Kun Taano an Kinabanon na Relihion ta Matatapos

“Lumuwas kamo sa saiya, banwaan ko, kun habo nindong makikabtang sa saiyang mga kasalan, asin kun habo nindong mag-ako nin kabtang kan saiyang mga damat.”​—KAPAHAYAGAN 18:4.

1. (a) Sa anong paagi na an Dakulang Babilonya buminagsak? (b) Paano nakaapektar sa Mga Saksi ni Jehova an pangyayaring ini?

“BUMINAGSAK na an Dakulang Babilonya!” Iyo, sa punto-de-vista ni Jehova an pankinaban na imperyo nin falsong relihion buminagsak na. Ini nagin totoo poon pa kan 1919, kan an natatada kan mga tugang ni Cristo lumuwas sa impluwensia kan Kakristianohan, na sarong pangenot na kabtang kan mistikong Babilonya. Bilang resulta, sinda nagin nang talingkas na idenunsiar an falsong relihion asin ipaisi an matanos na pamamahala nin Dios paagi sa Mesiyanikong Kahadean. Sa bilog na siglong ini ibinuyagyag kan maimbod na mga Saksi ni Jehova an katiriponan nin mga relihion na kontrolado ni Satanas, na saiyang minanipular tanganing dayaon an “bilog na ineerokan na daga.”​—Kapahayagan 12:9; 14:8; 18:2.

Paano Buminagsak an Dakulang Babilonya?

2. Ano an presenteng kamugtakan kan mga relihion sa kinaban?

² Minsan siring, tibaad maghapot an saro, ‘Paano nindo masasabi na an Dakulang Babilonya buminagsak na, mantang an relihion garo baga nag-ooswag sa kadakol na kadagaan?’ An Katolisismo asin Islam naghihingakong igwa nin labing tigsarong bilyon na paratubod. An Protestantismo nag-ooswag pa man giraray sa Amerika del Norte asin Sur, na kun saen an bagong mga simbahan asin kapilya padagos na itinotogdok. Ginatos na milyon an nagsusunod sa mga rituwal kan Budismo asin Hinduismo. Pero, sagkod saen an gabos na relihion na ini nakatatao nin positibong impluwensia sa paggawe kan binilyon na ini? Iyan daw nakaolang sa mga Katoliko asin Protestante na magginaradanan sa Amihanan na Irlandia? Iyan daw nakatao nin tunay na katoninongan sa mga Judio asin Muslim sa Tahaw na Sirangan? Iyan daw naggiya sa pagkaoroyon kan mga Hindu asin Muslim sa India? Asin, mas dai pa sana nahahaloy, iyan daw nakaolang sa mga Serbianong Ortodokso, Croatang mga Katoliko, asin Bosnianong mga Muslim na ipadagos an “paglinig etniko,” pananalakat, panlulupig, asin pagginaradanan? An relihion sa parate sarong ngaran sana, sarong garo tibulaka nin sogok kahimpis na panlipod na minagatak sa pinakamaluyang doon.​—Galacia 5:​19-21; ikomparar an Santiago 2:​10, 11.

3. Taano an relihion ta hinohokoman sa atubangan nin Dios?

³ Sa punto-de-vista nin Dios, an relihiosong pagsuportar kan mga tawo dai nakaliliwat sa sarong dai madudulagan na katunayan​—an gabos na relihion hinohokoman sa atubangan nin Dios. An Dakulang Babilonya, siring sa ipinaheheling kan saiyang kasaysayan, angay na hokoman nin bakong paborable huli ta “an saiyang mga kasalan nakaabot na sagkod sa langit, asin ginirumdom na nin Dios an saiyang mga gibo nin inhustisya.” (Kapahayagan 18:5) Sa makahulang pananaram si Oseas nagsurat: “Huli ta nagsasarabwag sinda nin doros, asin alihoshos an saindang aanihon.” An gabos na falsong relihion ni Satanas sa bilog na kinaban maako kan pinakamagabat na padusa huli sa saindang pagpasaloib sa Dios, sa saiyang pagkamoot, sa saiyang ngaran, asin sa saiyang Aki.​—Oseas 8:7; Galacia 6:7; 1 Juan 2:​22, 23.

Kaipuhan Nindong Pumili

4, 5. (a) Sa anong mga kamugtakan kita nabubuhay ngonyan? (b) Anong mga hapot an kaipuhan niatong simbagon?

⁴ Kita nabubuhay sa ultimong kabtang kan “huring mga aldaw,” asin bilang tunay na mga Kristiano kita nakikilaban tanganing makaligtas sa “mga panahon [na ini] na masakit pakibagayan.” (2 Timoteo 3:​1-5) An tunay na mga Kristiano temporaryong mga residente sa kinaban ni Satanas, na totoong nagpapaheling kan saiyang maraot na personalidad bilang sarong paragadan, putikon, asin parapakaraot. (Juan 8:44; 1 Pedro 2:​11, 12; Kapahayagan 12:10) Kita napalilibotan nin kadahasan, pandadaya, panloloko, karatan, asin labi-labing inmoralidad. An mga prinsipyo iniignoro. An hedonismo asin personal na bentaha iyo an mga tataramon na naglaladawan sa situwasyon. Asin sa dakol na kaso kinokonsinte kan klero an moral na karatan paagi sa pagpaluya sa puersa kan malinaw na pagkondenar kan Biblia sa homoseksuwalidad, pakikisaro, asin pagsambay. Sa siring an isyu iyo na, Kamo daw nagsusuportar asin nagkokonsinte sa falsong pagsamba, o kamo daw aktibong nagpapartisipar sa tunay na pagsamba?​—Levitico 18:22; 20:13; Roma 1:​26, 27; 1 Corinto 6:​9-11.

⁵ Panahon ngonyan nin pagbulagbulag. Huli kaini, nangorognang may dahelan na mamidbid an pagkakalaen kan falso asin tunay na pagsamba. Ano pa an ginibo kan mga relihion kan Kakristianohan na nagpapangyari sa sainda na magin kulpableng marhay?​—Malaquias 3:18; Juan 4:​23, 24.

An Falsong Relihion Inakusar

6. Paano pinasaloiban kan Kakristianohan an Kahadean nin Dios?

⁶ Dawa ngani minilyon sa Kakristianohan an regular na naggagamit kan Pamibi kan Kagurangnan, na dian sinda namimibi na dumatong na logod an Kahadean nin Dios, sinda maigot na nagsuportar sa gabos na porma nin politikal na kapahayagan, sa pagpagilid kan teokratikong pamamahalang iyan. Dakol na siglo na an nakaagi an “mga prinsipe” kan Iglesia Katolika, na siring ninda Kardinal Richelieu, Mazarin, asin Wolsey, nag-akto man bilang sekular na mga estadista, mga ministro nin gobyerno.

7. Paano ibinuyagyag kan Mga Saksi ni Jehova an klero nin Kakristianohan labi nang 50 taon an nakalihis?

⁷ Labing 50 taon na an nakalihis, sa pulyeto na may titulong Religion Reaps the Whirlwind, ibinuyagyag kan Mga Saksi ni Jehova an pakikilabot nin Kakristianohan sa politika.a An sinabi kaidto aplikado man na gayo ngonyan: “An sadiosan na pagsiyasat sa paggawe kan relihiosong klero kan gabos na denominasyon mahayag na an relihiosong mga namomoon sa bilog na ‘Kakristianohan’ nagpapartisipar na may makosog na interes sa politika kan ‘presenteng maraot na kinaban na ini’ asin nakisasale sa kinabanon na mga gibo kaiyan.” Kaidto biyong tinuyaw kan mga Saksi si Papa Pio XII huli sa saiyang mga konkordat sa Nazi na si Hitler (1933) asin sa Fascistang si Franco (1941), siring man sa pakipagribay kan papa nin diplomatikong mga representante sa parasalakay na nasyon nin Hapon kan Marso 1942, mga pirang bulan sana pakatapos kan maringison na pagsalakay sa Pearl Harbor. An papa nasudyang himateon an patanid ni Santiago: “Mga parapakisambay, dai nindo naaaraman na an pakikikatood sa kinaban pakikiiwal sa Dios? An siisay man, kun siring, na boot na magin katood kan kinaban ginigibo an saiyang sadiri na kaiwal nin Dios.”​—Santiago 4:4.

8. Paano napapalabot sa politika ngonyan an Iglesia Katolika Romana?

⁸ Ano an situwasyon ngonyan? An papado nakikilabot pa man giraray sa politika, kapwa paagi sa klero kaiyan asin sa legong mga representante kaiyan. An dai pa sana nahahaloy na mga papa nagpaheling kan saindang pag-oyon sa Naciones Unidas paagi sa pagdiskurso sa palsipikadong gibo nin tawo na iyan para sa pankinaban na katoninongan. An sarong dai pa sana nahahaloy na isyu kan L’Osservatore Romano, an opisyal na peryodiko kan Batikano, nag-anunsio na pitong bagong diplomatiko, “mga embahador sa Santa Sede,” an nagpresentar kan saindang mga kredensial sa “Santo Papa.” Maiimahinar ta daw si Jesus asin si Pedro na nakikilabot sa siring na diplomatikong pagriribayan? Si Jesus nagsayumang gibohon na hade kan mga Judio asin nagsabi na an saiyang Kahadean bakong sa kinaban na ini.​—Juan 6:15; 18:36.

9. Taano ta masasabi niato na an Protestanteng mga relihion kapareho man sana kan saindang Katolikong mga katimbang?

⁹ An Protestanteng mga namomoon daw mas marahay kisa sa saindang Katolikong mga katimbang? Sa Estados Unidos, dakol na konserbatibong Protestanteng relihion, asin siring man an mga Mormon, midbid na kampi sa sarong politikal na partido. An Kristianong Koalisyon nakikilabot na gayo sa politika nin E.U. An ibang Protestanteng klero malinaw na kampi sa laen man na politikal na paninindogan. Kun minsan nalilingawan na sa Estados Unidos, an politikal na mga representante sa pagtaram na siring ninda Pat Robertson asin Jesse Jackson mga “Reberendo” man sa presente o kaidto, siring kan Britanong miembro kan Parlamento na si Ian Paisley kan Amihanan na Irlandia. Paano daw ninda ipinangangatanosan an saindang mga paninindogan?​—Gibo 10:​34, 35; Galacia 2:6.

10. Anong malinaw na kapahayagan an ginibo kan 1944?

¹⁰ Siring sa ihinapot kan Religion Reaps the Whirlwind kan 1944, iyan man an hapot niato ngonyan: “Puede daw na an arin man na organisasyon na minalaog sa mga tratado kaiba kan kinabanon na mga kapangyarihan asin aktibong iminamaniobra an sadiri na makalaog sa politikal na mga aktibidad kan kinaban na ini, na naghahanap nin bentaha asin proteksion sa kinaban na ini . . . magin iglesia nin Dios o magrepresentar ki Cristo Jesus digdi sa daga? . . . Malinaw nanggad, an gabos na relihionista na an katuyohan kapareho kan mga kahadean sa kinaban na ini dai puedeng irepresentar an kahadean nin Dios paagi ki Cristo Jesus.”

An Espiritu ni Cain kan Falsong Relihion

11. Paano sinunod kan falsong relihion an halimbawa ni Cain?

¹¹ Sa bilog na kasaysayan, an falsong relihion nagpaheling kan espiritu kan paragadan sa tugang na si Cain, na guminadan sa saiyang tugang na si Abel. “An mga aki nin Dios asin an mga aki kan Diablo namimidbid sa bagay na ini: An gabos na dai naggigibo nin katanosan bakong gikan sa Dios, ni an saro na dai namomoot sa saiyang tugang. Huli ta ini an mensahe na saindong nadangog poon sa kapinonan, na kita maninigong magkaminorootmootan; bakong arog ni Cain, na naggikan sa maraot asin guminadan sa saiyang tugang. Asin sa anong dahelan na ginadan nia sia? Huli ta an saiyang mga gibo maraot, alagad an sa saiyang tugang matanos.” Habong tawan nin diretso an dalisay asin inaakong pagsamba sa Dios kan saiyang tugang, si Cain guminamit nin kadahasan​—an huring paagi kaidtong mga dai ikapaliwanag an saindang mga aksion.​—1 Juan 3:​10-12.

12. Ano an ebidensia kan pakikilabot nin relihion sa mga guerra asin iriwal?

¹² Sinusuportaran daw kan mga katunayan an pag-akusar na ini sa falsong relihion? Sa librong Preachers Present Arms, an autor nagsabi: “Sa kasaysayan nin mga sibilisasyon, . . . duwang puersa an perming nagkakasaro sa magkasorog na alyansa. Iyan an guerra asin relihion. Asin, sa gabos na darakulang relihion sa kinaban, . . . mayo nin nagin mas dusay sa [guerra] kisa sa [Kakristianohan].” Kan pirang taon na an nakaagi, an peryodikong The Sun kan Vancouver, Canada, nagsabi: “Sarong kaluyahan nin tibaad gabos na organisadong relihion na an iglesia nagsusunod sa bandera . . . Anong guerra an pinaglabanan na dian dai hiningakong an Dios nasa lambang lado?” Tibaad naheling na nindo an prueba kaini sa sarong lokal na simbahan. Sa parate, an nasyonal na bandera nag-aadorno sa altar. Sa irarom nin anong bandera sa paghona nindo na si Jesus mamartsa? An saiyang mga tataramon nag-aaningal sa nag-aging mga siglo: “An sakong kahadean bakong kabtang kan kinaban na ini”!​—Juan 18:36.

13. (a) Paano nasudya an falsong relihion sa Aprika? (b) Anong nagpapamidbid na tanda nin Kristianismo an itinao ni Jesus?

¹³ An mga relihion nin Kakristianohan dai tinokdoan an saindang mga aripompon kan katotoohan nin tunay na sa magturugang na pagkamoot. Imbes, an mga pagkakalaen nin nasyon, tribo, asin rasa tinotogotan na bangaon an saindang mga miembro. An mga report nagpapaheling na an klerong Katoliko asin Anglicano may labot sa pagkabaranga na nagresulta sa paglaglag sa sarong rasa kan mga tribo sa Rwanda. An The New York Times nagreport: “An lagduan na paggaradanan sa Rwanda nagcausa sa dakol na Katoliko Romano duman na magsaboot na sinda trinaydor kan mga namamahala sa iglesia. An iglesia sa parate nababanga sa etnikong mga lado, sa pag-oltanan nin Hutu asin Tutsi.” An iyo man sanang peryodiko kinotar an sarong pading Maryknoll na nagsasabi: “An iglesia nasudyang marhay sa Rwanda kan 1994. Dakol na mga taga-Rwanda an sa sarong sentido isinikwal na an iglesia. Dai na iyan pinaniniwalaan.” Kanigoan an kalaenan sa mga tataramon ni Jesus: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.”​—Juan 13:35.

14. Anong rekord nin paggawe an ipinipresentar kan pangenot na mga relihion na bakong Kristiano?

¹⁴ An iba pang pangenot na relihion kan Dakulang Babilonya dai nagtao nin mas marahay na halimbawa. An teribleng lagduan na paggaradanan kan 1947, kan mabanga an India, nagpapaheling na an pangenot na mga relihion duman dai nakapaluwas kan bungang pagpahunod. An padagos na komunal na kadahasan sa India nagkokompirmar na an kadaklan na tawo dai nagbago. Bakong makangangalas na an magasin na India Today nagkonklusyon: “An relihion nagin ngaran na sa irarom kaiyan an pinakanakakukubhan na mga krimen ipinagpapadagos. . . . Iyan nagpapaluwas nin ngana-nganang kadahasan asin sarong mapanlaglag na marhay na puersa.”

“Nakabibiglang Kapahayagan na Masakit Paniwalaan Pero Totoo”

15. Ano an kamugtakan nin relihion sa parteng solnopan?

¹⁵ Dawa an sekular na mga komentarista nakarisa sa pagkasudya kan relihion na makakombensir, itadom an tunay na mga pamantayan sa buhay, asin tumangon an pagsalakay kan sekularismo. Sa saiyang librong Out of Control, an dating parakonseho para sa nasyonal na seguridad na si Zbigniew Brzezinski kan E.U. nagsurat: “Sarong nakabibiglang kapahayagan na masakit paniwalaan pero totoo na an pinakadakulang kapangganahan para sa proposisyon na ‘an Dios gadan’ nangyari bakong sa mga estado na dominado nin Marxismo . . . kundi sa liberal na demokratikong mga sosyedad sa Solnopan, na an kultura nagpatalubo nin moral na pagkaindiperente. Dian, an katunayan iyo na an relihion nagpondo nang magin sarong pangenot na sosyal na puersa.” Sia nagpadagos: “An pamomogol kan relihion sa kultura nin Europa nagluya nang marhay, asin an Europa ngonyan​—na orog pa ngani kisa sa Amerika—​sa pundamental sarong sekular na sosyedad.”

16, 17. (a) Anong hatol an itinao ni Jesus manongod sa klero kan saiyang aldaw? (b) Anong marahay na prinsipyo an sinabi ni Jesus manongod sa bunga?

¹⁶ Ano an sinabi ni Jesus manongod sa Judiong klero kan saiyang aldaw? “An mga eskriba asin Fariseo nagturukaw sa tukawan ni Moises [tanganing itokdo an Torah, an Ley]. Kaya an gabos na bagay na isinasabi ninda sa saindo, giboha asin kuyoga nindo, alagad dai nindo arogon an saindang mga ginigibo, huli ta sinda nagtataram alagad dai naggigibo.” Iyo, an relihiosong pagsaginsagin bakong bago.​—Mateo 23:​2, 3.

¹⁷ An bunga kan falsong relihion nagkokondenar kaiyan. An prinsipyo na itinao ni Jesus aplikadong marhay: “An gabos na kahoy na marahay nagbubunga nin marahay, alagad an gabos na kahoy na raot nagbubunga nin daing data; an marahay na kahoy dai makakapagbunga nin daing data, ni makakapagbunga man nin marahay an raot na kahoy. An gabos na kahoy na dai nagbubunga nin marahay pinuputol asin iinaapon sa kalayo. Tunay, kun siring, paagi sa saindang mga bunga mamimidbid nindo an mga lalaking iyan.”​—Mateo 7:​17-20.

18. Paano kutana maninigo na pinagdanay kan Kakristianohan na malinig an mga miembro kaiyan?

¹⁸ Kun an mga relihion nin Kakristianohan sadiosan na iaaplikar an Kristianong disiplina nin pagtitiwalag, o pag-ekskomunikar, para sa gabos na tampalasan na gibo na nakomitir kan naghihingakong mga miembro kaiyan, ano an mangyayari? Ano an mangyayari sa gabos na dai nagsosolsol na putikon, parapakisaro, parasambay, homoseksuwal, maninikas, kriminal, parapabakal nin asin adikto sa droga, asin miembro nin sindikato? Daing duwa-duwa, an raot na bunga kan Kakristianohan nagpapangyari kaiyan na magin angay sana sa paglaglag nin Dios.​—1 Corinto 5:​9-13; 2 Juan 10, 11.

19. Anong mga pag-admitir an ginibo manongod sa pamomoon sa relihion?

¹⁹ An pankagabsan na asamblea para sa Iglesia Presbiteriano sa Estados Unidos nag-admitir: “Kita napaaatubang sa sarong krisis na terible an hiwas asin implikasyon. . . . Poon sa 10 sagkod 23 porsiento kan klero sa bilog na nasyon an nakikabtang sa bakong disenteng paggawe sa sekso o seksuwal na relasyon sa mga miembro kan parokya, kliente, empleyado, asin iba pa.” An sarong negosyante sa E.U. marahay an pagkasumaryo kan punto: “An relihiosong mga institusyon nasudyang ipaabot an saindang makasaysayan na mga pamantayan sa buhay, asin sa dakol na kaso, nagin kabtang kan problema.”

20, 21. (a) Paano idinenunsiar ni Jesus asin ni Pablo an pagsaginsagin? (b) Anong mga hapot an kaipuhan pang simbagon?

²⁰ An pagdenunsiar ni Jesus sa relihiosong pagsaginsagin totoo ngonyan kun paanong iyan totoo kan saiyang panahon: “Kamong mga parasaginsagin, marahay nanggad an pagkahula ni Isaias dapit sa saindo, kan sia magsabi, ‘An mga tawong ini nagtataong onra sa sako sa saindang mga ngabil, alagad an saindang puso harayo sa sako. Sayang sana na sinda nagsasamba sa sako, huli ta itinotokdo ninda bilang mga doktrina an mga pagboot nin mga tawo.’” (Mateo 15:​7-9) An mga tataramon ni Pablo ki Tito naglaladawan man kan satong modernong situwasyon: “Sinda nagpapahayag sa publiko na midbid ninda an Dios, alagad ta sinda nagpapainda sa saiya paagi sa saindang mga gibo, huli ta sinda makababalde asin masumbikal patin bakong aprobado para sa ano man na marahay na gibo.”​—Tito 1:16.

²¹ Sinabi ni Jesus na kun an buta magkabit sa buta, pareho sinda mahoholog sa kotkot. (Mateo 15:14) Mawot daw nindong malaglag kaiba kan Dakulang Babilonya? O mawot daw nindong maglakaw sa tanos na mga dana na an saindong mga mata bukas asin magkamit kan bendisyon ni Jehova? An mga hapot na napapaatubang sa sato ngonyan: Arin na relihion, kun igwa man, an nagpapaluwas nin diosnon na bunga? Paano niato mamimidbid an tunay na pagsamba na inaako nin Dios?​—Salmo 119:105.

[Nota sa Ibaba]

Nagigirumdoman daw Nindo?

◻ Ano an presenteng kamugtakan kan Dakulang Babilonya sa atubangan nin Dios?

◻ Sa anong basihan na inakusar an falsong relihion?

◻ Paano ipinaheling nin falsong relihion an espiritu ni Cain?

◻ Anong prinsipyo an sinabi ni Jesus para sa paghokom sa arin man na relihion?

[Retrato sa pahina 13]

Sa bilog na kasaysayan an relihiosong mga namomoon nakilabot sa politika

[Mga retrato sa pahina 15]

Si Kardinal Mazarin

Si Kardinal Richelieu

Si Kardinal Wolsey

An mga klerigong ini makapangyarihan man na mga estadista

[Pasasalamat para sa pinagkuanan kan retrato]

Si Kardinal Mazarin asin si Kardinal Richelieu: Hale sa librong Ridpath’s History of the World (Tomo VI dangan Tomo V). Si Kardinal Wolsey: Hale sa librong The History of Protestantism (Tomo I).