An Parlamento kan mga Relihiyon sa Kinaban—Magigin Mapanggana daw Iyan?
GINATOS na namomoon sa relihiyon an nagtiripon sa ikaduwang Parlamento kan mga Relihiyon sa Kinaban na ginibo sa Chicago, Illinois, E.U.A., kan tig-init nin 1993. An Budismo, Kakristianohan, Hinduismo, Judaismo, asin Islam irinepresentar gabos. Presente man an mga aswang asin mga parasamba sa diosa. Pinag-olayan ninda an saindang kabtang sa pagtapos sa guerra. An tsirman kan parlamento inadmitir na “dos-tersio kan dakulang mga iriwal sa kinaban ngonyan igwa nin relihiyosong mga implikasyon.”
Sanggatos na Taon Na an Nakaagi
Nagin mapanggana daw an parlamento? Helinga an nangyari sanggatos na taon na an nakaagi sa enot na Parlamento kan mga Relihiyon sa Kinaban. Ginibo man iyan sa Chicago, kan tig-init nin 1893, asin labing 40 relihiyon an irinepresentar. An Konsilyo Para sa Parlamento kan mga Relihiyon sa Kinaban inaadmitir na an mga nag-atender kan 1893 “naniwala na iyan an magigin enot sa mga serye nin internasyonal na mga pagtiripon sa pag-iribaiba nin relihiyon na makakokontribuwir sa pakasabot, katoninongan asin progreso. Iyan dai nagin siring. An relihiyosong pagkapanatiko asin kadahasan nagin nang kabtang kan mga guerra kan nakaaging 100 na taon, asin nagpapadagos na siring ngonyan.” Taano ta nasudya? Huli ta an bilog na ideya nin pag-iribaiba nin relihiyon dai inooyonan nin Dios. Nagsasabi an Biblia: “Dai kamo makipagsakal na bakong timbang sa mga dai nagtutubod.”—2 Corinto 6:14-17.
Tamang-tama, an Setyembre 1893 na luwas kan Zion’s Watch Tower nagdoon kan kadaihan nin Makakasuratan na pagsuportar para sa Parlamento kan mga Relihiyon sa Kinaban kan iyan magsabi, na may kadikit na pagtuya: “Nakakotkot sinda nin dakol na magagayon na bungbong na dalipay sa mga kagabaan nin Babilonya asin sa iba pang suanoy na siudad, pero may mga dai pa nakukua. . . . Dai sindang nakuang ano man na nagtataram manongod ki Moises asin Josue na nag-apod nin ‘Parlamento nin mga Relihiyon,’ nin mga Moabita asin Amonita, asin Edomita . . . Dai sindang nakuang ano man na nagtataram manongod sa makosog na gurang na si Samuel na nagsugo sa Gat asin Ekron sa pagkua nin mga representante kan mga saserdote ni Dagon tanganing tumukad sa Silo asin makikomperensia sa mga saserdote ni Jehova . . . Dai sindang nakuang ano man na nagtataram manongod sa gurang nang anit an paha na si Elias na nagproponer nin ‘kongreso’ kaiba kan mga saserdote ni Baal asin Moloc para sa sarong semanang pag-orolay manongod sa mga doktrina kan kanya-kanya nindang pagtubod, na may katuyohan na palakopon an paggalang sa relihiyon kan kada saro.”
Kahadean nin Dios—An Solamenteng Paglaom
An Parlamento kan mga Relihiyon sa Kinaban dai magigin mapanggana. Ginamit nin mga diaryo asin delegado an mga terminong siring baga sa “karibarawan,” “kariribokan,” asin “grabeng pagkaribaraw” may koneksion sa parlamento. Sono sa sarong bareta, pati an pulis napalabot sa pagpakalma sa duwang kariribokan na gikan sa politikal na pagkabaranga. Sa sarong dokumento kan 1952, ilinista kan parlamento bilang saro sa mga katuyohan kaiyan: “An pag-establisar nin permanenteng Pankinaban na Parlamento nin mga Relihiyon na makikipagtabangan sa NACIONES UNIDAS sa pagkamit nin pankinaban na katoninongan asin pagkasinabotan sa tahaw kan gabos na nasyon.” Sa kabaliktaran, nagsabi si Jesus na an saiyang Kahadean bakong kabtang kan kinaban na ini. Itinotokdo kan Biblia an Kahadean nin Dios bilang an solamenteng solusyon sa mga problema kan katawohan.—Daniel 2:44; Juan 18:36.