Bareta kan mga Parabalangibog kan Kahadean
Tabang Para sa mga “Napapaha” sa Rusya
“MAOGMA an mga nagugutom asin napapaha sa katanosan, huli ta sinda mababasog,” an sabi ni Jesus. (Mateo 5:6) An minasunod na mga eksperyensia nag-iilustrar kun paano nagtatabang an Mga Saksi ni Jehova na mapanigoan an espirituwal na pagkapaha kan dakol sa Rusya, kun saen ipinangalad an relihiosong katalingkasan sa laog nin labing 70 taon.
▪ An sarong babae na an ngaran Valentina igwa nin seryosong mga hapot sa Biblia na dai pa nasisimbag sa dakol nang taon. Halimbawa, iniisip-isip nia: ‘Kiisay namibi si Jesus?’ Nangatanosan sia na si Jesus siertong namibi sa saro na mas halangkaw sa saiya asin nag-isip-isip sia manongod sa ngaran kan Saro na ini.
Nagduman sia sa Iglesya Ruso Ortodokso. Minsan siring, dai nia nanompongan sa relihion na iyan an simbag sa saiyang mga hapot. Huling bakong kontento, nagduman sia sa sarong iglesyang Protestante alagad sa giraray dai nakanompong nin malinaw na mga simbag. Dai aram kun saen pa maduman, pinonan ni Valentina na basahon an Biblia, na naghihingoang sia na sana an humanap kan mga simbag—na mayong nangyari. Namibi sia para sa tabang.
Paghaloyhaloy an Mga Saksi ni Jehova nagtoktok sa saiyang pinto. Ipinaheling ninda sa saiya hale sa Biblia na Jehova an ngaran nin Dios. Sa katapustapusi, nanodan nia kun kiisay namibi si Jesus! Pinonan niang pag-adalan nin regular an Biblia kaiba kan mga Saksi. Sa parate dai sia natotorog tanganing basahon an mga literatura na ipinublikar kan Watch Tower Society asin hanapon an mga teksto sa Biblia. Dai nahaloy nagkonklusyon si Valentina na nanompongan na nia an katotoohan. Mayo pang tolong bulan nagpoon na siang makikabtang sa paghuhulit, asin duwang bulan pakalihis kaiyan, sia nabautismohan. Binalosan an saiyang mapagngayongayong paghanap kan katotoohan.
▪ An sarong Saksi nagbiahe lunad sa bus tanganing maghulit sa sarong puerang lugar. Durante kan biahe nakipag-olay sia sa sarong hoben na babae manongod sa mga panuga kan Biblia, alagad bakong interesado an hoben na babae. Pakalihis nin duwang bulan nagbiahe na naman an Saksi pasiring sa lugar man sanang iyan tanganing tumao nin pahayag-publiko. Pakatapos kan pahayag dinolok nia an sarong bisita asin hinapot ini: “Igwa na daw nin nakipag-olay sa saindo manongod sa maogmang bareta hale sa Biblia?” An lalaki nagsimbag, “Igwa, ika.” Paghona kan Saksi nagsusuba ini. Alagad ipinaliwanag kan hoben na lalaki na duwang bulan bago kaini nadangog nia an pag-oolay kan Saksi asin kan hoben na babae, kan nakasakay sa bus. “Boot kong makaaram nin dakol pa, alagad naglusad na kamo sa bus, asin naghona ako na nungka na akong makaheheling liwat nin Mga Saksi ni Jehova. Dangan sa pinagtatrabawohan ko nakamidbid ko an sarong lalaki na nag-aadal kan Biblia kaiba kan mga Saksi. Kaya uya ako!”
An lalaki asin an saiyang agom nagpoon na mag-adal sa Biblia. Pakalihis nin halipot na gayong panahon, naheling nia na an saiyang trabaho kontra sa mga prinsipyo kan Biblia. Huling boot na papagdanayon an marahay na konsensia sa atubangan nin Dios, nagbago sia nin trabaho. Ngonyan ipinakikipag-olay na nia sa iba an manongod sa Kahadean nin Dios sa gabos na oportunidad. An saiyang agom nag-ooswag man sa saiyang pag-adal sa Biblia.
An Mga Saksi ni Jehova sa mahiwas na teritoryo nin Rusya naoogmang magkaigwa nin kabtang sa pagsabi sa gabos na sinserong tawo: “‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.”—Kapahayagan 22:17.