Magpaheling nin Personal na Interes—Paagi sa Paghuhulit na Daing Pagpaorog
1 Sa sarong bisyon, si apostol Juan nakaheling nin sarong anghel na naglalayog sa tahaw kan langit na ipinapahayag an daing katapusan na maogmang bareta sa mga tawo nin “lambang nasyon asin tribo asin tataramon patin banwaan.” (Kap. 14:6) Sinusunod daw niato an halimbawa kan anghel paagi sa paghuhulit na daing pagpaorog? Dai niato naririsa, tibaad igwa kita nin mga punto de vista na may kinakampihan o salang paghusgar. An satong aktitud sa mga tawo na satong nanunuparan puedeng makaapektar sa paagi kan satong pag-atubang sa sainda kan maogmang bareta. Kun siring, kaipuhan niatong ipaheling an tunay na mamomoton na pagmakolog kun naghuhulit sa mga tawo na laen an pinaghalean.
2 Estudyaran an Saindong Teritoryo: Igwa daw nin mga imigrante o dulag na nakaistar sa saindong teritoryo? Tibaad madali niato sindang malipasan. Gumibo nin inisyatiba na hanapon sinda, asin hingoahon na orog pang makamidbid sinda. Ano daw an saindang mga pangangaipo asin interes, an saindang mga gusto asin dai gusto, an saindang mga kahaditan asin salang paghusgar? Hingoahon na ibagay dian an saindong pag-atubang kan mensahe kan Kahadean. (1 Cor. 9:19-23) Arog ni apostol Pablo, maninigo kitang makamate nin obligasyon na ipaabot an maogmang bareta sa gabos na yaon sa satong teritoryo, kaiba na an mga gikan sa ibang nasyon, laen an kultura, iba an lenguahe, asin mayaman na marhay.—Roma 1:14, nota sa ibaba.
3 Pero, paano kamo makakapagpatotoo sa saro na iba an lenguahe? Gamiton na marhay an pulyetong Good News for People of All Nations. Puede man kamong magdara nin pirang pulyeto o brosyur sa mga lenguahe na komun na ginagamit sa saindong teritoryo. (Helingon An Satong Ministeryo sa Kahadean na Hulyo 2003, p. 4, par. 2-3.) Dugang pa, an nagkapirang parahayag maigot na naghingoa na makanood nin pataratara asin simpleng pag-atubang sa ibang mga lenguahe. Parateng napapahanga an mga tawo kun nadadangog ninda an saro na hinihingoang makipag-olay sa sainda sa saindang sadiring lenguahe, dawa sa limitadong marhay na paagi, asin ini tibaad makaakit sa sainda sa maogmang bareta.
4 Arogon si Jehova: Paagi sa paghihingoa na maabot an mga tawo na laen-laen an pinaghalean, inaarog niato an satong daing ipinapaorog na Dios, si Jehova, “na an kabotan iyo na an gabos na klase nin tawo makaligtas asin makaabot sa tamang kaaraman sa katotoohan.”—1 Tim. 2:3, 4.