Pakapanggana sa Kapungawan sa Paglilingkod sa Dios
SI Jesu-Cristo nagboot sa saiyang mga parasunod: “Paduman kamo asin gumibo kamo nin mga disipulo sa mga tawo kan gabos na nasyon.” (Mateo 28:19) Para sa dakol na Kristiano, an pag-otob sa pagboot na iyan nangahulogan nin pag-ako sa depisil na mga kamugtakan na harayo sa harong. An nagbibiyaheng mga paraataman, an saindang mga agom, asin an iba pa binabayaan an dakol na bagay huli sa paglilingkod sa Dios. An kapungawan puwedeng magin tunay na angat para sa gabos na ining Saksi ni Jehova.
An kapungawan nangyayari kun an mga nagigirumdoman dinadara an saindong kaisipan pabalik sa katiwasayan asin pagkamoot nin sarong magayon na nakaagi. Ini puwedeng magcausa nin makosogon na emosyon kaya namomondo kamo asin dai na nakakatagal. An totoo, pakapabakalan kan saindang mga rogaring asin pakabiyahe nin magastos sa ibang nasyon, an iba binayaan an saindang mga plano asin nagbalik sa sadiring lugar. Nadaog sinda nin kapungawan.
An siring na mga atake sa emosyon sa kadaklan parate pakabalyo pa sana, pero sa iba nagpapadagos iyan sa bilog na buhay. Pakahale sa laog nin labing 20 taon, si Jacob ‘napungaw nin labi-labi para sa harong kan saiyang ama.’ (Genesis 31:30) Siisay an makalalaom na magtios nin kapungawan? Ano an nakakapukaw dian? Paano makapanggagana an saro sa siring na mga saboot?
Ano an Nakakapukaw sa Kamondoan?
An kapungawan puwedeng makaapektar sa siisay man. Si Amytis, aking babae kan hade sa Media na si Astyages, malinaw na igwa kan gabos na dahelan para sa kaogmahan: mga kayamanan, kabantogan, sarong magayon na harong. Alagad napungaw siang marhay para sa kabukidan kan Media kaya an saiyang agom, si Hadeng Nabucodonosor, itinogdok an nakabitin na mga hardin nin Babilonya sa paghihingoa na rangahon sia.
An kapungawan puwedeng nangorognang nakababalo sa pasensia kun an buhay garo baga mas masakit kisa kan bago bumalyo an saro. Kan an mga tawo sa Juda magin bihag, nagreklamo sinda: “Sa pangpang kan mga salog nin Babilonya—kami nagtutukaw. Nagtarangis man kami kun nagigirumdoman mi an Sion. Paano niamo maaawit an awit ki Jehova sa ibang daga?”—Salmo 137:1, 4.
Dakol na bagay an puwedeng makapukaw sa makuring kapungawan. Si Terri, na naghale sa Canada, nagsabi: “Sarong aldaw naholog hale sa sarong libro an retrato kan pamilya. Kan puroton ko iyan, tolos na nadaog ako nin makuring kapungawan, asin naghibi ako.” Si Chris, na nagbalyo hale sa Inglaterra pasiring sa sarong mas pobreng nasyon, nag-ako: “An pakamidbid sana sa tono nin sarong lumang awit o sa parong nin sarong pamilyar na putahe puwedeng makapahiro sa sako na mawoton an mga bagay na nabayaan ko.”—Ikomparar an Bilang 11:5.
An pagkadarayupot nin pamilya parateng sarong nakakakontribuwir na bagay. Si Roseli, taga-Brazil na ngonyan nag-iistar sa kataed na nasyon, nagkomento: “Namomondo ako kun nakakadangog ako nin maraot na bareta hale sa harong asin dai ako makakaduman tanganing makatabang. Kun beses mas grabe pa iyan kun mayo akong nakukuang bareta asin minapoon na magparaimahinar nin mga bagay.” Si Janice buminalyo hale sa Amerika del Norte pasiring sa sarong sadit na banwaan sa mga tropikong Amazon. Nagsabi sia: “Napupungaw ako kun nakakadangog ako nin maogmang bareta hale sa harong. Nadadangog ko kun paano sinda iribang nag-oorogma, asin minamawot ko na makaiba ko sinda.”
Bako sanang an pagbaya sa mga tawo an nagkacausa nin kapungawan. Nagpaliwanag si Linda: “Nanluluya an boot ko kun dai ko aram kun saen mabakal kan mga bagay na kaipuhan ko. Dai ko aram an mga presyo o kun paano makikibalyo. Mahalon an pagkaigwa nin sadiring kotse, asin permi akong nasususo sa paghihingoa kong makalunad sa pano-panong pampublikong transportasyon. Ini daing ibang epekto sako kundi mapungaw sa harong.” Sa pagkomento manongod sa siwang sa kultura asin ekonomiya, nagkomento si Janet: “An kadukhaan an nakaribok sa isip ko. Dai pa ako nakaheling kaidto nin mga tawo na nakikilimos nin tinapay, o darakulang pamilya na gabos nag-eerok sa sarong kuwarto na mayong tubig. . . . An siring na mga bagay nakaribok na gayo sa isip ko na an pagmate ko dai ko na kayang mag-istar pa duman.”
Pakapanggana sa Saindong mga Saboot
Dai kita maninigong masopog dapit sa pagkaigwa nin makosog na emosyonal na mga saboot para sa mga tawo na namomotan niato o para sa pamilyar na mga palibot na dinakulaan niato. Tinawan kita ni Jehova Dios nin emosyon tanganing maogma kita sa mainit na personal na mga relasyon. An Kristianong mga paraataman kan kongregasyon sa Efeso maygurang sa emosyon na mga lalaki. Pero ano an nangyari kan umabot na an katapusan kan pagdalaw sainda ni apostol Pablo? Tara, “sinda gabos nagtarangis nin makuri, asin kinugos ninda an liog ni Pablo patin hinadokan sia”! (Gibo 20:37) Siyempre, an pangyayaring iyan dai kalabot an kapungawan. Minsan siring, tinatawan kita kaiyan nin hohorophoropon. Normal na magkaigwa nin mga saboot, pero dai ta iyan pagtogotan na kontrolon kita. Kun siring, paano nindo puwedeng mapangganahan an kapungawan?
An pag-adal na makataram kan lokal na lenguahe sarong liyabe sa pagmateng pamugtak. An mga kapungawan puwedeng maggrabe kun naoolang an komunikasyon huli ta kaipuhan nindong atubangon an ibang tataramon. Kun siring, kun posible mag-adal na magbasa asin magtaram kan lenguahe kan rehiyon bago kamo bumalyo duman. Kun dai, magkonsentrar sa pag-adal nin lenguahe durante kan enot na pirang semana pakaabot nindo. Iyan an panahon na pinakamakosog an motibasyon nindo asin kun siring igwa kan pinakamarahay na posibilidad na manodan iyan. Kun idudusay nindo an mga semanang ini sa pag-adal sana kan lenguahe, dai mahahaloy maoogma kamo sa mga pakikipag-olay, asin makakatabang iyan na mainaan an mga kapungawan.
Magkaigwa tolos nin bagong mga katood sagkod na mapupuwede, huli ta tatabangan kamo kaini na makamateng komportable. An kongregasyon kan mga Saksi ni Jehova iyo an pinakamarahay na lugar na makakua nin tunay na mga katood. Kamo an umenot asin magin interesado sa iba. Maghingoa na aramon an saindang pinaghalean, saindang pamilya, saindang mga problema, asin saindang mga interes. Imbitaran sa saindong harong an mga kapagtubod. Bilang resulta, maheheling nindo na an iba magigin interesado man sa saindo.
Sa tahaw kan banwaan nin Dios, an pakikikatood puwedeng magin siring kadayupot sa bogkos nin pamilya. Nagsabi si Jesus: “An siisay man na minagibo kan kabotan nin Dios, ini iyo an sakong tugang na lalaki asin tugang na babae patin ina.” (Marcos 3:35) Inasegurar man ni Cristo sa saiyang mga parasunod: “Dai nin siisay man na nagbaya sa harong o mga tugang na lalaki o mga tugang na babae o ina o ama o mga aki o mga oma huli sa sako asin huli sa maogmang bareta na dai magkakamit nin mananggatos ngonyan sa panahon na ini, mga harong asin mga tugang na lalaki asin mga tugang na babae asin mga ina asin mga aki patin mga oma, na may mga paglamag, asin sa madatong na palakaw nin mga bagay daing katapusan na buhay.” (Marcos 10:29, 30) Paagi sa siring kagayon na espirituwal na asosasyon nin magturugang, dai kita nagsosolo, dawa sa sarong bagong nasyon.
An pagpadanay sa pakikikatood sa mga nabayaan sa sadiring lugar puwede man na makatabang saindo na mapangganahan an kapungawan. Tibaad magngalas kamo na ngonyan na buminalyo na kamo, an komunikasyon paagi sa surat espesyalmenteng makahulogan, mantang posibleng iisipon nindong marhay an saindong mga tataramon. Igwa nin nakakaogmang mga bagay na masasabi. Si Janet, na sinambit kasubago, nagsuherir: “Mahal an pagtelepono sa harayong lugar, pero an pagpadara nin irinekord na cassette tape paagi sa korreo medyo barato. An pagtaram sa atubangan nin recorder medyo laen sa primero. Pero kun nakikipag-olay kamo sa saro na igwa nin mikropono sa pag-oltanan nindo, pasil asin interesante iyan.” Dangan puwede man kamong humagad nin cassette recording.
Si Shirley, na buminalyo hale sa Estados Unidos pasiring sa Latin Amerika 25 taon na an nakaagi, nagsabi: “Permi akong nagsusurat manongod sa nakapakokosog na mga eksperyensia imbes na mga problema. Ini nakadadagka sa iba na padagos na sumurat sako.” Alagad mag-ingat. An sobrang pagparasurat puwedeng olangon kamo sa pagkaigwa nin bagong mga katood. Si Del, na buminalyo hale sa Canada pasiring sa ibang nasyon, nagsabi: “Likayan na magparadanay sa harong asin magparahorophorop dapit sa mga bagay na kinapupungawan nindo. Imbes, lumuwas kamo asin mag-ogma sa saindong bagong lugar.”
Aramon an mga kaugalean, kasaysayan, pangisi, asin mga lugar na interesante asin magayon sa bagong nasyon. Tatabangan kamo kaini na dai magparaisip manongod sa negatibong mga bagay. Asin kun intension nindong mag-erok sa binalyohan nindo, pinakamarahay na dai kamo magsongko sa sadiring nasyon tolos-tolos o poropermi. Nagkakaipo nin panahon na magkaigwa nin bagong mga pakikikatood asin matood sa bagong mga palibot. An haralawig na pagsongko sa sadiring lugar pinopondo an paaging iyan. Oras na magin pamugtak na kamo, maoogma kamong pumuli para sa pagdalaw—dangan bumalik. Mientras tanto, magin sibot sa pagkadayupot sa saindong bagong iniistaran.
Padagos na Tumanaw sa Enotan
Itinao ni Jehova sa sato an bilog na daga bilang satong erokan. (Salmo 115:16) Paagi sa magayagayang espiritung Kristiano, an buhay puwedeng magin maogma sa arin man na nasyon. Kun buminalyo kamo tanganing makapalakop kan intereses nin Kahadean asin maghulit kan maogmang bareta sa ibang nasyon o saen man na lugar sa saindong sadiring nasyon, gibohon iyan na may maogmang paglaom. Maglaom sa pagkakaigwa nin bagong mga katood, pag-adal dapit sa laen-laen na kaugalean, paggibo nin mga disipulo, o paggibo nin kapakipakinabang na mga bagay sa paglilingkod sa Dios.
Si Jehova Dios sarong Katood na perming makakaibanan nindo, saen man kamo. (Salmo 94:14; 145:14, 18) Kaya magdanay na dayupot sa saiya sa pamibi. (Roma 12:12) Tatabangan kamo kaini na isaisip an saindong katuyohan sa buhay bilang lingkod nin Dios. Isinaisip ni Abraham asin Sara an saindang katuyohan kan bayaan ninda an saindang komportableng erokan sa siudad nin Ur. Sa pagkuyog sa pagboot ni Jehova, binayaan ninda an mga katood asin paryentes. (Gibo 7:2-4) Kun pinagparagirumdom asin kinapungawan ninda an lugar na binayaan ninda, nagkaigwa kutana sinda nin oportunidad na bumalik. Pero pinag-aaabot ninda an mas marahay na lugar—sa huri an buhay sa sarong paraisong daga sakop kan langitnon na Kahadean nin Dios.—Hebreo 11:15, 16.
An paghuhulit sa ibang nasyon o kun saen mas dakula an pangangaipo sa saindong sadiring nasyon para sa mga parabalangibog kan Kahadean puwede talagang magin angat. Pero mabungahon asin pinakakapakipakinabang man na gibohon iyan. (Juan 15:8) Asin kun an negatibong mga kaisipan temporaryong makadaog saindo, mapapangganahan an mga iyan paagi sa pagsaisip kan saindong pasohan asin pagtanaw sa enotan. An sarong tugang na misyonera na mayong agom nagsabi: “Kun minaabot sako an kamondoan, pinagmamaigotan kong isipon an dapit sa bagong kinaban asin kun paano magigin sarong pamilya an bilog na katawohan.” An maogmang mga kaisipan na arog kaini puwedeng makatabang saindo na mapagdanay an saindong kagayagayahan asin dai magpadaog sa kapungawan.
[Ritrato sa pahina 29]
An kapungawan dai kinakaipuhan na makaolang sa Kristianong ministeryo