SIMBAG SA MGA HAPOT SA BIBLIYA

Posible daw na mahali an pagtios sa kinaban?

Taon-taon, minilyon an nagagadan sa malnutrisyon asin hilang na dara kan grabeng pagtios. Dawa may mga asensadong nasyon, an mayoriya sa kinaban grabe man giraray an pagtios. Sinasabi kan Bibliya na problema na talaga iyan kaidto pa.​—Basahon an Juan 12:8.

Kaipuhan nin sarong gobyerno na mamamahala sa bilog na kinaban para tapuson an pagtios. Dapat may kakayahan an gobyernong iyan na idistribwir nin pantay-pantay an natural na mga kayamanan kan kinaban saka papunduhon an giyera, na saro sa pinakakawsa kan pagtios. Iyan an klase nin gobyerno na ipinanuga nin Diyos.​—Basahon an Daniel 2:44.

Siisay an makakahali kan pagtios?

Pinili nin Diyos an Aki niyang si Jesus na iyo an mamahala sa bilog na katawuhan. (Salmo 2:4-8) Hahalion ni Jesus sa pagtios an mga tawo asin tatapuson an pang-aapi asin kadahasan.​—Basahon an Salmo 72:8, 12-14.

Bilang an ihinulang ‘Prinsipe nin Katuninungan,’ gigibuhon ni Jesus na matuninong asin matiwasay an bilog na kinaban. An gabos na tawo maistar sa sadiring harong, magigin maugma sa trabaho, asin magkakaigwa nin abundang kakanon.​—Basahon an Isaias 9:6, 7; 65:21-23.