Ikakaoyon daw an Patienot na Pagtalaga sa Pagkamoot nin Dios?

“TINATAWAN mi nin kahulogan an patienot na pagtalaga na daing sagkod na plano nin Dios, na paagi kaiyan dinideterminaran nia kun ano an gusto niang gibohon sa lambang tawo. Huli ta dai nia sinda gabos linalang sa pararehong kamugtakan, kundi patienot na itinatalaga an iba sa buhay na daing katapusan asin an iba sa daing sagkod na kapahamakan.”

Iyan an pakahulogan kan Protestanteng Repormista na si John Calvin sa saiyang pakasabot sa patienot na pagtalaga sa librong Institutes of the Christian Religion. An pakasabot na ini basado sa ideya na an Dios nakakaaram kan gabos asin na an gawe kan saiyang mga linalang dai puwedeng kustionon an saiyang mga katuyohan o obligaron siang gumibo nin mga pagliwat.

Alagad ini daw talaga an ipinaririsa kan Biblia mapadapit sa Dios? Orog pang importante, an siring daw na paliwanag nakakaoyon sa mga kuwalidad nin Dios, nangorogna sa saiyang pangenot na kuwalidad​—an pagkamoot?

Sarong Dios na May Kakayahan na Maghula kan Ngapit

An Dios kayang ihula an ngapit. Ilinaladawan nia an saiyang sadiri bilang “Saro na nagpapaisi kan mangyayari sa huri poon pa sa kapinonan, asin kan mga bagay na dai pa nahahaman poon kan kasuanoy; an Saro na nagsasabi, ‘An sakuyang hatol magdadanay, asin gabos na sakong ikinaoogma sakong gigibohon.’” (Isaias 46:10) Sa bilog na kasaysayan nin tawo, ipinasurat nin Dios an saiyang mga hula tanganing ipaheling na puwede niang gamiton an saiyang patienot na pakaaram asin ihula an mga pangyayari bago iyan maotob.

Kaya, kan kaaldawan ni Belsasar, an hade sa Babilonya, kan an propetang si Daniel mangatorogan nin duwang mabangis na hayop, na an saro sinalidahan kan saro, itinao saiya ni Jehova an kahulogan kaiyan: “An lalaking karnero na saimong naheling na igwa kan duwang sungay iyo an mga hade kan Media asin Persia. Asin an barahibohon na lalaking kanding iyo an hade nin Grecia.” (Daniel 8:​20, 21) Maliwanag nanggad, ginamit nin Dios an saiyang patienot na pakaaram tanganing ihayag an pagkasunodsunod kan mga kapangyarihan pankinaban. An nag-eeksister kan panahon na idto na Imperyo nin Babilonya sasalidahan kan Medo-Persia dangan kan Grecia.

An mga hula puwede man na mapadapit sa sarong indibiduwal. Halimbawa, ipinahayag kan propetang si Miqueas na an Mesiyas mamumundag sa Betlehem. (Miqueas 5:2) Sa giraray, sa kasong ini ginamit nin Dios an saiyang patienot na pakaaram. Alagad, an pangyayaring ini ipinaisi na igwang partikular na katuyohan​—an pagpamidbid kan Mesiyas. Dai tinatawan nin katanosan kan pangyayaring ini an pankagabsan na pag-aplikar kan doktrina nin patienot na pagtalaga na kabale an lambang indibiduwal.

Sa kabaliktaran, ihinahayag kan Kasuratan na igwa nin mga situwasyon na pinagmamarhay nin Dios na dai aramon nin patienot an magigin resulta. Bago linaglag an Sodoma asin Gomorra, sia nagpahayag: “Desidido akong humilig tanganing maheling ko kun baga sinda minagawe man nanggad sono sa kurahaw dapit dian na nakaabot sa sakuya, asin, kun dai, maaraman ko iyan.” (Genesis 18:21) An tekstong ini malinaw na nagpapaheling sato na dai patienot na inaram nin Dios kun gurano kalakop an kabikoan sa mga siudad na idto bago nia inimbestigar an mga bagay.

Totoo, kaya nin Dios na helingon nin patienot an nagkapirang mangyayari, pero sa dakol na pangyayari, pinagmarhay nia na dai gamiton an saiyang patienot na pakaaram. Huling an Dios makakamhan sa gabos, libre sia na gamiton an saiyang mga abilidad sono sa gusto nia, bakong sono sa mga kagustohan nin bakong sangkap na mga tawo.

Sarong Dios na Kayang Itanos an mga Bagay

Arog ni Calvin, an iba nagsasabi na patienot nang dineterminaran nin Dios an pagkaholog nin tawo sa kasalan bago sia naglalang asin na patienot na niang itinalaga an ‘mga pinili’ bago kan pagkakasalang iyan. Pero kun totoo iyan, bako daw na nagin mapagsaginsagin kutana an Dios na ialok an paglaom na buhay na daing katapusan ki Adan asin Eva, na lubos na nakakaaram na dai ninda maootob iyan? Saro pa, mayong kabtang sa Kasuratan na nagpapainda na an enot na tawong mag-agom pinapili: kun baga makuyog sa mga pagboot nin Dios asin mabuhay sagkod lamang o sayumahan iyan asin magadan.​—Genesis, kapitulo 2.

Alagad talaga daw na naolang kan kasalan ni Adan asin Eva an katuyohan nin Dios? Dai, huli ta pakatapos tolos kan saindang pagkakasala, ipinaisi nin Dios na sia mapaluwas nin sarong “banhi” na malaglag ki Satanas asin sa saiyang mga ahente asin na saiya giraray na itatanos an mga bagay digdi sa daga. Kun paanong an pipirang insekto dai makakaolang sa sarong hardinero sa pagpaluwas nin abundang ani, sa siring na paagi an pagmasumbikal ni Adan asin Eva dai makakaolang sa Dios na gibohon na paraiso an daga.​—Genesis, kapitulo 3.

Kan huri ihinayag nin Dios na magkakaigwa nin sarong Kahadean na gobyerno na ipinaniwala sa sarong gikan ni Hadeng David asin na may ibang makakaasosyar sa Kahadean na ini. An ibang ini inaapod na “mga banal kan Kaharohalangkawe.”​—Daniel 7:18; 2 Samuel 7:12; 1 Cronica 17:11.a

An Paghula Bakong Patienot na Pagtalaga

An bagay na dai pinagmarhay nin Dios na aramon kun arin na dalan an lalakawan kan katawohan dai nakaolang sa saiya na ihula an mga ibubunga kan marahay o maraot na mga gawe nin tawo. An sarong mekaniko na pinatatanidan an sarong drayber manongod sa diperensia kan saiyang sasakyan dai puwedeng papanimbagon kun may mangyaring aksidente o akusaron nin patienot na pagtalaga kaiyan. Siring man kaiyan, an Dios dai puwedeng akusaron nin patienot na pagtalaga sa mamondong mga ibinunga kan mga gawe nin mga indibiduwal.

Totoo man iyan sa mga gikan kan enot na tawong mag-agom. Bago ginadan ni Cain an saiyang tugang, pinapili ni Jehova si Cain. Dadaogon daw nia an kasalan, o an kasalan an madaog sa saiya? Mayong nagpaparisa sa tala na patienot na itinalaga ni Jehova na an maraot an pipilion ni Cain asin gagadanon an saiyang tugang.​—Genesis 4:​3-7.

Kan huri, pinatanidan kan Pagboot ni Moises an mga Israelita manongod sa mangyayari kun bumaya sinda ki Jehova, halimbawa, paagi sa pag-agom hale sa paganong mga nasyon. Talagang nangyari an ihinula. Maheheling ini sa halimbawa ni Hadeng Salomon, na sa saiyang huring mga taon naimpluwensiahan kan saiyang mga agom na tagaibang banwaan na gumibo nin idolatriya. (1 Hade 11:​7, 8) Iyo, pinatanidan nin Dios an saiyang banwaan, alagad dai nia patienot na itinalaga an saindang indibiduwal na igagawe.

An mga pinili dinagka na magpadagos kun habo nindang mawaran kan ipinanugang balos na paghade sa kalangitan kaiba ni Cristo. (2 Pedro 1:10; Kapahayagan 2:​5, 10, 16; 3:11) Siring sa ihinapot kan nagkapirang enot na teologo, Taano ta itinao an siring na mga pagirumdom kun dai na mababago an pag-apod sa mga pinili?

Patienot na Pagtalaga Asin an Pagkamoot nin Dios

An tawo tinawan nin libreng kabotan, na linalang “sa ladawan nin Dios.” (Genesis 1:27) An libreng kabotan dai puwedeng mayo kun an tawo dapat na magtao nin onra asin maglingkod sa Dios huli sa pagkamoot, bakong arog sa mga robot na an kada hiro patienot nang dineterminaran. An pagkamoot na ipinaheheling kan intelihente, talingkas na mga linalang magpapangyari sa Dios na mapahimutikan an bakong makatanosan na mga sahot. Sia nagsasabi: “Magpakadonong ka, aki ko, asin paogmaha an sakong puso, tanganing makasimbag ako sa nagduduhagi sako.”​—Talinhaga 27:11.

Kun an mga lingkod nin Dios patienot nang itinalaga​—o iprinograma, sabi ngani—​bako daw na puwedeng pagdudahan an pagigin tunay kan pagkamoot ninda sa saindang Kaglalang? Siring man, bako daw na kontra sa dai pagpapalaen nin Dios na gumibo sia nin patienot nang itinalagang pagpili nin mga tawo na nakatalaga sa kamurawayan asin kaogmahan na dai kinokonsiderar an saindang indibiduwal na mga merito? Saro pa, kun an iba nag-aako nin siring na pagpaorog, mantang an iba nakatalaga sa daing sagkod na silot, ini nungkang makakapukaw nin sinserong mga pagmate nin pagpasalamat sa “mga pinili.”​—Genesis 1:27; Job 1:8; Gibo 10:​34, 35.

Sa katapustapusi, sinabihan ni Cristo an saiyang mga disipulo na ihulit an maogmang bareta sa bilog na katawohan. Kun pinili na nin Dios an mga ililigtas, bako daw na papaluyahon kaini an kaigotan na ipinaheheling kan mga Kristiano sa pag-eebanghelyo? Bako daw na gigibohon sana kaiyan na daing kamanungdanan an paghuhulit?

An daing ipinapalaen na pagkamoot nin Dios iyo an pinakamakosog na puwersa na puwedeng magpahiro sa mga tawo na kamotan man sia. An pinakadakulang kapahayagan kan pagkamoot nin Dios iyo an pag-atang kan saiyang Aki para sa bakong sangkap, makasalan na katawohan. An patienot na pakaaram nin Dios mapadapit sa saiyang Aki sarong espesyal na kaso, pero sinisierto kaiyan sato na an mga panuga sa pagbalik liwat na nasasarig ki Jesus talagang maootob. Kaya magtubod logod kita sa Aking iyan asin dumayupot sa Dios. Ipaheling ta an satong apresasyon paagi sa pag-ako sa imbitasyon nin Dios na pumoon nang magkaigwa nin marahay na relasyon sa satong Kaglalang. Ngonyan, ipinaaabot nin Dios an imbitasyon na ini sa gabos na gustong gamiton an saindang libreng kabotan asin ipaheling an saindang pagkamoot sa saiya.

[Nota sa Ibaba]

[Kahon sa pahina 7]

PATIENOT NA ITINALAGA BILANG SARONG GRUPO

“Idtong patienot nang minidbid nin Dios saiya man na patienot nang itinalaga na magin kabaing kan saiyang Aki, tanganing sia magin panganay sa dakol na magturugang. Asin an mga patienot na niang itinalaga, inapod man nia; idtong saiyang mga inapod, pinakangmatanos man nia; idtong saiyang pinakangmatanos, saiya man na pinamuraway.” (Roma 8:29, 30, New International Version) Paano daw niato maninigong saboton an terminong “patienot nang itinalaga” na ginamit ni Pablo sa mga bersikulong ini?

An pangangatanosan digdi ni Pablo bakong dai maninigaran na argumento apabor sa indibiduwal na patienot na pagtalaga. Sa pagpoon kan satong siglo, ipinaliwanag kan Dictionnaire de théologie catholique an mga argumento ni Pablo (Roma, kapitulo 9-11) nin siring kaini: “Nag-oorog nanggad, an lakop na opinyon sa tahaw kan mga iskolar na Katoliko iyo na an aktuwal na ideya nin patienot na pagtalaga sa buhay na daing sagkod dai isinabi.” Dangan kinotar kan libro man sanang iyan si M. Lagrange na nagsasabi: “An hapot na sa pangenot ipinaliliwanag ni Pablo bako nanggad manongod sa patienot na pagtalaga asin pagtalaga sa kalaglagan kundi manongod sana sa pag-apod sa mga Hentil sa grasya nin Kristianismo, na an kabaliktaran kaiyan iyo an kawaran nin pagtubod kan mga Judio. . . . Iyan manongod sa mga grupo, mga Hentil, mga Judio, asin bakong direkta sa espisipikong mga indibiduwal.”​—Samo an italiko.

Dai pa sana nahaloy, an The Jerusalem Bible nagtao nin kaparehong konklusyon manongod sa mga kapitulong ini (9-11), na nagsasabi: “An tema kan mga kapitulong ini, kun siring, bakong an problema manongod sa indibiduwal na patienot na pagtalaga sa kamurawayan, o sa pagtubod pa ngani, kundi manongod sa kabtang kan Israel sa pagkabilog kan kasaysayan nin kaligtasan, an solamenteng problema na pinalataw kan mga tataramon sa D[aan] na T[ipan].”

An huring mga bersikulo kan Roma kapitulo 8 konektado sa iyo man sanang konteksto. Kaya, an mga bersikulong ini makatanosan na makapagigirumdom sato na patienot nang naheling nin Dios an pag-eksister nin sarong grupo gikan sa tahaw kan katawohan na aapodon tanganing maghade kaiba ni Cristo, saka an mga kahagadan na dapat nindang otobon​—asin ginibo ini na dai patienot na isinasabi an espisipikong mga indibiduwal na pipilion, huli ta magigin kontra iyan sa saiyang pagkamoot asin hustisya.