An Katotoohan Manongod sa mga Anghel

Parateng kabale sa pagigin pamilyar sa saro an pakaaram manongod sa pamilya kan sarong iyan. Arog man kaiyan an pakamidbid ki Jehova Dios. Bako sanang pakanood kan saiyang ngaran an kalabot. Dapat man kitang makaaram manongod sa saiyang “pamilya” sa langit. (Ikomparar an Efeso 3:​14, 15.) An mga anghel inaapod kan Biblia na “mga aki” nin Dios. (Job 1:6) Huli sa saindang mahalagang kabtang sa Biblia, maninigong mawoton niato na makanood nin dakol pa manongod sa sainda tanganing masabotan an saindang kabtang sa katuyohan nin Dios.

SARONG bagong grupo an nabibilog. Bako sanang dakol na tawo an nagsasabi na naniniwala sinda sa mga anghel; nagdadakol an nagsasabi na naapektaran ninda. Kan hapoton an 500 na Amerikano, “Personal na daw nindong namatean an presensia nin anghel sa saindong buhay?” haros un-tersio an nagsimbag nin iyo. Makangangalas man an bilang nin mga hoben na naghihingakong naniniwala sa mga anghel​—sono sa sarong surbey sa Estados Unidos, 76 porsiento gabos! Malinaw nanggad, an mga tawo interesado sa mga anghel. Alagad paano nakasosono sa katotoohan kan Biblia an presenteng kaisipan manongod sa mga anghel?

Pagpalibog sa Kabtang ni Satanas

Kun nagtataram dapit sa mga anghel, dai niato maninigong ignorohon an maraot na mga anghel, langitnon na mga linalang na sinasabi kan Biblia na nagrebelde tumang sa Dios. Pangenot sa mga ini si Satanas. An sarong popular na libro na inaapod na Ask Your Angels nagsusuherir na si Satanas saro sanang “aspekto nin Dios” na nakatatabang sa mga tawo na pakosogon an saindang “espirituwal na mga kalamnan” paagi sa danay na pagsugot. Sa ibong kan “mamomoton na mga intension” ni Satanas, sabi kan mga autor, sa laog nin dakol na siglo sia napasalang iinaasosyar sa karatan. Idinadagdag ninda na si Satanas asin si Jesus, “minsan ngani bako nanggad na magkakomplemento, kisuerra magkakampi, mahalagang mga kabtang kan sasarong kabilogan.” Nakabibigla an mga paniniwalang ini, alagad ano an sinasabi kan Biblia?

Linilinaw kan Biblia na si Satanas bakong “sarong aspekto nin Dios” kundi kaiwal nin Dios. (Lucas 10:​18, 19; Roma 16:20) Tinutumang nia an soberaniya ni Jehova, asin an saiyang mga intension sa mga tawo bako nanggad na “mamomoton.” Daing puso niang inuubos an saiyang kaanggotan sa mga lingkod nin Dios digdi sa daga. Inaakusar nia sinda sa atubangan nin Dios aldaw-banggi!a (Kapahayagan 12:​10, 12, 15-17) Si Satanas desididong raoton sinda ano man an mangyari. An saiyang daing herak na paglamag sa matanos na tawong si Job nagbuyagyag kan saiyang bagol nang kaisipan dapit sa pagsakit nin tawo.​—Job 1:​13-19; 2:​7, 8.

Imbes na “magkakampi,” si Satanas asin si Jesus biyong magkatumang. Tara, daing duwa-duwa na si Satanas an nagsutsut ki Herodes na ipagboot an lagduan na paggadan sa mga aki​—na gabos sa paghihingoang gadanon an sadit na aking si Jesus! (Mateo 2:​16-18) Asin an daing ontok na mga atake ni Satanas nagpadagos sagkod kan pagkagadan ni Jesus. (Lucas 4:​1-13; Juan 13:27) Sa siring, imbes na “mahalagang mga kabtang kan sasarong kabilogan,” si Jesus asin si Satanas biyong magkasarungat. An hula sa Biblia nagpapaheling na an saindang pag-iiwal dai malilikayan. (Genesis 3:15) Angay nanggad, an binuhay liwat na si Jesus an malaglag ki Satanas sa itinalaan na panahon nin Dios.​—Kapahayagan 1:18; 20:​1, 10.

Mga Pamibi Kiisay?

An nagkapirang promotor kan mobimiento para sa mga anghel nagrerekomendar nin paghorophorop asin iba pang paagi tanganing makikomunikar sa mga anghel. “An sinserong pakiolay na makikomunikar sa siisay man na miembro kan langitnon na pamilya dai iignorohon,” an sabi nin sarong libro. “Humagad ka asin sisimbagon ka.” Si Miguel, Gabriel, Uriel, asin Rafael kabilang sa mga anghel na irinerekomendar kan libro na konsultahon.b

Minsan siring, tinokdoan ni Jesus an saiyang mga parasunod na mamibi sa Dios, bakong sa mga anghel. (Mateo 6:​9, 10) Kaagid kaiyan, si Pablo nagsurat: “Sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan.” (Filipos 4:6) Sa saindang mga pamibi, kun siring, an mga Kristiano dai minadolok sa kiisay pa man apuera ki Jehova, asin ginigibo ninda iyan sa ngaran ni Jesu-Cristo.c​—Juan 14:​6, 13, 14.

An mga Anghel daw Daing Denominasyon?

Sono ki Eileen Elias Freeman, na namamayo sa AngelWatch Network, “an mga anghel lihis sa lambang relihion, lambang pilosopiya, lambang kredo. Sa totoo, an mga anghel mayo nin relihion siring kan pagkaaram niato.”

Minsan siring, linilinaw kan Biblia na an maimbod na mga anghel talagang igwa nin relihion; sinasamba ninda an tunay na Dios, si Jehova, na habong may makaribal na ibang dios. (Deuteronomio 5:​6, 7; Kapahayagan 7:11) Sa siring, an sarong anghel ilinadawan an saiyang sadiri ki apostol Juan na “kapwa oripon” kan mga nagkukuyog sa mga pagboot nin Dios. (Kapahayagan 19:10) Mayo kitang mababasa sa Biblia dapit sa maimbod na mga anghel na nagsusuportar sa ano man na ibang porma nin pagsamba. Nagtatao sinda ki Jehova nin esklusibong debosyon.​—Exodo 20:​4, 5.

“An Ama kan Kaputikan”

Kalabot sa dakol na pakatupar daa nin mga anghel an pagkomunikar sa mga gadan. “Namatean ko na an sakong amaon nakanompong nin paagi na makaolay ako asin paaramon ako na sia maogma na sa katapustapusi,” sabi nin sarong babae na an ngaran Elise pagkaresibi kan ipinamumugtak niang tanda. Nagigirumdoman man ni Terri an sarong namomotan na katood na nagadan. “Sarong semana pakalobong,” sabi nia, “sinongko nia ako sa hinona kong pangatorogan. Sinabihan nia ako na dai ko maninigong ipagmondo an saiyang paghale, huli ta sia maogma asin matoninong.”

Alagad an Biblia nagsasabi na an mga gadan ‘mayo man lamang nin pakaaram.’ (Eclesiastes 9:5) Iyan nagsasabi man na kun an tawo magadan, “sa aldaw na iyan an saiyang mga pag-iisip napapara.” (Salmo 146:4) Minsan siring, si Satanas iyo “an ama kan kaputikan.” (Juan 8:44) Sia an pinaggikanan kan kaputikan na an kalag nin tawo natatadang buhay pagkagadan. (Ikomparar an Ezequiel 18:4.) Dakol na tawo ngonyan an naniniwala kaini, na nakasosono sa katuyohan ni Satanas, huli ta pigninigaran kaiyan an pangangaipo para sa pagtubod sa pagkabuhay liwat​—sarong pundamental na doktrina nin Kristianismo. (Juan 5:​28, 29) Kaya, an pakikihumapot sa mga gadan o an garo baga pakaresibi nin mga mensahe hale sa sainda saro pang kabtang kan mobimiento para sa mga anghel na dai inooyonan nin Dios.

Pagdolok sa mga Anghel o sa mga Demonyo?

An kadaklan kan presenteng mobimiento para sa mga anghel nakisasale sa okulto. Horophoropa an eksperyensia ni Marcia. “Poon kan Setyembre sagkod Disyembre 1986,” sabi nia, “nagpoon akong makaresibi nin mga mensahe gikan sa ronang ‘lihis sa natural.’ Ako nakaheling nin mga fantasma asin nagkaigwa nin bakong kapanipaniwalang mga pangatorogan dapit sa ‘nakaaging buhay.’ May nakaolay akong mga katood na nagadan na asin nagkaigwa ako nin dakol na iba pang misteryosong eksperyensia na dian may naaraman ako manongod sa mga tawong nakamidbid ko pa sana. Nabiyayaan man ako kan balaog na automatikong pagsurat asin nagpapaabot ako nin mga mensahe gikan sa mga espiritu. An iba, na dai ko noarin man nakamidbid kan sinda buhay pa digdi sa daga, nagpapadara nin mga mensahe sa iba paagi sa sako.”

Lakop an paggamit nin pagtoodtood bilang paagi na “makikomunikar” sa mga anghel. An sarong reperensia direktang dinadagka an mga parabasa kaiyan na gumamit nin may mahikang mga gapo, baraha, sinsilyo sa I Ching, panhihimalad, asin astrolohiya. “Togoti an saindong kairairaroming boot na giyahan kamo pasiring sa tamang orakulo,” an isinurat kan mga autor, “asin manarig kamo na may anghel na masabat sa saindo duman.”

Minsan siring, sono sa Biblia an ano man na ‘magsabat sa saindo duman’ siertong bakong saro sa mga anghel nin Dios. Taano? Huli ta an pagtoodtood direktang pagkontra sa Dios, asin an tunay na mga parasamba​—sa langit asin digdi sa daga—​dai nakikilabot dian. Tara, sa Israel an pagtoodtood sarong kasalan na kagadanan an padusa! “An gabos na naggigibo kan mga bagay na ini makababalde ki Jehova,” an sabi kan Pagboot.​—Deuteronomio 13:​1-5; 18:​10-12.

“Anghel nin Liwanag”

Dai niato maninigong ipagngalas na kayang palatawon kan Diablo na kapakipakinabang an pagtoodtood, sa anghel pa ngani. An Biblia nagsasabi na si Satanas “nagmamalemale na anghel nin liwanag.” (2 Corinto 11:14) Kaya ngani niang mag-imbento nin mga tanda dangan papangyarihon iyan, na dinadaya an mga nakaheheling na isipon ninda na an tanda gikan sa Dios. (Ikomparar an Mateo 7:​21-23; 2 Tesalonica 2:​9-12.) Alagad an gabos na gibo ni Satanas​—dawa kun gurano iyan karahay o karaot sa pagheling—​nakaootob sa saro sa duwang katuyohan: patumangon ki Jehova an mga tawo o butahon sana an saindang kaisipan tanganing ‘an liwanag kan mamuraway na maogmang bareta manongod ki Cristo dai sumirang.’ (2 Corinto 4:​3, 4) An ikaduwang paaging ini nin pandadaya an parateng pinakaepektibo.

Horophoropa an tala sa Biblia dapit sa sarong oripon na daragita kaidtong enot na siglo. An saiyang mga hula nagtao nin dakulang ganansia sa saiyang mga kagurangnan. Dakol na aldaw na sia nagsusunodsunod sa mga disipulo, na nagsasabi: “An mga lalaking ini mga oripon kan Kaharohalangkaweng Dios, na nagbabalangibog sa saindo kan dalan nin kaligtasan.” Totoo an saiyang mga tataramon. Pero, an tala nagsasabi sa sato na sia sinasaniban, bakong nin anghel, kundi nin “sarong demonyo sa pagtoodtood.” Sa kahurihurihi, si Pablo “nagsalingoy patin nagsabi sa espiritu: ‘Ako nagboboot sa saimo sa ngaran ni Jesu-Cristo na lumuwas sa saiya.’ Asin luminuwas iyan kan mismong oras na idto.”​—Gibo 16:​16-18.

Taano ta pinaluwas ni Pablo an espiritung ini? Total, iyan nagtao nin dakulang entrada sa mga kagurangnan kan daragitang sinasaniban nin demonyo. Igwa nin mga kapangyarihan na lihis sa natural, an oripon na daragita tibaad sinasabihan an mga paraoma kun noarin matanom, an mga daraga kun noarin mapaagom, asin an mga paramina kun saen mahanap nin bulawan. Tara, pinangyari pa ngani kan espiritung ini na an daragita magtaram nin nagkapirang totoong tataramon, na hayag na inoomaw an mga disipulo!

Minsan siring, iyan “sarong demonyo sa pagtoodtood.” Bilang siring, mayo iyan nin diretso na magbalangibog manongod ki Jehova asin sa saiyang probisyon para sa kaligtasan. An mapag-omaw na pananaram kaiyan, na posibleng isinabi tanganing palatawon na totoo an mga hula kan oripon na daragita, irinayo sa tunay na mga parasunod ni Cristo an atension kan mga nagheheling. May marahay na dahelan, pinatanidan ni Pablo an mga taga-Corinto: “Dai kamo puedeng makikakan sa ‘lamesa ni Jehova’ asin sa lamesa nin mga demonyo.” (1 Corinto 10:21) Bakong makangangalas na an mga Kristiano kan enot na siglo rinaot an gabos nindang libro na konektado sa pagtoodtood.​—Gibo 19:19.

Sarong “Anghel na Naglalayog sa Tahaw kan Langit”

Siring kan satong naheling, ibinubuyagyag kan Biblia an kadaklan sa presenteng mobimiento para sa mga anghel bilang konektadong marhay sa Kaiwal nin Dios, si Satanas na Diablo. Nangangahulogan daw ini na an banal na mga anghel bakong kalabot sa mga aktibidad nin tawo? Sa kabaliktaran, sinda ngonyan may makapangyarihan na ginigibo digdi sa daga. Ano iyan? Tanganing masimbag, dapat niatong helingon an libro kan Biblia na Kapahayagan. An mga anghel mas dakol na beses na nasasambitan sa librong ini kisa sa ibang libro kan Biblia.

Sa Kapahayagan 14:​6, 7, mababasa ta an rekord ni apostol Juan dapit sa sarong makahulang bisyon na inako nia: “Naheling ko pa an sarong anghel na naglalayog sa tahaw kan langit, asin igwa sia nin daing katapusan na maogmang bareta na ipahahayag sa mga nag-eerok sa daga, asin sa lambang nasyon asin tribo asin tataramon patin banwaan, na nagsasabi sa makosog na tingog: ‘Matakot sa Dios asin pamurawayon sia, huli ta nag-abot na an oras kan saiyang paghokom, asin kaya sambahon an Saro na naglalang kan langit asin daga asin dagat asin mga burabod nin tubig.’”

Itinatampok kan tekstong ini an pangenot na gibohon kan mga anghel ngonyan. Kalabot sinda sa sarong asignasyon na dapat na enoton​—an pagpahayag kan maogmang bareta kan Kahadean nin Dios. Mapadapit sa gibohon na ini na si Jesus nanuga sa saiyang mga disipulo: “Ako danay na nasa saindo sagkod sa pagtatapos kan palakaw nin mga bagay.” (Mateo 28:​18-20) Paanong si Jesus nasa kaibanan kan saiyang mga parasunod? An sarong paagi iyo an pagtao sainda kan tabang nin mga anghel tanganing mahaman an dakulaon na gibohon na ini.

An Mga Saksi ni Jehova naggagamit nin labing sarong bilyon na oras taon-taon sa paghuhulit kan maogmang bareta kan Kahadean nin Dios. Mantang ginigibo ini, naheheling ninda an ebidensia kan paggiya nin mga anghel. Sa saindang ministeryo sa harong-harong, parateng nangyayari na may nakakaolay sindang mga indibiduwal na natatapos pa sanang mamibi na logod may sarong tumabang sa sainda na masabotan an mga katuyohan nin Dios. An paggiya nin mga anghel, kadungan kan mismong inisyatiba kan mga Saksi, nagbubunga nin ginatos na ribong nakamimidbid ki Jehova kada taon!

Naghihinanyog daw kamo sa anghel na naglalayog sa tahaw kan langit? Pagsongko kan Mga Saksi ni Jehova, taano ta dai mas lubos na ipakipag-olay sa sainda an mensaheng ini nin mga anghel?

[Mga Nota sa Ibaba]

[Kahon sa pahina 8]

SAIRISAY AN ANGHEL?

KABALIKTARAN sa paniniwala nin dakol, an mga anghel bakong nagluwas na kalag nin mga tawo na nagadan na. An Biblia malinaw na nagsasabi na an mga gadan ‘mayo man lamang nin pakaaram.’ (Eclesiastes 9:5) Saen, kun siring, naggikan an mga anghel? An Biblia nagsasabi na sinda saro-sarong linalang nin Dios bago pa lalangon an daga. (Job 38:​4-7) An kabilangan kan langitnon na pamilya nin Dios tibaad ginatos na milyon, posibleng binilyon o labi pa! An ibang anghel uminiba ki Satanas sa saiyang pagrebelde.​—Daniel 7:10; Kapahayagan 5:11; 12:​7-9.

Mantang si Jehova Dios nin areglo, bakong makangangalas na organisado an saiyang dakulaon na pamilya nin mga anghel.​—1 Corinto 14:33.

• An pangenot na anghel, kapwa sa kapangyarihan asin autoridad, iyo an arkanghel, si Jesu-Cristo, na inaapod man na Miguel. (1 Tesalonica 4:16; Judas 9) Nasa irarom kan saiyang autoridad an mga serafin, kerubin, asin anghel.

• An mga serafin nag-aasikaso sa trono nin Dios. Malinaw na kabale sa saindang asignasyon an pagpahayag kan kabanalan nin Dios asin pagpapadanay sa saiyang banwaan na malinig.​—Isaias 6:​1-3, 6, 7.

• An mga kerubin maheheling man na kaibanan ni Jehova. Bilang mga paradara o parahatod kan trono nin Dios, sinusuportaran ninda an kamahalan ni Jehova.​—Salmo 80:1; 99:1; Ezequiel 10:​1, 2.

• An mga anghel (na nangangahulogan “mga mensahero”) ahente asin representante ni Jehova. Ginigibo ninda an kabotan nin Dios, baga man kalabot dian an pagligtas sa banwaan nin Dios o paggadan sa mga maraot.​—Genesis 19:​1-26.

[Mga retrato sa pahina 7]

Naghihinanyog daw kamo sa anghel na naglalayog sa tahaw kan langit?