Inaarog daw Nindo an Satong Dios na Dai Nagpapaorog?

DAI pagpaorog​—saen daw iyan puedeng manompongan? Igwa nin Saro na biyong dai nagpapaorog, mayo nin prehuwisyo, paboritismo, asin diskriminasyon. Sia si Jehova Dios, an Kaglalang nin katawohan. Minsan siring, mapadapit sa mga tawo, an Ingles na parasurat kan ika-19 siglo na si Charles Lamb sadiosan na nagsurat: “Ako, sa mas simpleng pagtaram, pano nin mga prehuwisyo​—na igwang mga ginugusto asin hinahaboan.”

Pag-abot sa dai pagpaorog, kadakol kan kulang sa mga relasyon sa tawo. Dakol na siglo na an nakaagi an madonong na si Hadeng Salomon nin Israel nagkomento na “an tawo nagsakop sa tawo sa saiyang ikararaot.” (Eclesiastes 8:9) An pagkaongis sa ibang rasa, ralaban nin mga nasyon, asin iriwal nin mga pamilya padagos na nagdadakol. Kun siring, realistiko daw na maniwala na, paagi sa sainda man sana, an mga tawo puedeng makagibo nin sosyedad na daing pagpaorog?

Kaipuhan an may pag-aram na paghihingoa tanganing kontrolon an satong mga ugale asin haleon sa satong sadiri an ano man na nakagamot nang marhay na mga prehuwisyo. (Efeso 4:​22-24) Dai ta naaaraman tibaad may tendensia kitang magkaigwa nin mga ugale na pinorma kan satong sosyal asin edukasyonal na mga kamugtakan asin nakagamot na sa satong pinaghalean na pamilya, rasa, asin nasyon. An garo baga bakong gayong makosog na mga inklinasyon na ini sa parate nakatanom nang marhay asin nagpapalakop nin mga ugale na nagbubunga nin pagpaorog. An Eskoses na huwes asin editor na si Lord Francis Jeffrey nag-admitir pa ngani: “Mayong dai naririsa an tawo na mas haloy kisa sa pagkagamot kan saiyang mga prehuwisyo.”

Si Lenaa saro na nag-aadmitir na kaipuhan an may pag-aram na paghihingoa tanganing labanan an inklinasyon na magpaorog. An pagpogol sa mga pakamate nin prehuwisyo sa boot nin saro, an sabi nia, “nangangaipo nin dakol na paghihingoa huli ta an nagimatan sarong makosog na marhay na impluwensia.” Minimidbid man ni Lena na kaipuhan an dayaday na mga pagirumdom.

An Rekord nin Dai Pagpaorog ni Jehova

Si Jehova sangkap na halimbawa nin dai pagpaorog. Poon sa enot na mga pahina kan Biblia, mababasa ta kun paano nia ipinaheling an dai nia pagpaorog sa saiyang mga pagtratar sa mga tawo. Dakol kitang manonodan sa ekselenteng mga halimbawa asin pagirumdom na ini.

Nagpaheling si Jehova nin dai pagpaorog sa pagmaniobra sa mga bagay-bagay kaya an Judiong apostol na si Pedro nakapagbalangibog kan maogmang bareta ki Cornelio asin sa iba pang Hentil kan 36 C.E. Kan panahon na idto si Pedro nagsabi: “An Dios daing ipinaoorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.”​—Gibo 10:​34, 35.

Sa gabos niang pagtratar sa pamilya nin tawo, daing pagliwatliwat na ipinaheling ni Jehova an dai nia pagpaorog. Si Cristo Jesus nagsabi dapit sa saiyang Ama: “Pinasisirang nia an saiyang aldaw sa maraot asin sa marahay asin pinapaoranan nia an matanos asin bakong matanos.” (Mateo 5:45) Orog pang inoomaw si Jehova bilang Dios na dai nagpapaorog, si Pedro nagpatunay: “Sia mapasensia sa saindo huli ta habo nia na an siisay man malaglag kundi boot nia na an gabos makapagsolsol.”​—2 Pedro 3:9.

Kan kaaldawan ni Noe, kan “an karatan nin tawo labi-labi na sa daga asin an gabos na tendensia kan mga kaisipan kan saiyang puso danay na sa karatan na sana,” ipinagboot ni Jehova an paglaglag sa kinaban na idto nin katawohan. (Genesis 6:5-7, 11, 12) Minsan siring, sa pagboot nin Dios asin naheheling na marhay kan saiyang mga kakontemporanyo, si Noe naggibo nin dahong. Mantang si Noe asin an saiyang mga aking lalaki naggigibo kan dahong, si Noe saro man na “parahulit nin katanosan.” (2 Pedro 2:5) Apisar na aram nia an maraot na inklinasyon nin puso kan kapag-arakian na idto, si Jehova daing pagpaorog na nagpaabot sa sainda nin malinaw na mensahe. Pinukaw nia an saindang isip asin puso paagi sa pagpatrabaho asin pagpahulit ki Noe. Yaon sa sainda an gabos na oportunidad na maghimate, alagad imbes “dai sinda nagmangno sagkod na dumatong an baha asin iinanod sinda gabos.”​—Mateo 24:39.

Kanigoan kaekselenteng halimbawa nin dai pagpaorog ni Jehova! Sa delikadong huring mga aldaw na ini, pinahihiro kaiyan an mga lingkod nin Dios na ibalangibog an maogmang bareta kan Kahadean na may kaparehong dai pagpaorog. Dugang pa, dai sinda minapondo sa pagpahayag kan aldaw nin pamalos ni Jehova. Naheheling na marhay kan publiko, daing pagpaorog na iinaatubang ninda an mensahe ni Jehova tanganing madangog kan gabos.​—Isaias 61:​1, 2.

Lininaw kan mga panuga ni Jehova sa mga patriarkang sinda Abraham, Isaac, asin Jacob na sia Dios na dai nagpapaorog. Paagi sa espesipikong linya nin pamilya ninda madatong an ninombrahan na Saro na paagi sa saiya “an gabos na nasyon sa daga magbebendisyon nanggad kan saindang sadiri.” (Genesis 22:18; 26:4; 28:14) Si Cristo Jesus napatunayan na iyo an ninombrahan na Saro na iyan. Paagi sa kagadanan asin pagkabuhay liwat ni Jesus, itinao ni Jehova an dalan nin kaligtasan para sa gabos na makinuyog na katawohan. Iyo, an mga pakinabang sa pantubos na atang ni Cristo makakamtan na daing ipinaoorog.

Kan kaaldawan ni Moises, an dai pagpaorog ni Jehova nahayag mismo sa pinakainteresanteng paagi may koneksion sa mga aking babae ni Zelofehad. An limang babae na ini napaatubang sa sarong dakulang problema manongod sa mana kan saindang ama sa Dagang Panuga. Totoo ini huli ta ugale sa Israel na an manang daga mapasa mga aking lalaki. Minsan siring, si Zelofehad nagadan na mayong nawalat na aking lalaki na mag-aako nin mana. Kun siring an limang aking babae ni Zelofehad iinatubang ki Moises an saindang kahagadan para sa daing pagpaorog na pagtratar, na an sabi: “Taano an ngaran kan samuyang ama ta hahaleon sa tahaw kan saiyang pamilya huli ta sia dai nagkaigwa nin aking lalaki? Tawe kami nin rogaring sa tahaw kan mga tugang na lalaki kan samuyang ama.” Hininanyog ni Jehova an saindang mga pakimaherak asin pinagbotan si Moises: “Kun enkaso an siisay man na lalaki magadan na dai nagkaigwa nin aking lalaki, kaipuhan kun siring na papangyarihon nindo na an saiyang mana mapasa saiyang aking babae.”​—Bilang 27:​1-11.

Kanigoan kamamomoton asin daing pagpaorog na arogan! Tanganing maseguro na an mana sa tribo dai mapasa ibang tribo kun mag-agom an mga aking babae, hinagad sa sainda na mag-agom sana sa “pamilya kan tribo kan saindang mga apoon.”​—Bilang 36:5-12.

An dugang pang pakamansay sa dai pagpaorog ni Jehova maheheling sa kaaldawan kan hokom asin propetang si Samuel. Isinugo sia ni Jehova na lahidan an bagong hade kan tribo ni Juda sa pamilya ni Jese na Betlehemita. Alagad walo an aking lalaki ni Jese. Siisay an lalahidan bilang hade? Naghanga si Samuel sa pisikal na tindog ni Eliab. Minsan siring, si Jehova dai napadadara sa panluwas na mga itsura. Sinabihan nia si Samuel: “Dai ka magheling sa saiyang lalauogon asin sa langkaw kan tindog nia . . . Huli ta an pagheling nin Dios bakong arog kan pagheling nin tawo, huling an tawo nagheheling sa kun ano an naheheling kan mga mata; alagad kun manongod ki Jehova, hineheling nia kun ano an puso.” Si David, na pinakangohod na aking lalaki ni Jese, an pinili.​—1 Samuel 16:1, 6-13.

Pakanood sa Dai Pagpaorog ni Jehova

Marahay na arogon kan Kristianong kamagurangan si Jehova paagi sa pagheling sa espirituwal na mga kualidad nin sarong kapagtubod. Pasil na husgaran an sarong indibiduwal paagi sa satong sadiring mga pamantayan, na tinotogotan an satong personal na mga saboot na tahoban an satong paghusgar. Siring sa pagkasabi kaiyan nin sarong magurang sa kongregasyon, “Pinagmamaigotan kong trataron an iba sa paagi na nakapaoogma ki Jehova, bakong basado sa sakong sadiring patienot na inisip na mga ideya.” Kapakipakinabang nanggad para sa gabos na lingkod ni Jehova na gamiton an saiyang Tataramon bilang saindang pamantayan!

An mga halimbawa sa Biblia na nasambitan sa enotan tinatabangan kitang labanan an dai pa nahahaleng mga pakamate nin rasyal o nasyonalistikong prehuwisyo. Paagi sa pag-arog sa dai pagpaorog ni Jehova, pinoprotehiran niato an Kristianong kongregasyon sa prehuwisyo, diskriminasyon, asin paboritismo.

Nanodan ni apostol Pedro na “an Dios daing ipinaoorog.” (Gibo 10:34) An paboritismo kaiwal nin dai pagpaorog asin minabalga sa mga prinsipyo nin pagkamoot asin pagkasararo. Si Jesus nakaakit sa mga dukha, maluya, asin hamak, asin pinagian nia an saindang pasan. (Mateo 11:​28-30) Kabaliktaran siang marhay kan Judiong mga namomoon sa relihion, na nagpakangkagurangnan sa mga tawo, na pinagagabatan sinda nin magabat na pasan nin mga susundon. (Lucas 11:​45, 46) An paggibo kaini asin pagpaheling nin paboritismo sa mga mayaman asin prominente tunay na bakong kaoyon sa mga katokdoan ni Cristo.​—Santiago 2:​1-4, 9.

Ngonyan, an Kristianong kamagurangan nagpapasakop sa pagkapayo ni Cristo asin nagpapaheling nin dai pagpaorog sa gabos kan dusay na banwaan ni Jehova. Mantang ‘pinapastoran ninda an aripompon nin Dios na nasa saindong pangataman,’ linilikayan ninda an pagpaheling nin paboritismo huli sa kamugtakan sa ekonomiya, pagkakalaen nin personalidad, o mga relasyon sa pamilya. (1 Pedro 5:2) Paagi sa pag-arog sa Dios na dai nagpapaorog asin pagsunod sa saiyang patanid tumang sa mga gibo nin paboritismo, pinaooswag kan Kristianong kamagurangan an espiritu nin dai pagpaorog sa kongregasyon.

An Kristianong kongregasyon kan Mga Saksi ni Jehova sarong internasyonal na kasararoan nin magturugang. Iyan buhay na ebidensia na an daing prehuwisyo, daing pagpaorog na sosyedad puedeng magkatotoo sa irarom kan pagdirehir ni Jesu-Cristo. An mga Saksi ‘isinolog an bagong pagkatawo na linalang oyon sa kabotan nin Dios sa tunay na katanosan asin kaimbodan.’ (Efeso 4:24) Iyo, nakanonood sinda sa sangkap na halimbawa kan Dios na dai nagpapaorog, si Jehova, asin may paglaom na buhay na daing sagkod sa bagong kinaban na mayo kan gabos na pagpaorog.​—2 Pedro 3:13.

[Nota sa Ibaba]

[Retrato sa pahina 26]

Nanodan ni apostol Pedro na an Dios daing ipinaoorog