Bareta kan mga Parabalangibog kan Kahadean
An Pagpapatotoo Nagbubunga sa Harong Asin sa Eskuelahan
KALABOT sa buhay nin sarong Kristiano an paggibo nin marahay sa iba, nangorogna paagi sa paghiras sa sainda kan maogmang bareta kan Kahadean nin Dios. An Talinhaga 3:27 nagsasabi: “Dai mo ipanguri an marahay sa mga nanonongdan kaiyan, kun nasa kapangyarihan kan saimong kamot na gibohon iyan.” Sa Argentina an sarong hoben na Saksi na nasa tersera anyo sa haiskul nagmawot na ihiras an maogmang bareta kan Kahadean sa sarong amigo sa eskuelahan. An paggibo nia kaiyan nagkaigwa nin mahiwas an naabot na mga resulta.
Sarong aldaw an hoben na Saksi nagsabi sa saiyang amigo na bakong gabos na relihion marahay. Kan an hoben na lalaki magsimbag na dai man siang ginigibong maraot, an Saksi nagsabi: “Ni may ginigibo ka man para sa Dios.” Pinapag-isip kaini an hoben. Pagkatapos ipinaliwanag kan Saksi na ini na an huring mga aldaw asin tanganing makamtan an pag-oyon nin Dios, an saro dapat na magkaigwa nin tamang kaaraman sa Biblia asin iaplikar iyan. Uminoyon an saiyang amigo sa eskuelahan. Alagad totogotan daw sia kan saiyang pamilya na mag-adal sa Biblia? Tanganing tawan nin mapaghohorophorop an saiyang amigo, ipinakiolay sa saiya kan Saksi na basahon an librong Puwede Kamong Mabuhay Sagkod Lamang sa Paraiso Digdi sa Daga.
Nag-agi an panahon, asin an amigo nagpondo sa pag-eskuela. Labing sarong taon na mayo nin bareta dapit sa saiya. Dangan sarong aldaw an hoben na Saksi nabiglang makaresibi nin apod sa telepono hale sa saiyang amigo na nagsabi na naheheling nia na talagang naootob an mga hula sa Biblia. Tolos-tolos na iinareglo kan Saksi na pag-adalan an Biblia kaiba nia.
Kan magduman sia sa harong kan saiyang dating amigo sa eskuelahan, narisa nia na an mga magurang kan saiyang amigo nahahadit na marhay kun sa ano napapalabot an saindang aki. Pati an ngohod na tugang kan saiyang amigo naghona na ini nabubua na. Kaya an ngohod na tugang pinasabay kan mga magurang sa sunod na pag-adal. Pakatapos kaidto, may mga luha sa saiyang mga mata, an hoben na lalaking ini nagbareta sa mga magurang na an saiyang matuang tugang bakong bua, na ikinakagsing kan ina, “Imbes na saro an problema ko, duwa na ngonyan!”
Huli kaini, sa sunod na pag-adal sia mismo presente asin uminoyon na an mga barobata bakong bua. Kan huri sarong pag-adal sa Biblia an iinareglo kaiba sia asin an saiyang agom. Dai nahaloy an bilog na pamilya nagpoon nang umatender sa mga pagtiripon kan kongregasyon sa Kingdom Hall. Pag-abot nin panahon, an mga apoon nagpoon man na mag-adal sa Biblia asin magduman sa mga pagtiripon. Poon kaidto, nabautismohan na an enot na hoben na lalaki. Nag-agom sia, asin sinda mag-agom maigot na mga parahayag.
Dugang pa, paagi sa impormal na pagpapatotoo sa eskuelahan, an hoben na Saksi may natabangan pang duwang kaeskuela saka an ina asin tugang na babae kan saro sa sainda na pumoon na mag-adal sa Biblia. Gabos-gabos, 11 katawo an nakanood kan katotoohan sa Biblia huli ta an hoben na Saksi dai nagpogol sa paggibo nin marahay sa saiyang mga kaeskuela. Kanigoan kaogmang resulta! Tunay nanggad, “Maogma an banwaan na an Dios iyo si Jehova!”—Salmo 144:15.