Nasudya Na daw an Paggiya nin Tawo?
SIISAY an naglalang kan gabos na bagay? Kun an simbag nindo an “Dios,” dangan kaiba kamo kan minilyon na nagtutubod sa Dios kan Biblia, an Kaglalang.
Minsan siring, an dakol na nagtutubod sa Dios nadedepisilan na akoon na sia aktibong kalabot sa pagresolber kan mga problema nin katawohan. Realistiko daw na isipon na an Dios igwa nin ginigibong programa na magdadara nin kaginhawahan sa katawohan? Dakol an dai nakakukua nin rasonableng ebidensia na ini totoo.
Sa laog nin rinibong taon, nag-eksperimento an mga tawo nin dai mabilang na paagi nin pagtabang sa sadiri sa paghanap nin mga solusyon, na dai ilinalabot an Dios. Pero nakua na daw kan mga tawo an mga solusyon? O an mga problema daw orog na naggagrabe asin depisil na resolberan? Ano an ginigibo nin tawo sa pangenot na mga problema sa kinaban ngonyan?
An sarong eksperto arog kaini an pagkasabi: “Poon pa kan Industriyal na Rebolusyon, an maoswag na mga nasyon nasobrahan an paggamit sa natural na mga kayamanan kan kinaban paagi sa dai masusteniran na mga paagi nin produksion asin pagkonsumo, na nagkacausa nin danyos sa panglobong palibot, sa ikapapahamak kan nag-ooswag na mga nasyon.”
Padagos na rinaraot nin tawo an daga. An diaryo sa Argentina na Clarín nagkomento: “Sa ikaduwang kabangaan kan siglong ini, an kapasloan sa ekonomiya, kawaran nin pag-iingat, asin kapabayaan responsable sa darakulang kalamidad na bako sanang nakagadan nin mga tawo kundi nakaraot man sa palibot, na parateng sa dai makarkulong sokol.”
An makuring kadukhaan ngonyan garo baga permanente nang kana sa modernong sosyedad. Dawa an inaapod na mayaman na mga nasyon sa kinaban nanluluya huli sa makuring gabat nin kadukhaan. Sono sa The Globe and Mail sa Toronto, Canada, kinakarkulo na an “un-tersio sa mga taga-Canada makaeeksperyensia nin kadukhaan sa panahon na sinda nakatatrabaho pa.” Idinudugang kan diaryo na an “pagkaburulagbulag nin pamilya saro sa pangenot na mga dahelan nin kadukhaan, asin an tendensia orog na naggrabe sa dai pa sana nahahaloy na mga taon.”
An pag-abuso sa droga saro pang tanda nin nagrururong sosyedad. Ano daw an magigibo nin katawohan manongod dian? Malinaw na kadikiton sa pankagabsan. An minilyon nagpapadagos na makaeksperyensia nin pisikal, mental, asin moral na pagraot bilang direktang resulta kan saindang pag-abuso sa mga narkotiko. Asin an problema marikason na naglalakop.
An mga sientista garo baga nadadaog sa pakikilaban tumang sa helang. Totoo, dakol na laban an ginana kan modernong teknolohiya. Pero, may sientipikong mga paagi mismo na nakakontribuwir sa paglataw nin bagong klase nin peligrosong mga mikrobyo na dai na kaya nin mga droga.
An mga gobyerno nin tawo dai kayang paontokon an lakop na gayong pagbalga sa mga diretso nin tawo. Halimbawa, sa ibong kan kadakol na panunumpa asin ley na ginibo tanganing maolang an pan-ooripon, kinakarkulo na sa bilog na kinaban labing sarong gatos na milyon katawo an napupuwersang magtrabaho sa irarom nin mga kamugtakan na katimbang nin kaherakherak na kaoripnan.
Alagad taano ta nasudya na an paggiya nin tawo? Konsiderara an mga bagay na ini. An paggiya nin tawo naggigikan sa mga tawo—mga tawo na igwa nin seryosong mga limitasyon. An saindang eksperyensia sa buhay halipot nanggad asin sa kagabsan limitado nin mga kultura asin palibot. Limitado man an saindang kaaraman. Ano man na paggiyang itinatao ninda nagpapabanaag kan mga limitasyon na iyan. Siring kan sinabi ni apostol Pablo, “an gabos nagkasala asin nagkulang sa kamurawayan nin Dios.”—Roma 3:23.
Sa katunayan an kadaklan kan problema asin kadepisilan na naeeksperyensiahan kan mas dakulang kabtang nin katawohan direkta o bakong direktang resulta kan pag-ignoro sa paggiya nin Dios. Alagad, saen manonompongan an siring na paggiya? Paano an Dios nagtatao sa sato nin paggiya ngonyan? An minasunod na artikulo magpapaliwanag kan mga simbag.