Sinda Nagtiripon Bilang Magayagayang mga Paraomaw
AN SUANOY na banwaan ni Jehova Dios pinagbotan na “magin daing iba kundi magayagaya” kun sinda nagtitiripon para sa pagsamba. (Deuteronomio 16:15) An “Magayagayang mga Paraomaw” na Pandistritong mga Kombension kan 1995/96 siertong nakatao sa Mga Saksi ni Jehova nin marahay na mga dahelan na maggayagaya.
Poon kan an seryeng ini nin mga kombension magpoon, an mga iyan nakaparigon sa pagtubod. Ipinaheling man kaiyan kun paano makanonompong nin kagayagayahan sa sarong kinaban na daing kagayagayahan. Satong saro-sarong konsideraron an kada aldaw kan kombension.
‘Omawa Nindo si Jehova, Kamo Banwaan . . . Maggayagaya Kamo!’
An nasa enotan na tema kan enot na aldaw kan kombension basado sa Salmo 149:1, 2. An pahayag na “Igwa Kitang Rason na Magkurahaw sa Kagayagayahan” siniyasat an aplikasyon kan hula sa Isaias kapitulo 35. Iyan nagkaigwa nin kaotoban sa suanoy na Israel asin espesyalmente sa satong aldaw sa pagbabalik kan mga parasamba ki Jehova sa prosperidad asin salud sa sarong espirituwal na paraiso. Sa siring, an mga kombensionista nagkaigwa nin rason na magkurahaw sa kagayagayahan huli sa katuyohan nin Dios para sa saiyang banwaan sa sarong espirituwal na paraiso asin sa nagdadangadang na pisikal na Paraiso na harani nang marhay.
An pahayag sa pinakatema na, “Napapalaen Bilang Magayagayang mga Paraomaw sa Bilog na Kinaban,” sinimbag an hapot na: Ano an nagpapalaen sa sato sa kinaban na ini? Iyan iyo an satong nagkakasararong pagsamba ki Jehova. Saen man nag-iistar an Mga Saksi ni Jehova sa dagang ini, sinda nagtataram asin nagtotokdo na may pagkaoroyon. Ipinaggagayagaya man ninda an dakulang katuyohan ni Jehova na pakangbanalon an saiyang banal na ngaran asin ibindikar an saiyang soberaniya paagi sa saiyang Kahadean. Pero, paano kita tinatabangan ni Jehova na magkaigwa nin lugar sa saiyang katuyohan? Itiniwala nia sa sato an katotoohan kan saiyang banal na Tataramon. An Dios nagtao sa sato kan saiyang banal na espiritu. Binendisyonan nia kita nin pambilog na kinaban na kasararoan nin magturugang asin nin areglo para sa dalisay na pagsamba. An satong internasyonal na pamilya tinatabangan kita na maglingkod ki Jehova na may dakulang kagayagayahan nin puso.
Idinoon kan “Pagdadanay na Siblag Asin Daing Digta sa Kinaban” an pangangaipo na likayan na madigtaan kan pagpaorog asin pagpalaenlaen huli sa mga kamugtakan sa buhay. (Santiago 2:5-9) An nagkapira tibaad makiibaiba sana duman sa mga kapareho ninda an pinaghalean o pinansial na kamugtakan, na dai iniintindi an mga kapwa Kristianong pobre o daing sukat. An iba tibaad may tendensiang paboran idtong nasa mga posisyon nin responsibilidad sa kongregasyon. Nalingawan ninda na an pinakadakulang pribilehio na puedeng akoon nin siisay man iyo an pagigin sarong Saksi ni Jehova. Kun siring, dai ta dapat na togotan an kinabanon na mga tendensia na digtaan kita asin raoton an katoninongan kan kongregasyon.—2 Pedro 3:14.
An pahayag na “Andam Na daw Akong Mag-agom?” nagdoon na dakol an naghihidaling mag-agom. An nagkapira naagom tanganing dulagan an masakit na situwasyon sa harong o huli ta an kasarabay ninda nag-aaragom na. Minsan siring, kaiba sa balidong mga rason para sa pag-agom an magkaparehong pagmawot na pag-aaboton an teokratikong mga pasohan, tunay na pagkamoot, pangangaipo nin makakaibaiba asin seguridad, asin an pagmawot na magpadakula nin mga aki. Kaipuhan an espirituwal na pagsasanay sa pag-andam para sa pag-agom. Kabilang kan iba pang bagay, igwa nin pangangaipo na magpatalubo nin marahay na mga kualidad paagi sa pagsolog kan bagong personalidad. Madonong man na aramon kun baga an napiling aagomon nagpapaheling nin ebidensia na may tunay na relasyon ki Jehova asin magalang na tinatratar an iba. Madonong man an paghagad nin hatol sa maygurang na mga Kristiano.—Talinhaga 11:14.
An nagtataong kaliwanagan na pahayag na ini sinundan nin saro na may titulong “Mga Magurang na Nakakukua nin Kaogmahan sa Saindang mga Aki.” An pagkamundag nin sarong omboy parateng panahon nin dakulang paggayagaya. Minsan siring, an pagkaigwa nin mga aki nagtatao man nin dakulang paninimbagan. (Salmo 127:3) Sa siring, mahalagang tokdoan an mga aki na kamotan si Jehova. Magigibo ini kan mga magurang paagi sa regular na pagtaram manongod ki Jehova sa saindang mga aki asin paagi sa pag-aplikar kan mga prinsipyo kan saiyang Tataramon sa laog kan pamilya.
An enot na aldaw kan kombension natapos paagi sa sarong sorpresa—an pagluwas kan bagong brochure na Jehovah’s Witnesses and Education. Malinaw na ipinaliliwanag kaiyan na an mga Saksi “pinaririgon an boot kan saindang mga hoben na magmahigos asin magin seryoso sa mga asignasyon na itinatao sa sainda sa eskuelahan.” Ipinaliliwanag man kan publikasyon na ini an pambihirang mga resulta kan mga klase para sa pagbasa asin pagsurat na kinokondukta nin Mga Saksi ni Jehova sa dakol nang taon sa Nigeria, Mejico, asin iba pang nasyon. An brochure maninigong makatabang sa mga edukador na maheling na tinatawan ta nin dakulang importansia an edukasyon.
“Danay Kitang Magdolot sa Dios nin Atang nin Pag-omaw”
An temang ini kan ikaduwang aldaw basado sa Hebreo 13:15. Iinatubang sa programa sa aga an simposium manongod sa “Paghimate sa Pangapodan na Omawon si Jehova.” Bakong olang an edad sa pagsimbag sa pangapodan na ini. An Salmo 148:12, 13 nagsasadol sa hoben na mga lalaki, daraga, gurang na lalaki, asin mga aking lalaki na omawon si Jehova. Dakol sa magayagayang mga lingkod ni Jehova an nahimong dugangan an saindang pag-omaw. Sa bilog na kinaban, labing 600,000 an nakikakabtang sa pambilog na panahon na paghuhulit, o paglilingkod bilang payunir. Labing 15,000 an nakikakabtang sa gibohon bilang espesyal payunir, asin labing 15,000 an naglilingkod sa Bethel.
An “Maimbod na Paglilingkod Kaiba kan Organisasyon ni Jehova” sarong pahayag na nagpaheling na mahalaga an kaimbodan sa mga lingkod nin Dios. An pagigin maimbod ki Jehova nangangahulogan na pangangapot sa saiya na may debosyon na makosogon kaya iyan nagseserbi na garo matibay na pandukot. An kaimbodan hinahagadan kita na lumikay sa tuyong pagbalga kan mga pagboot sa Biblia, baga man kita naheheling o dai nin iba. Hinahagad man kaiyan na maimbod na suportaran niato an mga katokdoan sa Biblia na makukua sa mga magasin na An Torrengbantayan asin Awake! siring man an gabos na iba pang espirituwal na kakanon na itinatao kan Watch Tower Society. An pahayag na ini sinundan kan pahayag sa bautismo. Kanigoan an kagayagayahan kan an mga kandidato sa bautismo nagtao nin ebidensia kan saindang pagdusay ki Jehova!
An mga tataramon sa Oseas 4:1-3 nagin basihan para sa pahayag sa hapon na “Karahayan o Bisyo—Arin an Saimong Pinag-aaabot?” Dawa an pagmansay kan kinaban sa karahayan ruminuro, an mga Kristiano kaipuhan na gumibo nin “odok na paghihingoa” na pag-aaboton an moral na pagkaekselente. (2 Pedro 1:5) Minapoon ini sa kun paano nag-iisip an sarong tawo. Kun an saiyang kaisipan marahay, sia magtataram nin malinig, kapakipakinabang, asin nakapakokosog na mga tataramon asin magmamaigot na magin sadiosan sa saiyang relasyon sa iba. Kalabot man sa pag-aaabot sa karahayan an pagmamaigot na magin mapagsabot asin maheherakon sa kapwa Kristiano na nakamamate nin kasakitan asin makuring kamondoan.—1 Tesalonica 5:14.
An saro pang pahayag, “Mag-ingat Tumang sa mga Siod kan Diablo,” nagpatanid sa mga Kristiano tumang sa pagsapeligro kan saindang sadiri sa mga impluwensia nin demonyo. Sa langtad nin pagbobolong sa mga kahelangan, kaipuhan kan mga Kristiano na magin maingat sa mga paagi, siring kan hipnotismo, na may okultismo. Apuera kaiyan, an ginigibo kan mga indibiduwal tanganing pangatamanan an saindang pisikal na salud sarong personal na bagay.
An ikaduwang aldaw natapos sa sarong magayagayang sorpresa—an pagluwas nin sarong pambulsang publikasyon na dinisenyo tanganing tabangan an mga tawong sadiosan an puso na umoswag nin marikas pasiring sa pagdusay asin bautismo. An bagong 192-pahinas na librong ini may titulong Kaaraman na Minagiya Pasiring sa Buhay na Daing Katapusan. An librong Kaaraman iinaatubang an katotoohan sa nakapakokosog na paagi. Iyan dai nagkokonsentrar sa pagpahimutik sa falsong mga doktrina. An malinaw na pananaram asin lohikong pagkasunodsunod maninigong magpapasil sa paggamit kan librong ini sa pagkondukta nin mga pag-adal sa Biblia asin tumabang sa mga tawo na masabotan an nakaoogma sa pusong kaaraman nin Dios.
“Mag-ogma Kamo, Banwaan, Asin Maggayagaya Kamo Sagkod Lamang”
An mga tataramon na ini hale sa Isaias 65:18 an tema kan ikatolong aldaw kan kombension. An kaotoban kan hula sa Biblia nagtotokdo sa 1914 bilang an taon na an maraot na palakaw na ini luminaog sa huring mga aldaw. Huli kaini, an mga pahayag sa simposium na may titulong “Magayagayang mga Paraomaw Durante kan Pagtatapos kan Palakaw na Ini” nakakua kan dai nababangang atension kan mga nagdadangog. Ipinaheling kan mga espiker kun paano naiimpluwensiahan na marhay an binilyon kan paslo asin madahas na espiritu kan kinaban. Madatong an panahon na sinda hohokoman bilang kabtang kan kinaban na si Satanas an namamahala. Sa siring, ngonyan na an panahon na pumili. Kiisay na kampi an gusto ta? Gusto daw niatong sambahon si Jehova asin suportaran an saiyang soberaniya, o kita daw matogot na si Satanas an mamahala sa sato paagi sa paggibo kan mga bagay na ikinaoogma nia? Kita gabos maninigong manindogan na dai mapagdududahan sa kampi ni Jehova.
An pampublikong pahayag na, “Omawon an Hade na Daing Katapusan!” nagtao nin solidong pagkakan nin isip sa gabos na nag-atender. Minsan ngani an ideya nin kadaihan nin katapusan garo dai kayang masabotan nin maluyang tawo, si Jehova biyong nakasasabot kaiyan. “Si Jehova Hade sa panahon na daing katapusan, sagkod lamang,” an inawit kan salmista. (Salmo 10:16) An Hade na daing katapusan na ini nagbukas sa dalan na an katawohan magkamit nin buhay na daing sagkod paagi sa saiyang Aki, si Jesu-Cristo. (Juan 17:3) “Iyo, kita na makasalan na katawohan puedeng kamtan an buhay na daing katapusan paagi sa pagtotokdo nin Dios asin sa pagtubod sa pantubos na atang ni Jesus,” an sabi kan espiker.
Mantang an kombension madali nang matapos, an mga nag-atender napakosog kan pangultimong pahayag, na may titulong “Magayagayang Omawon si Jehova sa Aroaldaw.” Nakadadagka sa puso na madangog an mga report kan pag-oswag sa paggibo nin mga disipulo sa bilog na daga. Asin an mga kombensionista napahiro na ‘omawon si Jehova sa bilog na aldaw asin omawon an saiyang ngaran sagkod lamang.’—Salmo 145:2.
An labi-labi karaot na mga panriringis hinahalean nin kagayagayahan an kinaban. Minsan siring, an mga indibiduwal na may bilog na pagtubod ki Jehova puedeng magkaigwa nin diosnon na kagayagayahan. Bilang pambilog na kinaban na kasararoan nin magturugang, an Mga Saksi ni Jehova puedeng otrohon an minasunod na mga tataramon kan Salmo 35: 27, 28: “Magkurahaw sa kagayagayahan asin maggayagaya idtong mga naoogma sa sakong katanosan, asin magsabi sinda sa gabos na panahon: ‘Pamurawayon si Jehova, na naoogma sa katoninongan kan saiyang lingkod.’ Asin an sakong dila magtaram sa maluya sanang tingog kan saimong katanosan, sa bilog na aldaw kan saimong kaomawan.”
[Mga retrato sa pahina 7]
An mga pamilya makikinabang sa brochure na “Jehovah’s Witnesses and Education”
[Mga retrato sa pahina 8, 9]
An bagong libro na “Kaaraman na Minagiya Pasiring sa Buhay na Daing Katapusan” iinaatubang an mga katotoohan sa Biblia sa nakaparirigon na paagi
[Retrato sa pahina 9]
Dakol an nabautismohan bilang simbolo kan saindang pagdusay ki Jehova
[Retrato sa pahina 9]
An mga kombensionista napahirong gayo kan drama na “Pagtao nin Onra sa mga Maninigo sa Saindang mga Taon nin Kagurangan”