Sa Arin na Lamesa Kamo Nagkakakan?

“Dai kamo puwedeng makikakan sa ‘lamesa ni Jehova’ asin sa lamesa nin mga demonyo.”​—1 CORINTO 10:21.

1. Anong mga lamesa an nakapuwesto sa atubangan niato, asin anong patanid an itinao ni apostol Pablo manongod sa mga iyan?

AN IPINASABONG na mga tataramon na ini ni apostol Pablo nagpapaheling na duwang piguratibong lamesa an nakapuwesto sa atubangan nin katawohan. An kada lamesa namimidbid sa klase nin simbolikong kakanon na ipinuwesto dian, asin kita gabos nagkakakan sa saro o sa saro. Alagad, kun boot niatong paogmahon an Dios, dai kita puwedeng magkakan sa saiyang lamesa asin kadungan kaiyan puwedeng magnamit sa lamesa nin mga demonyo. Si apostol Pablo nagpatanid: “An mga bagay na iinatang kan mga nasyon iinaatang ninda sa mga demonyo, asin bakong sa Dios; asin habo ko na kamo makisumaro sa mga demonyo. Dai kamo puwedeng uminom sa kopa ni Jehova asin sa kopa nin mga demonyo; dai kamo puwedeng makikakan sa ‘lamesa ni Jehova’ asin sa lamesa nin mga demonyo.”​—1 Corinto 10:​20, 21.

2. (a) Anong lamesa ni Jehova an nag-eksister sa mga aldaw kan suanoy na Israel, asin siisay an nakikabtang sa mga atang sa katoninongan? (b) Ano an kahulogan ngonyan kan pakikikakan sa lamesa ni Jehova?

² An mga tataramon ni Pablo nagpapagirumdom sa sato kan mga atang sa katoninongan na idinolot kan suanoy na mga Israelita sa irarom kan Pagboot ni Jehova. An altar nin Dios inapod na lamesa, asin an saro na nagdadara kan hayop na iaatang sinasabi na igwa nin pakikipagkatoninongan ki Jehova asin sa mga saserdote. Paano? Enot, si Jehova nakikabtang sa atang huli ta an dugo iwinirik sa saiyang altar asin an taba sinolo kan kalayo sa irarom. Ikaduwa, an saserdote nakikabtang ta sia (asin an saiyang pamilya) nagkakan kan inasal na daghan asin toong tabay kan iinatang na hayop. Asin ikatolo, an paraatang nakikabtang paagi sa pagkakan kan ibang parte kaiyan. (Levitico 7:​11-36) Ngonyan, an pakikikakan sa lamesa ni Jehova nangangahulogan na itao niato saiya an klase nin pagsamba na hinahagad nia, siring kan ipinaghalimbawa ni Jesus asin kan saiyang mga apostol. Tanganing magibo ini, kaipuhan tang kumakan sa espirituwal kan itinatao ni Jehova paagi sa saiyang Tataramon asin organisasyon. An mga Israelita, na nagkamit nin espesyal na pakikipagkatoninongan ki Jehova sa saiyang lamesa, pinangaladan na magdolot nin mga atang sa mga demonyo sa saindang lamesa. An espirituwal na mga Israelita asin an kairiba nindang “ibang karnero” sakop kan iyo man sanang pangangalad nin Dios.​—Juan 10:16.

3. Paano an saro magkakasala sa pakikikakan sa lamesa nin mga demonyo sa satong aldaw?

³ Paano an saro puwedeng magkasala nin pakikikakan sa lamesa nin mga demonyo sa satong aldaw? Paagi sa paglilingkod sa mga interes nin ano man na tumang ki Jehova. An lamesa nin mga demonyo kabale an gabos na propaganda nin demonyo, dinisenyo tanganing dayaon asin patalikodon kita ki Jehova. Siisay an boot na pakakanon an saiyang puso asin isip kan siring na hilo? An tunay na mga Kristiano nagsasayumang makikabtang sa mga atang na idinodolot kan kadaklan na tawo ngonyan sa mga dios nin guerra asin sa kayamanan.​—Mateo 6:24.

Paglikay sa “Lamesa nin mga Demonyo”

4. Anong hapot an napapaatubang sa sato gabos, asin taano ta habo niatong may pakaaram na makikakan sa lamesa nin mga demonyo?

⁴ An hapot na napapaatubang sa sato gabos, Sa arin na lamesa ako nagkakakan? Dai niato madudulagan an bagay na obligado kitang magkakan sa sarong lamesa o sa saro. (Ikomparar an Mateo 12:30.) Habo ta na may pakaaram na makikakan sa lamesa nin mga demonyo. An paggibo kaiyan makakawara sato kan pag-oyon kan iyo sanang tunay asin nabubuhay na Dios, si Jehova. Sa ibong na lado, an pakikikakan sa kakanon na nasa lamesa sana ni Jehova minagiya sa satong buhay na daing katapusan sa kaogmahan! (Juan 17:3) May kasabihan na an salud nin tawo depende sa saiyang kinakakan. Kun siring, an siisay man na boot na magdanay an marahay na pisikal asin mental na salud dapat na maanan an saiyang pagkakan. Kun paanong an matataba asin mayong sustansiang kakanon, minsan ngani masiram an pagkaandam na may idinugang na mga kemikal, dai nakakakontribuwir sa satong padagos na pisikal na salud, kaya an propaganda kan kinaban na ini na pinagayon nin mga ideya nin demonyo raot na piguratibong mayong sustansiang kakanon na makakaraot sa satong isip.

5. Paano kita makalilikay sa pagkakan nin mga katokdoan nin mga demonyo ngonyan?

⁵ Si apostol Pablo naghula na durante kan huring mga aldaw, an mga tawo magkakaralagalag kan “katokdoan nin mga demonyo.” (1 Timoteo 4:1) Bako sana na an siring na katokdoan nin mga demonyo manonompongan sa falsong relihiyosong mga paniniwala kundi iyan mahiwas na ipinalalakop man sa ibang paagi. Halimbawa, kaipuhan niatong analisaron asin timbangon kun anong mga libro asin magasin an binabasa niato asin kan satong mga aki, kun anong mga programa sa telebisyon an satuyang dinadalan, asin kun anong mga pasale sa teatro asin pelikula an satong hiniheling. (Talinhaga 14:15) Kun para sa pag-aling-aling nagbabasa kita nin eroestorya, iyan daw nagtatampok nin mayong kamanungdanan na kadahasan, ipinagbabawal na sekso, o mga gibo nin okulto? Kun kita nagbabasa nin totoong estorya tanganing matokdoan, iyan daw nagpapaliwanag nin sarong pilosopiya o dalan nin buhay na “bakong sono ki Cristo”? (Colosas 2:8) Iinaatubang daw an basang na mga pagbanabana, o sinusuportaran daw an pakikilabot sa kinabanon na sosyal na mga mobimiento? Pinakokosog daw kaiyan an determinasyon na magin mayamanon? (1 Timoteo 6:9) Iyan daw publikasyon na tusong nag-aatubang nin nakakabangang mga katokdoan na bakong arog-Cristo? Kun an simbag iyo asin padagos kitang nagbabasa o nagheheling kan materyal na iyan, namemeligro kita sa pagkakan sa lamesa nin mga demonyo. Ngonyan, igwa nin ginatos na ribong publikasyon na nagpapalakop nin kinabanon na mga pilosopiya na garo baga nakapagtotokdo asin inaako kan kadaklan. (Eclesiastes 12:12) Pero mayo sa propagandang ini an talagang bago; ni na iyan epektibo para sa kapakinabangan asin ikararahay nin saro, siring man sana sa mapandayang sinabi ni Satanas ki Eva na dai nagin epektibo para sa saiyang ikararahay.​—2 Corinto 11:3.

6. Kun iniimbitaran kita ni Satanas na namitan an saiyang mayong sustansiang kakanon na sa demonyo, paano kita garo baga maninigong sumimbag?

⁶ Kun siring, kun iniimbitaran kita ni Satanas na namitan an saiyang mayong sustansiang kakanon na sa demonyo, paano kita maninigong sumimbag? Siring kan ginibo ni Jesus kan sia sugotan ni Satanas na gibohon na tinapay an mga gapo. Si Jesus nagsimbag: “Nasusurat, ‘An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.’” Asin kan alokon si Jesus kan Diablo kan “gabos na kahadean kan kinaban asin an kamurawayan kan mga iyan” kun sia mahuruhod asin magibo nin sarong akto nin pagsamba ki Satanas, si Jesus nagsimbag: “Humale ka, Satanas! Huli ta nasusurat, ‘Ika magsamba ki Jehova na saimong Dios, asin sa saiya ka sana magtao nin banal na paglilingkod.’”​—Mateo 4:​3, 4, 8-10.

7. Taano ta dinadaya ta an satong sadiri kun iniisip niato na puwede kitang mapangganang kumakan kapwa sa lamesa ni Jehova asin sa lamesa nin mga demonyo?

⁷ An lamesa ni Jehova asin an lamesa na ipinuwesto kan saiyang mga kaiwal na demonyo nungkang mapag-ooyon! Ata, iyo, prinobaran na iyan kaidto. Girumdoma an suanoy na mga Israelita kan mga aldaw kan propetang si Elias. Naghingako an banwaan na nagsasamba ki Jehova, alagad naniwala sinda na an ibang dios, arog baga ki Baal, nanuga nin pag-asenso. Dinolok ni Elias an banwaan asin nagsabi: “Sagkod noarin kamo mag-uurong-sulong sa duwang magkalaen na opinyon? Kun si Jehova an tunay na Dios, sumunod kamo sa saiya; alagad kun si Baal, sumunod kamo sa saiya.” Dai maninigaran, an mga Israelita nag-urong-sulong “enot sa sarong bitis dangan sa saro.” (1 Hade 18:21; The Jerusalem Bible) Inangat ni Elias an mga saserdote ni Baal na patunayan an pagka-Dios kan saindang dios. An Dios na makakapahilig nin kalayo hale sa langit duman sa atang magpapatunay na iyo an tunay na Dios. Sa ibong nin dakol na paghihingoa, nasudya an mga saserdote ni Baal. Dangan namibi sana si Elias: “O Jehova, simbaga ako, tanganing an banwaan na ini mamidbid na ika, Jehova, iyo an tunay na Dios.” Tolos-tolos an kalayo hale ki Jehova huminilig hale sa langit asin sinolo an ilinugom sa tubig na atang na hayop. Napahiro kan nakakakombensir na pagpaheling kan pagka-Dios ni Jehova, kinuyog kan banwaan si Elias asin ginadan gabos an 450 propeta ni Baal. (1 Hade 18:​24-40) Kaya ngonyan, kaipuhan na midbidon niato si Jehova bilang an tunay na Dios asin desididong bumirik sa pagkakan sa saiya sanang lamesa kun dai pa kita nakagigibo kaiyan.

‘An Maimbod na Oripon’ Nagpupuwesto sa Lamesa ni Jehova

8. Anong oripon an ihinula ni Jesus na gagamiton nia sa espirituwal na pagpapakakan sa saiyang mga disipulo durante kan saiyang presensia, asin siisay an oripon?

⁸ An Kagurangnan na Jesu-Cristo naghula na durante kan saiyang presensia an sarong “maimbod asin madonong na oripon” magtatao nin espirituwal na kakanon para sa saiyang mga disipulo: “Maogma an oripon na iyan kun sa pagdatong kan saiyang kagurangnan makua siang naggigibo nin siring. Sa katotoohan sinasabi ko sa saindo, Paniniwalaan nia sia kan gabos niang rogaring.” (Mateo 24:​45-47) An oripon na ini napatunayan na, bakong sasarong indibiduwal, kundi grupo nin nagdusay, linahidan na mga Kristiano. An grupong ini ipinuwesto sa lamesa ni Jehova an pinakamarahay na espirituwal na kakanon kapwa para sa linahidan na natatada asin sa “dakulang kadaklan.” Labi nang apat na milyon ngonyan an bilang, an dakulang kadaklan nanindogan kaiba kan linahidan na natatada para sa unibersal na soberaniya ni Jehova Dios asin para sa saiyang Kahadean na paagi kaiyan papakangbanalon nia an saiyang banal na ngaran.​—Kapahayagan 7:​9-17.

9. Anong instrumento an ginagamit kan grupong oripon sa pagtao nin espirituwal na kakanon para sa mga Saksi ni Jehova, asin paano an saindang espirituwal na bangkete makahulang ilinadawan?

⁹ An grupong maimbod na oripon na ini ginagamit an Watch Tower Bible and Tract Society sa pagtao nin espirituwal na kakanon para sa gabos na Saksi ni Jehova. Mantang an Kakristianohan asin an ibang kabtang kaining palakaw nin mga bagay nagugutom huli sa kadaihan nin nagtataong-buhay na espirituwal na kakanon, an banwaan ni Jehova nagbabangkete. (Amos 8:11) Ini bilang kaotoban kan hula sa Isaias 25:6: “Si Jehova kan mga hukbo magibo para sa gabos na banwaan, sa bukid na ini, nin bangkete nin matatabang putahe, bangkete nin arak na laon, nin matatabang putahe na pano nin hotok, nin arak na laon, sinara.” Arog kan ipinaheheling kan bersikulo 7 asin 8, an bangketeng ini magpapadagos nin daing katapusan. Kanigoan na bendisyon iyan para sa gabos na nasa naheheling na organisasyon ni Jehova ngonyan, asin kanigoan na bendisyon na iyan magpapadagos sa ngapit!

Mag-ingat sa Nakakahilong Kakanon sa Lamesa nin mga Demonyo

10. (a) Anong klaseng kakanon an itinatao kan maraot na grupong oripon, asin ano an nagmomotibar sainda? (b) Paano tinatratar kan maraot na grupong oripon an saindang dating mga kapwa oripon?

¹⁰ Nakakahilo an kakanon sa lamesa nin mga demonyo. Halimbawa, horophoropa an kakanon na itinatao kan maraot na grupong oripon asin kan mga apostata. Iyan bakong masustansia o dai nakakapakosog; iyan bakong marahay sa salud. Dai magigin siring, huli ta an mga apostata nagpondo na sa pagkakan sa lamesa ni Jehova. Bilang resulta, nawara na an ano man na saindang napatalubo sa bagong personalidad. An nakakamotibar sa sainda, bakong an banal na espiritu, kundi an grabeng kaongisan. Bangkag sinda sa saro sanang katuyohan​—an pangongolog sa saindang dating mga kapwa oripon, arog kan ihinula ni Jesus.​—Mateo 24:​48, 49.

11. Ano an isinurat ni C. T. Russell manongod sa pagpili nin espirituwal na kakanon nin saro, asin paano nia ilinadawan an mga buminaya sa lamesa ni Jehova?

¹¹ Halimbawa, kaidto pang 1909, an presidente kaidto kan Watch Tower Society, si C. T. Russell, nagsurat dapit sa mga tuminalikod sa lamesa ni Jehova dangan nagpoon na abusohon an saindang dating mga kapwa oripon. An The Watch Tower na Oktubre 1, 1909, nagsabi: “An gabos na suminuhay sa Sosyedad asin sa gibohon kaiyan, imbes na paoswagon an saindang sadiri o pakosogon an iba sa pagtubod asin sa mga bunga kan espiritu, garo baga ginigibo an kabaliktaran​—nagpoprobar na mangolog sa Dahelan na pinaglingkodan ninda kaidto, asin, kisuerra nakakakuang atension, luway-luway na puminasiring sa pagkalingaw, na dinadanyaran an sainda man sanang sadiri asin an iba na igwa nin kaparehong parapakiiwal na espiritu. . . . Kun hinohona nin iba na makakakua sinda nin siring karahay o mas marahay na kakanon sa ibang lamesa, o na makakaprodusir sinda mismo nin siring karahay o mas marahay​—pabayaan an mga ini sa saindang dalan. . . . Pero mantang pinababayaan niato an iba kun magduman saen man sa paghanap nin kakanon asin liwanag para sa ikaoogma ninda, nakakukubhan na sabihon, an mga nagin kaiwal niato laen na gayo an ginigibo. Imbes na sabihon sa magalang na kaisipan kan kinaban, ‘Nanompongan ko na an sarong bagay na gusto ko; paaram!’ an mga ini nagpapaheling nin kaanggotan, malisya, kaongisan, iriwal, ‘mga gibo kan laman asin kan diablo’ siring sa nungkang naaraman tang ipinaheheling nin kinabanon na mga tawo. Garo baga binakunahan sinda nin karungawan, Satanikong phobia sa tubig [rabies]. An iba sa sainda inaatake kita dangan nagsasabing kita an nag-atake. Andam sindang magtaram asin magsurat nin daing kuwentang mga kaputikan asin ibaba an sadiri sa paggibo nin karingisan.”

12. (a) Paano kinokolgan kan mga apostata an saindang mga kapwa oripon? (b) Taano ta peligroso na huli sa pag-usyoso kumakan sa mga isinurat kan mga apostata?

¹² Iyo, an mga apostata nagpupublikar nin literatura na naggagamit nin mga pagbiribid, may diit na katotoohan, asin biyong kaputikan. Nagpipiket pa ngani sinda sa mga kombension kan mga Saksi, na pinoprobaran na siodon an daing pakaaram. Kun siring, magigin peligrosong bagay na togotan an satong pag-usyoso na pahiroon kita na kumakan nin siring na mga isinurat o maghinanyog sa saindang mapan-abusong pananaram! Mantang dai ta iniisip iyan na sarong peligro para sa sato personalmente, an peligro nagdadanay. Taano? Enot, an ibang literatura kan mga apostata nag-aatubang nin mga kaputikan paagi sa “magagayon na tataramon” asin “mga tataramon na putik.” (Roma 16:​17, 18; 2 Pedro 2:3) Ano an malalaoman nindo sa lamesa nin mga demonyo? Asin minsan ngani an mga apostata puwedeng mag-atubang man nin mga katunayan, an mga ini parateng kinua na mayo sa konteksto na an pasohan kuanon an iba parayo sa lamesa ni Jehova. An gabos sa saindang isinurat nagtatatsar sana asin nagpapaluya! Mayo nin nakakapakosog.

13, 14. Ano an mga ibinubunga kan mga apostata asin kan saindang propaganda?

¹³ Nagsabi si Jesus: “Paagi sa saindang mga bunga mamimidbid nindo sinda.” (Mateo 7:16) Ano, ngonyan, an mga ibinubunga kan mga apostata asin kan saindang mga publikasyon? Apat na bagay an nagtatanda kan saindang propaganda. (1) Katusohan. An Efeso 4:14 nagsasabi na sinda ‘tuso sa pagpakana nin karatan.’ (2) Mapalangkaw na intelihensia. (3) Kadaihan nin pagkamoot. (4) Manlaenlaen na porma nin pagkabakong sadiosan. Iyo ini an mismong mga rikado kan kakanon na nasa lamesa nin mga demonyo, na an gabos kaiyan dinisenyo tanganing paluyahon an pagtubod kan banwaan ni Jehova.

¹⁴ Asin igwa nin saro pang bagay. Sa ano nagbalik an mga apostata? Sa dakol na situwasyon, sinda luminaog giraray sa kadikloman nin Kakristianohan asin sa mga doktrina kaiyan, siring baga kan paniniwala na an gabos na Kristiano paduman sa langit. Saro pa, an kadaklan dai na nangangapot nin marigon sa Makakasuratan na paninindogan manongod sa dugo, neutralidad, asin sa pangangaipo na magpatotoo dapit sa Kahadean nin Dios. Alagad kita nakadulag na sa kadikloman kan Dakulang Babilonya, asin nungkang boot niatong bumalik dian. (Kapahayagan 18:2, 4) Bilang maimbod na mga lingkod ni Jehova, taano ta boot pa niatong magsalimbad sa propaganda na ilinuwas kan mga nagsisikwal na ini sa lamesa ni Jehova na ngonyan nangongolog paagi sa tataramon sa mga nagtatabang sa sato na kumakan nin “marahay na mga tataramon”?​—2 Timoteo 1:13.

15. Anong prinsipyo sa Biblia an nakakatabang sa sato na humiro na may kadonongan kun nakakadangog kita nin mga sahot na ginigibo nin mga apostata?

¹⁵ An iba tibaad magin mapag-usyoso manongod sa mga sahot na ginigibo kan mga apostata. Alagad maninigo niatong isapuso an prinsipyo sa Deuteronomio 12:​30, 31. Digdi pinatanidan ni Jehova an mga Israelita paagi ki Moises dapit sa kun ano an dapat likayan oras na bawion ninda an Dagang Panuga sa paganong mga nag-eerok. “Mag-ingat kamo ta tibaad masiod kamo ninda, pakaparaa sa sainda sa atubangan nindo, asin ta tibaad maghapot kamo manongod sa saindang mga dios, na nagsasabing, ‘Paano na an mga nasyon na ini naglilingkod sa saindang mga dios? Asin ako, iyo, ako, magibo man nin siring.’ Dai mo paggibohon an siring ki Jehova na saimong Dios.” Iyo, si Jehova Dios nakakaaram kun paano minaaser an pag-usyoso nin tawo. Girumdoma si Eva, asin man an agom ni Lot! (Lucas 17:32; 1 Timoteo 2:14) Nungka kitang maghinanyog sa mga sinasabi o ginigibo kan mga apostata. Imbes, magin sibot kita sa pagpapakosog sa mga tawo asin sa maimbod na pagkakan sa lamesa ni Jehova!

Solamente an Lamesa ni Jehova an Magdadanay

16. (a) Ano an sa dai na mahahaloy mangyayari ki Satanas, sa saiyang mga demonyo, asin sa piguratibong lamesa na dian an mga nasyon sa kinaban nagkakakan? (b) Ano an mangyayari sa gabos na tawo na padagos na nagkakakan sa lamesa nin mga demonyo?

¹⁶ Dai na mahahaloy, an dakulang kahorasaan bigla na sanang maabot, na marikas na mapasiring sa kulminasyon sa “dakulang aldaw nin Dios na Makakamhan sa gabos.” (Kapahayagan 16:​14, 16) Maabot iyan sa kulminasyon mantang linalaglag ni Jehova an palakaw na ini nin mga bagay asin an piguratibong lamesa na kinakakanan kan mga nasyon sa kinaban. Dadaogon man ni Jehova an bilog na dai naheheling na organisasyon ni Satanas na Diablo kaiba an grupo nin mga demonyo kaiyan. An mga nagpadagos na magkakan sa espirituwal na lamesa ni Satanas, an lamesa nin mga demonyo, mapipiritan na umatender sa literal na pagkakan, bako, bakong bilang mga parakakan, kundi bilang pinakaputahe​—sa saindang kalaglagan!​—Helingon an Ezequiel 39:4; Kapahayagan 19:​17, 18.

17. Anong mga bendisyon an maabot sa mga esklusibong nagkakakan sa lamesa ni Jehova?

¹⁷ Solamente an lamesa ni Jehova an magdadanay. An mga nagpapahalaga sa pagkakan dian magdadanay asin magkakapribilehiyo na kumakan dian sagkod lamang. Nungkang manhuhuma giraray sainda an mga kakulangan sa pagkakan. (Salmo 67:6; 72:16) Sa sangkap na salud maglilingkod sinda ki Jehova Dios sa Paraiso! Sa katapustapusi an nakakapahirong mga tataramon sa Kapahayagan 21:4 makangangalas na maootob: “Papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” Huling an pagtumang bagay na nakalihis na, an unibersal na soberaniya ni Jehova Dios magigin mapanggana sa gabos na lugar sagkod lamang mantang ibinububo an daing katapusan na pag-oyon nin Dios sa kinaldang katawohan na nag-eerok sa Paraisong daga. Tanganing makamtan an balos na ini, kita gabos logod magin determinado na esklusibong kumakan sa lamesa ni Jehova, na naglilipwas nin pinakamarahay na espirituwal na kakanon!

Paano Nindo Sisimbagon?

◻ Paano niato malilikayan na madaya kan mga katokdoan nin mga demonyo?

◻ Taano ta dai kita puwedeng mapangganang magkakan kapwa sa lamesa ni Jehova asin sa lamesa nin mga demonyo?

◻ Anong klaseng kakanon an itinatao kan mga apostata?

◻ Taano ta peligroso na magin mapag-usyoso dapit sa mga sahot nin mga apostata?

◻ Ano an mga ibinubunga kan mga apostata?

[Ritrato sa pahina 10]

An lamesa ni Jehova naglilipwas nin pinakamarahay na espirituwal na kakanon