Sarong Mas Marahay na Kinaban—Pangatorogan daw Sana?
KUN kamo nagin parasunod nin Mazdaismo siring sa ihinulit kan taga-Iran na propetang si Zoroaster, naghalat kutana kamo para sa aldaw na an daga mabalik sa orihinal na kagayonan kaiyan. Kun kamo nag-istar sa suanoy na Grecia, tibaad nangarap kamo na maabot an trangkilong Mga Islang Mapalad o na maheling an pagbalik kan Panahon nin Dakulang Kaogmahan Asin Prosperidad na ilinadawan kan poetang si Hesiod kan ikawalong siglo B.C.E. An sarong Indian na Guaraní sa Amerika del Sur tibaad naghahanap pa kan Daga na Mayong Karatan. Sa pamumuhay sa satong panahon, tibaad naglalaom kamo na an kinaban maoswag huli sa sarong politikal na ideolohiya o bilang resulta nin modernong aldaw na pagrisa sa ekolohiya.
Panahon nin Dakulang Kaogmahan Asin Prosperidad, Mga Islang Mapalad, Daga na Mayong Karatan—an mga ini kaiba sa dakol na ngaran sa paglaladawan sa saro sanang kamawotan, an paglaom sa sarong mas marahay na kinaban.
An kinaban na ini, an satong kinaban, bako nanggad na pinakamarahay na lugar. Nag-oorog sa ringis na krimen, pagralabanlaban nin magkakahimanwa na daing kaagid an kadahasan, paglaglag sa sarong rasa, mayong labot sa mga kasakitan kan iba, kadukhaan asin gutom, kawaran nin trabaho asin kakulangan nin pagkasararo, ekolohikong mga problema, mayong bolong na mga helang na nagpapasakit sa minilyon—an listahan nin presenteng mga kasakitan garo baga mayo nin katapusan. Sa paghorophorop sa mga guerra sa presente, an sarong Italianong peryodista nagsabi: “An hapot na natural na minalataw iyo na kun baga an pakikiiwal bakong an pinakamakosog na saboot sa satong panahon.” Sa pagkonsiderar sa situwasyon, sa paghona daw nindo realistiko na magmawot nin laen, nin mas marahay? O an siring daw na kamawotan paghimuyawot sana para sa Utopia, pangatorogan na nungkang magigin totoo? Nabubuhay daw kita sa pinakamarahay sa gabos na posibleng kinaban?
Bako ining bagong mga kahaditan. Sa laog nin dakol na siglo an mga tawo nangangarap nin sarong kinaban na dian malakop an pagkaoroyon, hustisya, prosperidad, asin pagkamoot. Sa pag-agi nin panahon, nagkapirang pilosopo an detalyadong nagpahayag kan saindang mga ideya manongod sa sangkap na mga Estado, mas marahay na mga kinaban. Alagad, makamomondo, nungka nindang ikinapaliwanag kun paano an mga iyan mapangganang padadalaganon.
May ikatotokdo daw an dakol nang siglo an edad na listahan na ini nin mga pangarap, Utopia, asin makosog na kamawotan nin tawo para sa sarong mas marahay na sosyedad?
[Ritrato sa pahina 3]
Ini daw an pinakamarahay sa gabos na posibleng kinaban?