Puede daw Nindong Talagang Kamotan an Dios?
“MAYONG tawo na makaheheling sa sako asin mabubuhay,” an sabi nin Dios. (Exodo 33:20) Dugang pa, poon kan mga panahon kan Biblia mayo nin ebidensia na an siisay man na tawo nagkaigwa nin direktang pakikomunikar sa saiya. Bako daw na garo masakit—imposible pa ngani—na makapatalubo nin hararom na pagpadangat sa saro na nungka nindong direktang naheling o nadangog? Talaga daw na posible na magkaigwa nin mamomoton na relasyon sa Kaglalang kan uniberso?
Dapat na daing duda na posibleng makapatalubo nin mainit na personal na relasyon sa Dios. Sa Deuteronomio 6:5, mababasa niato na pinagbotan an nasyon nin Israel: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong kosog.” Kan huri pinatunayan liwat ni Jesu-Cristo an ley na ini sa saiyang mga parasunod asin idinugang: “Iyo ini an pinakadakula asin enot na togon.” (Mateo 22:37, 38) Sasadolon daw kita kan Biblia na kamotan an Dios kun dai makakamit an siring na relasyon?
Alagad linalaoman daw kita ni Jehova na kamotan sia huli sana ta ipinagboboot nia iyan? Dai. Linalang nin Dios an enot na mag-agom na tawo na igwa kan kapasidad na kamotan sia. Si Adan asin Eva dai pinirit sa sarong mamomoton na relasyon sa saindang Kaglalang. Imbes, ibinugtak sinda nin Dios sa marahayon na mga kamugtakan na dian mapatatalubo ninda an hararom na pagpadangat sa saiya. Sinda an mapili—orog na dumayupot sa Dios o rumayo sa saiya.
Pinili ni Adan asin Eva na magrebelde. (Genesis 2:16, 17; 3:6, 7) Minsan siring, an mga gikan ninda magkakaigwa kan potensial na magpatalubo nin mamomoton na relasyon sa Kaglalang.
Paglakaw sa Kaibanan kan Tunay na Dios
Halimbawa, sa Biblia, si Abraham inaapod na “katood” nin Dios. (Santiago 2:23) Pero bako sanang si Abraham an solamenteng nagkaigwa nin dayupot na relasyon sa Dios. An Biblia nagtataram manongod sa dakol na iba pang tawong bakong sangkap na nagpaheling nin tunay na pagpadangat ki Jehova asin ‘naglakaw sa kaibanan kan tunay na Dios.’—Genesis 5:24; 6:9; Job 29:4; Salmo 25:14; Talinhaga 3:32.
An mga lingkod nin Dios kan suanoy dai namundag na may pagkamoot asin pagpadangat sa Dios. Iyan kinaipuhan na pataluboon ninda. Paano? Paagi sa pakamidbid sa saiya sa saiyang personal na ngaran, an Jehova. (Exodo 3:13-15; 6:2, 3) Paagi sa pakaaram manongod sa saiyang pag-eksister asin pagka-Dios. (Hebreo 11:6) Paagi sa parateng paghorophorop sa saiyang mamomoton na mga gibo. (Salmo 63:6) Paagi sa pagpahayag kan kairairaromi nindang mga kaisipan sa pamimibi sa Dios. (Salmo 39:12) Paagi sa pakanood manongod sa saiyang karahayan. (Zacarias 9:17) Paagi sa pagpatalubo nin nakararahay na takot na mapaanggot sia.—Talinhaga 16:6.
Puede daw kamong magin katood nin Dios asin maglakaw sa kaibanan nia? Totoo, dai nindo naheheling an Dios o nadadangog an saiyang tingog. Minsan siring, inaagda kamo ni Jehova na magin ‘bisita sa saiyang tolda,’ saiyang katood. (Salmo 15:1-5) Sa siring, posible na kamotan nindo an Dios. Alagad paano nindo mapatatalubo an dayupot asin mapagpadangat na relasyon sa saiya?