Kun Paano Makanonompong nin Kagayagayahan sa Paggibo nin mga Disipulo

SARO sa hararom na kagayagayahan na puedeng maeksperyensiahan nin sarong tawo iyo an pagigin katabang nin Dios. Ngonyan, kabale sa gibohon nin Dios an pagtipon nin matanos an inklinasyon na mga tawo pasiring sa Kristianong kongregasyon asin pagsanay sa sainda sa buhay bilang mga Kristiano ngonyan patin para sa kaligtasan pasiring sa sarong bagong kinaban.​—Miqueas 4:​1-4; Mateo 28:​19, 20; 2 Pedro 3:13.

Nagin burabod nin dakulang kagayagayahan para sa Mga Saksi ni Jehova sa Latin Amerika na maheling an sarong milyon katawo na magin mga disipulo ni Jesu-Cristo poon kan 1980. Sa mabungang langtad na ini, kun saen dakol an iginagalang asin tinutubod an Biblia, an nagkapirang pambilog na panahon na ministro nakatabang sa mga dinosena na idusay an saindang buhay ki Jehova. Huli sa mahiwas na eksperyensia, tibaad may ikasabi sinda sa sato manongod sa kagayagayahan nin paggibo nin mga disipulo. An nagkapirang suhestion ninda tibaad makatabang sa saindo na makanompong nin kagayagayahan sa paggibo nin mga disipulo sa saindong lugar.

Pagmidbid sa Potensial na “Karnero”

“Sa ano man na siudad o baryo kamo lumaog, hanapon nindo kun siisay dian an maninigo,” an sinabi ni Jesus kan sugoon nia an saiyang mga apostol na maghulit. (Mateo 10:11) Kun kamo minasongko sa mga tawo, paano nindo mamimidbid idtong mga puedeng tabangan sa espirituwal? Si Edward, sarong pambilog na panahon na ministro sa labi nang 50 taon, nagsasabi: “Ipinaheheling ninda iyan paagi sa saindang odok sa boot na mga hapot asin sa saindang satispaksion pagkatawe nin mga simbag hale sa Kasuratan.” Idinugang ni Carol: “Kun an sarong tawo magtuga sako nin sarong personal na problema o kahaditan, iyan sa katotoohan sarong pakimaherak para sa tabang. Pinagmamaigotan kong humanap nin makatatabang na impormasyon sa mga publikasyon kan Watch Tower Society. An siring na personal na interes parateng minagiya sa sarong pag-adal sa Biblia.” Pero, bakong perming pasil na mamidbid an mga sinsero. Si Luis nagsasaysay: “An nagkapira na garo interesadong marhay minalataw na bako man talagang interesado, alagad an iba na garo kontra sa primero nagbabago kun madangog ninda an talagang sinasabi kan Biblia.” Mantang an dakol na taga-Latin Amerika iginagalang an Biblia, idinugang nia, “Namimidbid ko idtong mga puedeng tabangan sa espirituwal kun tolos nindang inaako an itinotokdo kan Biblia pakatapos na ipaheling ko iyan sa sainda.” An pagtabang sa siring na mga “maninigo” na umoswag sa espirituwal nagdadara nin tunay na kagayagayahan asin satispaksion. Paano daw nindo ini magigibo?

Pagpoon nin mga Pag-adal sa Biblia

An paggamit nin mga pantabang sa pag-adal sa Biblia na prinodusir kan “maimbod asin madonong na oripon” iyo an sa parate pinakamarahay na paagi na tabangan an mga tawo na masabotan an katotoohan sa Biblia. (Mateo 24:45) Paano nindo mapatatalubo an apresasyon sa halaga kan siring na mga pantabang sa pag-adal sa Biblia? Si Edward nagsasabi: “Mantang an mga kamugtakan, personalidad, asin punto-de-vista nin mga tawo laen-laen na gayo, pinagmamaigotan kong magin madaling makibagay sa pagpoon nin mga pag-adal.” Dai nindo puedeng gamiton an pararehong paagi sa gabos.

Sa nagkapira, tibaad kaipuhan an nagkapirang impormal na pag-orolay sa Kasuratan antes na iintrodusir an sarong libro para sa pag-adal sa Biblia. Minsan siring, sarong mag-agom na misyonero an nagreport: “Sa parate iinaalok mi an pag-adal sa enot na pagsongko.” Siring man, an sarong Saksi na nakatabang sa 55 katawo na magdusay nagsasabi: “An sakuyang pangenot na paagi na makapoon nin mga pag-adal sa Biblia iyo an pagdiretso sa librong Puwede Kamong Mabuhay Sagkod Lamang sa Paraiso Digdi sa Daga.” Dawa ngani dai nagugustohan kan nagkapira an ideya nin pag-adal nin ano man, an iba galagang pag-adalan an ano man na pinaniniwalaan nindang makatatabang sa sainda sa buhay. An alok na daing bayad na mga leksion sa Biblia sa harong sa parate nakaaakit sa mga ini. An nagkapirang misyonero ipinaliliwanag an alok na ini dangan nagsasabi: “Gusto kong ipaheling sa saindo kun paano mi iyan ginigibo. Kun gusto nindo iyan, puede nindong ipadagos. Kun habo nindo, nasa saindo na iyan.” Kun iyan iinaalok sa siring na paagi, an mga tawo dai natatakot na umako.

An saro pang Saksi, na nakatabang sa dakol na daing sukat asin kulang an edukasyon, nagsasabi: “Nanompongan ko na an mga tract espesyalmenteng nakatatabang sa pagpoon nin mga pag-adal sa Biblia.” Dawa arin na publikasyon an saindang ginagamit, an pambilog na panahon na mga paratokdo pinagmamaigotan na tawan nin pangenot na pagdodoon an Biblia. Si Carola nagsasabi: “Sa enot na pag-adal, an ginagamit ko sana mga retrato asin mga limang teksto, tanganing lumataw an pangenot na mga punto asin an Biblia dai lumuwas na masakit.”

Pagpapadanay na Buhay an Interes

An mga tawo naoogmang makamate nin pag-oswag, kaya irinerekomendar ni Jennifer: “Gibohon na buhay an pag-adal. Umabante.” An regular na pagkondukta sa pag-adal na dai pinalilihis an mga semana nakatatabang man sa sainda na mamatean na sinda nag-ooswag. An sarong espesyal payunir na nagdakula sa probinsia ipinaliwanag an halaga nin pagpasimple sa mga paliwanag asin pagkonsentrar sa pangenot na mga punto, tanganing minsan idtong dikit an inadalan umoswag. Sia nagsasabi: “Sa samong baryo, kaipuhan ming baribion an daga pakatapos na ikasabwag an mga banhi. Kun pabahaon mi an oma, an daga nagkakaigwa nin matagas na ibabaw na masakit taroson kan nagtutubong mga banhi, asin iyan nagkakagaradan. Sa kaparehong paagi, kun pababahaan nindo an mga bagong interesado nin dakol na punto, tibaad iyan lumuwas na garo masakiton asin sinda pumondo.” Minsan an mga tawong mahinapot kaipuhan na makanood na magkonsentrar sa saro-sarong tema tanganing sinda umoswag sa pakasabot. Sinabihan ni Jesus an saiyang mga apostol: “Igwa pa ako nin dakol na isasabi saindo, alagad ta dai pa nindo iyan kaya ngonyan.”​—Juan 16:12.

An saro pang paagi na mapadanay na buhay an interes iyo an pagparigon sa boot kan mga sinosongko nindo na padagos na isip-isipon an Tataramon nin Dios kun kamo mayo na. Irinerekomendar ni Yolanda: “Magwalat nin sarong hapot. Tawan sinda nin asignasyon na gigibohon ninda, siring sa pagbasa nin sarong kabtang kan Biblia o pagsiyasat sa sarong tema na nakaaapektar sa sainda.”

Pagpatalubo nin Pagkamoot Para ki Jehova

An saindong kagayagayahan madakula kun tatabangan nindo an saindong mga estudyante na magin “mga paragibo kan tataramon, asin bakong mga paradangog sana.” (Santiago 1:22) Paano daw nindo iyan magigibo? An tunay na mga Kristiano minomotibar nin pagkamoot ki Jehova. Si Pedro, na taga-Mejico, nagpapaliwanag: “Dai puedeng kamotan nin mga tawo an saro na dai ninda midbid, kaya sa kapinonan pa sana kan pag-adal, itinotokdo ko sa sainda an ngaran nin Dios hale sa Biblia, asin naghahanap ako nin mga oportunidad na idoon an mga kualidad ni Jehova.” Sa pag-olay-olay, puede nindong parigonon an apresasyon ki Jehova paagi sa pagpahayag kan saindong mga saboot para sa saiya. Si Elizabeth nagsasabi: “Permi kong pinagmamaigotan na sambiton an karahayan ni Jehova. Durante kan sakong mga pag-adal, kun nakaheheling ako nin sarong magayon na burak, magayon na gamgam, o karinyosong kuting, permi kong sinasambit na iyan gibo ni Jehova.” “Magtaram manongod sa ipinanuga nin Dios na bagong kinaban bilang katunayan arog kan aram nindo,” an suhestion ni Jennifer. “Hapoton sinda kun ano an gusto nindang gibohon sa bagong kinaban.”

Kun an sarong tawo maghohorophorop na may pag-apresyar sa saiyang nanonodan manongod ki Jehova, iyan minatundag sa saiyang puso asin pinahihiro sia kaiyan. Alagad dai sia makapaghohorophorop kun dai sia nakagigirumdom. An sarong halipot na repaso sa tolo o apat na pangenot na punto pakatapos nin kada pag-adal pantabang sa memorya. An dakol na paratokdo sa Biblia ipinasusurat sa mga bagohan an pangenot na mga teksto kaiba nin sarong nota sa likod kan saindang Biblia. An sarong misyonero na hale sa Inglaterra ipinaliliwanag an saro pang pakinabang sa pagrepaso: “Ihinahapot ko kun paano sinda nakinabang sa impormasyon. Pinapaghohorophorop sinda kaini na may pag-apresyar sa mga dalan asin pagboot ni Jehova.”

An sarong maimbod na Saksi na naggradwar sa ikatolong klase nin Gilead nagsasabi: “Kaipuhan kitang magin entusiastiko. Kaipuhan na masabotan kan satong mga estudyante na kita nagtutubod sa satong itinotokdo.” An pagtubod na nagpangyari sa saindo na magin maogmang “paragibo kan gibohon” puedeng makaolakit kun iyan ipahahayag nindo.​—Santiago 1:25.

“Nanonompongan ko na namamatean nin mga tawo na sinda mas harani sa Dios kun tinatabangan ko sindang mamidbid an mga simbag sa saindang mga pamibi,” an sabi nin sarong Saksi na nakatabang sa dakol na sambahon si Jehova. “Tinatawan ko sinda nin mga halimbawa hale sa sako mismong eksperyensia, na siring sa sarong ini: Kan an sakuyang kaiba asin ako umabot sa sarong bagong destino bilang mga payunir, igwa sana kami nin kakadikit na gulay, sarong patos na mantikilya, asin mayo nin kuarta. Naubos mi an kakanon sa pamanggihan asin nagsabi, ‘Ngonyan mayo na kita nin para sa aga.’ Namibi kami manongod kaiyan, asin nagtorog. Amay pa pagkaaga an sarong lokal na Saksi nagsongko asin iinintrodusir an saiyang sadiri, na sinasabi, ‘Namibi ako na magsobol si Jehova nin mga payunir. Ngonyan maiibanan ko kamo nin haros bilog na aldaw, alagad mantang ako nag-iistar sa harayong baryo, kaipuhan kong mangodto kaiba nindo, kaya nagdara ako nin kakanon para sa sato gabos.’ Idto dakol na karneng baka asin mga gulay. Permi kong sinasabi sa sakuyang mga estudyante na nungka kitang babayaan ni Jehova kun eenoton niatong hanapon an saiyang Kahadean.”​—Mateo 6:33.

Mag-alok nin Praktikal na Tabang

Orog pa an kalabot sa paggibo nin mga disipulo ni Cristo kisa sa pagkondukta sana nin sarong pag-adal sa Biblia. An sarong misyonero na naglingkod nin dakol na taon bilang nagbibiaheng paraataman nagsasabi: “Tawan nindo sinda nin panahon. Dai maghidaling humale pakatapos kan pag-adal. Kun angay, magdanay asin mag-olay-olay nin halipot.” Si Elizabeth nagsasabi: “Pinahehelingan ko sinda nin interes huli ta buhay an kalabot. Ako naghahadit nin dakol na beses manongod sainda na garo sinda mga aki ko.” An ibang Saksi nagtao kan mga suhestion na ini: “Dalawon sinda kun sinda naghehelang.” “Kun kamo harani sa saindang harong, halimbawa sa ministeryo sa langtad, dalawon sinda nin halipot tanganing ipamidbid an ibang Saksi sa sainda.” Si Eva nagsasabi: “Maghinanyog nin maingat tanganing masabotan an pinaghalean asin situwasyon sa buhay kan tawo. Ini nakaaapektar sa reaksion kan tawo sa katotoohan asin puedeng makaolang sa saindang pag-oswag. Magin kamong amigo ninda, tanganing magkaigwa sinda kan kompiansa na magtaram manongod sa saindang mga problema.” Idinugang ni Carol: “An tunay na interes sa tawo mahalaga mantang an mga pagbabago na dadarahon kan katotoohan sa saiyang buhay kun minsan mangangahulogan kan pagkawara nin pamilya asin mga amigo. Sa pankagabsan, marahay kun aram kan estudyante kun saen kita nag-iistar asin may kompiansa sia na dumolok sa sato ano man na oras.” Tabangan siang mansayon an kongregasyon bilang an bago niang pamilya.​—Mateo 10:35; Marcos 10:​29, 30.

“Magin alisto sa pag-alok nin praktikal na tabang. Itaed sinda sa mga pagtiripon, asin tabangan sinda sa saindang mga aki,” an sabi ni Yolanda. An pagtokdo sa mga bagohan kun paano patotoodon an saindang mga aki, paooswagon an saindang mga pamantayan sa kalinigan, aandamon an mga komento para sa mga pagtiripon, asin itatao an mga pahayag sa Teokratikong Paadalan sa Pagmiministro gabos kabtang kan paggibo nin mga disipulo. Idinugang nin saro pang tugang na babae: “Mahalagang patoodon an mga bagohan para sa ministeryo. Kun an aspektong ini nin pagpatood nalilingawan, an nagkapira nagdadanay na takot na maghulit, nawawaran kan kagayagayahan ninda sa paglilingkod ki Jehova, asin dai nakatatagal.” Kaya magtao nin maingat na pagpatood sa pagharongharong, sa mga pagdalaw liwat, asin sa pagpopoon nin mga pag-adal sa Biblia. An saindong kagayagayahan dakula kun maheling nindo an saindong estudyante na nag-ooswag sa saindong tabang asin paggiya.

Pakosogon Sinda na Magtagal

“Yaon an tendensiang pabayaan an pag-adal kun an estudyante nabautismohan na,” an patanid nin sarong eksperyensiadong paragibo nin disipulo. Kapwa an maestro asin an estudyante kaipuhan na girumdomon na an sarong bago pa sanang mabautismohan na Kristiano bako pang maygurang sa espirituwal. Dakula pa an kaipuhan niang italubo sa saiyang pagtubod, sa saiyang pag-apresyar sa pagboot nin Dios, asin sa saiyang pagkamoot ki Jehova. Kaipuhan na parigonon an saiyang boot na pataluboon an marahay na mga ugale sa personal na pag-adal tanganing sia padagos na umoswag.​—1 Timoteo 4:15.

An bagohan tibaad nangangaipo nin tabang tanganing umoswag asin magin mapagpasakat na miembro kan asosasyon nin magturugang. Tibaad nangangaipo sia nin paggiya sa pag-atubang sa mga bakong pagkasangkap kan mga tugang mantang sia nagigin dayupot sa sainda. (Mateo 18:​15-35) Tibaad nangangaipo sia nin tabang tanganing magin ekspertong paratokdo, na kayang gumibo kan sadiri niang pagsiyasat. An sarong misyonero nagsasaysay: “An sarong estudyante pakatapos na mabautismohan mawot na paoswagon an saiyang abilidad bilang paratokdo, kaya sia nagsabi sa sako, ‘Makondukta ako nin sarong bagong pag-adal sa masunod na semana, alagad kaipuhan kong ikabalik sa sakong memorya an enot na mga kapitulo na pinag-adalan ko. Puede daw na otrohon mo giraray sa sako an mga kapitulong ini, nin saro-saro, tanganing ikanota ko an mga paliwanag kan mga teksto asin ilustrasyon, dangan magagamit ko iyan sa pagkondukta kan sakong pag-adal?’ Sia nagin ekselenteng paratokdo, na apat sa saiyang mga estudyante an nabautismohan nin sarabay sa sarong asamblea.”

Kun Taano ta Bawi an Paghihingoa sa Paggibo nin mga Disipulo

“An paggibo nin mga disipulo nangangahulogan nin mas dakol na paraomaw ki Jehova. Iyan nangangahulogan nin buhay para duman sa mga minaako kan katotoohan,” an sabi ni Pamela. “Gustong-gusto ko na itokdo an katotoohan sa iba​—iyan magayonon! An saro naheheling an mga estudyante na nag-ooswag nin luway-luway, na naggigibo nin mga pagbabago sa saindang buhay asin dinadaog an mga olang na garo dai kayang lampasan kun bakong huli sa espiritu ni Jehova. An dakol sa mga namoot ki Jehova nagin kong dayupot na marhay na mga katood.”

“Kun hinohorophorop ko idtong mga tinabangan ko na magin mga disipulo,” an pagsaysay nin sarong misyonera na hale sa Alemania, “naheheling ko an nagkapira na masosopgon na gayong mga tawo na uminoswag na marhay bilang mga ministro nin Dios na haros dai ko mapaniwalaan iyan. Naheheling ko an mga tawong nakapanggana sa darakulaon na mga kaolangan, na malinaw na sa tabang ni Jehova. Naheheling ko an mga pamilya na dati burulag alagad ngonyan sararo​—maogmang mga aki na may responsableng mga magurang. Naheheling ko an mga tawo na nagkakamit nin makahulogan na buhay, na nag-oomaw ki Jehova. Iyo ini an kagayagayahan sa paggibo nin mga disipulo.”

Iyo, an pagigin katabang ni Jehova Dios sa paggibo nin mga disipulo sarong burabod nin daing kabaing na kagayagayahan. An mga eksperyensia kan mga misyonero asin payunir patotoo dian. Kamo puedeng makanompong kan kaparehong kagayagayahan asin satispaksion kun iaaplikar nindo an mga suhestion asin gigibohon iyan nin bilog na kalag. Sa bendisyon ni Jehova, an saindong kagayagayahan magigin kompleto.​—Talinhaga 10:22; 1 Corinto 15:58.