Magayagayang Pagpasakop sa Autoridad
“Kamo nagin makinuyog gikan sa puso.”—ROMA 6:17.
1, 2. (a) Anong espiritu an maririsa sa kinaban ngonyan, asin ano an gikanan asin mga epekto kaiyan? (b) Paano ipinaheheling kan dusay na mga lingkod ni Jehova na sinda napapalaen?
“AN ESPIRITU na naghihiro ngonyan sa mga aki nin kasumbikalan” nakakukubhan nanggad na maririsa ngonyan. Iyan an espiritu nin dai nakokontrol na independensia, na naggigikan ki Satanas, “an poon kan autoridad kan doros.” An espiritung ini, an “doros” na ini, o an lataw na ugale nin kapasloan asin kasumbikalan, igwang “autoridad,” o kapangyarihan, sa kadaklan kan katawohan. Ini sarong dahelan kun taano an kinaban ta nag-aagi sa inaapod na krisis sa autoridad.—Efeso 2:2.
2 Makaoogma, an dusay na mga lingkod ni Jehova ngonyan dai pinapano an saindang espirituwal na pulmon kaining maating “doros,” o espiritu nin pagrebelde. Aram ninda na “an kaanggotan nin Dios maabot sa mga aki nin kasumbikalan.” Dagdag pa ni apostol Pablo: “Kaya dai kamo makikabtang sa sainda.” (Efeso 5:6, 7) Imbes, an tunay na mga Kristiano nagmamaigot na “mapano nin espiritu [ni Jehova],” asin minainom sinda sa “kadonongan hale sa itaas,” na “malinig, dangan matoninong, makatanosan, andam na magkuyog.”—Efeso 5:17, 18; Santiago 3:17.
Boluntad na Pagpasakop sa Soberaniya ni Jehova
3. Ano an liyabe sa boluntad na pagpasakop, asin anong dakulang leksion an itinotokdo sato kan kasaysayan?
3 An liyabe sa boluntad na pagpasakop iyo an pagmidbid sa lehitimong autoridad. An kasaysayan nin katawohan nagpapaheling na an pagsikwal sa soberaniya ni Jehova dai nagtatao nin kaogmahan. An siring na pagsikwal dai nagtao nin kaogmahan ki Adan asin Eva, ni sa nagsutsut kan saindang pagrebelde, si Satanas na Diablo. (Genesis 3:16-19) Sa saiyang ibinabang kamugtakan sa presente, si Satanas may “dakulang kaanggotan” huli ta aram nia na halipot na sana an saiyang panahon. (Kapahayagan 12:12) An katoninongan asin kaogmahan kan katawohan, iyo, kan bilog na uniberso, minadepende sa unibersal na pagmidbid sa matanos na soberaniya ni Jehova.—Salmo 103:19-22.
4. (a) Anong klaseng pagpasakop asin pagkuyog an boot ni Jehova na ipaheling kan saiyang mga lingkod? (b) Sa ano kita maninigo na kombensido, asin paano iyan ipinahahayag kan salmista?
4 Minsan siring, huli kan saiyang makangangalas an pagkatimbang na mga kuwalidad, si Jehova dai naninigoan sa matamlay na pagkuyog. Sia makapangyarihan, iyo nanggad! Pero bako siang maisog. Sia Dios nin pagkamoot, asin boot nia na an saiyang intelihenteng mga linalang boluntad na magkuyog sa saiya, huli sa pagkamoot. Boot nia na sinda magpasakop sa saiyang soberaniya huli ta bilog na puso nindang pinipili na ipasairarom an saindang sadiri sa saiyang matanos asin lehitimong autoridad, na kombensido na mayo nang orog pa karahay para sa sainda kisa sa pagkuyog sa saiya sagkod lamang. An klase nin tawo na gusto ni Jehova sa saiyang uniberso kapareho an saboot kan salmista na nagsurat: “An katogonan ni Jehova sangkap, nagpapaomay sa kalag. An pagirumdom ni Jehova masasarigan, nagpapadonong sa daing kabatidan. An mga pagboot ni Jehova toltol, nagpapaogma sa puso; an togon ni Jehova malinig, nagpapaliwanag kan mga mata. An pagkatakot ki Jehova dalisay, nagdadanay sagkod lamang. An mga paghokom ni Jehova tunay; an mga iyan napatunayan na gabos matanos.” (Salmo 19:7-9) Lubos na pagsarig sa pagigin tama asin pagigin matanos kan soberaniya ni Jehova—ini an dapat na magin satong kaisipan kun boot niatong mabuhay sa bagong kinaban ni Jehova.
Magayagayang Pagpasakop sa Satong Hade
5. Paano si Jesus tinawan nin balos huli sa saiyang pagkuyog, asin ano an odok na minimidbid niato?
5 Si Cristo Jesus mismo sarong nangongorog na halimbawa nin pagpapasakop sa saiyang langitnon na Ama. Mababasa niato na “sia nagpakumbaba asin nagin makinuyog sagkod sa kagadanan, iyo, kagadanan sa hariging pasakitan.” Dagdag pa ni Pablo: “Sa rason mismong ini ilinangkaw sia nin Dios sa superyor na kamugtakan asin may kabootan na itinao saiya an ngaran na halangkaw kisa lambang ibang ngaran, tanganing sa ngaran ni Jesus an lambang tuhod lumuhod kaidtong mga nasa langit asin sa daga asin mga nasa irarom kan daga, asin an lambang dila hayag na magmidbid na si Jesu-Cristo iyo an Kagurangnan para sa kamurawayan nin Dios na Ama.” (Filipos 2:8-11) Iyo, kita magayagayang minahuruhod sa atubangan kan satong Namomoon asin namamahalang Hade, si Cristo Jesus.—Mateo 23:10.
6. Paano si Jesus nagpatunay na saksi asin namomoon sa mga nasyon, asin paano magpapadagos an saiyang “sa-prinsipeng pamamahala” pakatapos kan dakulang kahorasaan?
6 Manongod ki Cristo na satong Namomoon, si Jehova naghula: “Uya! Bilang saksi sa mga nasyon itinao ko sia, bilang namomoon asin komandante sa mga nasyon.” (Isaias 55:4) Paagi sa saiyang ministeryo sa daga asin paagi sa saiyang pagdirehir sa gibong paghuhulit gikan sa langit pagkagadan asin pagkabuhay nia liwat, ipinaheling ni Jesus na sia mismo “maimbod asin totoong saksi” kan saiyang Ama sa mga tawo kan gabos na nasyon. (Kapahayagan 3:14; Mateo 28:18-20) An mga nasyon na iyan irinirepresentar ngonyan sa nagdadakol na bilang kan “dakulang kadaklan,” na makaliligtas sa “dakulang kahorasaan” sa pangengenot ni Cristo. (Kapahayagan 7:9, 14) Pero an pangengenot ni Jesus dai natatapos dian. An saiyang “sa-prinsipeng pamamahala” malawig nin sangribong taon. Para sa makinuyog na mga tawo, ootobon nia an saiyang ngaran na “Makangangalas na Parahatol, Makakamhan na Dios, Amang Daing Katapusan, Prinsipe nin Katoninongan.”—Isaias 9:6, 7; Kapahayagan 20:6.
7. Kun mawot niatong giyahan kita ni Cristo Jesus pasiring sa “mga burabod kan tubig nin buhay,” ano an dapat niatong gibohon na mayong pag-atraso, asin ano an magpapangyari sato na mamotan ni Jesus asin ni Jehova?
7 Kun mawot niatong makinabang sa “mga burabod kan tubig nin buhay” na pasiring dian an Kordero, si Cristo Jesus, ginigiyahan an matanos an pusong mga tawo, kaipuhan na daing pag-atraso na patunayan niato paagi sa satong paggawe na kita magayagayang nagpapasakop sa saiyang autoridad bilang Hade. (Kapahayagan 7:17; 22:1, 2; ikomparar an Salmo 2:12.) Si Jesus nagsabi: “Kun kamo namomoot sako, ootobon nindo an sakong mga togon. An igwa kan sakong mga togon asin minaotob kaiyan, an sarong iyan iyo an namomoot sa sako. Asin an namomoot sa sako mamomotan man kan sakong Ama, asin ako mamomoot sa saiya.” (Juan 14:15, 21) Boot daw nindong mamotan ni Jesus asin kan saiyang Ama? Kun siring magin mapagpasakop sa saindang autoridad.
An mga Paraataman Magayagayang Nagkukuyog
8, 9. (a) Ano an itinao ni Cristo para sa pagpakosog kan kongregasyon, asin sa anong bagay na an mga lalaking ini maninigong magin mga arogan sa aripompon? (b) Paano isinisimbolo an pagpasakop kan Kristianong mga paraataman sa libro nin Kapahayagan, asin paano sinda maninigong humanap nin “pusong makinuyog” kun nagkakapot nin hudisyal na mga bagay?
8 “An kongregasyon nagpapasakop ki Cristo.” Bilang Paraataman kaiyan, sia nagtao nin “balaog na mga lalaki” para sa “pagpakosog” kan kongregasyon. (Efeso 4:8, 11, 12; 5:24) An gurang sa espirituwal na mga lalaking ini sinabihan na ‘pastoran an aripompon nin Dios na nasa saindang pangataman,’ na dai “naghahade sa mga mana nin Dios, kundi magin mga halimbawa sa aripompon.” (1 Pedro 5:1-3) An aripompon sadiri ni Jehova, asin si Cristo an “marahay na pastor” kaiyan. (Juan 10:14) Mantang an mga paraataman tamang linalaoman an boluntad na pakikikooperar kan mga karnero na ipinaniwala ni Jehova asin ni Cristo sa saindang pangangataman, sinda mismo maninigo na magin marahay na mga arogan sa pagkamapagpasakop.—Gibo 20:28.
9 Kan enot na siglo, an linahidan na mga paraataman simbolikong irinirepresentar na yaon “sa,” o “nasa,” toong kamot ni Cristo, na nagpaparisa kan pagpasakop ninda sa saiya bilang Payo kan kongregasyon. (Kapahayagan 1:16, 20; 2:1) Kapareho man ngonyan, an mga paraataman sa laog kan mga kongregasyon kan mga Saksi ni Jehova maninigong magpasakop sa pangengenot ni Cristo asin ‘magpakumbaba mismo sa irarom kan mapangyaring kamot nin Dios.’ (1 Pedro 5:6) Kun hinahagad na magkapot nin hudisyal na mga bagay, arog ki Salomon durante kan saiyang maimbod na mga taon, sinda maninigong mamibi ki Jehova: “Tawan mo an saimong lingkod nin pusong makinuyog tanganing maghokom sa saimong banwaan, tanganing makamansay sa marahay asin maraot.” (1 Hade 3:9) An pusong makinuyog pahihiroon an sarong magurang na maghingoang maheling an mga bagay siring sa pagheling kaiyan ni Jehova asin ni Cristo Jesus tangani na an desisyon na ginibo digdi sa daga eksaktong magkapareho sagkod sa mapupuwede sa desisyon na ginibo sa langit.—Mateo 18:18-20.
10. Paano maninigong hingoahon kan gabos na paraataman na arogon si Jesus sa paagi kan saiyang pagtratar sa mga karnero?
10 An nagbibiyaheng mga paraataman asin mga magurang sa kongregasyon magmamaigot man na arogon si Cristo sa paagi kan saiyang pagtratar sa mga karnero. Bakong arog kan mga Fariseo, si Jesus dai nagpaotob nin kadakol na pagboot na masakit sunodon. (Mateo 23:2-11) Sia nagsabi sa mga arog-karnero: “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan. Pasana nindo an sakong sakal asin makanood sa sako, huli ta ako maboot asin mapakumbaba sa puso, asin makakakua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.” (Mateo 11:28-30) Mantang totoo na an lambang Kristiano kaipuhan na ‘magpasan kan saiyang sadiring pasan,’ maninigong girumdomon kan mga paraataman an halimbawa ni Jesus asin tabangan an saindang mga tugang na makamate na an saindang pasan na Kristianong paninimbagan “maboot,” “magian,” asin sarong kagayagayahan na pasanon.—Galacia 6:5.
Teokratikong Pagpasakop
11. (a) Paano puwedeng igalang nin sarong tawo an pagkapayo pero bako man talagang teokratiko? Iilustrar. (b) Ano an kahulogan kan pagigin tunay na teokratiko?
11 An teokrasya pamamahala nin Dios. Kalabot dian an prinsipyo nin pagkapayo na ipinahahayag sa 1 Corinto 11:3. Pero labi pa dian an boot sabihon kaiyan. An sarong tawo puwedeng magsagin na nagpapaheling nin paggalang sa pagkapayo pero bakong teokratiko sa lubos na kahulogan kan tataramon. Paano daw iyan puwedeng mangyari? Sa pag-ilustrar, an demokrasya gobyerno nin mga tawo, asin an demokrata tinawan nin kahulogan na “sarong tawo na naniniwala sa mga kamawotan nin demokrasya.” An sarong tawo puwedeng maghingako na demokratiko, makikabtang sa mga eleksion, asin magin aktibong politiko pa ngani. Alagad kun, sa saiyang pankagabsan na gawe-gawe, saiyang binabasangbasang an espiritu nin demokrasya asin an gabos na prinsipyong kalabot dian, masasabi daw na sia tunay na demokratiko? Kaagid kaiyan, tanganing magin tunay na teokratiko, an sarong tawo kaipuhan na bako sanang magpasakop sa pagkapayo sa kadikit na paagi. Kaipuhan niang arogon an mga paagi asin kuwalidad ni Jehova. Sia kaipuhan talagang nagsusunod ki Jehova sa gabos na paagi. Asin mantang si Jehova tinawan an saiyang Aki nin lubos na autoridad, an pagigin teokratiko nangangahulogan man nin pag-arog ki Jesus.
12, 13. (a) Ano, partikularmente, an kalabot sa pagigin teokratiko? (b) Kalabot daw sa teokratikong pagpasakop an pagkuyog sa kadakol na susundon? Iilustrar.
12 Girumdomon, gusto ni Jehova nin boluntad na pagpasakop na minomotibar nin pagkamoot. Iyan an saiyang paagi nin pamamahala sa uniberso. Sia an mismong personipikasyon nin pagkamoot. (1 Juan 4:8) Si Cristo Jesus “an ladawan kan saiyang kamurawayan asin an eksaktong representasyon kan saiya mismong naturalesa.” (Hebreo 1:3) Hinahagad nia sa saiyang tunay na mga disipulo na magkaminorootmootan. (Juan 15:17) Kaya an kalabot sa pagigin teokratiko bako sanang pagigin mapagpasakop kundi pagigin mamomoton man. An bagay masusumar siring kan minasunod: An teokrasya pamamahala nin Dios; an Dios pagkamoot; kun siring an teokrasya pamamahala nin pagkamoot.
13 An sarong magurang puwedeng maghona na tanganing magin teokratiko, an mga tugang maninigong kumuyog sa gabos na klase nin susundon. May mga magurang na naggibo nin mga susundon huli sa mga suhestion na itinatao sa panapanahon kan “maimbod asin madonong na oripon.” (Mateo 24:45) Halimbawa, isinuherir kaidto na tanganing mas madaling mamidbid an mga tugang sa kongregasyon, puwedeng marahay na dai perming tumukaw sa iyo na sanang tukawan sa Kingdom Hall. Iyan para sa praktikal na suhestion, bakong labi kaestriktong susundon. Pero an ibang magurang tibaad may tendensiang gibohon iyan na magin susundon asin nakakamate na an mga dai nagsusunod kaiyan bakong teokratiko. Alagad, puwedeng igwa nin dakol na marahay na rason kun taano an sarong tugang na lalaki o babae ta tibaad mas gustong tumukaw sa sarong lugar. Kun an sarong magurang dai mamomoton na hinohorophorop an siring na mga bagay, sia daw mismo tunay na teokratiko? Tanganing magin teokratiko, “an gabos logod nindong mga gibo mangyari sa pagkamoot.”—1 Corinto 16:14.
Paglilingkod na May Kagayagayahan
14, 15. (a) Paano puwedeng mahale nin sarong magurang sa nagkapirang tugang na lalaki o babae an saindang kagayagayahan sa paglilingkod ki Jehova, asin taano ini ta bakong teokratiko? (b) Paano ipinaheling ni Jesus na saiyang pinahahalagahan an pagkamoot na ipinahahayag kan satong paglilingkod, imbes na an kadakolan kaiyan? (c) Ano an maninigong konsideraron kan mga magurang?
14 An pagigin teokratiko nangangahulogan man nin paglilingkod ki Jehova na may kagayagayahan. Si Jehova iyo an “maogmang Dios.” (1 Timoteo 1:11) Boot nia na an saiyang mga parasamba maglingkod saiya na magayagaya. Maninigong girumdomon kan mga nag-iinsister nin mga susundon na kabale sa mga regulasyon na dapat na “pagmaanan na gibohon” kan Israel iyo an minasunod: “Mag-ogma ka sa atubangan ni Jehova na saimong Dios sa gabos mong gibo.” (Deuteronomio 12:1, 18) Ano man an ginigibo niato sa paglilingkod ki Jehova maninigo na kagayagayahan, bakong kagabatan. An mga paraataman dakol an magigibo tanganing mapamate an mga tugang na maogma sa paggibo kan saindang makakaya sa paglilingkod ki Jehova. Sa kabaliktaran, kun an mga paraataman bakong maingat, puwedeng mahale ninda sa nagkapirang tugang an saindang kagayagayahan. Kun, halimbawa, sinda naggigibo nin mga pagkokomparar, na tinatawan nin komendasyon an mga nakaabot o nakalabi sa promedyong oras kan kongregasyon na ginagamit sa pagpapatotoo asin ipinaririsa na tinatatsaran an mga dai nakaabot kaiyan, ano daw an mamamatean kan mga tibaad may balidong rason sa pagreport nin hababa na gayong oras? Dai daw sinda kaini gigibohon na makamate nin dai maninigong sala saka halean sinda kan saindang kagayagayahan?
15 An pipirang oras na ikakadusay kan iba sa pagpapatotoo sa publiko puwedeng magrepresentar nin mas dakulang paghihingoa kisa sa dakol na oras na ginamit kan iba sa paghuhulit, kun kokonsideraron an mas hoben na edad, mas marahay na salud, asin iba pang kamugtakan. Sa bagay na ini, sinda dai dapat na husgaran kan mga magurang. Iyo nanggad, ki Jesus itinao kan Ama an “kapangyarihan na maghokom.” (Juan 5:27) Tinatsaran daw ni Jesus an dukhang balo huli ta an saiyang dolot hababa kisa sa promedyo? Dai, namatean nia an tunay na halaga kan mga sentimong idto para sa balo. An mga iyan an “gabos na yaon sa saiya, an saiyang bilog na pagbuhay.” Kanigoan kararom na pagkamoot ki Jehova an irinepresentar kan mga iyan! (Marcos 12:41-44) Maninigo daw na an mga magurang kapareho man an mamatean sa mamomoton na mga paghihingoa kan mga an makakaya hababa na gayo sa “promedyo”? Sa mga tataramon nin pagkamoot ki Jehova, an siring na mga paghihingoa puwedeng labi pa ngani sa promedyo!
16. (a) Kun an mga magurang naggagamit nin mga numero sa saindang mga pahayag, taano ta nangangaipo sinda nin pagmansay asin marahay na pagtirotimbang? (b) Paano pinakamarahay na matatabangan an mga tugang na dugangan an saindang paglilingkod?
16 Maninigo daw na an mga pananaram na ini ngonyan liwaton na magin bagong “susundon” na an mga numero—pati mga promedyo—maninigo na nungkang masambitan? Dai nanggad! An punto iyo na an mga paraataman maninigo na magin timbang sa pagpakosog sa mga tugang na pahiwason an saindang ministeryo saka sa pagtabang sainda na gibohon an saindang makakaya na may kagayagayahan. (Galacia 6:4) Sa ilustrasyon ni Jesus dapit sa mga talento, an kagurangnan ipinaniwala an saiyang mga rogaring sa saiyang mga oripon na “lambang saro sono sa saiyang kakayanan.” (Mateo 25:14, 15) An mga magurang maninigo man na konsideraron an mga kakayanan nin lambang parahayag kan Kahadean. Iyan nagkakaipo nin pagmansay. Tibaad an iba sa aktuwal nangangaipo sana nin pagpakosog na gumibo nin mas dakol pa. Puwedeng pahalagahan ninda an tabang sa mas marahay na pag-organisar kan saindang aktibidad. Sa arin man na kamugtakan, kun sinda matatabangan na gibohon an saindang makakaya na may kagayagayahan, an kagayagayahan na iyan posibleng mapakosog sa sainda na pahiwason an saindang Kristianong aktibidad kun saen mapupuwede.—Nehemias 8:10; Salmo 59:16; Jeremias 20:9.
An Katoninongan na Gikan sa Magayagayang Pagpasakop
17, 18. (a) Paano puwedeng magtao sato nin katoninongan asin katanosan an magayagayang pagpasakop? (b) Ano an mapapasato kun talagang dadangogon niato an mga togon nin Dios?
17 An magayagayang pagpasakop sa lehitimong soberaniya ni Jehova nagtatao sato nin dakulang katoninongan. An salmista namibi ki Jehova: “An nagsosopay na katoninongan nasa mga namomoot sa saimong pagboot, asin sa sainda mayo nin masisingkogan.” (Salmo 119:165) Paagi sa pagkuyog sa pagboot nin Dios, kita mismo nakikinabang. Sinabihan ni Jehova an Israel: “Iyo ini an isinabi ni Jehova, an saimong Paratubos, an Banal na Saro kan Israel: ‘Ako, si Jehova, an saimong Dios, an Saro na nagtotokdo saimo na pakinabangon an saimong sadiri, an Saro na nagpapangyari saimo na maglakaw sa dalan na maninigo mong lakawan. O kun dadangogon mo sana kutana an sakong mga togon! Dangan an saimong katoninongan magigin siring sa salog, asin an saimong katanosan siring sa mga alon kan dagat.’”—Isaias 48:17, 18.
18 An pantubos na atang ni Cristo nagtatao sato nin pakipagkatoninongan sa Dios. (2 Corinto 5:18, 19) Kun kita may pagtubod sa nakababalukat na dugo ni Cristo asin maingat na naghihingoang labanan an satong mga kaluyahan patin ginigibo an kabotan nin Dios, nakakaginhawa kita sa pakamate nin sala. (1 Juan 3:19-23) An siring na pagtubod, na suportado nin mga gibo, nagtatao sato nin matanos na kamugtakan sa atubangan ni Jehova asin kan mamuraway na paglaom na makaligtas sa “dakulang kahorasaan” patin mabuhay sagkod lamang sa bagong kinaban ni Jehova. (Kapahayagan 7:14-17; Juan 3:36; Santiago 2:22, 23) An gabos na ini mapapasato ‘kun dadangogon ta sana kutana an mga togon nin Dios.’
19. Depende sa ano an satong kaogmahan ngonyan asin an satong paglaom na buhay na daing katapusan, asin paano ipinahayag ni David an satong odok sa pusong kombiksion?
19 Iyo, an satong kaogmahan ngonyan asin an satong paglaom na buhay na daing katapusan digdi sa sarong paraisong daga minadepende sa satong magayagayang pagpasakop sa autoridad ni Jehova bilang Soberanong Kagurangnan kan uniberso. Padagos logod na magin kapareho an saboot niato kan ki David, na nagsabi: “Saimo, O Jehova, an kadakulaan asin an kakosogan asin an kagayonan asin an kamahalan patin an dignidad; huli ta an gabos na bagay sa kalangitan asin sa daga sadiri mo. Saimo an kahadean, O Jehova, an Saro na naglalangkaw man kan saimong sadiri bilang payo sa gabos. Asin ngonyan, O samuyang Dios, nagpapasalamat kami saimo asin inoomaw niamo an saimong mamurawayon na ngaran.”—1 Cronica 29:11, 13.
Mga Punto na Dapat Girumdomon
◻ Anong klaseng pagpasakop asin pagkuyog an boot ni Jehova na ipaheling kan saiyang mga lingkod?
◻ Paano si Jesus tinawan nin balos huli sa saiyang pagkuyog, asin ano an dapat niatong patunayan paagi kan satong paggawe?
◻ Paano maninigong arogon si Jesus kan gabos na paraataman sa paagi kan saiyang pagtratar sa mga karnero?
◻ Ano an kalabot sa pagigin teokratiko?
◻ Anong mga bendisyon an itinatao sato kan magayagayang pagpasakop?
[Ritrato sa pahina 24]
An mga magurang pinakokosog an aripompon na magayagayang gibohon an saindang makakaya
[Ritrato sa pahina 26]
Si Jehova naoogma sa mga nagkukuyog sa saiya nin gikan sa puso