Magdanay na Dayupot sa Teokrasya
“Si Jehova iyo an satong Hokom, si Jehova iyo an satong Paraboot, si Jehova iyo an satong Hade.”—ISAIAS 33:22.
1. Taano an gobyerno ta pinagmamalasakitan nin kadaklan na tawo?
AN TEMANG gobyerno pinagmamalasakitan na marhay nin gabos. An marahay na gobyerno nagtatao nin katoninongan asin prosperidad. An Biblia nagsasabi: “Paagi sa hustisya napagdadanay nin hade an sarong nasyon.” (Talinhaga 29:4) Sa ibong na lado, an maraot na gobyerno nagbubunga nin inhustisya, malbersasyon, asin pan-aapi. “Kun namamahala an siisay man na maraot, nag-aagrangay an banwaan.” (Talinhaga 29:2) Sa bilog na kasaysayan, prinobaran nin tawo an dakol na klaseng gobyerno, asin makamomondo, sinda parateng “nag-aagrangay” huli sa pan-aapi kan mga namamahala sa sainda. (Eclesiastes 8:9) Magigibo daw talaga nin arin man na klase nin gobyerno an pagtao nin nagdadanay na pagkakontento sa mga sakop kaiyan?
2. Taano an “teokrasya” ta tamang-tamang pagrepresentar sa gobyerno kan suanoy na Israel?
2 Nasambitan kan historyador na si Josefo an napapalaen na klase nin gobyerno kan sia sumurat: “An nagkapirang banwaan ipinagkatiwala an kaharohalangkaweng kapangyarihan politikal sa mga monarkiya, an iba sa mga oligarkiya, an iba pa sa masa. Minsan siring, an samong paraboot [na si Moises] dai naakit sa mga klaseng ini nin organisasyon politikal, kundi tinawan an saiyang konstitusyon kan pagkaorganisar na—kun puede baga an pirit na tataramon—maaapod na ‘teokrasya,’ na ibinubugtak sa kamot nin Dios an gabos na soberaniya asin autoridad.” (Against Apion, II, 164-5) Oyon sa Concise Oxford Dictionary, an teokrasya nangangahulogan na “sarong klase nin gobyerno nin Dios.” An termino mayo sa Biblia, alagad iyan tamang-tamang nagrerepresentar sa gobyerno kan suanoy na Israel. Minsan ngani an mga Israelita nagkaigwa nin naheheling na hade, si Jehova an tunay na namamahala sa sainda. An Israelitang propeta na si Isaias nagsabi: “Si Jehova iyo an satong Hokom, si Jehova iyo an satong Paraboot, si Jehova iyo an satong Hade.”—Isaias 33:22.
Ano an Totoong Teokrasya?
3, 4. (a) Ano an totoong teokrasya? (b) Dai na mahahaloy, anong mga bendisyon an itatao nin teokrasya sa bilog na katawohan?
3 Poon kan imbentohon ni Josefo an terminong iyan, dakol na sosyedad an inapod na teokrasya. An nagkapira dian garo baga habong magtao nin katanosan, panatiko, asin maringis na paradaogdaog. An mga iyan daw totoong teokrasya? Bako oyon sa kahulogan kan pagkagamit ni Josefo sa termino. An problema iyo na dinagdagan an kahulogan kan “teokrasya.” An World Book Encyclopedia tinatawan iyan nin kahulogan na “sarong klase nin gobyerno na dian an estado pinamamahalaan nin sarong saserdote o mga saserdote, asin na dian may autoridad sa mga bagay na sibil asin relihioso an mga miembro kan klero.” Minsan siring, an totoong teokrasya bakong gobyerno nin mga saserdote. Iyan tunay na pamamahala nin Dios, gobyerno kan Kaglalang kan uniberso, si Jehova Dios.
4 Dai na mahahaloy, an bilog na daga masasakop nin teokrasya, asin kanigoan na bendisyon iyan! “An Dios mismo masasakaibanan [nin mga tawo]. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (Kapahayagan 21:3, 4) Mayo nin sa saserdoteng pamamahala nin mga tawong bakong sangkap na makatatao nin siring na kaogmahan. Solamente an pamamahala nin Dios. Huli kaini, an tunay na mga Kristiano dai naghihingoa na iintrodusir an teokrasya paagi sa aksion politikal. Sinda pasensiosong naghahalat na establisaron nin Dios an pambilog na kinaban na teokrasya sa sadiri niang panahon asin sa sadiri niang paagi.—Daniel 2:44.
5. Saen nagpupunsionar an totoong teokrasya ngonyan, asin anong mga hapot an pinalalataw manongod dian?
5 Minsan siring, mientras tanto nagpupunsionar nanggad an totoong teokrasya. Saen? Sa tahaw kan mga boluntad na nagpapasakop sa pamamahala nin Dios asin nagtatarabang sa paggibo kan saiyang kabotan. An mga fiel na iyan tiniripon bilang pambilog na kinaban na espirituwal na “nasyon” sa espirituwal na “daga” kaiyan. Sinda an mga natatada sa “Israel nin Dios” asin an lima may kabangang milyon na Kristianong kairiba ninda. (Isaias 66:8; Galacia 6:16) An mga ini sakop ni Jesu-Cristo, an langitnon na Hade na pinatukaw sa trono ni Jehova Dios, an “Hade sa panahon na daing sagkod.” (1 Timoteo 1:17; Kapahayagan 11:15) Sa anong paagi na teokratiko an organisasyon na ini? Ano an punto de vista kan mga miembro kaiyan sa autoridad kan kinabanon na mga gobyerno? Asin paano pinapagdadanay an prinsipyo nin teokrasya kan mga tawo na nagkakapot nin autoridad sa laog kan saindang espirituwal na komunidad?
Sarong Teokratikong Organisasyon
6. Paano an sarong organisasyon na naheheling asin kompuesto nin mga tawo napamamahalaan nin Dios?
6 Paano an sarong organisasyon na kompuesto nin mga tawo napamamahalaan ni Jehova, na nag-eerok sa dai naheheling na kalangitan? (Salmo 103:19) Iyan huli ta an mga asosyado dian sinusunod an ipinasabong na hatol: “Magtiwala ka ki Jehova sa bilog mong puso asin dai ka manarig sa saimong sadiring pakasabot.” (Talinhaga 2:6; 3:5) Itinotogot ninda na an Dios an mamahala sa sainda mantang kinukuyog ninda “an ley kan Cristo” asin iinaaplikar an ipinasabong na mga prinsipyo sa Biblia sa saindang buhay sa aroaldaw. (Galacia 6:2; 1 Corinto 9:21; 2 Timoteo 3:16; helingon an Mateo 5:22, 28, 39; 6:24, 33; 7:12, 21.) Tanganing magibo ini, kaipuhan na sinda magin mga estudyante sa Biblia. (Salmo 1:1-3) Arog kan ‘marahay an kamawotan’ na mga taga Berea kan suanoy, dai sinda nagsusunod sa tawo kundi daing ontok na bineberepikar sa Biblia an mga nanonodan ninda. (Gibo 17:10, 11; Salmo 119:33-36) Namimibi sinda kapareho kan salmista: “Tokdoan mo ako nin karahayan, marahay na kaisipan asin kaaraman, huli ta sa saimong mga togon ako nagtubod.”—Salmo 119:66.
7. Ano an pagkasunodsunod nin pangangataman sa teokrasya?
7 Sa lambang organisasyon, dapat na may nagkapira na nagkakapot nin autoridad o nagtatao nin pagdirehir. Dai napapalaen an Mga Saksi ni Jehova, asin sinusunod ninda an depinidong pagkaareglar nin autoridad na sinabi ni apostol Pablo: “An payo kan lambang lalaki iyo an Cristo; an payo man nin babae iyo an lalaki; an payo man kan Cristo iyo an Dios.” (1 Corinto 11:3) Kaoyon digdi, solamente kualipikadong mga lalaki an naglilingkod bilang mga magurang sa kongregasyon. Asin minsan ngani si Jesus—“an payo kan lambang lalaki”—yaon sa langit, yaon pa digdi sa daga an “mga natatada” sa saiyang linahidan na mga tugang, na may paglaom na mamahala kaiba nia sa kalangitan. (Kapahayagan 12:17; 20:6) An mga ini an kabilang sa kompuesto nin dakol na “fiel asin madonong na oripon.” Ipinaheheling nin mga Kristiano an saindang pagpasakop ki Jesus, asin kun siring sa payo ni Jesus, si Jehova, paagi sa pag-ako kan pangangataman kan “oripon” na iyan. (Mateo 24:45-47; 25:40) Sa paaging ini, areglado an teokrasya. “An Dios sarong Dios, bakong nin karibarawan, kundi nin katoninongan.”—1 Corinto 14:33.
8. Paano sinusuportaran nin Kristianong mga magurang sa kongregasyon an prinsipyo nin teokrasya?
8 Sinusuportaran nin Kristianong mga magurang sa kongregasyon an prinsipyo nin teokrasya huli ta minimidbid ninda na maninimbag sinda ki Jehova sa pagkapot ninda kan saindang limitadong autoridad. (Hebreo 13:17) Asin sa mga pagdedesisyon, sinda nananarig sa kadonongan nin Dios, bakong sa sadiri nindang kadonongan. Digdi, inaarog ninda an halimbawa ni Jesus. Sia an pinakamadonong na tawo na nabuhay kasuarin man. (Mateo 12:42) Minsan siring, sinabihan nia an mga Judio: “An Aki dai makagigibo nin ano man sa saiyang sadiring boot, kundi an saiya sanang naheheling na ginigibo kan Ama.” (Juan 5:19) An mga magurang sa kongregasyon kapareho man ki Hadeng David an aktitud. Nagkapot sia nin magabat na autoridad sa sarong teokrasya. Pero gusto niang sunodon an dalan ni Jehova, bakong an sa saiya. Sia namibi: “Tokdoi ako, O Jehova, sa saimong dalan, asin giyahe ako sa dana nin pagkatanos.”—Salmo 27:11.
9. Mapadapit sa manlaenlaen na paglaom asin manlaenlaen na pribilehio nin paglilingkod sa teokrasya, ano an timbang na punto de vista nin nagdusay na mga Kristiano?
9 Kinukuestion nin nagkapira kun baga imparsial na an autoridad sa kongregasyon kapot sana nin kualipikadong mga lalaki o na an nagkapira langitnon an paglaom mantang an iba daganon an paglaom. (Salmo 37:29; Filipos 3:20) Minsan siring, nasasabotan nin nagdusay na mga Kristiano na an mga areglong ini nasa Tataramon nin Dios. An mga iyan teokratiko. Kun iyan man kinukuestion, parate na iyan kinukuestion kan mga dai nagmimidbid sa mga prinsipyo sa Biblia. Apuera kaiyan, aram nin mga Kristiano na an mga lalaki asin babae magkapantay sa mga mata ni Jehova kun manongod sa kaligtasan. (Galacia 3:28) Para sa tunay na mga Kristiano, an pagigin nagsasamba sa Soberano kan uniberso iyo an pinakahalangkaw na pribilehio na posible, asin naoogma sinda na mapasa ano man na katongdan na sinasabi ni Jehova para sa sainda. (Salmo 31:23; 84:10; 1 Corinto 12:12, 13, 18) Dugang pa, an buhay na daing katapusan, baga man iyan sa langit o sa paraisong daga, totoong makangangalas na paglaom.
10. (a) Anong marahay na aktitud an ipinaheling ni Jonatan? (b) Paano an mga Kristiano ngonyan nagpapaheling nin aktitud na kaagid kan ki Jonatan?
10 Sa siring na paagi, an Mga Saksi ni Jehova kapareho ni Jonatan, an matatakton sa Dios na aki ni Hadeng Saul. Posibleng marhay na si Jonatan nagin kutanang marahayon na hade. Minsan siring, huli sa pagigin bakong fiel ni Saul, pinili ni Jehova si David na magin an ikaduwang hade sa Israel. Puminait daw an boot ni Jonatan huli kaini? Dai. Sia nagin maimbod na katood ni David asin prinotehiran pa ngani ini ki Saul. (1 Samuel 18:1; 20:1-42) Sa kaagid na paagi, an mga daganon an paglaom dai nauuri sa mga langitnon an paglaom. Asin an tunay na mga Kristiano dai nauuri sa mga nagkakapot nin teokratikong autoridad sa kongregasyon. Imbes, sinda ‘nagtatao sa sainda nin orog kisa sa ordinaryong konsiderasyon sa pagkamoot,’ na minimidbid an saindang pagpapagal para sa saindang espirituwal na mga tugang na lalaki asin babae.—1 Tesalonica 5:12, 13.
An Teokratikong Punto de Vista sa Kinabanon na Pamamahala
11. Ano an punto de vista sa kinabanon na mga autoridad nin mga Kristiano na nagpapasakop sa teokratikong pamamahala?
11 Kun an Mga Saksi ni Jehova sakop nin teokrasya, pamamahala nin Dios, ano an punto de vista ninda sa nasyonal na mga namamahala? Sinabi ni Jesus na an saiyang mga parasunod magigin “bakong kabtang kan kinaban.” (Juan 17:16) Minsan siring, minimidbid nin mga Kristiano an utang ninda ki “Cesar,” an kinabanon na mga gobyerno. Sinabi ni Jesus na maninigo na “itao [ninda] ki Cesar an mga bagay na ki Cesar, alagad sa Dios an mga bagay na sa Dios.” (Mateo 22:21) Oyon sa Biblia, an gobyerno nin tawo “nagtitirindog sa saindang relatibong mga kamugtakan na itinogot nin Dios.” Si Jehova, an Gikanan nin gabos na autoridad, tinotogotan na mag-eksister an mga gobyerno, asin hinahagad nia sa sainda na gumibo nin marahay sa mga sakop ninda. Kun iyan ginigibo ninda, sinda “ministro nin Dios.” An mga Kristiano nagpapasakop sa gobyerno kan nasyon na iniistaran ninda ‘huli sa saindang konsensia.’ (Roma 13:1-7) Siempre, kun an estado maghagad nin bagay na kontra sa ley nin Dios, an Kristiano ‘kukuyogon an Dios bilang namamahala imbes na mga tawo.’—Gibo 5:29.
12. Kun an mga Kristiano pinaglalamag kan mga autoridad, kiisay na halimbawa an inaarog ninda?
12 Paano man kun pinaglalamag kan mga autoridad nin gobyerno an tunay na mga Kristiano? Sa panahon na iyan inaarog ninda an halimbawa kan enot na mga Kristiano, na nagtagal nin mga panahon nin grabeng paglamag. (Gibo 8:1; 13:50) An mga pagbalong ini sa pagtubod dati nang inaantisipar, mantang nagpatanid na si Jesus na an mga iyan maabot. (Mateo 5:10-12; Marcos 4:17) Pero, an enot na mga Kristianong idto dai nagbalos sa mga naglalamag sa sainda; ni luminuya man an saindang pagtubod huli sa sakit. Imbes, inarog ninda an halimbawa ni Jesus: “Kan sia pinagmumuda, dai sia nagbalos na magmuda. Kan sia nagdudusa, dai sia nan-uma, kundi padagos na ipinagkatiwala an saiyang sadiri sa saro na naghohokom nin matanos.” (1 Pedro 2:21-23) Iyo, dinaog kan Kristianong mga prinsipyo an mga pagprobokar ni Satanas.—Roma 12:21.
13. Ano an reaksion kan Mga Saksi ni Jehova sa paglamag asin mapagbalobaging mga kampanya tumang sa sainda?
13 Iyo man ngonyan. Sa siglong ini, grabe an tinios kan Mga Saksi ni Jehova sa kamot nin mapan-aping mga namamahala—siring kan ihinula ni Jesus. (Mateo 24:9, 13) Sa nagkapirang nasyon, pinalalakop an mga putik asin pagmisrepresentar kan mga naghihingoang impluwensiahan an mga autoridad na gumibo nin aksion tumang sa sinserong mga Kristianong ini. Pero, sa ibong kan siring na “maraot na bareta,” pinatutunayan nin mga Saksi na sinda mga ministro nin Dios paagi sa saindang marahay na gawe-gawe. (2 Corinto 6:4, 8) Kun posible, iinaatubang ninda an saindang kaso sa mga opisyal asin sa mga hokoman kan nasyon tanganing patunayan an saindang pagigin daing naginibong sala. Ginagamit ninda an ano man na paaging yaon para sa sainda tanganing idepensa sa publiko an maogmang bareta. (Filipos 1:7) Alagad pakagiboha kan gabos na magigibo ninda na itinotogot kan ley, ipinababaya na ninda an mga bagay ki Jehova. (Salmo 5:8-12; Talinhaga 20:22) Kun kaipuhan, sinda, arog kan enot na mga Kristiano, dai natatakot na magdusa para sa katanosan.—1 Pedro 3:14-17; 4:12-14, 16.
Enoton an Kamurawayan nin Dios
14, 15. (a) Ano an pangenot para sa mga nagsusuportar sa prinsipyo nin teokrasya? (b) Sa anong okasyon na si Salomon nagtao nin marahay na halimbawa nin kapakumbabaan sa saiyang katongdan na paraataman?
14 Kan tokdoan ni Jesus an saiyang mga parasunod na mamibi, an enot niang nasambitan iyo an santipikasyon kan ngaran ni Jehova. (Mateo 6:9) Kaoyon kaini, an mga namumuhay na sakop nin teokrasya hinahanap an kamurawayan nin Dios, bakong an sa sainda. (Salmo 29:1, 2) Ibinabareta kan Biblia na kan enot na siglo, ini nagin singkogan para sa nagkapira na habong kumuyog ki Jesus ta “namotan ninda an kamurawayan nin mga tawo,” namotan nindang pamurawayon nin tawo. (Juan 12:42, 43) Tunay nanggad, kaipuhan an kapakumbabaan tanganing ipaorog si Jehova sa sobrang pagtao nin importansia sa sadiri.
15 Si Salomon nagtao nin marahay na aktitud sa bagay na ini. Ikomparar an mga tataramon nia kaidtong dedikasyon kan mamuraway na templo na itinogdok nia sa mga tataramon ni Nabucodonosor may labot sa pambihirang mga itinogdok nia. Sobra an kapalangkawan, ipinaghambog ni Nabucodonosor: “Bakong ini an Dakulang Babilonya, na pinatindog ko mismo para sa harong kan hade sa kosog kan sakuyang kapangyarihan asin para sa dignidad kan sakuyang kamahalan?” (Daniel 4:30) Sa kabaliktaran, hababa an boot na pinasadit ni Salomon an halaga kan saiyang nagibo, na sinasabi: “An Dios daw talagang mag-eerok kaiba nin mga tawo digdi sa daga? Uya! An langit, iyo, an langit kan mga langit mismo, dai ka mapagkaigo; gurano pa daw an harong na ini na sakong itinogdok?” (2 Cronica 6:14, 15, 18; Salmo 127:1) Dai ilinangkaw ni Salomon an saiyang sadiri. Aram nia na sia saro sanang representante ni Jehova asin sia nagsurat: “Nag-abot na daw an kapangahasan? Dangan maabot man an maraot na dangog; alagad yaon sa mga may hababang boot an kadonongan.”—Talinhaga 11:2.
16. Paano an mga magurang sa kongregasyon nagin tunay na bendisyon paagi sa dai pagpamuraway sa saindang sadiri?
16 Kaagid kaiyan, an Kristianong mga magurang sa kongregasyon ilinalangkaw si Jehova, bakong an saindang sadiri. Kinukuyog ninda an hatol ni Pedro: “Kun may naglilingkod, sia maglingkod na nagsasarig sa kosog na itinatao nin Dios; tanganing sa gabos na bagay an Dios mapamuraway paagi ki Jesu-Cristo.” (1 Pedro 4:11) An apod ni apostol Pablo sa “katongdan nin paraataman,” bakong importanteng posisyon nin pagkaprominente, kundi “marahay na gibo.” (1 Timoteo 3:1) An mga magurang ninonombrahan tanganing maglingkod, bakong tanganing mamahala. Sinda mga paratokdo asin pastor kan aripompon nin Dios. (Gibo 20:28; Santiago 3:1) An mapakumbaba, mapagsakripisyong mga magurang tunay na bendisyon sa kongregasyon. (1 Pedro 5:2, 3) “Padagos nindong kamotan an siring na mga lalaki,” asin pasalamatan si Jehova na sia nagtao nin kadakol na kualipikadong magurang na masorog sa teokrasya sa “huring mga aldaw” na ini.—Filipos 2:29; 2 Timoteo 3:1.
“Magin Kamong mga Paraarog sa Dios”
17. Sa anong mga paagi na an Dios inaarog kan mga sakop nin teokrasya?
17 Isinadol ni apostol Pablo: “Magin kamong mga paraarog sa Dios, bilang namomotan na mga aki.” (Efeso 5:1) An mga nagpapasakop sa teokrasya naghihingoa na magin arog nin Dios sagkod sa mapupuede para sa mga tawong bakong sangkap. Halimbawa, an Biblia nagsasabi manongod ki Jehova: “An Gapo, sangkap an saiyang gibo, huli ta an gabos niang dalan hustisya. Dios nin pagigin fiel, na dian sa saiya mayo nin inhustisya; matanos asin tanos sia.” (Deuteronomio 32:3, 4) Tanganing maarog an Dios sa bagay na ini, an mga Kristiano naghihingoang magkaigwa nin pagigin fiel, katanosan, asin timbang na sentido nin hustisya. (Miqueas 6:8; 1 Tesalonica 3:6; 1 Juan 3:7) Linilikayan ninda an dakol na sa kinaban puede na, arog baga kan inmoralidad, kaaraan, asin kahanaban. (Efeso 5:5) Huling an mga lingkod ni Jehova sinusunod an mga pamantayan nin Dios, bakong nin mga tawo, an saiyang organisasyon teokratiko, malinig, asin nakararahay.
18. Ano an labaw sa gabos na kualidad nin Dios, asin paano ipinababanaag nin mga Kristiano an kualidad na ini?
18 An labaw sa gabos na kualidad ni Jehova Dios iyo an pagkamoot. “An Dios pagkamoot,” sabi ni apostol Juan. (1 Juan 4:8) Mantang an teokrasya nangangahulogan na pamamahala nin Dios, iyan pamamahala paagi sa pagkamoot. Si Jesus nagsabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) An teokratikong organisasyon nagpaheling nin lataw na pagkamoot sa masakit na huring mga aldaw na ini. Durante kan mapait na paglalaban sa paglaglag sa sarong rasa duman sa Aprika, an Mga Saksi ni Jehova nagpaheling nin pagkamoot sa gabos, saen man sindang grupong etniko kabilang. Durante kan guerra sa dating Yugoslavia, an Mga Saksi ni Jehova sa gabos na lugar nagtarabangan, mantang an ibang grupong relihioso nakikabtang sa paglinig etniko daa. Bilang indibiduwal, an mga Saksi ni Jehova nagmamaigot na kuyogon an hatol ni Pablo: “Magkaharale na sa saindo an gabos na maraot an kamawotan na kapaitan asin kaanggotan asin kabangisan asin sirilyakan patin pagraway kaiba an gabos na karatan. Kundi magin maboot sa lambang saro, madinamayon sa mamomoton na paagi, na sueltong nagpapatarawadtawadan siring na an Dios man sueltong nagpatawad sa saindo paagi ki Cristo.”—Efeso 4:31, 32.
19. Ano an mga bendisyon na inaako ngonyan asin sa ngapit kan mga nagpapasakop sa teokrasya?
19 An mga nagpapasakop sa teokrasya nagkakamit nin dakulaon na mga bendisyon. Sinda may pakipagkatoninongan sa Dios asin sa mga kapwa Kristiano. (Hebreo 12:14; Santiago 3:17) May katuyohan sinda sa buhay. (Eclesiastes 12:13) Sinda may espirituwal na katiwasayan asin seguradong paglaom sa ngapit. (Salmo 59:9) Sa katunayan, nakakamtan ninda an panamit sa magigin kamugtakan kun an bilog na katawohan sakop na nin teokratikong pamamahala. Sa panahon na iyan, sabi kan Biblia, “dai sinda magibo nin maraot o manraraot sa bilog kong banal na bukid; huli ta an daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.” (Isaias 11:9) Abaa kamagigin mamuraway na panahon iyan! Gibohon logod niatong segurado an satong lugar sa maabot na Paraisong iyan paagi sa pagdadanay na dayupot ngonyan sa teokrasya.
Ikapaliliwanag daw Nindo?
◻ Ano an tunay na teokrasya asin saen iyan manonompongan ngonyan?
◻ Paano an mga tawo nagpapasakop sa teokratikong pamamahala sa saindang buhay?
◻ Sa anong mga paagi na hinahanap nin gabos na sakop nin teokrasya an kamurawayan nin Dios nin enot sa sadiri nindang kamurawayan?
◻ Ano an nagkapirang diosnon na kualidad na inaarog kan mga nagsusuportar sa teokrasya?
[Retrato sa pahina 17]
Ipinaorog ni Salomon an kamurawayan nin Dios kisa sa sadiri niang kamurawayan