokrasya, ano an maninigong magin relasyon kan mga karnero asin pastor?
[Ritrato sa pahina 16]
Nawara ni Adan asin Eva an Paraiso huli ta gusto nindang gibohon an saindang sadiring desisyon manongod sa tama asin sala
[Ritrato sa pahina 18]
Kun an sarong magurang mapakumbaba asin mamomoton na tinatratar an mga karnero, permi siang magigin puwersa para sa ikararahay