Pumili nin mga Artikulo Tanganing Pukawon an Espesipikong Interes kan mga Tawo
1 Siring sa mga parapana na maingat na iinaasentar an saindang mga pana, dakol na parahayag asin payunir sa kongregasyon an nagkakamit nin ekselenteng kapangganahan na ginagamit an piniling mga luwas kan An Torrengbantayan asin Awake! tanganing pukawon an espesipikong interes kan mga tawo sa saindang teritoryo. Saindang inaaram kun siisay an pinakaposibleng gustong magbasa kan nagkapirang luwas kan mga magasin. Paano daw ninda ginigibo ini?
2 Enot, entero nindang binabasa an kada luwas. Dangan, hinahapot ninda an saindang sadiri, Anong klase nin tawo an maaakit sa kada artikulo? Dangan hinihingoang dalawon an mga indibiduwal na posibleng interesado sa pagbasa kan luwas na iyan kan mga magasin. Kun inaantisipar na posibleng dakol an maako kan sarong partikular na luwas sa saindang teritoryo, nagpepedido sinda nin dagdag pang suplay.
3 Iginagalang na Marhay an Satong mga Magasin: An saro sa mga suskritor niato na nagtatrabaho sa internasyonal na magasin na may pinakadakol na parabasa sa Nigeria nagsabi dapit sa Awake!: “Enhora-buena sa pinakamarahay na magasin sa kinaban para sa pankagabsan na publiko.” An sarong apisyonadong marhay na parabasa kan satong mga magasin nagkomento: “Abaa kamakangangalas na mga mutya nin daing kaagid sa halagang kadonongan! Nakanonompong ako nin ano man na tema na interesante para sa sako na ipinaliliwanag sa mga pahina kan saro sa [mga babasahon] na ini.”
4 Kadakol kan tema na ipinaliliwanag kan mga magasin, kaiba an Biblia, mga pangyayari sa kinaban, pinaghahaditan sa pamilya, problema sa sosyedad, kasaysayan, siensia, buhay nin hayop asin tinanom, sa paglista nin pira sana. Sierto nanggad na an saro orog na may tendensiang basahon an manongod sa sarong bagay kun iyan may koneksion sa saiyang mga pangangaipo, sirkumstansia, o propesyon. Huling nakikipag-olay kita sa laen-laen na indibiduwal, na an kada saro igwa nin sadiri nindang partikular na mga gusto asin problema, epektibong marhay an pagpili nin espesipikong mga artikulo na makapupukaw sa mga tawo na nanonompongan niato.
5 Mangnoha an nangyari kan ialok nin duwang Saksi sa sarong kolumnista sa peryodiko an Setyembre 8, 1996 na luwas kan Awake! Sia nagsurat: “Bago ako magkaoportunidad na magsabing bako akong interesado, idinugang kan saro sa sainda: ‘Igwa nin artikulo manongod sa Amerikanong mga Indian. Aram niamo na dakol na kamong isinurat dapit sa temang iyan.’” Kinua nia an magasin asin, durante kan pamahaw, binasa an materyal manongod sa mga Indian, na sa huri inaadmitir na “iyan ekselente” asin “biyong sadiosan.”
6 Ano an Nakaiinteres sa mga Tawo sa Saindong Teritoryo? Ano an naheling nindo sa mga magasin sa dai pa sana nahahaloy na mga bulan na puedeng makapukaw sa mga paratinda asin propesyonal sa saindong teritoryo o sa saindong kataed, katrabaho, asin kaklase? Ano an magigin partikularmenteng nakaiinteres sa mga abogado, paratokdo, parakonseho sa pamilya asin eskuelahan, parahatol sa mga hoben, paratao nin serbisyo sosyal, asin parabolong? An paggirumdom sa mga tawo na hinuhulitan nindo mantang inaanalisar nindo an lambang luwas matao sa saindo nin ekselenteng mga paagi na ilakop an tataramon nin katotoohan.
7 Kun makanompong kamo nin saro na nagpapaheling nin espesyal na interes sa sarong artikulo sa Torrengbantayan o Awake! asin na mag-ako kan magasin, puede nindong sabihon: “Kun may artikulo sa masunod na luwas na iniisip kong magigin interesante man para sa saindo, maoogma akong darahan kamo nin sarong kopya.” Puede nindong idagdag an tawong iyan sa saindong ruta sa magasin, na parateng binabalikan na dara an pinakabagong mga magasin. Kapareho iyan kan ginigibo na niato kun hinahagad ta na makadalaw liwat kita sa mga indibiduwal na tibaad espesyalmenteng interesado sa nagkapirang artikulo na minaluwas sa satong mga magasin.
8 Magkaigwa nin Espirituwal na Katuyohan: Kan nakaaging pirang taon an sarong lalaking may pinag-aaabot na karera nagkua nin magasin na Awake! manongod sa sarong tema na nakainteres sa saiya. Minsan siring, an relihiosong lalaking ini binasa man an kaibang luwas na An Torrengbantayan, na may artikulo na nagpahiro sa saiya na siyasaton an saiyang haloy nang paniniwala sa Trinidad. Pakalihis nin anom na bulan sia nabautismohan! Huli kaini, dai mag-alangan na kaolayon dapit sa Makakasuratan na tema an mga parabasa kan satong mga magasin. Puede nindong iintrodusir an brosyur na Ano an Kahagadan sa Sato nin Dios? asin mag-alok nin pira sanang minuto na pag-olayan an sarong leksion sa kada pagdalaw liwat nindo na dara an bagong mga magasin.
9 Maingat na aramon kun siisay sa saindong mga dinadalaw liwat asin kontak sa negosyo an posibleng marhay na aapresyaron an pagkaigwa kan pinakabagong mga luwas kan An Torrengbantayan asin Awake! Dangan odok na maghingoang dumanan sinda. Kaolayon nindo an pinakadakol na mapupuede na dara an mahalagang marhay na mga babasahon na ini. Asin dai noarin man paglingawan na mantang pinagmamaigotan nindong tabangan an dakol pa na basahon an satong mga magasin, ‘iinaapon nindo an saindong tinapay sa ibabaw kan katubigan.’ Pag-abot nin panahon, puede kamong magin mapanggana sa pakanompong nin magigin mga kapwa disipulo.—Ecl. 11:1, 6.