Nagkakasararo sa Sangkap na Bogkos nin Pagkamoot

“Oroyon na mabogkos sa pagkamoot.”​—COLOSAS 2:2.

1, 2. Anong nakapababangang impluwensia an namamatean nangorogna ngonyan?

HINANYOGA! May makosog na tingog na nag-aaningal sa bilog na langit na nagsasabi: “Herak man kan daga asin kan dagat, huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon.” (Kapahayagan 12:12) Sa kada taon na minaagi, an mensaheng iyan orog na nagtatanda nin maraot na maabot para sa mga nag-eerok sa daga.

² An dakulang kaiwal ni Jehova haloy nang midbid na paratumang (Satanas) asin parapakaraot (Diablo). Pero an paradayang ini ngonyan may bagong makatatakot na papel​—sia nagin anggot na dios! Taano? Huli ta sia pinalayas sa langit ni Miguel asin kan mga anghel kaini sa ralaban na nagpoon sa langit kan 1914. (Kapahayagan 12:​7-9) Aram kan Diablo na halipot na sana an saiyang panahon na patunayan an angat nia na kaya niang patalikodon sa pagsamba sa Dios an gabos na tawo. (Job 1:11; 2:​4, 5) Huling mayo nang madudulagan, sia asin an saiyang mga demonyo garo anggot na bunyog nin mga alimbubuyog na inuubos an saindang kabangisan sa dai mapamugtak na katawohan.​—Isaias 57:20.

3. Ano an nagin epekto kan pagpalayas ki Satanas sa satong panahon?

³ An mga pangyayaring ini, na dai naheheling nin tawo, nagpapaliwanag kun taano ta may pankagabsan na pagbagsak nin moral sa katawohan ngonyan. Ipinaliliwanag man kaiyan an tarantang paghihingoa nin mga tawo na takpolan an pagkabarangabanga nin mga nasyon na talagang dai nagkakaoroyon. An mga tribo asin grupong etniko mabangis na nagsisinalakayan, na nagbubunga nin minilyon na tawong daing harong asin sadiring lugar. Bakong makangangalas na nag-oorog an katampalasanan sa sokol na dai pang kaagid! Arog kan ihinula ni Jesus, ‘an pagkamoot nin dakol sa katawohan minalipot.’ Saen ka man humeling, dai pagkaoroyon asin kadaihan nin pagkamoot an maheheling sa daing katrangkilohan na katawohan ngonyan.​—Mateo 24:12.

4. Taano ta nasa espesyal na peligro an banwaan nin Dios?

⁴ Huli sa kamugtakan sa kinaban, nagigin orog na makahulogan an pamibi ni Jesus para sa saiyang mga parasunod: “Ako nakikimaherak sa saimo, bako na haleon sinda sa kinaban, kundi na bantayan mo sinda huli sa maraot. Sinda bakong kabtang kan kinaban, kun paanong ako bakong kabtang kan kinaban.” (Juan 17:​15, 16) Ngonyan, an “maraot” nangorognang ilinuluwas an saiyang kaanggotan tumang sa mga “nagkukuyog sa mga pagboot nin Dios asin igwa kan gibohon nin pagpatotoo ki Jesus.” (Kapahayagan 12:17) Kun bakong huli sa mapagbantay asin mamomoton na pangataman ni Jehova, mapapara an saiyang maimbod na mga Saksi. An buhay niato depende sa pag-aprobetsar niato sa gabos na probisyon nin Dios para sa satong espirituwal na kaligtasan asin ikararahay. Kalabot dian an paghihingoa niato kaoyon sa paghiro kan Saiyang kapangyarihan paagi ki Cristo, siring sa isinadol kan apostol sa Colosas 1:29.

5, 6. Ano an saboot ni apostol Pablo manongod sa mga Kristianong taga-Colosas, asin taano ta angay an temang teksto para sa 1995?

⁵ Minsan ngani posible na dai pa sinda naheling nin personal ni Pablo, namomotan nia an saiyang mga tugang sa Colosas. Sinabihan nia sinda: “Kutana masabotan nindo kun gurano kararom kan sakuyang kahaditan para sa saindo.” (Colosas 2:​1, The New Testament in Modern English, ni J. B. Phillips) Mantang an mga parasunod ni Jesus bakong kabtang kan kinaban, an “maraot” daing ontok na maghihingoa na raoton an pagkasararo kan mga tugang paagi sa pagsabwag sa tahaw ninda kan espiritu nin kinaban. Ipinarisa kan baretang dara ni Epafras hale sa Colosas na ini nangyayari na sa nagkapirang kabtang.

⁶ An saro sa pangenot na interes ni Pablo para sa saiyang Kristianong mga tugang masusumaryo sa mga tataramon na: “Oroyon na mabogkos sa pagkamoot.” An saiyang mga tataramon may espesyal na kahulogan ngonyan, sa kinaban na pano nin pagkabaranga asin kadaihan nin pagkamoot. Kun isasapuso niato an hatol ni Pablo, kakamtan niato an pangataman ni Jehova. Maeeksperyensiahan man niato an kapangyarihan kan saiyang espiritu sa satong buhay, na tinatabangan kitang labanan an mga impluwensia kan kinaban. Abaa kadonong kan hatol na ini! Kaya, an Colosas 2:2 iyo an magigin satuyang temang teksto para sa 1995.

7. Anong pagkaoroyon an maninigong manompongan sa tahaw nin tunay na mga Kristiano?

⁷ Sa naenot na surat sa mga taga-Corinto, ginamit kan apostol bilang ilustrasyon an hawak nin tawo. Isinurat nia na “dai magkaigwa nin pagkabaranga” sa kongregasyon nin linahidan na mga Kristiano kundi na “magkaigwa nin pararehong pangataman sa lambang saro an mga kabtang kaiyan.” (1 Corinto 12:​12, 24, 25) Kanigoan karahay na ilustrasyon! An satong mga kalamias nagsisinarigan, na an kada saro kasugpon kan satong hawak. Iyo man an satong lakop sa kinaban na asosasyon nin magturugang, na kompuwesto nin mga linahidan asin nin minilyon na naglalaom na mabuhay sa sarong paraisong daga. Dai niato dapat na isiblag an satong sadiri sa grupo nin mga kapwa Kristiano tanganing mabuhay nin independiente! Naghihiro paagi ki Cristo Jesus, an espiritu nin Dios nagbobolos sa sato nin bulaos paagi sa satong pakikiasosyar sa satong mga tugang.

Pagkaoroyon Konektado sa Kaaraman

8, 9. (a) Ano an pundamental sa pakakontribuwir niato sa pagkaoroyon sa kongregasyon? (b) Paano kamo nagkamit nin kaaraman manongod ki Cristo?

⁸ An saro sa pangenot na mga punto ni Pablo iyo na an Kristianong pagkaoroyon konektado sa kaaraman, partikularmente an manongod ki Cristo. Nagsurat si Pablo na an mga Kristiano maninigong “oroyon na mabogkos sa pagkamoot asin may pagtanaw sa gabos na kayamanan kan bilog na kasiertohan kan saindang pakasabot, na an katuyohan tamang kaaraman manongod sa banal na hilom nin Dios, arin na baga, si Cristo.” (Colosas 2:2) Nag-ako kita nin kaaraman​—mga katunayan—​poon kan kita mag-adal kan Tataramon nin Dios. Bilang kabtang nin pagsabot kun paano nakatatama sa katuyohan nin Dios an dakol na katunayan na ini, nasasabotan niato an mahalagang marhay na kabtang ni Jesus. “Maingat na natatago sa saiya an gabos na kayamanan nin kadonongan asin nin kaaraman.”​—Colosas 2:3.

⁹ Iyan daw an saboot nindo manongod ki Jesus asin sa saiyang kabtang sa katuyohan nin Dios? An dakol sa Kakristianohan listong sambiton si Jesus, na naghihingakong inako na sia asin ligtas na. Alagad talaga daw na midbid sia ninda? Dai, huli ta an kadaklan naniniwala sa bakong Makakasuratan na doktrina nin Trinidad. Kamo bako sanang nakaaaram kan katotoohan sa bagay na ini kundi posible na mahiwas an kaaraman nindo dapit sa sinabi asin ginibo ni Jesus. Minilyon an natabangan digdi paagi sa pano nin impormasyon na pag-adal na ginagamit an librong The Greatest Man Who Ever Lived. Pero kaipuhan na padagos niatong pararomon an satong kaaraman manongod ki Jesus asin sa saiyang mga ginibo.

10. Sa anong paagi na makukua niato an natatagong kaaraman?

¹⁰ An pagkasabing “an gabos na kayamanan nin kadonongan asin nin kaaraman” “maingat na natatago” ki Jesus dai nangangahulogan na an kaaraman na iyan dai niato kayang manodan. Imbes, iyan garo bukas na mina. Dai kita kaipuhan na maghanap sa mahiwas na lugar na iniisip kun saen kita mapoon na magkotkot. Aram na niato​—an tunay na kaaraman minapoon sa ihinahayag kan Biblia manongod ki Jesu-Cristo. Mantang mas lubos niatong nasasabotan an kabtang ni Jesus sa pagkaotob kan katuyohan ni Jehova, nakakamtan niato an mga kayamanan nin tunay na kadonongan asin tamang kaaraman. Kaya an kaipuhan niatong gibohon padagos na magkotkot nin mas hararom, na kinukua an dakol pang mahahalagang gapo o mahahalagang bagay na yaon sa burabod na ini na nakotkot na niato.​—Talinhaga 2:​1-5.

11. Paano niato madudugangan an satong kaaraman asin kadonongan paagi sa paghorophorop manongod ki Jesus? (Iilustrar kan paghanaw ni Jesus sa mga bitis kan mga disipulo, o gumamit nin ibang halimbawa.)

¹¹ Halimbawa, tibaad aram niato na hinanawan ni Jesus an mga bitis kan saiyang mga apostol. (Juan 13:​1-20) Pero hinorophorop daw niato an leksion na saiyang itinotokdo asin an kaisipan na saiyang ipinaheling? Sa paggibo kaiyan, tibaad ikaluwas niato an kayamanan nin kadonongan na nagpapangyari sa sato​—iyo, nagpapahiro sa sato—​na liwaton an pagtrato niato sa sarong tugang na lalaki o babae na an personalidad haloy na niatong ikinauuyam. O kun tinawan nin asignasyon na medyo dai niato kursunada, tibaad laen na an satong reaksion oras na masabotan niato an bilog na kahulogan kan Juan 13:​14, 15. Arog kaiyan an epekto sa sato kan kaaraman asin kadonongan. Ano daw an puwedeng magin epekto sa iba mantang orog niatong iinooyon an satong sadiri sa nadugangan na kaaraman manongod ki Cristo? Posible na an aripompon ‘orog na oroyon na mabobogkos sa pagkamoot.’a

An Pagkadistorbo Puwedeng Makaraot sa Pagkaoroyon

12. Kaipuhan kitang mag-ingat tumang sa anong kaaraman?

¹² Kun an tamang kaaraman nagpapadali sa satong pagigin ‘oroyon na borogkos sa pagkamoot,’ ano an ibinubunga kan “falsong inaapod na ‘kaaraman’”? An kabaliktaran​—kontrobersia, dai pagkaoroyon, asin pagrayo sa pagtubod. Kaya dapat na mag-ingat kita tumang sa siring na falsong kaaraman, siring sa ipinatanid ni Pablo ki Timoteo. (1 Timoteo 6:​20, 21) Nagsurat man si Pablo: “Ini sinasabi ko tanganing mayo nin siisay man na makadaya sa saindo paagi sa nakabibihag na mga pangangatanosan. Mag-ingat kamo: tibaad may siisay man na bumihag saindo paagi sa pilosopiya asin basang na daya sono sa tradisyon nin mga tawo, sono sa enot na mga katokdoan kan kinaban asin bakong sono ki Cristo.”​—Colosas 2:​4, 8.

13, 14. (a) Taano ta namemeligro an mga tugang na taga-Colosas mapadapit sa kaaraman? (b) Taano ta tibaad isipon nin nagkapira ngonyan na sinda mayo sa kaagid na peligro?

¹³ An mga Kristianong taga-Colosas napalilibotan kan mapandayang impluwensia kan sa katunayan falsong inaapod na kaaraman. An dakol na tawo sa laog asin palibot nin Colosas halangkawon an paggalang sa mga pilosopiyang Griego. Igwa man nin mga Judaizer na gustong ipaotob sa mga Kristiano an Pagboot ni Moises, arog baga kan mga aldaw nin kapiyestahan kaiyan asin mga kahagadan sa kakanon. (Colosas 2:​11, 16, 17) Si Pablo bakong kontra sa pagkakamit nin tunay na kaaraman kan saiyang mga tugang, pero kaipuhan sindang mag-ingat na mayo nin mambiktima sa sainda, na naggagamit nin nakabibihag na mga pangangatanosan sa pagkombensir sa sainda na magkaigwa na sana nin sa-tawong punto-de-vista dapit sa buhay asin mga hiro. Masasabotan nindo na kun pabayaan kan nagkapira sa kongregasyon na an saindang kaisipan asin mga desisyon giyahan nin siring na bakong Makakasuratan na mga ideya asin punto-de-vista sa buhay, iyan magigin kakontra kan pagkaoroyon asin pagkamoot sa tahaw kan mga miembro sa kongregasyon.

¹⁴ ‘Iyo,’ tibaad isipon nindo, ‘nasasabotan ko an peligrong inatubang kan mga taga-Colosas, pero mayo ako sa peligrong maimpluwensiahan nin mga ideyang Griego, arog baga kan dapit sa inmortal na kalag o trinitaryong dios; ni may naheheling man akong peligro na madara kan paganong mga kapiyestahan kan falsong relihiyon na dinulagan ko.’ Marahay. Marahay na marigon na makombensir manongod sa pagkasuperyor kan pundamental na katotoohan na ihinayag paagi ki Jesus asin yaon sa Kasuratan. Pero, posible daw na kita namemeligro sa ibang pilosopiya o punto-de-vista nin tawo na lakop ngonyan?

15, 16. Anong punto-de-vista dapit sa buhay an tibaad makaapektar sa kaisipan nin Kristiano?

¹⁵ An saro sa siring na kaisipan haloy nang yaon: “Haen ngonyan an panuga kan saiyang pagdatong? An satong mga magurang ibinugtak na sa saindang kapahingaloan, pero sagkod ngonyan an gabos nagpapadagos na pareho man sana kan dati.” (2 Pedro 3:​4, The New English Bible) An saboot na iyan tibaad ipahayag sa ibang pagtaram, pero pareho an punto-de-vista. Halimbawa, tibaad may mangatanosan, ‘Kan enot kong manodan an katotoohan dakol nang dekada an nakaagi, an katapusan haranihon na. Alagad ta mayo pa man giraray iyan, asin siisay baga an nakaaaram kun noarin iyan maabot?’ Totoo, mayo nin tawong nakaaaram kun noarin maabot an katapusan. Pero, mangnoha an punto-de-vistang isinadol ni Jesus: “Magbantay kamo, magpuka kamo, huli ta dai nindo aram kun noarin an itinalaan na panahon.”​—Marcos 13:​32, 33.

¹⁶ Abaa kapeligroso na magkaigwa kan punto-de-vista na, huling dai aram kun noarin maabot an katapusan, maninigo kitang magplano para sa pano nin eksperyensia asin “normal” na buhay! An kaisipan na iyan maririsa sa pangangatanosan na, ‘Marahay pa na gumibo ako nin mga paagi na matogot sa sako (o sa sakong mga aki) na magkaigwa nin iginagalang na karera na halangkaw an suweldo asin magpapangyari sa sako na magkaigwa nin komportableng buhay. Siyempre, maatender ako sa Kristianong mga pagtiripon asin makikikabtang man sa paghuhulit, pero mayo nin dahelan na ako maghingoa o gumibo nin darakulang pagsasakripisyo.’​—Mateo 24:​38-42.

17, 18. Anong punto-de-vista an isinadol ni Jesus asin kan mga apostol na magkaigwa kita?

¹⁷ Pero dai maninigaran na si Jesus asin an saiyang mga apostol nagrekomendar na kita mamuhay na may pag-apretar dapit sa paghuhulit kan maogmang bareta, na naghihingoa asin andam na magsakripisyo. Si Pablo nagsurat: “Ini sinasabi ko, mga tugang, nainaan na an panahon na natatada. Kaya magpoon ngonyan an mga igwa nin agom magin siring sa mayo, . . . asin an mga nagbabakal siring sa mga dai nin rogaring, asin an mga minagamit kan kinaban siring sa mga dai nakikinabang kaiyan nin lubos; huli ta an kamugtakan kan kinaban na ini nagbabago.”​—1 Corinto 7:​29-31; Lucas 13:​23, 24; Filipos 3:​13-15; Colosas 1:29; 1 Timoteo 4:10; 2 Timoteo 2:4; Kapahayagan 22:20.

¹⁸ Imbes na isuherir na gibohon niatong pasohan an komportableng buhay, si Pablo nagsurat sa irarom nin pasabong: “Dai kita nagdara nin ano man sa kinaban, asin dai man kita makadadara nin ano man hale dian. Kaya, kun igwa na nin kakanon asin gubing, manigoan na kita kan mga bagay na iyan. . . . Makipaglaban ka kan marahay na pakilaban nin pagtubod, mangapot ka nin marigon sa buhay na daing sagkod na huli kaiyan ika inapod asin nagtao ka kan marahay na pagpahayag sa publiko sa atubangan nin dakol na saksi.”​—1 Timoteo 6:​7-12.

19. Paano naaapektaran an kongregasyon kun an mga yaon dian inaako an punto-de-vista sa buhay na isinadol ni Jesus?

¹⁹ Kun an kongregasyon kompuwesto nin mahigos na mga Kristiano na maigot na naghihingoa na ‘magtao nin marahay na pagpahayag sa publiko,’ natural sanang magkaigwa nin pagkaoroyon. Dai sinda napadadara sa kaisipan na, “Dakol ka nang rogaring na naririmpos para sa dakol na taon; magpahingalo ka, magkakan, mag-inom, magpasiramsiram.” (Lucas 12:19) Imbes, sararo sinda sa parehong paghihingoa, andam na magsakripisyo tanganing magkaigwa kan pinakalubos na kabtang na mapupuwede sa dai na noarin man maootrong gibong ini.​—Ikomparar an Filipos 1:​27, 28.

Mag-ingat sa Nakabibihag na mga Pangangatanosan

20. Sa ano pang ibang bagay na puwedeng madaya an mga Kristiano?

²⁰ Siyempre, igwa nin iba pang paagi na an mga Kristiano puwedeng ‘madaya nin nakabibihag na mga pangangatanosan’ o basang na mga daya na nakaoolang sa ‘oroyon na pagkabogkos sa pagkamoot.’ An opisina kan Watch Tower Society sa Alemania nagsurat: “An sarong pangyayari nagbunga nin kontrobersia, na nakikampi sa laen-laen na lado an mga parahayag asin pati kamagurangan manongod sa mga klase nin pagbolong na ginagamit nin sarong tugang.” Idinugang ninda: “Huli sa kadakol na klase nin metodong ginagamit asin sa kadakol na pasyente, ini bagay na kontrobersial asin, kun may pagkaespiritistiko an mga metodo sa pagbolong, puwedeng magin peligroso.”​—Efeso 6:12.

21. Paano puwedeng mawara sa tamang sentro nin atension an sarong Kristiano ngonyan?

²¹ An mga Kristiano boot na mabuhay asin magdanay na mabagsik an salud tanganing masamba ninda an Dios. Minsan siring, sa palakaw na ini kita naggugurang asin naghehelang huli sa pagkabakong sangkap. Imbes na idoon an mga isyu sa salud, kaipuhan na magkonsentrar kita sa tunay na solusyon, para sa sato asin para sa iba. (1 Timoteo 4:16) Si Cristo an pinakasentro kan atension sa solusyon na iyan, kun paanong sia an tinawan kan pinakasentrong atension kan hatol ni Pablo sa mga taga-Colosas. Pero girumdoma, ipinarisa ni Pablo na tibaad may nagkapirang umabot na may “nakabibihag na mga pangangatanosan” na irinarayo an satong atension ki Cristo, tibaad pasiring sa mga metodo nin pag-eksamin, pagbolong, o klase nin pagkakan.​—Colosas 2:​2-4.

22. Ano an maninigong magin timbang na kaisipan niato manongod sa kadakol na mga paghihingako dapit sa mga metodo nin pag-eksamin asin pagbolong?

²² An mga tawo sa palibot kan kinaban binobomba nin mga anunsio asin patotoo manongod sa gabos na klase nin pagbolong asin paagi nin pag-eksamin. An iba ginagamit asin minimidbid nin dakol; an iba tinatatsaran nin dakol o pinagdududahan.b An kada tawo responsable na desisyonan kun ano an gigibohon nia manongod sa saiyang salud. Pero an mga nag-aako sa hatol ni Pablo na yaon sa Colosas 2:​4, 8 may proteksion tumang sa pagkadaya paagi sa “nakabibihag na mga pangangatanosan” o “basang na daya” na nakalalagalag sa dakol na, mantang mayo nin paglaom sa Kahadean, desperadong rumahay. Dawa kun an Kristiano kombensido na garo baga marahay para sa saiya an sarong klase nin pagbolong, dai nia maninigong ilakop ini sa mga tugang na Kristiano, huli ta iyan puwedeng magin tema nin lakop na diskusyon asin kontrobersia. Sa siring ikapaheheling nia na iginagalang niang marhay an halaga nin pagkaoroyon sa kongregasyon.

23. Taano kita ta nangorognang may dahelan sa paggayagaya?

²³ Idinoon ni Pablo na an Kristianong pagkaoroyon basihan nin tunay na kagayagayahan. Kan saiyang kaaldawan tunay na mas kadikit an kongregasyon kisa ngonyan. Pero nakasurat sia sa mga taga-Colosas: “Minsan ngani mayo ako dian sa hawak, kaibanan pa man giraray nindo ako sa espiritu, na naggagayagaya asin nagheheling sa saindong kahusayan asin sa karigonan kan saindong pagtubod ki Cristo.” (Colosas 2:5; helingon man an Colosas 3:14.) Mas dakula nanggad an dahelan niato sa paggayagaya! Naheheling niato an tunay na ebidensia nin pagkaoroyon, kahusayan, asin karigonan sa pagtubod sa sadiri niatong kongregasyon, na nagpapabanaag kan pankagabsan na kamugtakan kan banwaan nin Dios sa bilog na daga. Kaya sa halipot na natatadang panahon sa presenteng palakaw, an lambang saro logod sa sato magin desidido na “oroyon na mabogkos sa pagkamoot.”

[Mga Nota sa Ibaba]

Namangno daw Nindo?

◻ Ano an teksto kan taon 1995 para sa mga Saksi ni Jehova?

◻ Taano an mga Kristianong taga-Colosas ta kaipuhan na oroyon na mabogkos sa pagkamoot, asin taano ta dapat man kita ngonyan?

◻ Anong mapandayang punto-de-vista sa buhay an nangorognang kaipuhan na likayan nin mga Kristiano ngonyan?

◻ Taano an mga Kristiano ta maninigong mag-alisto na dai malagalag nin nakabibihag na mga pangangatanosan manongod sa salud asin mga paagi nin pag-eksamin?

[Mga ritrato sa pahina 17]

Nasesentro daw sa presensia ni Jesus an saindong mga plano para sa ngapit?