Pagpaabot kan Maogmang Bareta sa Dakol Pa

MANTANG pinag-iisip-isip ko an mga tawo sa sakong nasyon, narealisar ko na dakol an nakamimidbid sa Mga Saksi ni Jehova paagi sana sa mga bareta. An mga tawong ini dapat na kaolayon, an inisip-isip ko, tanganing maaraman ninda kun siisay an Mga Saksi ni Jehova asin kun ano talaga an pinaniniwalaan ninda. Alagad paano ako makatatabang? An sakong agom Kristianong magurang sa kongregasyon, asin tinatawan nia ako nin madonong na giya asin mga suhestion.

Nakakua kami nin importanteng marhay na ideya sa artikulong “Magazines That Give Practical Comfort,” na ipinublikar sa Enero 8, 1995 luwas kan magasin na Awake! Mapadapit sa aktibidad nin sarong Saksi, nagsasabi an artikulo: “Pinagmamaigotan niang mangolekta nin mas daan na mga kopya kan nagkapirang magasin na Awake! na natipon kan ibang mga Saksi sa harong. Dangan dinadalaw nia an mga ahensia na hinohona niang puedeng magpaheling nin espesyal na interes sa nagkapira kan mga topiko.”

Sa tabang kan sakong agom, dai nahaloy nakakolekta ako nin nagkapirang gatos na kopya kan mga magasin. Sa mga ini nakapili ako nin manlaenlaen na mga tema na angay para sa mga tawo na hihingoahon kong kaolayon.

Ginagamit an mga direktoryo nin telepono asin pampublikong mga rekord, nagkompilar ako nin lista na nagrerepresentar sa mga ospital, dagosan nin mga hoben, asin mga harong para sa pag-ataman sa mga gurang. Ilinista ko man an mga nagmamanehar nin punerarya, superbisor asin parakonseho nin eskuelahan, doktor, asin opisyal sa mga bilanggoan patin korte. Kabale sa sakong lista an mga direktor nin institusyon para sa mga alkoholiko asin adikto sa droga, asosasyon para sa mga isyu sa kamugtakan kan palibot, para sa mga baldado asin biktima nin guerra, asin para sa pag-estudyar sa nutrisyon. Dai ko man linaktawan an mga manedyer nin mga opisina para sa asistensia publika, serbisyo sosyal, asin pampamilyang mga aktibidad.

Ano an Sasabihon Ko?

An enot kong ginigibo kun nagdadalaw iyo na ipamidbid nin malinaw an sakong sadiri. Dangan sinasambit ko na pira man sanang minuto an pagdalaw ko.

Oras na kaatubang na an namamahala, nagsasabi ako: “Saro ako sa Mga Saksi ni Jehova. Minsan siring, dai ako nagdigdi tangani na makipag-olay manongod sa relihion, na tibaad bakong angay durante kan oras nin trabaho sa opisina.” Sa parate nagigin mas pamugtak na an mga kamugtakan. Dangan, iinaadaptar an sakong mga komento sa situwasyon, nagpapadagos ako: “Duwa an dahelan kan sakong pagdalaw. Enot, boot kong ipahayag an sakong pagpahalaga sa gibohon na inoorganisar kan saindong opisina. Total, dai maninigong ipasipara na sana na an saro ginagamit an saiyang panahon asin kosog sa kapakanan kan pankagabsan na publiko. Ini dapat nanggad na komendaran.” Sa dakol na situwasyon an tawong dinodolok sa paaging ini napapangalas.

Sa oras na iyan an tawo posibleng marhay na nag-iisip-isip kun ano an ikaduwang dahelan kan pagdalaw ko. Nagpapadagos ako: “An ikaduwang dahelan kan pagdalaw ko iyo ini: Gikan sa samong magasin na Awake!, na ipinupublikar sa gabos na nasyon, nagpili ako nin nagkapirang artikulo na partikularmenteng ipinaliliwanag an klase nin trabaho nindo asin an mga problema na konektado dian. Nasisierto kong boot nindong maaraman kun paano minamansay nin sarong internasyonal na babasahon an mga problemang ini. Naoogma akong iwalat saindo an mga kopyang ini.” Sa parate sinasabi sa sako na inaapresyar an sakong mga paghihingoa.

Makangangalas Asin Nakakokontentong mga Resulta

Kan gamiton ko an pagdolok na ini, an kadaklan makikatood na naghinanyog sa sako; saro sana sa 17 an sinayumahan ako. Nagkaigwa ako nin dakol na eksperyensia na parehong makangangalas asin nakakokontento.

Halimbawa, pakatapos nin apat na beses na pagprobar asin mapasensiang paghalat, nagin mapanggana ako sa pakikipag-olay sa sarong inspektor nin pandistritong eskuelahan. Sia sibot-sibot na tawo. Pero, sia makikatood na marhay asin nakipag-olay sa sako sa dikit na oras. Kan mahale na ako, sia nagsabi: “Talagang pinahahalagahan ko an saindong paghihingoa, asin siertong babasahon kong maingat an saindong literatura.”

Sa saro pang kamugtakan, nagsongko ako sa sarong korte kan distrito, na nakaolay an pangenot na huwes, sarong medyo may edad nang lalaki. Paglaog ko sa saiyang opisina, nagtingag sia gikan sa saiyang mga papeles na medyo naiiritar.

“An oras nin opisina Martes na aga sana, asin pakatapos kaiyan puede na ako para sa ano man na impormasyon,” an daing galang na sabi nia.

“Togotan ako nindong humagad nin dispensasyon sa bakong tamang oras na pagdigdi ko,” an tolos-tolos na simbag ko asin idinugang pa, “Siempre, naoogma akong dumigdi giraray sa ibang panahon. Alagad an totoo an sakong pagdalaw sarong pribadong bagay.”

Ngonyan gustong makaaram an huwes. Sia naghapot, sa makikatood na gayong boses, kun ano an kaipuhan ko. Inotro ko na masongko giraray ako sa Martes.

“Tukawe tabi nindo,” an iininsister nia, na biyo kong ipinagngalas. “Ano an kaipuhan nindo?”

Suminunod an sarong maogmang pag-orolay, asin naghagad sia nin dispensasyon sa pagigin antipatikong marhay sa kapinonan huli ta sia talagang sibot na marhay.

“Aram nindo kun ano an gusto ko sa Mga Saksi ni Jehova?” an hapot kan huwes mataodtaod. “Sinda igwa nin marigon na mga prinsipyo na dian dai sinda minasuway. Pinagmaigotan ni Hitler an bilog niang makakaya, alagad dai pa man giraray nakiguerra an mga Saksi.”

Paglaog ming duwa sa sarong opisina, namidbid kami kan mga sekretarya duman. Dangan an sekretarya de ehekutibo may pagkaindiperenteng nagsabi, “An presidente nungkang nagpapalaog sa siisay man na mga grupo.”

“Alagad palalaogon nia kami,” an kalmado kong simbag, “huli ta kami mga Saksi ni Jehova. Dai kami nagpepetisyon, asin an samong pagdalaw dai malampas sa tolong minuto.” Odok akong namibi sa sakong puso, “O Jehova, togotan tabi nindo na magin marahay an resulta kaini!”

May pagkaindiperenteng nagsimbag an sekretarya, “O sige na, poprobaran ko.” Naghale sia. Pakalihis nin mga duwang minuto, na garo baga daing sagkod para sa sako, luminuwas giraray sia na sinusundan kan presidente mismo. Mayo nin ano man na sinasabi, giniyahan nia kami pasiring sa saiyang opisina, na inagihan an duwa pang kuarto.

Kan ponan ming mag-olay, sia paorog nang paorog na nagin makikatood. Gikan sa boot niang inako an espesyal na mga isyu kan magasin na Awake! kan ialok niamo iyan. Pinasalamatan niamo si Jehova sa oportunidad na ini na makapagpatotoo nin marahay dapit sa katuyohan kan samong gibohon.

Sa pagsalingoy sa dakol na marahayon na eksperyensia, mas lubos kong naapresyar an sinabi ni apostol Pedro: “Sa katotoohan ako nakaiisi na an Dios daing ipinaoorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.” (Gibo 10:​34, 35) An kabotan nin Dios iyo na an mga tawo sa gabos na pinaghalean, lenguahe, o kamugtakan sa sosyedad matawan nin oportunidad na makaaram kan saiyang katuyohan para sa katawohan asin para sa daga.​—Isinurat.