Arogon an Dai Pagpaorog ni Jehova
1 Si Jehova interesado sa mga tawo. Daing pagpaorog na inaako nia an siisay man na naggigibo kan saiyang kabotan. (Gibo 10:34, 35) Kan si Jesus maghulit sa mga tawo, sia man dai nagpaorog. (Luc. 20:21) Kaipuhan niatong arogon an saindang halimbawa, siring kan ginibo ni Pablo, na nagsurat: “Saro sana an Kagurangnan kan gabos, na mayaman sa gabos na nag-aapod sa saiya.”—Roma 10:12.
2 An pagbalangibog kan maogmang bareta kan Kahadean nin Dios sa gabos na nanunuparan niato nagtatao nin kamurawayan sa Dios. Kaipuhan na padagos niatong ihiras an marahayon na mensaheng ini sa iba, ano man an saindang rasa, posisyon sa sosyedad, edukasyon, o pinansial na kamugtakan. (Roma 10:11-13) Ini nangangahulogan nin paghuhulit sa mga mahinanyog—mga lalaki, babae, hoben, asin may edad na. Kaipuhan niatong sumongko sa kada pinto tangani na matawan nin oportunidad an lambang kagharong na madangog an katotoohan.
3 Magkaigwa nin Interes sa Gabos: An satong pasohan iyo na makaolay an gabos na mahihimo niatong dolokon. Ginigirumdom ini, may mga parahayag na nagin mapanggana sa pagpapatotoo sa mga tawo na nasa mga opisina nin doktor, ospital, harong para sa pag-ataman sa mga gurang, asin klinika sa rehabilitasyon. Saro pa, nagpatotoo an mga parahayag sa mga nagmamanehar nin punerarya, superbisor asin parakonseho nin eskuelahan, asin huwes. Kun nagdodolok sa mga opisyal, tamang magpahayag nin pag-apresyar sa sainda sa nakatatabang na mga serbisyo na itinatao ninda sa komunidad. Magin magalang, asin pumili nin napapanahon na mga artikulo na partikularmenteng nagpapaliwanag kan saindang kanya-kanyang klase nin trabaho asin mga problema na konektado dian.
4 Sa sarong pangyayari an sarong tugang na babae nahimong makaolay an sarong huwes sa opisina kaini. Pakatapos nin maogmang orolay, ini an gikan sa boot na komento nia: “Aram mo kun ano an gusto ko sa Mga Saksi ni Jehova? Sinda igwa nin masarig an basehan na mga prinsipyo na dian sinda dai minasuway.” Nakatao nin marahay na patotoo sa maimpluwensiang tawong ini.
5 Dai niato nababasa an puso nin mga tawo. Minsan siring, paagi sa pakikipag-olay sa gabos na nanunuparan niato, ipinaheheling niato an satong pagtubod sa abilidad nin Dios na giyahan an satong gibohon. Dugang pa, tinatawan kaini an mga tawo nin pribilehio na madangog asin maghimate sa mensahe nin paglaom. (1 Tim. 2:3, 4) Gamiton niato nin madonong an satong panahon asin hingoahon na arogon an dai pagpaorog ni Jehova paagi sa pagpaabot kan maogmang bareta sa gabos na tawo na mahihimo niatong kaolayon.—Roma 2:11; Efe. 5:1, 2.