Kamo daw Timbang na Payunir?

MAOGMA an mga mata kan ama mantang hinahalat nia na nakaamba an mga takyag an saiyang aking babae na gibohon an enot na paporopondong mga lakad kaini. Kun bigla siang natutumba, pinaririgon nia an saiyang boot na umotro. Aram nia na sa dai mahahaloy makakapanimbang na sia asin magigin makosog.

Sa kaagid na paagi, an sarong bagohan na ministrong payunir tibaad nangangaipo nin panahon asin pagparigon nin boot bago sia makapanimbang na kaipuhan tanganing magin mapanggana bilang pambilog na panahon na parabalangibog kan Kahadean. Dakol na payunir an magayagayang nagpapadagos sa paglilingkod sa laog nin dakol na dekada. May nagkapira na nawaran nin pagkatimbang huli sa dai linalaoman na mga pagkaliwat sa saindang mga kamugtakan. An iba nawaran pa ngani kan saindang kagayagayahan. Sa sarong nasyon, 20 porsiento kan mga minapoon na magpayunir an minapondo bago matapos an enot na duwang taon kan saindang pambilog na panahon na paglilingkod. Ano an puedeng maghale sa sarong payunir sa pinakamagayagayang paglilingkod na ini? May magigibo daw tanganing malikayan an mga kaolangan na ini?

Minsan ngani an maluyang salud, pinansial na mga pangangaipo, asin mga paninimbagan sa pamilya tibaad magin dahelan na bayaan kan iba an pambilog na panahon na ministeryo, an nagin singkogan para sa iba iyo an dai pakapadanay nin marahay na pagkatimbang kan laen-laen na Kristianong obligasyon. An pagkatimbang nagpaparisa nin “kamugtakan na dian mayo nin sarong kabtang, elemento, bagay, o impluwensia na mas magabat kisa sa saro pa o bakong tama an proporsion sa iba.”

Ipinaheling ni Jesu-Cristo sa saiyang mga disipulo kun paano gigibohon an paghuhulit asin paggibo nin disipulo. Sa saiya mismong ministeryo, iinilustrar man nia kun paano mapagdadanay an pagkatimbang. Ipinaheling ni Jesus na an Judiong mga namomoon sa relihion bakong timbang, na sinasabihan sinda: “Nagtatao kamo nin tinagba kan yerbabuena asin kan anis patin kan komino, alagad linilingawan nindo an mas magabat na mga bagay kan Ley, an hustisya asin pagkaherak patin pagigin fiel. An mga bagay na ini obligasyon na gibohon, pero bakong tanganing basangbasangon an ibang bagay.”​—Mateo 23:23.

An prinsipyong ini aplikado man na gayo ngonyan, nangorogna sa ministeryong pagpayunir. Napahiro nin entusiasmo asin marahay na intension, an iba nagpayunir na daing lubos na pag-andam dian o pagkonsiderar sa gabos na kalabot dian. (Lucas 14:​27, 28) An iba nabangkag na marhay sa ministeryo sa langtad kaya nalingawan ninda an ibang mahalagang kabtang nin Kristianismo. Paano sinda magkakaigwa asin makapadadanay nin pagkatimbang?

Magdanay na Makosog sa Espirituwal!

Nungkang pinabayaan ni Jesus an saiyang espirituwalidad. Minsan ngani an mga kadaklan na nagdatong tanganing magdangog sa saiya asin maomayan nagkaipo nin dakol na panahon nia, nag-iskedyul sia nin panahon para sa mapaghorophorop na pamibi. (Marcos 1:35; Lucas 6:12) An timbang na pagpapayunir ngonyan naghahagad man na an saro lubos na aprobetsaran an gabos na probisyon tanganing magdanay na makosog sa espirituwal. Nangatanosan si Pablo: “Minsan siring, ika daw na nagtotokdo sa iba, dai nagtotokdo sa saimong sadiri?” (Roma 2:21) Tunay na sala na gamiton an gabos na panahon nin saro sa paghuhulit sa iba mantang pinababayaan na tawan nin panahon an igong personal na pag-adal asin regular na pamibi.

Si Kumiko duwang dekada nang nagpapayunir. Minsan ngani tolo an aki nia asin daing pagtubod an agom, nadiskobre nia paagi sa eksperyensia na an pinakamarahay na panahon para sa saiya na basahon asin pag-adalan an Biblia bago sia matorog. Mantang sia nag-aadal, partikularmente niang tinatandaan an mga punto na magagamit nia sa ministeryo sa langtad tanganing mapagdanay nia an saiyang pan-aroaldaw na ministeryo na bago asin interesante. An ibang mapangganang payunir naeenot na bumangon sa ibang miembro kan pamilya tanganing magkamit nin espirituwal na pagpakosog liwat sa matoninong na oras sa aga. Tibaad igwa kamo nin iba pang angay na panahon na itinagama sa pag-andam para sa mga pagtiripon asin pagbasa kan pinakabagong Kristianong mga publikasyon. Kun mawot nindong mapagdanay an kagayagayahan sa ministeryo, an personal na pag-adal bakong bagay na puedeng hidalion o pabayaan.

Pagtimbang kan mga Paninimbagan sa Pamilya

Kaipuhan man na girumdomon nin mga magurang na nagpapayunir na an dakulang kabtang kan “kabotan ni Jehova” para sa sainda may labot sa pag-asikaso sa pisikal, emosyonal, asin espirituwal na mga pangangaipo kan saindang sadiring pamilya. (Efeso 5:17; 6:​1-4; 1 Timoteo 5:8) Kun beses minsan an may pagtubod na agom asin mga miembro nin pamilya nahahadit na dai ninda maaako an pagranga asin pagsuportar kan agom asin ina oras na sia magpayunir. An siring na mga saboot nagbubunga nin bakong gayong entusiastikong reaksion sa saiyang pagmawot na magin payunir. Minsan siring, paagi sa marahay na pagplano asin pangandam, mapagdadanay an pagkatimbang.

An dakol na payunir nagmamaigot na gibohon an gabos nindang paghuhulit kun mayo sa harong an mga miembro nin pamilya. Si Kumiko, na nasambitan sa enotan, kaiba kan saiyang pamilya mantang namamahaw sinda, ihinahatod sa pinto an saiyang agom asin mga aki sa paghale ninda kun aga, asin nasa harong na bago sinda magpuli. Ginagamit nia an mga Lunes sa patienot na pagluto nin nagkapirang pagkakan tangani na sia makapahingalo asin makakakan kaiba kan saiyang pamilya imbes na magin sibot sa kusina. An sabay na paggibo nin bako sanang sarong trabaho, arog baga nin iba pang trabaho sa harong mantang nagluluto, nakatatabang man. Sa paaging iyan, si Kumiko nagkakaigwa pa ngani nin panahon na imbitaran an mga katood kan saiyang mga aki asin ipag-andam sinda nin espesyal na mga sorpresa.

Mantang nagtitin-edyer an mga aki, sinda parateng nangangaipo nin orog na atension kan saindang mga magurang sa pag-atubang sa bagong mga emosyon, kamawotan, pagduda, asin pagkahandal na nakapangingibabaw sa sainda. Ini nagkakaipo nin pagigin alisto asin pagliwat nin iskedyul nin magurang na payunir. Horophoropa si Hisako, sarong nagpapayunir na ina na may tolong aki. Ano an ginibo nia kan an saiyang panganay na aking babae magpoon na magpaheling nin kadaihan nin kagayagayahan asin entusiasmo para sa Kristianong mga pagtiripon asin paglilingkod sa langtad huli sa impluwensia nin kinabanon na mga katood sa eskuelahan? An tunay na pangangaipo iyo na isaboot kan saiyang aking babae an katotoohan asin lubos na magin kombensido na an pagigin siblag sa kinaban iyo an pinakamarahay.​—Santiago 4:4.

Si Hisako nagsabi: “Nagdesisyon ako na adalan sia giraray aroaldaw sa pundamental na mga doktrina sa librong Mabuhay Sagkod Lamang. Sa primero nagkapirang minuto sana kaming nakapag-aadal, na an sakong aking babae parateng nagrereklamo na makolog an tulak asin payo kun oras nang mag-adal. Alagad ginibo kong regular an pag-adal. Pakalihis nin nagkapirang bulan, an saiyang espiritu dakula an pag-oswag, na sa halipot na panahon nagbunga kan saiyang pagdusay asin bautismo.” Ngonyan si Hisako naoogma sa pambilog na panahon na ministeryo kaiba an saiyang aking babae.

An nagpapayunir na mga ama kaipuhan man na mag-ingat na dai sinda mabangkag sa pag-asikaso sa mga interesado sa langtad asin sa saindang mga obligasyon sa kongregasyon kaya dai na ninda ikinatatao sa saindang nagdadakulang mga aki an makosog na emosyonal na pagsuportar asin paggiya na maninigo para sa sainda. Bako ining bagay na maninigong ipasa kan lalaki sa saiyang agom na babae. An sarong sibot na Kristianong magurang sa kongregasyon na haloy nang nagpapayunir asin may pinadadalagan man na sadit na negosyo nagtatao nin panahon na adalan an kada saro sa saiyang apat na aki. (Efeso 6:4) Dugang pa, nag-aandam sia para sa semanal na mga pagtiripon kaiba kan saiyang pamilya. An timbang na mga payunir dai pinababayaan an saindang pamilya sa materyal o espirituwal.

Pagigin Timbang sa Hanap-Buhay

An tamang pagmansay sa aroaldaw na mga pangangaipo saro pang bagay na dian an mga payunir maninigong magmaigot na makapadanay nin marahay na pagkatimbang. Digdi liwat, dakol kitang manonodan sa marahay na halimbawa asin hatol ni Jesus. Nagpatanid sia tumang sa labi-labing paghadit manongod sa materyal na mga bagay. Imbes, pinarigon nia an boot kan saiyang mga disipulo na enoton an Kahadean, na nanunuga na an Dios aatamanon sinda arog kan saiyang ginigibo sa iba pang mga linalang nia. (Mateo 6:​25-34) Paagi sa pagsunod sa marahay na hatol na ini, nahimo nin dakol na payunir na magdanay sa pambilog na panahon na paglilingkod sa laog nin dakol na taon, asin binendisyonan ni Jehova an saindang mga paghihingoa na makakua nin ‘kakanon para sa kada aldaw.’​—Mateo 6:11.

Hinatolan ni apostol Pablo an mga kapwa Kristiano na ‘ipaaram sa gabos na tawo an saindang pagkamakatanosan.’ (Filipos 4:5) Sierto nanggad, an pagkamakatanosan magkakaipo na atamanon niato nin angay an satong salud. An timbang na mga payunir ginigibo an gabos na paghihingoa na magpaheling nin pagkamakatanosan sa saindang paagi nin pamumuhay asin sa saindang kaisipan manongod sa materyal na mga bagay, sa pakaaram na naheheling nin iba an saindang gawe.​—Ikomparar an 1 Corinto 4:9.

Maninigong likayan nin mga hoben na nagpapayunir an sobrang pag-aprobetsar sa pagkamatinao kan saindang mga magurang. Kun sinda nag-iistar pa sa harong kan saindang mga magurang, pagpaheling nin marahay na pagkatimbang asin pag-apresyar na tumabang sa mga gibohon sa harong asin magkaigwa nin trabahong por ora na magpapangyari sa sainda na makakontribwir sa mga gastos sa harong.​—2 Tesalonica 3:10.

An Timbang na mga Payunir Tunay na Bendisyon

Tibaad kamo payunir na nagmamaigot na mapagdanay an tamang pagkatimbang. Magkompiar kamo. Kun paanong an sadit na aki nangangaipo nin panahon na makanood na makapanimbang asin makalakaw, sinasabi nin dakol na maygurang na payunir na nahaloy sinda na makamit an pagkatimbang sa pag-asikaso sa gabos nindang obligasyon.

An personal na pag-adal, pag-asikaso sa mga miembro nin pamilya, asin pagpanigo sa saindang sadiring materyal na mga pangangaipo kabale sa mga bagay na dian pinagmamaigotan nin mga payunir an pagkatimbang. Ipinaheheling nin mga report na an dakol na payunir inootob an saindang mga paninimbagan sa pambihirang paagi. Sinda tunay na bendisyon sa komunidad asin kaomawan ki Jehova asin sa saiyang organisasyon.