Dinadaog nin Pagkamoot an Salang Pag-imon
“An pagkamoot bakong maimon.”—1 CORINTO 13:4.
1, 2. (a) Ano an sinabi ni Jesus sa saiyang mga disipulo manongod sa pagkamoot? (b) Posible daw na magin pareho mamomoton asin maimon, asin taano ta siring an saindong simbag?
AN PAGKAMOOT sarong nagpapamidbid na tanda nin tunay na Kristianismo. “Paagi kaini an gabos makaaaram na kamo an sakong mga disipulo, kun kamo nagkakaminorootmootan,” an sabi ni Jesu-Cristo. (Juan 13:35) Pinasabngan si apostol Pablo na ipaliwanag kun paano maninigong makaapektar sa Kristianong relasyon an pagkamoot. Kabilang sa iba pang bagay, isinurat nia: “An pagkamoot bakong maimon.”—1 Corinto 13:4.
2 Kan isurat ni Pablo an mga tataramon na iyan, pinanonongdan nia an salang pag-imon. Ta kun bako dai kutana nia masasabihan an kongregasyon man sanang iyan: “Ipinangingimon ko kamo nin diosnon na pangimon.” (2 Corinto 11:2) Napukaw an saiyang “diosnon na pangimon” huli sa mga tawo na nagin nakararaot na impluwensia sa kongregasyon. Pinahiro kaini si Pablo na padarahan an mga Kristiano sa Corinto nin ikaduwang ipinasabong na surat na igwa nin dakol na mamomoton na sadol.—2 Corinto 11:3-5.
Pag-imon sa Tahaw nin mga Kristiano
3. Paano an sarong problema na kalabot an pag-imon naglataw sa tahaw kan mga Kristiano sa Corinto?
3 Sa enot niang surat sa mga taga-Corinto, kinaipuhan na husayon ni Pablo an sarong problema na nakaoolang sa bagohan na mga Kristianong ini na magkaoroyon. May ilinalangkaw sindang nagkapirang tawo, na ‘nagpapaabaw-abaw an balang saro apabor sa saro tumang sa saro.’ Nagbunga ini nin pagkabaranga sa laog kan kongregasyon, na may mga nagsasabi: “Ako ki Pablo,” “Alagad ako ki Apolos,” “Alagad ako ki Cefas.” (1 Corinto 1:12; 4:6) Sa paggiya kan banal na espiritu, nahimo ni apostol Pablo na aramon an gamot kan problema. An mga taga-Corinto minagawe nin arog sa mga tawong makalaman an kaisipan, bakong arog sa “mga tawong espirituwal.” Sa siring, si Pablo nagsurat: “Kamo makalaman pa. Huli ta mantang igwa nin pag-imon asin pasuruhay dian sa saindo, bako daw na kamo makalaman asin bako daw na kamo naglalakaw nin siring sa mga tawo?”—1 Corinto 3:1-3.
4. Anong ilustrasyon an ginamit ni Pablo tanganing tabangan an saiyang mga tugang na makaabot sa tamang punto-de-vista dapit sa lambang saro, asin anong leksion an satong manonodan digdi?
4 Tinabangan ni Pablo an mga taga-Corinto na masabotan an tamang punto-de-vista dapit sa mga kakayahan asin abilidad nin manlaenlaen na miembro sa kongregasyon. Sia naghapot: “Siisay an nagpapalaen sa saimo? Sa katunayan, ano an rogaring mo na dai mo inako? Ngonyan, kun iyan inako mo, tadaw ta nagpapaabaw-abaw ka na garo baga dai mo iyan inako?” (1 Corinto 4:7) Sa 1 Corinto kapitulo 12, ipinaliwanag ni Pablo na an mga kabilang sa kongregasyon kaagid kan manlaenlaen na kabtang nin hawak nin tawo, arog baga kan kamot, mata, asin talinga. Idinoon nia na ginibo nin Dios an mga kabtang kan hawak sa paagi na an mga iyan nagmiminakolgan. Si Pablo nagsurat man: “Kun an sarong kabtang napamumuraway, an gabos na ibang kabtang naggagayagaya na kadamay kaiyan.” (1 Corinto 12:26) An prinsipyong ini maninigong iaplikar kan gabos na lingkod nin Dios ngonyan sa saindang relasyon sa lambang saro. Imbes na mag-imon sa iba huli sa asignasyon o mga naginibo kaini sa paglilingkod sa Dios, maninigo kitang makigayagaya sa sarong iyan.
5. Ano an ihinayag sa Santiago 4:5, asin paano itinatampok kan Kasuratan an pagigin totoo kan mga tataramon na ini?
5 Totoo, ini mas madaling sabihon kisa sa gibohon. An kagsurat sa Biblia na si Santiago pinagigirumdom kita na an “tendensia na mauri” nasa lambang makasalan na tawo. (Santiago 4:5) Nangyari an enot na kagadanan nin tawo huli ta napadara si Cain sa saiyang salang pag-imon. Si Isaac pinaglamag kan mga Filisteo huli ta nauri sinda sa padagos na pag-asenso nia. Si Raquel nag-imon sa pagkamainaki kan saiyang tugang na babae. An mga aking lalaki ni Jacob nag-imon sa pabor na ipinaheling sa saindang ngohod na tugang na si Jose. Si Miriam malinaw na nag-imon sa saiyang kunyada na bakong Israelita. Sinda Core, Datan, asin Abiram may pagkauring nagkasapakat tumang ki Moises asin Aaron. Si Hadeng Saul nag-imon sa militar na mga kapangganahan ni David. Mayong duwa-duwa na pag-imon man an sarong dahelan kan paorootrong diriskutiran kan mga disipulo ni Jesus manongod sa kun siisay an pinakadakula sa sainda. An katunayan iyo na mayong bakong sangkap na tawo na biyong dai nin makasalan na “tendensia na mauri.”—Genesis 4:4-8; 26:14; 30:1; 37:11; Bilang 12:1, 2; 16:1-3; Salmo 106:16; 1 Samuel 18:7-9; Mateo 20:21, 24; Marcos 9:33, 34; Lucas 22:24.
Sa Kongregasyon
6. Paano makokontrol nin kamagurangan an tendensia na mauri?
6 An gabos na Kristiano kaipuhan na mag-ingat tumang sa pagkauri asin salang pag-imon. Kabale digdi an mga grupo nin mga magurang na ninombrahan na mag-asikaso sa mga kongregasyon kan banwaan nin Dios. Kun an sarong magurang sa kongregasyon may kababaan nin isip, dai nia ambisyosong hihingoahon na labawan an iba. Sa ibong na kampi, kun an sarong magurang sa kongregasyon igwa nin nangongorog na mga abilidad bilang paraorganisar o espiker sa publiko, ipaggagayagaya ini kan iba, na minamansay iyan bilang sarong bendisyon sa kongregasyon. (Roma 12:15, 16) An sarong tugang na lalaki tibaad marahay an pag-oswag, na may ebidensia nin pagpaluwas kan mga bunga kan espiritu nin Dios sa saiyang buhay. Kun pinag-oorolayan an saiyang mga kualipikasyon, maninigong mag-ingat an kamagurangan na dai pagpadakulaon an sarong sadit na pagkukulang tanganing ipangatanosan an dai pagrekomendar sa saiya bilang ministeryal na lingkod o magurang sa kongregasyon. Iyan magpapaheling nin kakulangan nin pagkamoot asin pagkamakatanosan.
7. Anong problema an tibaad lumataw kun an sarong Kristiano magkaigwa nin teokratikong asignasyon?
7 Kun an saro mag-ako nin teokratikong asignasyon o espirituwal na bendisyon, an iba sa kongregasyon kaipuhan na mag-ingat tumang sa pagkauri. Halimbawa, an sarong may kakayahan na tugang na babae tibaad mas parateng ginagamit kisa sa iba sa pagtao nin mga demonstrasyon sa Kristianong mga pagtiripon. Ini tibaad paggikanan nin pag-imon kan nagkapirang tugang na babae. Tibaad kaparehong problema an nangyari ki Euodias asin Sintique sa kongregasyon nin Filipos. An siring na mga babae sa presenteng aldaw tibaad nangangaipo nin maboot na pagpakosog kan kamagurangan tanganing magin mapakumbaba asin “magkasaro sa pag-iisip dian sa Kagurangnan.”—Filipos 2:2, 3; 4:2, 3.
8. An pag-imon puedeng magbunga nin anong makasalan na mga akto?
8 An sarong Kristiano tibaad may aram dapit sa nakaagi nang pagkukulang nin saro na ngonyan may bendisyon na mga pribilehio sa kongregasyon. (Santiago 3:2) Huli sa pag-imon, tibaad magkaigwa nin sugot na isabi ini sa iba asin kustionon an asignasyon sa kongregasyon kan sarong iyan. Ini sarungat sa pagkamoot, na “nakatatahob sa dakol na kasalan.” (1 Pedro 4:8) An maimon na orolay puedeng makaraot sa katoninongan nin sarong kongregasyon. “Kun kamo igwa nin mapait na pag-imon asin pagkamakiiwalon sa saindong puso,” an patanid ni disipulo Santiago, “dai kamo managsag asin magputik tumang sa katotoohan. Ini bakong an kadonongan na hale sa itaas, kundi an daganon, makahayop, sa demonyo.”—Santiago 3:14, 15.
Sa Saindong Pamilya
9. Paano makokontrol nin mag-agom an mga pakamate nin pag-imon?
9 Dakol na pag-agoman an nabibigo huli sa salang pag-imon. Bakong mamomoton an pagpaheling nin kakulangan nin tiwala sa agom. (1 Corinto 13:7) Sa ibong na kampi, an sarong agom tibaad bakong sensitibo sa mga pakamate nin pag-imon kan saro. Halimbawa, an agom na babae tibaad nag-iimon huli sa atension na itinatao kan saiyang agom sa saro na bakong kasekso. O an agom na lalaki tibaad mag-imon huli sa kadakolan nin panahon na ginagamit kan saiyang agom sa pag-asikaso sa sarong nagtitios na paryente. Huling napapasopog sa siring na mga pagmate, an mag-agom tibaad dai na maggirong asin ipaheling an saindang pagkadisganar sa mga paagi na orog na nagpapadepisil sa problema. Imbes, an nag-iimon na agom nangangaipong makikomunikar asin magin sadiosan manongod sa saiyang mga saboot. An agom man kaipuhan na magpaheling nin pagsabot asin magtao nin pag-asegurar kan saiyang pagkamoot. (Efeso 5:28, 29) Tibaad pareho ninda kaipuhan na haleon an mga pakamate nin pag-imon paagi sa paglikay sa mga situwasyon na pinaggigikanan kaiyan. Kun minsan tibaad kaipuhan na tabangan nin sarong Kristianong paraataman an saiyang agom na masabotan na sia nagtatao nin limitado, tamang atension sa mga bakong kasekso tanganing otobon an saiyang mga paninimbagan bilang pastor kan aripompon nin Dios. (Isaias 32:2) Siempre, maninigong mag-ingat an sarong magurang sa kongregasyon na nungkang makatao nin ano man na balidong dahelan nin pag-imon. Nagkakaipo ini nin pagigin timbang, na sinisierto na sia naggagamit nin panahon sa pagpakosog sa saiya mismong relasyon sa agom.—1 Timoteo 3:5; 5:1, 2.
10. Paano matatabangan nin mga magurang an saindang mga aki na mapangganahan an mga pakamate nin pag-imon?
10 Dapat na tabangan man nin mga magurang an saindang mga aki na masabotan an ideya nin salang pag-imon. An mga aki parateng napapalabot sa diriskutiran na nagigin iriwal. Sa parate pag-imon an pinakadahelan. Huling magkakalaen an mga pangangaipo kan lambang aki, an mga aki dai puedeng trataron nin parepareho. Saro pa, kaipuhan na masabotan nin mga aki na an kada saro sa sainda igwa nin magkakalaen na kakosogan asin kaluyahan. Kun an sarong aki perming dinadagka na arogon an ginigibo kan saro pa, tibaad ini magpatalubo nin pagkauri sa saro asin nin kapalangkawan sa saro pa. Huli kaini, maninigong sanayon nin mga magurang an saindang mga aki na sokolon an saindang pag-oswag paagi sa paghorophorop sa mga halimbawa na nasa Tataramon nin Dios, bakong paagi sa pagdinaogan. An Biblia nagsasabi: “Dai kita magin mapalangkaw, na nagpupukaw nin pagdaraogan, na nagpapauroriurihan.” Imbes, “patunayan nin lambang saro an saiyang gibo, dangan may dahelan na siang mag-ogma dapit sa saiya sana, asin bakong sa pagkomparar sa ibang tawo.” (Galacia 5:26; 6:4) An pinakamahalaga, kaipuhan na tabangan nin Kristianong mga magurang an saindang mga aki paagi sa regular na pag-adal sa Biblia, na itinatampok an marahay asin maraot na mga halimbawa na yaon sa Tataramon nin Dios.—2 Timoteo 3:15.
Mga Halimbawa nin Pakadaog sa Pag-imon
11. Paanong si Moises sarong marahay na halimbawa sa pagresolber sa pag-imon?
11 Bakong arog kan gutom sa kapangyarihan na mga lider sa kinaban na ini, “si Moises iyo an pinakamahoyo sa gabos na tawo na yaon sa ibabaw kan daga.” (Bilang 12:3) Kan an pangengenot sa mga Israelita magin magabat na tanganing solohon ni Moises, pinangyari ni Jehova na maghiro an Saiyang espiritu sa 70 iba pang Israelita, na tinatawan sinda nin kapangyarihan na tumabang ki Moises. Kan an duwa sa mga lalaking ini magpoon na gumaweng garo mga propeta, hinona ni Josue na ini nakapaluluya nin dai maninigo sa pangengenot ni Moises. Boot na pogolan ni Josue an mga lalaki, alagad si Moises mapakumbabang nangatanosan: “Nag-iimon ka para sa sako? Dai, kun puede sana magin propeta an bilog na banwaan ni Jehova, huli ta ibubugtak ni Jehova sa sainda an saiyang espiritu!” (Bilang 11:29) Iyo, maogma si Moises kan an iba mag-ako nin mga pribilehio sa paglilingkod. Dai sia maimon na nagmawot nin kamurawayan para sa saiyang sadiri.
12. Ano an nagpangyari ki Jonatan na malikayan an mga pakamate nin pag-imon?
12 An sarong marahay na halimbawa kun paano nangingibabaw an pagkamoot sa posibleng salang mga pakamate nin pag-imon itinao ni Jonatan, an aki kan Israelitang si Hadeng Saul. Si Jonatan an sunod na nakalinyang magmamana kan trono kan saiyang ama, alagad pinili ni Jehova si David, an aki ni Jese, na magin sunod na hade. An dakol na nasa situwasyon ni Jonatan mag-iimon ki David, na an pagheling sa saiya sarong karibal. Minsan siring, an pagkamoot ni Jonatan ki David nakaolang sa pagmateng iyan na dominaron sia. Kan maaraman an pagkagadan ni Jonatan, si David nakasabi: “Nagmomondo ako manonongod sa saimo, tugang kong Jonatan, nagin kang marahayon sa sakuya. An saimong pagkamoot sa sako orog na makangangalas kisa sa pagkamoot nin mga babae.”—2 Samuel 1:26.
An Pinakanangongorog na mga Halimbawa
13. Siisay an pinakamarahay na halimbawa kun dapit sa pag-imon, asin taano?
13 Si Jehova Dios an pinakanangongorog na halimbawa nin saro na nakadadaog minsan sa tamang pag-imon. An siring na mga pagmate napopogolan nia sa sangkap na paagi. An ano man na mapuersang kapahayagan nin pag-imon nin Dios perming kaoyon sa pagkamoot, hustisya, asin kadonongan nin Dios.—Isaias 42:13, 14.
14. Anong halimbawa an itinao ni Jesus na kabaliktaran ki Satanas?
14 An ikaduwang nangongorog na halimbawa nin saro na nagpapaheling nin pakadaog sa pag-imon iyo an namomotan na Aki nin Dios, si Jesu-Cristo. “Minsan ngani sia kabaing nin Dios,” si Jesus “dai nag-isip na man-agaw, an boot sabihon, na sia makapantay sa Dios.” (Filipos 2:6) Kabaliktaran na marhay sa ginibo kan ambisyosong anghel na nagin si Satanas na Diablo! Arog kan “hade nin Babilonya,” may pag-imon na minawot ni Satanas na magin “kabaing kan Kaharohalangkawe” paagi sa paggibo kan saiyang sadiri na karibal na dios tumang ki Jehova. (Isaias 14:4, 14; 2 Corinto 4:4) Prinobaran pa ngani ni Satanas na kombensiron si Jesus na “lumuhod asin gumibo nin sarong akto nin pagsamba” sa saiya. (Mateo 4:9) Alagad mayo nin makapararayo ki Jesus sa saiyang mapakumbabang pagpasakop sa soberaniya ni Jehova. Kabaliktaran ki Satanas, si Jesus “nagpakang-daing halaga asin buminaing sa sarong oripon asin nagin kaagid nin mga tawo. Orog pa kaiyan, kan makua nia an saiyang sadiri na kabaing nin tawo, sia nagpakumbaba asin nagin makinuyog sagkod sa kagadanan, iyo, kagadanan sa hariging pasakitan.” Sinuportaran ni Jesus an pagkamakatanosan kan pamamahala kan saiyang Ama, na biyong isinisikwal an kapalangkawan asin pag-imon kan Diablo. Huli sa kaimbodan ni Jesus, “ilinangkaw sia nin Dios sa superyor na kamugtakan asin may kabootan na itinao saiya an ngaran na halangkaw kisa sa lambang ibang ngaran, tanganing sa ngaran ni Jesus an lambang tuhod lumuhod kaidtong mga nasa langit asin sa daga asin mga nasa irarom kan daga, asin an lambang dila hayag na magmidbid na si Jesu-Cristo iyo an Kagurangnan para sa kamurawayan nin Dios na Ama.”—Filipos 2:7-11.
Pakadaog sa Saindong Pag-imon
15. Taano ta dapat kitang mag-ingat na pogolon an mga pakamate nin pag-imon?
15 Bakong arog nin Dios asin ni Cristo, an mga Kristiano bakong sangkap. Huling makasalan, kun beses tibaad gumawe sinda huli sa makasalan na pag-imon. Imbes na togotan an pag-imon na pahiroon kitang magkritika sa sarong kapagtubod manongod sa sarong sadit na pagkukulang o iniimahinar na sala, kun siring, mahalaga na horophoropon niato an ipinasabong na mga tataramon na ini: “Dai ka magin labi-labi kamatanos, ni magsagin labi-labi kadonong. Taano ka ta magdadara nin kapahamakan sa saimong sadiri?”—Eclesiastes 7:16.
16. Anong marahay na hatol dapit sa pag-imon an itinao sa sarong daan na luwas kan magasin na ini?
16 Dapit sa temang pag-imon, an The Watch Tower na Marso 15, 1911, nagpatanid: “Minsan ngani maninigo kitang magin maigot na marhay, maimon na marhay sa katuyohan kan Kagurangnan, pero dapat niatong siertohon na marhay na iyan bakong pribadong bagay; asin maninigong horophoropon kun baga kita ‘parapakilabot’ o bako. Saro pa, maninigo niatong horophoropon kun baga tibaad tama na an kamagurangan an magresolber kaiyan asin kun baga obligasyon niato o bako na dumolok sa kamagurangan. Kita gabos maninigong magkaigwa nin dakulang pag-imon para sa katuyohan kan Kagurangnan asin sa gibohon kan Kagurangnan, alagad mag-ingat na marhay na bako iyan an maraot na klase . . . sa ibang pagtaram, maninigo niatong seguradohon na marhay na bako iyan na pag-imon sa iba, kundi pag-imon para sa iba, para sa saiyang kapakanan asin ikararahay.”—1 Pedro 4:15.
17. Paano niato malilikayan an makasalan na mga akto nin pag-imon?
17 Paano kita bilang mga Kristiano makalilikay sa kapalangkawan, pag-imon, asin pagkauri? An solusyon nasa pagtogot na sueltong bumolos an banal na espiritu nin Dios sa satong buhay. Halimbawa, kaipuhan kitang mamibi para sa espiritu nin Dios asin para sa tabang sa pagpaheling kan marahay na mga bunga kaiyan. (Lucas 11:13) Kaipuhan kitang umatender sa Kristianong mga pagtiripon, na pinoponan paagi sa pamibi asin yaon dian an espiritu asin bendisyon nin Dios. Saro pa, kaipuhan niatong pag-adalan an Biblia, na ipinasabong nin Dios. (2 Timoteo 3:16) Asin kaipuhan kitang makikabtang sa paghuhulit kan Kahadean na ginigibo paagi sa kapangyarihan kan banal na espiritu ni Jehova. (Gibo 1:8) An pagtabang sa mga kapwa Kristiano na nagtitios nin maraot na eksperyensia saro pang paagi nin pagpadara sa marahay na impluwensia kan espiritu nin Dios. (Isaias 57:15; 1 Juan 3:15-17) An maigot na pag-otob sa Kristianong mga obligasyon na ini matabang na ingatan kita sa makasalan na mga gibo nin pag-imon, ta an Tataramon nin Dios nagsasabi: “Magpadagos kamong maglakaw sa espiritu asin dai kamo makagigibo nin ano man na horot nin laman.”—Galacia 5:16.
18. Taano ta dai niato perming kakaipuhanon na makilaban tumang sa salang mga pakamate nin pag-imon?
18 An pagkamoot enot na nalilista sa mga bunga kan banal na espiritu nin Dios. (Galacia 5:22, 23) An paggibo nin pagkamoot matabang sa sato na makontrol an makasalan na mga tendensia ngonyan. Alagad kumusta sa ngapit? An minilyon na lingkod ni Jehova igwa nin paglaom na mabuhay sa maabot na daganon na Paraiso, kun saen makaaantisipar sinda na makaabot sa pagkasangkap bilang tawo. Sa bagong kinaban na iyan, mangingibabaw an pagkamoot asin mayo nin siisay man na mapadara sa salang mga pakamate nin pag-imon, huli ta “an linalang mismo bubutasan man hale sa kaoripnan sa kalapaan asin magkakaigwa kan mamuraway na katalingkasan kan mga aki nin Dios.”—Roma 8:21.
Mga Puntong Mapaghohorophorop
◻ Anong ilustrasyon an ginamit ni Pablo na makatatabang na tumangon an pag-imon?
◻ Paano puedeng raoton nin pag-imon an katoninongan kan kongregasyon?
◻ Paano masasanay nin mga magurang an saindang mga aki na makapanggana sa pag-imon?
◻ Paano niato malilikayan an makasalan na mga akto nin pag-imon?
[Retrato sa pahina 16]
Dai pagtogotan na raoton nin pag-imon an katoninongan kan kongregasyon
[Retrato sa pahina 17]
Puedeng sanayon nin mga magurang an saindang mga aki na makapanggana sa mga pakamate nin pag-imon