An Paninimbagan Kaiba kan Pakaaram sa Tamang Relihiyon
“Maogma an mga nagdadangog sa tataramon nin Dios asin nag-ootob kaiyan!”—LUCAS 11:28.
1. Oras na mamidbid ninda an tamang relihiyon, anong klase nin mga tawo an nagsesentro kan saindang buhay dian?
BAKO pang igo na mamidbid sana an tamang relihiyon. Kun kita mamomoton sa kun ano an tama asin totoo, oras na manompongan niato iyan, isesentro niato dian an satong buhay. An tunay na relihiyon bako sanang pilosopiya sa isip; iyan dalan nin buhay.—Salmo 119:105; Isaias 2:3; ikomparar an Gibo 9:2.
2, 3. (a) Paano idinoon ni Jesus an halaga kan paggibo kan kabotan nin Dios? (b) Ano an paninimbagan kan gabos na nakakaaram kan tamang relihiyon?
2 Idinoon ni Jesu-Cristo an halaga kan paggibo kan ipinahayag nin Dios na Saiyang kabotan. Sa pagtapos kan namidbid na Sermon sa Bukid, ipinaaram ni Jesus na bakong gabos na minaapod saiya na Kagurangnan (na sa siring naghihingako na mga Kristiano) makalalaog sa Kahadean; kundi idto sanang naggigibo kan kabotan kan saiyang Ama. An iba, an sabi nia, isisikwal bilang “mga paragibo nin katampalasanan.” Taano ta katampalasanan? Huli ta siring sa sinasabi kan Biblia, kasalan an dai pakagibo kan kabotan nin Dios, asin an gabos na kasalan katampalasanan. (Mateo 7:21-23; 1 Juan 3:4; ikomparar an Roma 10:2, 3.) Puwedeng aram nin sarong tawo an tamang relihiyon, puwedeng tinatawan nia nin komendasyon an mga nagtotokdo kaiyan, asin puwedeng inoomaw nia an mga naggigibo kaiyan, alagad igwa man siang paninimbagan na iaplikar iyan sa saiya mismong buhay. (Santiago 4:17) Kun aakoon nia an paninimbagan na iyan, manonompongan nia na an saiyang buhay magigin mas marahay, asin mamamatean nia an kagayagayahan na dai makakamtan sa ibang paagi.
3 Sa sinundan na artikulo, pinag-olayan niato an anom sa nagpapamidbid na mga tanda kan tunay na relihiyon. An kada saro kaiyan bako sanang nagtatabang sato na mamidbid an tamang relihiyon kundi siring man nag-aatubang sato personalmente nin mga angat asin oportunidad. Sa anong paagi?
Ano an Saindong Reaksion sa Tataramon nin Dios?
4. (a) Mantang nagpopoon na makiasosyar sa mga Saksi ni Jehova an mga bagohan, ano tolos an namamasdan ninda manongod sa paggamit kan mga Saksi sa Biblia? (b) Paano an igong pagpapakakan sa espirituwal nakakaapektar sa mga lingkod ni Jehova?
4 Mantang an mga Saksi ni Jehova inaadalan sa Biblia an bagong mga interesado, namamansayan tolos kan dakol sa mga bagohan na ini na an itinotokdo gikan sa Biblia. Bilang simbag sa saindang mga hapot, dai sinda itinotokdo sa mga kredo nin iglesya, sa mga tradisyon nin tawo, o sa mga opinyon nin prominenteng mga tawo. An Tataramon nin Dios mismo an autoridad. Kun minaduman sinda sa Kingdom Hall, namamasdan ninda na dian an Biblia man an pangenot na inaadalan na libro. Dai nahahaloy na marealisar kan sinserong mga naghahanap sa katotoohan na an sarong pangenot na dahelan nin kagayagayahan na saindang naheheling sa tahaw kan mga Saksi ni Jehova iyo an katunayan na sinda igong pinakakakan sa espirituwal gikan sa Tataramon nin Dios.—Isaias 65:13, 14.
5. (a) Anong angat an iinaatubang sa mga nakamamasid sa mga Saksi ni Jehova? (b) Paano sinda makapakikikabtang sa kagayagayahan kan mga Saksi?
5 Kun inaako nindo ini, ano an saindong reaksion dian? Kun nasasabotan nindo iyan, dai kamo puwedeng magin na sanang daing girong na paramasid, ni na bobooton man nindong magin siring. Ipinaheheling kan Biblia na idtong “mga paradangog sana” pero bakong “mga paragibo kan tataramon” ‘dinadaya an saindang sadiri nin putik na pangangatanosan.’ (Santiago 1:22) Dinadaya ninda an saindang sadiri huli ta dai ninda inaako na ano man an tibaad sabihon ninda, an dai ninda pakakuyog sa Dios nagpapaheling na sinda dai talaga namomoot sa saiya. An pagpahayag nin pagtubod na dai sinusuportaran nin mga gibo gadan na pagtubod. (Santiago 2:18-26; 1 Juan 5:3) Sa kabaliktaran, an saro na pinahihiro kan pagkamoot ki Jehova na magin “paragibo kan gibohon” magigin ‘maogma sa paggibo nia kaiyan.’ Iyo, siring sa ipinaliwanag ni Jesu-Cristo, “maogma an mga nagdadangog sa tataramon nin Dios asin nag-ootob kaiyan!”—Santiago 1:25; Lucas 11:28; Juan 13:17.
6. Kun tunay niatong inaapresyar an Tataramon nin Dios, anong mga oportunidad an personal niatong pagmamaigotan na aprobetsaran?
6 An kagayagayahan na iyan mararom mantang kamo nagtatalubo sa kaaraman dapit sa kabotan nin Dios asin nag-aaplikar kan mga nanonodan pa nindo. Guranong paghihingoa an saindong gigibohon sa pag-adal kan Tataramon nin Dios? Manampulong ribong indibiduwal na dai tataong bumasa asin sumurat an nagmaigot nin marhay na makanood nin pagbasa, na ginigibo iyan nangorogna tanganing mabasa ninda an Kasuratan asin ikatokdo iyan sa ibang tawo. An iba minabangon nin amay kada aga tanganing may magamit sindang oras kada aldaw sa pagbasa kan Biblia asin mga pantabang sa pag-adal sa Biblia, arog kan An Torrengbantayan. Mantang personal nindong ginigibo an sunod-sunod na pagbasa kan Biblia o hiniheling an mga tekstong sinitar sa ibang materyal sa pag-adal, maingat na mangnohon an mga ley asin kapagbootan ni Jehova, asin pagmaigotan na masabotan an dakol na prinsipyong yaon dian para sa paggiya sa sato. Maghorophorop dapit sa kun ano an ihinahayag kan kada kabtang manongod sa Dios, sa saiyang katuyohan, asin sa saiyang mga pagtratar sa katawohan. Tawan ini nin panahon na moldehon an saindong puso. Horophoropon kun baga igwa nin mga paagi na mas lubos nindong ikakaaplikar sa saindo mismong buhay an hatol kan Biblia.—Salmo 1:1, 2; 19:7-11; 1 Tesalonica 4:1.
Bilog daw an Saindong Debosyon ki Jehova?
7. (a) Paano an doktrina nin Trinidad nakaimpluwensia sa mga paghihingoa kan mga tawo na sambahon an Dios? (b) Ano an puwedeng mangyari kun aram na nin sarong tawo an katotoohan mapadapit ki Jehova?
7 Para sa minilyon na tawo, nakagiginhawang manodan na an tunay na Dios bakong sarong Trinidad. An paliwanag na “iyan sarong misteryo” nungkang nakapanigo sa sainda. Paano sinda makararani sa sarong Dios na dai nasasabotan? Bilang resulta kan katokdoan na iyan, an nagin tendensia ninda ignorohon an Ama (na an ngaran nungka nindang nadangog sa simbahan) asin sambahon si Jesus bilang Dios o itao an saindang pagsamba ki Maria (na sa pagkatokdo sainda iyo daa an “Ina nin Dios”). Alagad naogma an saindang puso kan an saro sa mga Saksi ni Jehova binuksan an Biblia asin ipinaheling sainda an personal na ngaran nin Dios, an Jehova. (Salmo 83:18) An sarong babaeng taga-Venezuela naogmang gayo kan ipaheling saiya an ngaran nin Dios kaya literal niang kinugos an daragitang Saksi na naghiras sa saiya kan mahalagang marhay na katotoohan na iyan asin uminoyon na magkaigwa nin pag-adal sa Biblia sa harong. Kun nanonodan kan siring na mga tawo na si Jesus nagtataram dapit sa saiyang Ama bilang “sakong Dios asin saindong Dios” asin na inaapod ni Jesus an saiyang Ama na “an iyo sanang tunay na Dios,” narerealisar ninda na an itinotokdo kan Biblia manongod sa Dios bakong dai nasasabotan. (Juan 17:3; 20:17) Kun aram na ninda an mga kuwalidad ni Jehova, namamatean nindang napaparani sinda sa saiya, minapoon na mamibi sa saiya, asin boot na paogmahon sia. Ano an resulta?
8. (a) Huli kan saindang pagkamoot ki Jehova asin kan saindang pagmawot na mapaogma sia, ano an ginibo kan minilyon na tawo? (b) Taano an Kristianong bautismo ta mahalagang marhay?
8 Durante kan nakaaging sampulong taon, 2,528,524 katawo sa anom na kontinente asin sa dakol na isla an nagdusay kan saindang buhay ki Jehova dangan sinimbolisaran an pagdusay na ini paagi sa bautismo sa tubig. Saro daw kamo sa sainda, o kamo daw ngonyan nag-aandam na magpabautismo? An bautismo sarong makahulogan na marhay na pangyayari sa buhay nin lambang tunay na Kristiano. Sinugo ni Jesus an saiyang mga parasunod na gumibo nin mga disipulo sa mga tawo sa gabos na nasyon asin bautismohan sinda. (Mateo 28:19, 20) Mahalaga man na mangnohon na kasunod tolos kan bautismo ni Jesus na si Jehova mismo nagtaram gikan sa kalangitan, na nagsasabing: “Ika an sakuyang Aki, an namomotan; inoyonan taka.”—Lucas 3:21, 22.
9. Tanganing mapagdanay an inooyonan na relasyon ki Jehova, ano an hinahagad sato?
9 An inooyonan na relasyon ki Jehova sarong bagay na dapat pahalagahan nin marhay. Kun kamo luminaog na sa siring na relasyon paagi sa pagdusay asin bautismo, likayan an ano man na makararaot kaiyan. Dai pagtogotan an mga kahaditan sa buhay asin an pagparaisip sa materyal na mga bagay na ipasegunda na sana iyan. (1 Timoteo 6:8-12) Tunay nanggad na mamuhay oyon sa hatol kan Talinhaga 3:6: “Sa gabos mong dalan girumdomon mo [si Jehova], asin itatanos nia an saimong mga dana.”
Gurano Kararom na Nakaaapektar Saindo an Pagkamoot ni Cristo?
10. Taano an pagsamba niato ki Jehova ta dai nagpapangyari sato na dai na intindihon si Jesus?
10 Siyempre, an igong pag-apresyar ki Jehova bilang an iyo sanang tunay na Dios dai nagpapangyari sa sarong tawo na dai na intindihon si Jesu-Cristo. Al kontraryo, an Kapahayagan 19:10 nagsasabi: “An pagpatotoo ki Jesus iyo an nagpapasabong nin paghula.” Poon sa Genesis sagkod sa Kapahayagan, an ipinasabong na mga hula nagtatao nin mga detalye manongod sa kabtang ni Jesu-Cristo sa katuyohan ni Jehova. Mantang naaaraman nin sarong tawo an mga detalyeng iyan, may minalataw na sarong kawiliwiling ladawan na mayo kan biniribid na mga kahulogan asin salang mga pagsabot na bunga kan falsong mga katokdoan kan Kakristianohan.
11. Paano an pakanood sa tunay na itinotokdo kan Biblia manongod sa Aki nin Dios nakaapektar sa sarong babaeng taga-Polandia?
11 An pakasabot sa katotoohan manongod sa Aki nin Dios puwedeng magkaigwa nin hararom na epekto sa sarong tawo. Iyan an nangyari ki Danuta, sarong babaeng taga-Polandia. Nakakaolay nia an mga Saksi ni Jehova sa laog na nin walong taon, nagustohan an saindang mga itinotokdo, alagad dai nia ginigibo an tunay na pagsamba na magin saiyang dalan nin buhay. Dangan nakaresibi sia nin kopya kan librong The Greatest Man Who Ever Lived, na nag-aatubang kan buhay ni Cristo sa paaging madaling masabotan.a Kan matanga na, binuksan nia an libro, na an plano bumasa nin saro sanang kapitulo. Alagad, maagahon na, kan tapos na niang basahon an libro, kan iyan butasan nia. Napaluha nanggad sia. “Jehova, patawada po ako,” an pakiolay nia. Bilang resulta kan saiyang nabasa, nasabotan nia nin mas malinaw kisa kasuarin pa man an pagkamoot na ipinaheling ni Jehova asin kan saiyang Aki. Saiyang narealisar na sa laog nin walong taon sia mayong utang na boot na tuminalikod sa tabang na mapasensiang ipinaaabot saiya nin Dios. Kan 1993 nabautismohan sia bilang simbolo kan saiyang pagdusay ki Jehova basado sa pagtubod ki Jesu-Cristo.
12. Paano an tamang kaaraman dapit ki Jesu-Cristo nakakaapektar sa satong buhay?
12 An “tamang kaaraman kan satong Kagurangnan na Jesu-Cristo” konektado sa pagigin aktibo asin mabungang Kristiano. (2 Pedro 1:8) Sagkod saen kamo makikikabtang sa siring na aktibidad, na ihinihiras sa iba an mensahe kan Kahadean? Kun gurano an kayang gibohon kan mga indibiduwal apektado nin dakol na kamugtakan. (Mateo 13:18-23) May mga kamugtakan na dai niato puwedeng liwaton; an iba puwede. Ano an mamotibar sato na midbidon asin gibohon an mga pagliliwat na puwedeng gibohon? Si apostol Pablo nagsurat: “Pinipirit kami kan pagkamoot ni Cristo”; sa ibang pagtaram, an pagkamoot na ipinaheling nia sa pagtao kan saiyang buhay para sa satong kapakanan nangongorog na marhay kaya mantang nagtatalubo an satong apresasyon dian, an sato mismong puso mapahihiro sagkod sa kairairaromi. Bilang resulta, narerealisar niato na bako nanggad maninigo na kita padagos sa pag-aabot sa paslong mga pasohan asin namumuhay na puro na sana pagpanigo sa sadiri. Imbes, satong liniliwat an satong mga aktibidad tanganing enoton an gibohon na itinokdo ni Cristo na gibohon kan saiyang mga disipulo.—2 Corinto 5:14, 15.
Siblag sa Kinaban—Sagkod Saen?
13. Taano ta maninigo na habo niatong magkaigwa nin kabtang sa sarong relihiyon na ginibo an sadiri na kabtang kan kinaban?
13 Bakong depisil na maheling an rekord na ginibo kan Kakristianohan asin iba pang relihiyon huli ta gusto nindang magin kabtang kan kinaban. An mga pondo nin iglesya ginamit sa pagsustento sa rebolusyonaryong aktibidad. May mga padi na nagin mga gerilya. Aroaldaw, an mga diaryo nagtatampok nin mga bareta manongod sa relihiyosong mga grupo sa laen-laen na parte kan daga na nagraralabanlaban. An saindang mga kamot nagtuturo nin dugo. (Isaias 1:15) Asin sa bilog na kinaban an klero padagos na naghihingoang kontrolon an mga aktibidad sa politika. An tunay na mga parasamba mayong kabtang digdi.—Santiago 4:1-4.
14. (a) Ano an dapat niatong personal na likayan kun gusto niatong magdanay na siblag sa kinaban? (b) Ano an makatatabang sato na malikayan an pagkasiod sa kinabanon na mga ugale asin gibo?
14 Alagad an pagigin siblag sa kinaban labi pa dian an kalabot. An kinaban midbid sa pagkamoot sa kuwarta asin sa nababakal nin kuwarta, pagmawot nin personal na kabantogan, asin daing ontok na paghanap nin kasingawan, kaiba an mga bagay na arog baga kan kadaihan nin pagmakolog sa iba, pagputik asin mapan-insultong pananaram, pagrebelde tumang sa autoridad, asin dai pakapogol sa sadiri. (2 Timoteo 3:2-5; 1 Juan 2:15, 16) Dahelan sa sato mismong pagkabakong sangkap, kita kun beses sa sarong paagi tibaad nagpapaheling nin pira sa mga ugaleng iyan. Ano an makatatabang sato sa paghihingoa niatong likayan an siring na mga siod? Dapat niatong girumdomon kun siisay an nasa likod kan gabos na iyan. “An bilog na kinaban namumugtak sa kapangyarihan kan maraot.” (1 Juan 5:19) Gurano man kanakaaakit an sarong dalan, gurano man kadakol kan ibang tawo na namumuhay sa paaging iyan, kun satong naheheling na an pangenot na kaiwal ni Jehova, si Satanas na Diablo, an nasa likod kaiyan, narerealisar niato kun gurano talaga kakanos kaiyan.—Salmo 97:10.
Sagkod Saen an Saindong Pagkamoot?
15. Paano an daing kapasloan na pagkamoot na namasdan nindo nakatabang saindo na mamidbid an tamang relihiyon?
15 Kan enot na kamo nagpoon na makiasosyar sa mga Saksi ni Jehova, an pagkamoot na naheheling sa sainda daing duwa-duwa na nakaakit sa saindo huli ta kabaliktaran iyan sa espiritu kan kinaban. An pagdodoon sa daing kapasloan na pagkamoot ilinalaen an dalisay na pagsamba ki Jehova sa gabos na iba pang porma nin pagsamba. Puwedeng ini an nakakombensir saindo na an mga Saksi ni Jehova tunay nanggad na naggigibo kan tamang relihiyon. Si Jesu-Cristo mismo nagsabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.”—Juan 13:35.
16. Ano an mga oportunidad na kita bilang mga indibiduwal puwedeng humiwas sa satong pagkamoot?
16 An kuwalidad daw na iyan nagpapamidbid man saindo na saro sa mga disipulo ni Cristo? May mga paagi daw na puwede pa kamong humiwas sa pagpaheling nin pagkamoot? Mayong duda na kita gabos puwede. Iyan bako sanang pagigin makikatood sa iba sa Kingdom Hall. Asin kun kita mamomoot sana sa mga namomoot sa sato, ano an kalaenan niato sa kinaban? “Orog sa gabos, magkaigwa nin makosog na pagkamoot sa lambang saro,” an sadol kan Biblia. (1 Pedro 4:8) Kiisay kita puwedeng magpaheling nin orog na pagkamoot? Sa saro daw na Kristianong tugang na lalaki o babae na an pinaghalean laen kan sa sato asin na an paagi nin paggibo sa pirang bagay ikinauuyam niato? Sa saro daw na, bilang resulta nin helang o kagurangan, dai na nakakaatender nin regular sa mga pagtiripon? Sa sato daw na agom? O tibaad, sa satong naggugurang nang mga magurang? An iba na marahay man sa pagpaheling kan mga bunga kan espiritu, kabale an pagkamoot, nakamateng garo baga nagpopoon na naman sindang manodan ini kan sinda mapaatubang sa masakiton na mga situwasyon na puwedeng lumataw sa pagtao nin haros gabos na pag-ataman sa sarong miembro nin pamilya na grabe an pagkabaldado. Siyempre, dawa napapaatubang sa mga kamugtakan na ini, an satong pagkamoot maninigo na makaabot man sagkod sa luwas kan satong sadiring pamilya.
Pagpapatotoo sa Kahadean—Gurano Kaimportante Saindo?
17. Kun kita personal na nakinabang sa mga pagsongko kan mga Saksi ni Jehova, kita maninigo ngonyan na mapahirong gibohon an ano?
17 An sarong importanteng paagi na ipinaheheling niato an pagkamoot sa satong mga kapwa tawo iyo an pagpapatotoo sa sainda manongod sa Kahadean nin Dios. Sasaro sanang grupo nin mga tawo an naggigibo kan gibohon na ini na ihinula ni Jesus. (Marcos 13:10) Sinda an mga Saksi ni Jehova. Kita personal na nakinabang kaiyan. Ngonyan pribilehiyo niato na tabangan an iba. Kun an pagmansay niato sa bagay kapareho kan sa Dios, an gibohon na ini magigin pangenot sa satong buhay.
18. Paano an satong pagbasa kan librong Jehovah’s Witnesses—Proclaimers of God’s Kingdom puwedeng makaimpluwensia sa sato mismong pakikikabtang sa pagpapatotoo sa Kahadean?
18 An nakaoogmang tala kun paano an mensahe kan Kahadean ikinapaabot sa pinakaharayong mga parte kan daga durante kaining huring mga aldaw isinasaysay sa librong Jehovah’s Witnesses—Proclaimers of God’s Kingdom. Kun tatao kamo nin Ingles, basahon nanggad iyan. Asin mantang ginigibo nindo iyan, mangnohon nin marhay an gabos na paagi na an mga indibiduwal nakikabtang sa pagtao nin patotoo dapit sa Kahadean. May nagkapira daw na puwede nindong arogon an saindang halimbawa? Kadakol kan oportunidad na bukas sa sato gabos. An sato logod na pagkamoot ki Jehova magpahiro sato na gamiton iyan nin marahay.
19. Paano kita nakikinabang kun inaako niato an paninimbagan na kaiba kan pakaaram sa tamang relihiyon?
19 Kaya kun kita nagmamahigos sa paggibo kan kabotan ni Jehova, satong nanonompongan an simbag sa hapot na, Ano an kahulogan nin buhay? (Kapahayagan 4:11) Dai na kita nagkakapkap, na nakamamateng mayong halaga. Mayo nang karera na puwede nindong pagdusayan kan saindong sadiri na magtatao nin orog na pagkakontento kisa sa itatao kan bilog na pusong pagmamahigos nindo sa paglilingkod ki Jehova Dios. Asin kanigoan kamamuraway na ngapit an itinatagama kaiyan! Sarong nakakokontentong buhay na daing sagkod sa saiyang bagong kinaban, kun saen lubos niatong magagamit an satong mga kakayahan kaoyon kan mamomoton na katuyohan sa paglalang nin Dios sa katawohan.
[Nota sa Ibaba]
a Ipinublikar kan Watchtower Bible and Tract Society of New York, Inc.
Paano Nindo Sisimbagon?
◻ Taano ta mahalaga sa sarong relihiyon na akoon an Biblia bilang Tataramon nin Dios asin tawan nin onra si Jehova bilang an tunay na Dios?
◻ Ano an itinotokdo kan tunay na relihiyon manongod sa kabtang ni Jesus bilang Paratubos?
◻ Taano an mga Kristiano ta maninigong magdanay na siblag sa kinaban asin gumibo nin daing kapasloan na pagkamoot?
◻ Ano an kabtang kan pagpapatotoo sa Kahadean sa tamang relihiyon?
[Mga ritrato sa pahina 16]
An bautismo sarong mahalagang aksion sa pag-ako kan mga paninimbagan kan tunay na pagsamba. Kada bulan, mga 25,000 sa bilog na kinaban an naggigibo kan aksion na iyan
Rusia
Senegal
Papua New Guinea
E.U.A.
[Mga ritrato sa pahina 17]
An paghiras sa iba kan katotoohan sa Biblia kabtang kan tunay na pagsamba
E.U.A.
E.U.A.
Brazil
Hong Kong