Biktima daw Kamo nin Prehuwisyo?
ANO an pagkakaparareho nin etnikong kadahasan, rasismo, diskriminasyon, segregasyon, asin paglaglag sa sarong rasa? Iyan gabos bunga nin lakop na tendensia nin tawo—an prehuwisyo!
Ano an prehuwisyo? An sarong ensiklopedya tinatawan iyan nin kahulogan na “sarong opinyon na nabilog na dai tinawan nin panahon o pagmakolog tanganing mahusgaran sa makatanosan na paagi.” Bilang mga tawong bakong sangkap, kita may tendensiang magin medyo prehudisyal. Tibaad may naiisip kamong mga pangyayari na kamo naghusgar na mayo sa saindo an gabos na katunayan. Ipinaheheling kan Biblia an kalaenan kan siring na prehudisyal na mga inklinasyon sa paagi nin paghohokom ni Jehova Dios. Iyan nagsasabi: “An pagheling nin Dios bakong arog kan pagheling nin tawo, huling an tawo nagheheling sa kun ano an naheheling kan mga mata; alagad kun manongod ki Jehova, hineheling nia kun ano an puso.”—1 Samuel 16:7.
Puedeng Makadanyar an Prehuwisyo
Daing duwa-duwa na an gabos nakaeksperyensia na nin napasalang paghusgar nin iba. (Ikomparar an Eclesiastes 7:21, 22.) Sa pankagabsan, kita gabos biktima nin prehuwisyo. Minsan siring, kun hinahale tolos, an prehudisyal na mga kaisipan posibleng kadikit sana o mayo nganing ibungang danyos. An pagpatalubo sa siring na mga kaisipan an puedeng magresulta nin kakologan. Iyan puedeng makadaya sa sato na maniwala sa kaputikan. Halimbawa, sa impluwensia nin prehuwisyo, may mga tawong talagang naniniwala na an sarong tawo puedeng magin mahanab, hugakon, tonto, o mapalangkaw huli sana sa pagigin kabilang sa sarong relihioso, etniko, o nasyonal na grupo.
Sa dakol na pangyayari an siring na napasalang paghusgar nagbubunga nin bakong makatanosan, mapan-abuso, o madahas pa nganing tratamiento sa iba. Minilyon na tawo an nawaran nin buhay sa lagduan na mga pangadan, mga paglaglag sa sarong rasa, etnikong garadanan, asin iba pang klase nin labi-labing prehuwisyo.
Sa bilog na daga, linabanan nin mga gobyerno an prehuwisyo paagi sa legal na paggarantiya kan dai malalapas na diretso sa katalingkasan, katiwasayan, asin pagkapantaypantay. Kun babasahon nindo an konstitusyon o pangenot na mga ley sa saindong nasyon, daing duda na makanonompong kamo nin sarong kabtang o enmienda na sinadya tanganing protehiran an mga diretso nin gabos na siudadano, ano man an saindang rasa, sekso, o relihion. Pero, an prehuwisyo asin diskriminasyon lakop sa bilog na kinaban.
Biktima daw kamo nin prehuwisyo? Binansagan daw kamong mahanab, hugakon, tonto, o mapalangkaw huli sana sa saindong rasa, edad, sekso, nasyonalidad, o relihiosong mga paniniwala? Idinedehar daw sa saindo an mga oportunidad sa tamang edukasyon, trabaho, istaran, asin mga serbisyo sosyal huli sa prehuwisyo? Kun iyo, paano kamo makapanggagana?
[Retrato sa pahina 3]
An pagpatalubo sa prehuwisyo minapukaw sa rasyal na pagkaongis
[Pasasalamat para sa pinagkuanan]
Nina Berman/Sipa Press