Perming Itao ki Jehova an Pagabat sa Saindo
DAKOL ngonyan an nakamamateng garo nadadatogan na nin mga pagabat. An mga kadepisilan sa pagbuhay, masakit na mga problema sa pamilya, mga problema sa salud, kolog asin pagsakit huli sa pan-aapi asin panriringis, asin kadakol pang ibang kasakitan nabibitin na garo mga gilingan na gapo sa saindang liog. Apuera sa mga pangigipit na ini sa luwas, an iba nagagabatan man sa pakamate nin personal na kadaihan nin halaga asin pagkasudya huli sa sainda mismong pagkabakong sangkap. Dakol an nasusugotan na sumuko na nin biyo. Paano kamo makapanggagana kun an mga pagabat garo baga dai na makakaya?
May panahon na si Hadeng David nin Israel nakamate na an pangigipit haros dai na nia makaya. Sono sa Salmo 55, sia naribok na marhay an isip sa paghadit huli sa mga pangigipit asin pagkaongis kan saiyang mga kaiwal. Nakamate sia nin grabeng kolog sa puso asin nin takot. Nag-aagrangay na sana sia sa saiyang kamondoan. (Salmo 55:2, 5, 17) Minsan siring, sa ibong kan gabos niang kasakitan, nakanompong sia nin paagi na makapanggana. Paano? Nagsarig sia sa saiyang Dios para sa pagsuportar. An saiyang hatol sa iba na tibaad makamate nin arog sa saiya: “Tawan ki Jehova mismo an pagabat sa saimo.”—Salmo 55:22.
Ano daw an boot niang sabihon kan “tawan ki Jehova mismo an pagabat sa saimo”? Iyan daw pagdolok sana ki Jehova sa pamibi asin pagpahayag kan satong kahaditan? O may magigibo daw kita mismo na makatatabang na maresolberan an situwasyon? Kumusta kun mamatean niato na kita bako na nanggad na angay na rumani ki Jehova? Maaaraman niato kun ano an boot sabihon ni David paagi sa pagsiyasat sa nagkapirang eksperyensia na siertong nagirumdoman nia nin malinaw kan isurat nia an mga tataramon na iyan.
Gibohon an mga Bagay sa Kosog ni Jehova
Nagigirumdoman daw nindo kun paano pinatakot ni Goliat an puso kan parapakilaban na mga lalaki nin Israel? Natakot sindang marhay sa higanteng tawo na ini, na labing 2.7 metros an langkaw. (1 Samuel 17:4-11, 24) Alagad dai natakot si David. Taano? Huli ta dai nia prinobaran na makipaghampangan ki Goliat sa sadiri niang kosog. Poon kan panahon na sia lahidan na magigin hade nin Israel, tinogotan nia an espiritu nin Dios na gumiya sa saiya asin pakosogon sia sa gabos niang ginigibo. (1 Samuel 16:13) Kaya sinabi nia ki Goliat: “Ako minadolok sa saimo sa ngaran ni Jehova nin mga hukbo, an Dios kan hukbo nin Israel, na saimong dinuhagi. Sa aldaw na ini itatao ka ni Jehova sa sakuyang kamot.” (1 Samuel 17:45, 46) Si David ekspertong paralagpitaw, alagad makasisierto kita na an banal na espiritu ni Jehova an guminiya asin guminibong mas nakagagadan sa gapong ilinagpitaw nia ki Goliat.—1 Samuel 17:48-51.
Naatubang ni David an dakulaon na angat na ini asin sia nagin mapanggana paagi sa pagkaigwa nin kompiansa na susuportaran asin pakokosogon sia nin Dios. Sia nakapatalubo nin marahay, may pagtitiwalang relasyon sa Dios. Ini daing duwa-duwa na napakosog kan pagligtas sa saiya ni Jehova bago kaini. (1 Samuel 17:34-37) Arog ki David, puede kamong magpadanay nin makosog na personal na relasyon ki Jehova asin magkaigwa nin lubos na kompiansa sa saiyang abilidad asin pagigin andam na pakosogon asin susteniran kamo sa gabos na kamugtakan.—Salmo 34:7, 8.
Gibohon an Saindong Makakaya na Resolberan an Problema
Minsan siring, dai ini nangangahulogan na dai na noarin man magkakaigwa nin mga panahon na may makuring kolog, kahaditan, asin takot pa ngani, siring kan malinaw na ipinaheheling kan Salmo 55. Nagkapirang taon pakalihis kan daing takot na pagpaheling na ini nin kompiansa ki Jehova, halimbawa, si David nakaeksperyensia nin dakulang takot sa atubangan kan saiyang mga kaiwal. Nawara an pabor ni Hadeng Saul sa saiya asin kinaipuhan siang dumulag para sa saiyang buhay. Probaring imahinaron an emosyonal na kapurisawan na siertong itinao kaini ki David, an mga hapot na siertong pinalataw kaiyan sa saiyang isip manongod sa pagkaotob kan katuyohan ni Jehova. Total, linahidan na sia na magigin hade sa Israel, pero uya sia na kinakaipuhan na mabuhay bilang sarong dulag sa kaawagan, na hinahanap na garo layas na hayop. Kan probaran niang magpaili sa siudad nin Gat, an sadiring banwaan ni Goliat, sia namidbid. Na may anong resulta? An rekord nagsasabi na “natakot sia nin makuri.”—1 Samuel 21:10-12.
Alagad dai nia tinogotan an saiyang takot asin grabeng kahaditan na pogolan sia sa pagdolok ki Jehova para sa tabang. Sono sa Salmo 34 (na isinurat bilang resulta kan eksperyensiang ini), si David nagsabi: “Ako naghapot ki Jehova, asin sinimbag nia ako, asin ilinigtas nia ako sa gabos kong katakotan. An nasasakitan na ini nag-apod, asin si Jehova mismo nagdangog. Asin sa gabos niang kasakitan sia ilinigtas Nia.”—Salmo 34:4, 6.
Siempre, sinuportaran sia ni Jehova. Pero mangnoha na si David dai sana nagtukawtukaw asin naghalat na iligtas sia ni Jehova. Minidbid nia an pangangaipo na gibohon nia an gabos niang makakaya sa irarom kan mga kamugtakan tanganing makahale sa masakit na situwasyon. Minidbid nia an kamot ni Jehova sa saiyang pagkaligtas, alagad sia mismo guminibo nin aksion, na nagsagin na bua kaya dai sia ginadan kan hade nin Gat. (1 Samuel 21:14–22:1) Kaipuhan man niatong gibohon an gabos niatong makakaya na mapangganahan an mga pagabat, imbes na halaton na sana si Jehova na iligtas kita.—Santiago 1:5, 6; 2:26.
Dai Pagdagdagan an mga Pagabat sa Saindo
Si David nakanood nin saro pang leksion, sarong makolog na leksion, sa nahuhuring kabtang kan saiyang buhay. Ano daw idto? Na kun beses dinadagdagan niato an mga pagabat sa sato. Pakalihis na manggana sa mga Filisteo, ruminaot an situwasyon ni David kan magdesisyon siang ibalyo sa Jerusalem an kaban kan tipan. An makasaysayan na tala nagsasabi sa sato: “Dangan si David asin an bilog na banwaan na kaiba nia tuminindog asin nagduman sa Baale-juda tanganing itukad hale duman an kaban kan tunay na Dios . . . Minsan siring, isinakay ninda an kaban kan tunay na Dios sa sarong bagong karreta, . . . asin si Uzza saka Ahio, na mga aking lalaki ni Abinadab, an naggigiya sa bagong karreta.”—2 Samuel 6:2, 3.
An paggamit nin karreta tanganing lunadan kan Kaban nagbalga sa gabos na instruksion na itinao ni Jehova mapadapit kaiyan. Malinaw na sinabi na an autorisado sanang mga paradara, an Coatitang mga Levita, maninigong pasanon an Kaban sa saindang abaga, na naggagamit nin mga palo na ilinaog sa mga argolya na espesyalmenteng ikinabit sa Kaban. (Exodo 25:13, 14; Bilang 4:15, 19; 7:7-9) An pag-ignoro sa mga instruksion na ini nagdara nin kalamidad. Kan matutumba na kutana iyan huli sa bakang nagguguyod sa karreta, si Uzza, na posibleng sarong Levita alagad siertong bakong saserdote, kinapotan an Kaban tanganing dai matumba asin ginadan ni Jehova huli sa saiyang kadaihan nin paggalang.—2 Samuel 6:6, 7.
Si David bilang hade kaipuhan na manimbag digdi. An saiyang reaksion nagpapaheling na minsan an mga igwa nin marahay na relasyon ki Jehova puedeng sa panapanahon magkaigwa nin salang reaksion sa masakit na mga situwasyon. Enot si David naanggot. Dangan natakot sia. (2 Samuel 6:8, 9) An saiyang may pagtitiwalang relasyon ki Jehova nabalo nin makuri. Uya an sarong okasyon na garo dai nia ikinatao ki Jehova an pagabat sa saiya, na dai nia sinunod an saiyang mga pagboot. Puede daw na iyan an magin situwasyon niato kun beses? Binabasol daw niato si Jehova huli sa minalataw na mga problema huli ta iniignoro niato an saiyang mga instruksion?—Talinhaga 19:3.
Pakapanggana sa Pagabat na Pakamate nin Kasalan
Kan huri, si David naggibo nin dakulaon na pagabat na pakamate nin kasalan para sa saiya man sana paagi sa pagkakasala nin magabat tumang sa moral na mga pamantayan ni Jehova. Sa okasyon na ini binayaan ni David an saiyang responsibilidad na pangenotan an saiyang mga tawohan sa ralaban. Nagdanay sia sa Jerusalem mantang sinda nagduman sa pakilaban. Nagbunga ini nin magabat na problema.—2 Samuel 11:1.
Naheling ni Hadeng David an magayon na si Bat-seba na nagkakarigos. Nagkaigwa sia nin inmoral na relasyon sa saiya, asin si Bat-seba nagbados. (2 Samuel 11:2-5) Sa pagprobar na itago an salang gawe, iinareglo nia na an agom kaini, si Urias, bumalik sa Jerusalem hale sa ralaban. Si Urias habong makidorog sa saiyang agom mantang nakikilaban an Israel. (2 Samuel 11:6-11) Si David naggibo ngonyan nin maraot asin bikong paagi tanganing ikatago an saiyang kasalan. Iinareglo nia na an mga kapwa soldados ni Urias bayaan si Urias sa peligrosong posisyon sa ralaban tanganing sia magadan. Sarong makababalde, magabat na kasalan!—2 Samuel 11:12-17.
Sa kahurihurihi, siempre, pinapanimbag si David sa saiyang kasalan, asin ibinuyagyag sia. (2 Samuel 12:7-12) Probaring imahinaron an gabat nin kamondoan asin kasalan na siertong namatean ni David kan marealisar nia an labi-labing karatan kan ginibo nia bilang resulta kan saiyang horot. Puedeng nadaog sia kan saiya mismong pakamate nin pagkukulang, nangorogna huli ta sia posibleng sarong emosyonal, sensitibo an boot na tawo. Puedeng nakamate sia nin biyong kadaihan nin halaga!
Minsan siring, tolos-tolos na inako ni David an saiyang sala, na inaadmitir ki propeta Natan: “Nagkasala ako tumang ki Jehova.” (2 Samuel 12:13) Sinasabi sa sato kan Salmo 51 kun ano an saiyang namatean asin kun paano sia nagngayongayo ki Jehova Dios na linigan sia asin patawadon sia. Sia namibi: “Hugasan mo ako nin biyo sa sakong sala, asin linigan mo ako sa sakong kasalan. Huli ta aram ko an sakuyang kalapasan, asin an sakuyang kasalan danay na nasa atubangan ko.” (Salmo 51:2, 3) Huli ta sia tunay na nagsolsol, ikinatogdok nia liwat an saiyang makosog, dayupot na relasyon ki Jehova. Dai pigparaisip na sana ni David an mga pakamate nin pagbasol asin kadaihan nin halaga. Itinao nia an saiyang pagabat ki Jehova paagi sa mapakumbabang pagmidbid sa saiyang kasalan, pagpaheling nin tunay na pagsolsol, asin pamimibi nin maigot para sa kapatawadan ni Jehova. Nakamtan nia liwat an pabor nin Dios.—Salmo 51:7-12, 15-19.
Pakapanggana sa Pagpasaloib
Dinadara kita kaini sa pangyayari na nagtulod ki David na isurat an Salmo 55. Sia nag-aagi nin grabeng kolog sa emosyon. “An sako mismong puso nasa makuring kolog sa laog ko,” an isinurat nia, “asin an mga katakotan nin kagadanan mismo napasa sako.” (Salmo 55:4) Ano an dahelan kan kolog na ini? Si Absalom, na aki ni David, nagpakana na agawon ki David an pagkahade. (2 Samuel 15:1-6) An pagpasaloib na ini kan saiyang sadiring aki masakiton nang tagalan, alagad an nagpagrabe kaiyan iyo na an pinakapinagtitiwalaan na parahatol ni David, sarong lalaki na an ngaran Ahitofel, uminiba sa pagkasapakat tumang ki David. Si Ahitofel an ilinaladawan ni David sa Salmo 55:12-14. Bilang resulta kan pagkasapakat asin pagpasaloib, kinaipuhan ni David na dumulag sa Jerusalem. (2 Samuel 15:13, 14) Kanigoan na kamondoan an siertong dinara kaini sa saiya!
Pero, dai nia tinogotan an saiyang makuring emosyon asin kamondoan na paluyahon an saiyang pagtitiwala asin kompiansa ki Jehova. Ipinamibi nia ki Jehova na sudyaon an mga plano kan mga magkasapakat. (2 Samuel 15:30, 31) Sa giraray naheheling niato na si David dai basta na sana naghalat na si Jehova an gumibo kan gabos na trabaho. Kan oras na nagkaoportunidad, ginibo nia an saiyang makakaya na labanan an pagkasapakat tumang sa saiya. Isinugo nia an saro pa kan saiyang mga parahatol, si Husai, na bumalik sa Jerusalem tanganing magsagin na maiba sa pagkasapakat, minsan ngani, sa katunayan, nagduman sia tanganing raoton iyan. (2 Samuel 15:32-34) Sa pagsuportar ni Jehova, nag-aser an planong ini. Si Husai nakakua nin igong panahon para ki David na matipon liwat an saiyang hukbo asin makaorganisar tanganing idepensa an saiyang sadiri.—2 Samuel 17:14.
Sierto nanggad na naapresyar ni David sa bilog niang buhay an mapagprotehir na pag-ataman ni Jehova siring man an saiyang pasensia asin pagigin andam na magpatawad! (Salmo 34:18, 19; 51:17) Huli sa kasaysayan na ini na may kompiansang pinaririgon ni David an satong boot sa satong mga panahon nin kasakitan na dumolok ki Jehova para sa tabang, na ‘itao ki Jehova an pagabat sa sato.’—Ikomparar an 1 Pedro 5:6, 7.
Magtogdok Asin Magpadanay nin Makosog, May Pagtitiwalang Relasyon ki Jehova
Paano niato nakakamtan an klase nin relasyon ki Jehova na yaon ki David, sarong relasyon na nagsustenir sa saiya sa mga panahon nin dakulang pagbalo asin kasakitan? Nagtotogdok kita nin siring na relasyon paagi sa pagigin mahigos na mga paraadal kan Tataramon nin Dios, an Biblia. Nagpapatokdo kita sa saiya manongod sa saiyang mga pagboot, prinsipyo, asin personalidad. (Salmo 19:7-11) Mantang kita naghohorophorop sa Tataramon nin Dios, kita orog na napararani sa saiya asin nakanonood na magtiwala sa saiya nin lubos. (Salmo 143:1-5) Naparararom asin napakokosog niato an relasyon na iyan mantang kita nakiaasosyar sa mga kapwa parasamba tanganing dugang pang matokdoan ni Jehova. (Salmo 122:1-4) Pinasasarig niato an satong relasyon ki Jehova paagi sa odok sa pusong pamibi.—Salmo 55:1.
Totoo, si David, arog niato, nagkaigwa nin mga depresyon kan an saiyang relasyon ki Jehova bakong arog kakosog kan maninigo. An pan-aapi puedeng “makaparungaw” sa sato. (Eclesiastes 7:7) Alagad naheheling ni Jehova kun ano an nangyayari, asin aram nia kun ano an nasa satong puso. (Eclesiastes 4:1; 5:8) Kaipuhan kitang magmaigot na papagdanayon na makosog an satong relasyon ki Jehova. Dangan, ano man an mga pagabat na kaipuhan niatong pasanon, makasasarig kita ki Jehova na pagianon iyan o tawan kita kan kosog na mapangganahan an satong situwasyon. (Filipos 4:6, 7, 13) An kaipuhan magdanay kitang dayupot ki Jehova. Kan gibohon ini ni David, sia lubos nanggad na tiwasay.
Kun siring, ano man an saindong mga kamugtakan, sabi ni David, perming itao ki Jehova an pagabat sa saindo. Dangan maeeksperyensiahan niato an katotoohan kan panuga: “Sia matabang sa saimo. Noarin man dai nia totogotan na matanyog an matanos.”—Salmo 55:22.