Mga Hapot Hale sa mga Parabasa
Sono sa Galacia 6:8, “an nagtatanom sa laman mag-aani man nin pagkatunaw sa laman, alagad an nagtatanom sa espiritu mag-aani nin buhay na daing katapusan gikan sa espiritu.” Anong “espiritu” an boot na ipakahulogan, asin paano kita maani nin buhay paagi kaiyan?
An Hebreo asin Griegong mga termino na trinadusir na “espiritu” igwa nin manlaenlaen na kahulogan, arog kan: (1) puersa aktiba nin Dios, (2) an puersa nin buhay sa mga tawo o hayop, (3) an nakapahihirong puersa nin isip nin sarong persona, asin (4) sarong espiritung persona, o anghel. An primero sa mga ini—puersa aktiba nin Dios—iyo an kahulogan na manonompongan niato sa Galacia 6:8.
Bilang nakatatabang na impormasyon, mangnoha an Galacia 3:2, kun saen manonompongan niato an primerong paggamit nin “espiritu” sa libro nin Galacia. Hinapot ni Pablo an mga Kristiano: “Kamo daw nag-ako kan espiritu huli sa mga gibo sono sa pagboot o huli sa pagdangog paagi sa pagtubod?” Dangan, sa Galacia 3:5, ikinonektar nia an “espiritu” na iyan sa makapangyarihan na mga gibo. Kaya an “espiritu” na sinasabi nia iyo an banal na espiritu, an dai naheheling na puersa aktiba nin Dios.
Paghaloyhaloy, sa Galacia 5:16, ipinaheling ni Pablo an pagkakalaen nin espiritu asin nin laman. Mababasa niato: “Ako nagsasabi, Magpadagos kamong maglakaw sa espiritu asin dai kamo makakagibo nin ano man na horot nin laman.” Sa “horot nin laman” an boot niang sabihon makasalan na laman nin tawo. Kaya, sa Galacia 5:19-23, ilinista nia an “mga gibo nin laman” na nalalaen sa “bunga kan espiritu.”
Kun siring, sa Galacia 6:8, an tawong “nagtatanom sa laman” iyo an saro na nagtotogot na giyahan sia kan makasalan na mga horot nin tawo, na nagpapangana sa “mga gibo nin laman.” Tibaad maeksperyensiahan nia an nakararaot na mga epekto kan siring na gawe, asin kun dai sia magbago, sia siertong dai makamit nin buhay sa o sakop kan Kahadean nin Dios.—1 Corinto 6:9, 10.
Bilang debotadong mga Kristiano dapat niatong mawoton na ‘magtanom sa espiritu nin Dios.’ Kalabot dian an pamumuhay sa paagi na nagtotogot sa banal na espiritu na magpunsionar na mayong kaolangan sa satong buhay, na minatabang sato na ipaheling an bunga kaiyan. Dapat niatong girumdomon iyan kun kita nagdedesisyon kun ano an babasahon o kun anong mga programa sa telebisyon an dadalanon. Kita nagtatanom sa espiritu mantang kita nagtatao nin atension sa mga pagtiripon kan kongregasyon asin naghihingoang ikaaplikar an sadol kan ninombrahan nin espiritung kamagurangan.—Gibo 20:28.
Nakaiinteres, minatapos an Galacia 6:8 na may pagseguro na kun kita magtanom na kaoyon sa banal na espiritu, kita makakalinya na ‘mag-ani nin buhay na daing katapusan gikan sa espiritu.’ Iyo, basado sa pantubos ni Cristo, an Dios matao nin daing sagkod na buhay paagi sa paghiro kan banal na espiritu.—Mateo 19:29; 25:46; Juan 3:14-16; Roma 2:6, 7; Efeso 1:7.