Mga Hapot Hale sa mga Parabasa

Si Jesus nagsabi: “Kun patawadon nindo an mga kasalan nin siisay man na tawo, iyan napatawad na sa sainda; kun papagdanayon nindo idtong sa siisay man na tawo, iyan nagdadanay.” An mga tataramon daw na ini nangangahulogan na an mga Kristiano puedeng magpatawad nin mga kasalan?

Mayo nin Makakasuratan na basihan sa pagkonklusyon na an mga Kristiano sa pankagabsan, o minsan an nombradong kamagurangan sa mga kongregasyon, tinawan nin Dios nin autoridad na magpatawad nin mga kasalan. Pero, an sinabi ni Jesus sa saiyang mga disipulo sa Juan 20:​23, na kinotar sa itaas, nagpaparisa na an mga apostol tinawan nin Dios nin espesyal na mga kapangyarihan sa bagay na ini. Asin an tataramon dian ni Jesus puedeng konektado sa saiyang sinabi sa Mateo 18:18 manongod sa langitnon na mga desisyon.

May nagkapirang pagkakasala na puedeng patawadon nin mga Kristiano, kaoyon kan hatol ni apostol Pablo na nasusurat sa Efeso 4:32: “Magin maboot sa lambang saro, madinamayon sa mamomoton na paagi, na sueltong nagpapatarawadtawad siring na an Dios man sueltong nagpatawad sa saindo paagi ki Cristo.” Si Pablo nagtataram digdi manongod sa personal na mga problema sa pag-oltanan nin mga Kristiano, arog baga nin daing ingat na pagtaram. Maninigo nindang pagmaigotan na husayon an mga bagay na ini, na pinatatawad an lambang saro. Girumdoma an mga tataramon ni Jesus: “Kun siring, kun dinadara mo an saimong balaog sa altar asin dian saimong magirumdoman na an saimong tugang igwa nin ano man tumang sa saimo, bayaan mo nguna an saimong balaog sa atubangan kan altar, asin maghale ka; makipagkatoninongan ka nguna sa saimong tugang, dangan, kun nakabalik ka na, idolot mo na an saimong balaog.”​—Mateo 5:​23, 24; 1 Pedro 4:8.

Minsan siring, an konteksto kan Juan 20:23 nagsusuherir na an pinanonongdan ni Jesus mas magabat na mga kasalan, siring sa ipinaririsa kan sinabi pa nia sa espesipikong mga nagdadangog na ini. Helingon niato kun taano.

Kan aldaw na sia buhayon liwat, si Jesus nagpaheling sa mga disipulo na nasa laog nin nakabarat na kuarto sa Jerusalem. An rekord nagsasabi: “Kun siring, si Jesus nagsabi liwat sa sainda: ‘Magkaigwa logod kamo nin katoninongan. Kun paanong isinugo ako kan Ama, isinusugo ko man kamo.’ Asin pagkasabi nia kaini hinayopan nia sinda asin sinabi sa sainda: ‘Akoa nindo an banal na espiritu. Kun patawadon nindo an mga kasalan nin siisay man na tawo, iyan napatawad na sa sainda; kun papagdanayon nindo idtong sa siisay man na tawo, iyan nagdadanay.’”​—Juan 20:​21-23.

Posible na an mga disipulong nasambitan sa pangenot iyo an fiel na mga apostol. (Ikomparar an bersikulo 24.) Paagi sa paghayop sa sainda asin pagsabing, “Akoa nindo an banal na espiritu,” sa simbolikong paagi ipinaisi sa sainda ni Jesus na sa dai na mahahaloy ibububo sa sainda an banal na espiritu. Si Jesus padagos na nagsabi na sinda magkakaigwa nin autoridad mapadapit sa kapatawadan nin mga kasalan. Rasonable nanggad, an saiyang duwang pananaram konektado sa kada saro, na an saro minagiya pasiring sa saro.

Singkuentang aldaw poon kan sia buhayon liwat, kan aldaw nin Pentecostes, ibinubo ni Jesus an banal na espiritu. Ano an naotob kaiyan? Enot, an mga nag-ako kan espiritu namundag giraray bilang espirituwal na mga aki nin Dios na may paglaom na magin kairibang namamahala ni Cristo sa langit. (Juan 3:​3-5; Roma 8:​15-17; 2 Corinto 1:22) Alagad bako sana iyan an nagibo kan pagbubong idto kan espiritu. An ibang nag-ako nagkamit nin milagrosong mga kapangyarihan. Paagi kaiyan an iba puedeng magtaram nin ibang tataramon na dai ninda kaidto aram. An iba puedeng maghula. An iba pa puedeng magpaomay nin mga may helang o magbuhay liwat nin mga gadan.​—1 Corinto 12:​4-11.

Mantang an mga tataramon ni Jesus sa Juan 20:22 nagtokdo sa pagbubong ini kan banal na espiritu sa mga disipulo, an saiyang konektadong mga tataramon manongod sa pagpatawad nin mga kasalan garo nangangahulogan na an mga apostol tinawan nin Dios paagi sa pagpunsionar kan espiritu nin pambihirang autoridad na magpatawad o magpadanay nin mga kasalan.​—Helingon an The Watchtower, Marso 1, 1949, pahina 78.

An Biblia dai nagtatao sa sato nin kompletong rekord kan lambang panahon na ginamit kan mga apostol an siring na autoridad, alagad dai man irinekord kaiyan an lambang pangyayari na naggamit sinda nin milagrosong balaog sa pagtaram nin ibang tataramon, paghula, o pagpaomay.​—2 Corinto 12:12; Galacia 3:5; Hebreo 2:4.

An sarong pangyayari na kalabot an autoridad nin mga apostol na magpatawad o magpadanay nin mga kasalan kalabot si Ananias asin Safira, na nagputik sa espiritu. Si Pedro, na nadangog si Jesus na nagsabi kan satong nababasa sa Juan 20:​22, 23, ibinuyagyag si Ananias asin Safira. Kinaolay nguna ni Pedro si Ananias, na nagadan ora mismo. Kan sa huri lumaog si Safira asin nagputik man, ipinahayag ni Pedro an paghokom sa saiya. Dai pinatawad ni Pedro an saiyang kasalan kundi nagsabi: “Uya! An mga bitis kan mga naglobong sa saimong agom nasa pinto, asin iluluwas ka ninda.” Sia nagadan man ora mismo.​—Gibo 5:​1-11.

Sa pangyayaring ini si apostol Pedro naggamit nin espesyal na autoridad na magpahayag nin depinidong pagpadanay nin kasalan, sarong milagrosong kaaraman na dai patatawadon nin Dios an kasalan ni Ananias asin Safira. An mga apostol minalataw man na nagkaigwa nin lihis sa tawong pakamansay sa mga kaso na kun saen segurado sinda na an mga kasalan napatawad na basado sa atang ni Cristo. Kaya an mga apostol na idto na tinawan nin kapangyarihan kan espiritu puedeng magpahayag kan kapatawadan o pagpadanay sa mga kasalan.a

Bako ining pagsabi na an gabos na linahidan nin espiritung kamagurangan kan panahon na idto igwa nin siring na milagrosong autoridad. Maheheling niato iyan sa sinabi ni apostol Pablo manongod sa lalaking itiniwalag sa kongregasyon nin Corinto. Si Pablo dai nagsabing, ‘Pinatatawad ko an mga kasalan kan lalaking iyan’ o, ‘Aram ko na an lalaki napatawad na sa langit, kaya akoa nindo sia liwat.’ Imbes, sinadol ni Pablo an bilog na kongregasyon na patawadon an Kristianong ini na nakabalik na asin pahelingan sia nin pagkamoot. Idinagdag ni Pablo: “An ano man na may kabootan na ipinatatawad nindo sa siisay man, ginigibo ko man.”​—2 Corinto 2:​5-11.

Oras na an lalaki ikabalik na sa kongregasyon, an gabos na Kristianong tugang na lalaki asin babae puedeng magpatawad sa sentido nin dai paghinanakit sa saiya huli sa nagibo nia. Minsan siring, kaipuhan nguna siang magsolsol asin ikabalik. Paano iyan mangyayari?

May magagabat na kasalan na kaipuhan na husayon kan kamagurangan sa kongregasyon, arog baga nin paghabon, pagputik, o magabat na inmoralidad. Hinihingoa nindang itanos asin sagweon an siring na mga nagkasala, na pinahihiro sindang magsolsol. Alagad kun an saro daing pagsolsol na naggigibo nin magabat na kasalan, iinaaplikar kan kamagurangan na ini an pagboot nin Dios na itiwalag an nagkasala. (1 Corinto 5:​1-5, 11-13) An sinabi ni Jesus sa Juan 20:23 bakong aplikado sa siring na mga kaso. An kamagurangan na ini mayo nin milagrosong mga balaog kan espiritu, arog baga kan abilidad na paomayan an mga may helang sa hawak o buhayon liwat an mga gadan; nahaman na kan mga balaog na idto an katuyohan kaiyan kan enot na siglo dangan natapos na. (1 Corinto 13:​8-10) Dugang pa, an kamagurangan ngonyan mayong autoridad nin Dios na magpatawad nin magabat na mga pagkakasala sa sentido nin pagpahayag na an nagkasala nin magabat malinig na sa pagheling ni Jehova. An klaseng ini nin kapatawadan dapat na basado sa pantubos na atang, asin si Jehova sana an puedeng magpatawad basado dian.​—Salmo 32:5; Mateo 6:​9, 12; 1 Juan 1:9.

Arog sa kaso kan lalaki sa suanoy na Corinto, kun an nagkasala nin magabat habong magsolsol, dapat siang itiwalag. Kun sa huri magsolsol sia asin magpaheling nin mga gibo na angay sa pagsolsol, posible an kapatawadan nin Dios. (Gibo 26:20) Sa siring na situwasyon, an Kasuratan nagtatao sa kamagurangan nin rason na maniwala na talagang pinatawad na ni Jehova an nagkasala. Dangan, oras na ikabalik na an saro, puede siang tabangan kan kamagurangan sa espirituwal na paagi na magin marigon sa pagtubod. An iba sa kongregasyon puede man na magpatawad sa paagi na kapareho kan pagpatawad kan mga Kristiano sa Corinto sa natiwalag na lalaki na ikinabalik na kaidto.

Sa paghusay sa mga bagay sa paaging ini, an kamagurangan dai naggigibo kan sadiri nindang mga pamantayan sa paghusgar. Iinaaplikar ninda an mga prinsipyo sa Biblia asin maingat na sinusunod an mga prosedimiento sa Kasuratan na itinao ni Jehova. Huli kaini, an ano man na pagpatawad o dai pagpatawad kan kamagurangan mapapasa sentido kan mga tataramon ni Jesus sa Mateo 18:18: “Sa katotoohan sinasabi ko sa saindo, An ano man na mga bagay na gaposon nindo sa daga iyo an mga bagay na ginapos sa langit, asin an ano man na mga bagay na hubadan nindo sa daga iyo an mga bagay na hinubadan sa langit.” An saindang mga aksion magpapaheling sana kan pagmansay ni Jehova sa bagay siring kan iinaatubang sa Biblia.

Bilang resulta, an sinabi ni Jesus, na nasusurat sa Juan 20:​23, bakong sarungat sa iba pang kabtang kan Kasuratan, kundi ipinaririsa kaiyan na an mga apostol igwa nin espesyal na autorisasyon mapadapit sa kapatawadan, kaoyon sa saindang espesyal na katongdan kan bago pa sana an Kristianong kongregasyon.

[Nota sa Ibaba]