Maogmang Bareta sa Maabot!
KITA gabos namomondo kun nakareresibi kita nin maraot na bareta na personalmenteng nakaaapektar sa sato. Sa ibong na kampi, kita naggagayagaya kun minaabot an maogmang bareta—sarong bareta nin kagayagayahan para sa sato o sa satuyang mga namomotan. Alagad kun an maraot na bareta nakaaapektar sa iba asin bakong sa sato, sa parate igwa nin pag-usyoso; an nagkapira naoogma pa nganing maaraman an maraot na naabtan nin iba. Ini tibaad sa sarong kabtang dahelan kun taano an maraot na bareta ta mabentang marhay!
Durante kan pagpopoon kan Guerra Mundial II, igwa nin sarong malinaw na gayong halimbawa kan makangingiring interes sa kapahamakan nin ibang tawo. Sarong 10,000 toneladas na marikas asin biyong armadong barko de guerra, an Graf Spee, an ipinag-oorgolyo kan Aleman na armada kan 1939. Sa laog nin dakol nang semana an barko de guerrang ini nagpaparapanraot sa pankomersiong mga barko kan Alyado sa kadagatan nin Timog Atlantiko asin Indio. Sa katapustapusi, tolong Britanong cruiser an luminapag asin uminatake sa Graf Spee, na may mga nagadan asin napiritan an barko na luway-luway na pumagilid sa duongan sa Uruguay na Montevideo tanganing magpahirahay. Pinagbotan kan gobyerno nin Uruguay an barko de guerra na bumalik tolos-tolos sa dagat, ta kun dai iyan eembargohon. Kaya garo baga magkakaigwa nin sarong maringis pero bakong patas na guerra.
Kan maaraman ini, an sarong grupo nin mayaman na mga negosyante sa Estados Unidos nag-arkila nin sarong eroplano, na mga $2,500 an bayad kan kada saro, pasiring sa Uruguay tanganing maheling an madugong ralaban. Sa saindang pagkadisganar, an ralaban nungkang nangyari. Si Adolf Hitler nagboot na laboton an Graf Spee. An rinibong paradalan na nagtiripon sa duongan na naglalaom na maheling an pasale nin sarong maringis na ralaban sa dagat, nakaheling asin nakadangog na sana nin sarong nakabobongog na pagputok na nagpalubog sa Graf Spee, na linabot kan mga tripulante man sana kaini. An kapitan naghugot paagi sa pagbadil sa saiyang payo.
Sa ibong nin medyo hilig nin nagkapirang tawo sa nakapangigirabo, an kadaklan maoyon na mas gusto ninda an maogmang bareta kisa sa maraot na bareta. Arog man daw kaiyan an saboot nindo? Kun siring, taano ta irinerekord kan kasaysayan an kadakol na maraot na bareta asin kakadikit na maogmang bareta? Mababaliktad pa daw an situwasyon?
Mga Causa kan Gabos na Maraot na Bareta
Sinasabi kan Biblia an manongod sa panahon kaidto na maogmang bareta sana an yaon. An maraot na bareta sarong bagay na dai aram, dai nadadangog. Kan matapos ni Jehova Dios an saiyang paglalang, an planetang Daga andam nang istaran nin tawo asin hayop. An rekord kan Genesis nagsasaysay sa sato: “Naheling nin Dios an gabos niang ginibo asin, uya! idto marahayon.”—Genesis 1:31.
An kadaihan nin maraot na bareta daing gayo naghaloy pakalalanga sa tawo. Antes na magkaigwa nin aki sinda Adan asin Eva, an maraot na bareta nin pagrebelde tumang sa Dios asin sa saiyang husay na unibersal na areglo nin karahayan irineport. An sarong halangkaw an ranggong espiritung aki nagtraydor sa saiyang pinagtitiwalaan na posisyon asin nagin mapanggana sa pagtulod sa enot na mag-agom na tawo na ibanan sia sa saiyang rebelde, mapagpasaloib na dalan.—Genesis 3:1-6.
An kadakol na maraot na bareta na naheling kan katawohan nagpoon sa panahon na iyan. Bakong makangangalas na an intriga, pandadaya, mga kaputikan, balobagi, asin bakong kompletong katotoohan natampok na marhay sa maraot na bareta na buminaha sa kinaban poon kaidto. Prangkang binasol ni Jesu-Cristo si Satanas na Diablo bilang an kagmukna kan maraot na bareta, na sinasabi sa relihiosong mga namomoon kan Saiyang aldaw: “Gikan kamo sa saindong ama na Diablo, asin boot nindo na gibohon an mga horot kan saindong ama. An sarong iyan sarong paragadan sa kapinonan nia, asin dai sia nagdanay sa katotoohan, huli ta mayo sa saiya an katotoohan. Kun sia nagtataram nin putik, sia nagtataram oyon sa saiyang sadiring boot, huli ta sia sarong putikon asin iyo an ama kan kaputikan.”—Juan 8:44.
Mantang an populasyon nin tawo nagdadakol, an maraot na bareta nagdakol man kasabay kaiyan. Siempre, dai ini nangangahulogan na dai nagkaigwa nin mga panahon nin kagayagayahan asin kaogmahan, huli ta igwa nin dakol na bagay sa buhay na nagin causa nin kagayagayahan. Pero, an dagom nin problema asin kamondoan nagin lataw sa lambang kapag-arakian nin katawohan sagkod ngonyan.
Igwa nin saro pang pundamental na causa kan mamondong situwasyon na ini. Iyan an satong minanang tendensia sa paggibo nin sala asin kalamidad. Ipinamimidbid mismo ni Jehova an dai malilikayan na causang ini nin maraot na bareta paagi sa pagsabi: “An tendensia kan puso nin tawo maraot poon sa saiyang pagkaniaki.”—Genesis 8:21.
Taano an Maraot na Bareta ta Nagdadakol?
Minsan siring, igwa nin sarong dahelan kun taano an maraot na bareta ta nagdakol sa ika-20 siglong ini. An dahelan na ini sinabi nin malinaw sa Biblia, na naghula na an katawohan sa ika-20 siglo malaog sa sarong napapalaen na peryodo nin panahon na midbid bilang an “huring mga aldaw” o “panahon kan katapusan.” (2 Timoteo 3:1; Daniel 12:4) Ipinamimidbid kan hula sa Biblia asin kan kronolohiya sa Biblia an “peryodo nin katapusan” na ini, na puminoon kan 1914. Para sa detalyadong Makakasuratan na prueba kaini, helingon tabi an kapitulo 11 kan librong Kaaraman na Minagiya Pasiring sa Buhay na Daing Katapusan, na ipinublikar kan Watchtower Bible and Tract Society of New York, Inc.
An huring mga aldaw mapoon sa sarong pangyayari na insigidang magigin dahelan nin pagdakol kan maraot na bareta digdi sa daga. Ano iyan? Iyan an pagholog ki Satanas na Diablo asin sa saiyang kairibang demonyo hale sa langit. Puede nindong basahon an malinaw na paglaladawan na ini kan dai malilikayan na pagdakol nin maraot na bareta sa Kapahayagan 12:9, 12: “Ihinolog an dakulang dragon, an enot na halas, an inaapod Diablo asin Satanas, na nandadaya sa bilog na ineerokan na daga; ihinolog sia sa daga, asin an saiyang mga anghel ihinolog kaiba nia. . . . ‘Herak man kan daga asin kan dagat, huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.’”
Kaya sa ano man na panahon na natatada pa sagkod sa katapusan kan huring mga aldaw, malalaoman niato na an maraot na bareta mapadagos asin madakol patin magrabe pa ngani.
Iyan Dai Perming Magdadanay na Siring
Makaoogma para sa mga nag-eerok sa daga, an miserableng kamugtakan nin mga bagay na nagbubunga kan epidemya nin maraot na bareta ngonyan dai perming mag-eeksister. Sa katunayan, makasasabi kita na may kompiansa na bilang na an mga aldaw kan nagpapadagos na maraot na bareta. An situwasyon bakong dai nang paglaom, sa ibong kan pagigin garo siring man nanggad. An katapusan kan gabos na maraot na bareta harani na asin seguradong maabot sa itinalaan na panahon nin Dios.
Makaseseguro kita kaini huli ta an huring mga aldaw ihinulang maabot sa kulminasyon o matatapos sa paglaglag asin paghale nin Dios sa gabos na causa nin maraot na bareta. Hahaleon nia an maraot na mga tawong nagpapakana nin iriwal na nagsasayumang magbago asin magbakle sa saindang salang dalan. Ini magkakaigwa nin kulminasyon sa ralaban kan dakulang aldaw nin Dios na Makakamhan sa gabos na midbid bilang an ralaban nin Armagedon. (Kapahayagan 16:16) Tolos-tolos pakatapos kaiyan, si Satanas na Diablo asin an saiyang kaibang hukbo nin mga demonyo gagaposon. Ilinaladawan kan Kapahayagan 20:1-3 an paggapos ki Satanas, an kagtugdas nin gabos na maraot na bareta: “Naheling ko an sarong anghel na naghihilig hale sa langit na igwa kan liabe kan bungaw asin sarong dakulang kadena sa saiyang kamot. Asin dinakop nia an dragon, an enot na halas, na iyo an Diablo asin Satanas, asin ginapos nia sia sa laog nin sangribong taon. Asin ihinolog nia sia sa bungaw asin pinintoan nia idto patin sinelyohan idto sa ibabaw nia, tanganing dai na nia madaya an mga nasyon.”
Kasunod kan dramatikong mga pangyayaring ini, an sarong panahon nin dai pang kaagid na maogmang bareta madatong para sa daga asin sa mga nag-eerok dian. Kabale sa mga mag-eerok na ini an minilyon na nakaligtas sa ultimong ralaban nin Armagedon asin an binilyon na bubuhayon liwat hale sa saindang pagtorog sa kagadanan sa mga lolobngan. An pinakamarahay sa gabos na maogmang baretang ini ilinaladawan sa huring libro kan Biblia: “An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”—Kapahayagan 21:3, 4.
Naiimahinar daw nindo an maogmang panahon na iyan? Tunay nanggad na sarong mamuraway na ngapit na kun saen an maraot na bareta dai na maeksister. Iyo, an gabos na maraot na bareta tapos na asin dai na madadangog giraray. An maogmang bareta mangingibabaw sa panahon na iyan, asin iyan madakol sa panahon na daing sagkod.